ᐃᒡᓗᓕᕆᓂᖅ

ᐃᓱᒪᒋᓪᓗᒍ ᐃᓄᐃᑦ ᑐᓐᖓᒋᖃᑦᑎᐊᕐᓯᒪᓂᖏᓐᓄᑦ ᒪᑭᒪᐅᑎᐅᖏᓐᓇᕈᓐᓇᕐᑐᓄᑦ, ᓄᓇᒋᔭᐅᖏᓐᓇᓕᕋᔭᕐᑐᓂ ᓄᓇᖃᐃᓐᓇᖃᑦᑕᕐᓯᒪᖏᒻᒪᑕ.  ᓯᕗᓂᐊᓂ ᖃᓪᓗᓈᖅᑕᐅᖅᑲᐅᓛᕋᑎᒃ, ᐊᕐᕌᒎᑉ ᐃᓚᖓᓂ ᓄᓇᖃᖃᑦᑕᕐᓯᒪᕗᑦ ᐊᕐᕌᒎᑉ ᐃᓚᖏᓐᓂ ᓂᕐᔪᑏᑦ ᓅᑉᐸᓪᓕᐊᓂᕆᔭᖏᓐᓄᑦ ᒪᓕᒃᐸᓪᓕᐊᓪᓗᑎᒃ ᑐᓐᖓᒋᔭᖏᓐᓄᑦ ᐆᒪᐃᓐᓇᕆᐊᖃᕈᑎᒋᔭᖏᓐᓄᑦ. ᐃᓄᐃᑦ ᓄᓇᖃᕐᓯᒪᕗᑦ ᐋᖅᑭᒃᑕᐅᓯᒪᔪᑎᒍᑦ ᓄᓇᓕᐅᔪᓂ ᒪᕐᕈᐃᑦ ᑭᖑᕚᕇᖑᖃᑎᒌᒃᑐᑎᒍᑦ (ᑕᐃᒪᓐᖓᓂᑦ 1950-ᖏᓐᓂ-1960-ᖏᓐᓂ), ᐃᒡᓗᖃᑦᑎᐊᓐᖏᓗᐊᓂᕐᓗ ᐊᒃᓱᕈᓐᓇᖅᑐᕐᓯᐅᕈᑕᐅᓯᒪᓪᓗᓂ ᑕᐃᒪᓐᖓᓂᑦ. ᐃᓚᓕᐅᑎᓗᒍ ᐱᔾᔪᑎᐅᓯᒪᔪᑦ ᐅᖓᓯᒃᑐᕐᒥᐅᑦ ᓄᓇᓕᐅᔪᓂ, ᐊᑭᑐᓗᐊᕐᓂᖏᓐᓄᑦ ᐱᖁᑎᑦ ᐊᐅᓪᓚᕐᑎᑕᐅᔭᕆᐊᖃᖅᐸᒃᑐᓄᓪᓗ, ᐱᑕᖃᓐᖏᓗᐊᕐᓂᖓᓄᓪᓗ ᐃᑲᔪᕈᑎᒃᓴᓄᑦ ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᖅᑲᓇᐃᔭᖅᑎᑭᒃᓴᓗᐊᖅᐸᖕᓂᖏᑦ ᐊᒻᒪᓗ ᑕᑯᒐᓂᖅᑑᕗᖅ ᐃᒡᓗᓕᕆᓂᖅ ᖃᓄᖅ ᐊᒃᓱᕈᓐᓇᖅᑐᕐᓯᐅᕈᑕᐅᓂᖓᓂᒃ ᑕᒪᕐᒥᐸᓗᒃ ᐃᓄᐃᑦ ᐃᓚᒌᓄᑦ. ᖃᐅᔨᓴᖅᑕᐅᕋᑖᓂᑰᓯᒪᔪᖅ ᐃᓄᐃᑦ ᐊᕐᓇᐃᑦ ᐊᖏᕐᕋᖃᖏᑦᑐᓄᑦ ᐃᓱᒪᓕᐅᕆᔾᔪᑎᖃᕐᓯᒪᕗᖅ, ᐊᖏᕐᕋᖃᖏᓐᓂᖅ ᐊᑦᒃᑕᕐᓇᖅᑐᓪᓚᕆᐅᓂᖓᓄᑦ ᐃᓄᐃᑦ ᐊᕐᓇᓄᑦ: “ᐅᓗᕆᐊᓇᕐᓂᖓ ᐊᖏᕐᕋᖃᖏᓐᓂᖅ ᓴᖅᑭᔮᕐᐳᖅ ᐊᔾᔨᒌᓐᖏᕈᓗᐃᔭᕐᑐᑦ ᐊᕐᓇᓄᑦ, ᐃᖅᑲᓇᐃᔮᖃᖏᓐᓂᕐᒥᑦ, ᐃᖅᑲᓇᐃᔭᖃᖅᑐᑦ ᐱᔪᓐᓇᕐᐸᖏᑦᑐᑦ ᑮᓇᐅᔭᑎᒍᑦ ᐃᑲᔪᖅᓱᖅᑕᐅᔪᑎᒍᑦ ᐃᒡᓗᒧᑦ ᐅᕝᕙᓘᓐᓃᑦ ᑮᓇᐅᔾᔭᒃᓴᓗᐊᖅᐸᖏᑦᑐᑦ ᐊᑭᓖᑦᑎᐊᕈᓐᓇᖁᓪᓗᒋᑦ ᐃᒡᓗᓄᑦ ᐊᑐᖅᑐᐊᕐᓂᕐᒧᑦ, ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᔭᖅᑎᖏᑦ ᐊᑦᑕᕐᓇᖅᑐᒦᑦᑐᑦ ᐱᓯᒪᔭᐅᔪᑎᒍᑦ ᐃᖅᑲᓇᐃᔭᖅᑎᑦ ᐃᒡᓗᖁᑎᖏᓐᓂ” (50)[1] ᓱᓕ, ᓄᑖᖑᓛᖑᓯᒪᔪᖅ ᓈᓴᖅᑕᐅᓯᒪᔪᓂ ᓇᓗᓇᐃᖅᓯᒻᒪᑦ, ᐸᐅᒃᑑᑎᒃᑯᑦ ᐃᓚᒋᔭᐅᔪᖁᑎᖏᑦ ᓵᑦᑎᕙᒻᒪᑕ ᐃᓄᒋᐊᓗᐊᖅᑐᓄᑦ ᑲᓇᑕᓕᒫᒥ, ᑐᕌᑲᐅᑎᒋᔪᒃᑯᑦ ᐊᒃᑐᐃᓂᕐᓗᒃᓯᒪᓪᓗᓂ ᐋᓐᓂᐊᖅᑐᓕᕆᓂᒃᑯᑦ ᐱᔾᔪᑎᒋᓪᓗᒋᑦ, ᓲᕐᓗ ᐃᓅᖃᑎᒌᑦᑎᐊᕈᓐᓇᕐᓂᕐᒧᑦ, ᐃᓚᒌᓂ ᐋᓐᓂᕐᓯᕆᐅᕙᒃᑐᓄᑦ, ᐊᒻᒪᓗ ᓱᕈᓰᑦ ᐃᓕᓐᓂᐊᕈᓐᓇᕐᓂᕆᒐᔭᖅᑕᕋᓗᐊᖏᓐᓄᑦ[2]. ᐃᓚᓕᐅᑎᓗᒍ, ᐃᓱᒪᒋᓪᓗᒋᑦ ᐊᕐᕌᒍᒋᔭᐅᔪᑎᒍᑦ ᐃᓄᐃᑦ ᓄᓇᓕᖏᓐᓂ – ᐱᓗᐊᕐᑐᒥᒃ 50 ᐳᓴᓐᑎᐅᔪᑦ ᐃᓄᐃᑦ 25 ᐊᕐᕌᒍᓖᑦ ᑐᖔᓃᑉᐳᑦ – ᐊᑐᐃᓐᓇᖃᕆᐊᖃᕐᓂᕐᒧᑦ ᐊᑦᑕᕐᓇᖏᑦᑐᒃᑯᑦ ᓈᒻᒪᒃᑐᑎᒍᓪᓗ ᐃᒡᓗᖃᕆᐊᖃᕐᓂᖓᓂᑦ ᓯᕗᓪᓕᐅᔾᔭᐅᔭᕆᐊᖃᒻᒪᕆᒃᐳᖅ. ᑕᒪᓐᓇ ᖃᓄᐃᓕᖓᓂᕆᔭᖓ ᐃᒡᓗᓕᕆᓂᕐᒧᑦ ᐊᑦᑕᕐᓇᖅᑐᒃᑰᕈᑎᐅᓕᕐᓯᒪᓪᓗᓂ ᐃᓄᐃᑦ ᓄᓇᓕᖏᓐᓂ, ᐃᓚᒋᔭᐅᓪᓗᓂ ᐊᖏᕐᕋᓐᖏᑐᐃᓐᓇᕆᐊᖃᓕᖅᐸᖕᓂᖏᑦ ᐃᒃᑮᓇᖅᑐᒻᒪᕆᐅᕙᒃᑐᒥ ᓯᓚᖓᓂ ᑲᓇᑕᓕᒫᒥ.

ᐸᐅᒃᑑᑎᒃᑯᑦ ᐃᓚᒋᔭᖏᑦ ᑐᑭᓯᐅᒪᕗᑦ ᐃᓯᕈᓐᓇᕐᓂᖅ ᐊᑦᑕᕐᓇᖏᑦᑐᖅ ᐃᒡᓗᒧᑦ ᖃᓄᐃᖏᑦᑎᐊᕐᓂᕆᔭᐅᔪᓐᓇᕐᐳᖅ ᖁᕕᐊᓱᒍᑕᐅᔪᓐᓇᕐᓗᓂᓗ ᐃᓄᐃᑦ ᐊᕐᓇᓄᑦ ᐃᓚᒋᔭᖏᓐᓄᓪᓗ. ᐸᐅᒃᑑᑎᒃᑯᑦ ᐊᐅᓚᑦᑎᔨᐅᓪᓗᑎᒃ ᑲᑎᒪᔨᖏᑦ ᑕᐃᒪᐃᒻᒪᑦ ᐃᓯᕈᓐᓇᕐᓂᖅ ᐊᑦᑕᕐᓇᖏᑦᑐᖅ ᓈᒻᒪᒃᑐᒧᓪᓗ ᐃᒡᓗᒧᑦ ᖁᑦᑎᓐᓂᖅᐹᖑᓪᓗᓂ ᓯᕗᓪᓕᐅᔾᔭᐅᒋᐊᓕᒃ ᑐᑭᒧᐊᒃᑎᑕᐅᔪᓐᓇᖁᓪᓗᒋᑦ ᐸᐅᒃᑑᑎᒃᑯᑦ ᐱᓕᕆᐊᖓᑦ ᑕᖅᑭᐅᓂᐊᕐᑐᓂ ᐊᕐᕌᒎᓂᐊᖅᑐᓂᓗ. ᒫᓐᓇᐅᔪᒥ ᐸᐅᒃᑑᑎᒃᑯᑦ ᑮᓇᐅᔭᖃᖅᑎᑕᐅᓯᒪᔪᑎᒍᑦ ᐱᓕᕆᐊᒃᓴᖃᓐᖏᓚᑦ ᐱᔾᔪᑎᖃᕐᑐᖅ ᐃᒡᓗᓕᕆᓂᕐᒧᑦ. ᑕᐃᒪᐃᒃᑲᓗᐊᖅᑎᓪᓗᒍ, ᐸᐅᒃᑐᑎᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᐅᓯᒪᕗᑦ ᐃᒡᓗᓕᕆᓂᕐᒧᑦ ᑲᑎᒪᓂᐅᔪᓄᑦ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᐊᓂᖅᑐᓕᕆᓂᕐᒧᑦ ᑲᑐᔾᔨᖃᑎᒌᒃᑯᖏᓐᓂ (NAHO), ᑐᓐᖓᓱᒃᑎᑦᑎᔨᐅᓯᒪᓪᓗᑎᒃ ᐅᖃᖅᑎᐅᓂᕐᒧᑦ ᑲᑎᒪᔾᔪᑕᐅᓯᒪᔪᓂ ᐃᓕᓐᓂᐊᒃᑲᓐᓂᕈᓐᓇᖁᓪᓗᒋᑦ ᐃᒡᓗᓕᕆᓂᕐᒧᑦ ᐱᒋᐊᖅᑎᑕᐅᕐᑯᕙᓪᓕᐊᖏᓐᓇᕐᑐᓂᒃ. ᑭᖑᓪᓕᖅᐹᖅ ᑲᑎᒪᔾᔪᑕᐅᓯᒪᔪᖅ ᒫᔨ 1, 2012.

 

 


[1] Qulliit Nunavut Status of Women Council. (2007).

[2] Knotsch, Cathleen & Dianne Kinnon. (2011) If Not Now…When? Addressing the Ongoing Inuit Housing Crisis in Canada. Key Findings. National Aboriginal Health Organization.