ᐃᓅᓯᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ

ᐸᐅᒃᑑᑎᒃᑯᑦ ᐃᓅᓯᕐᒧᑦ ᒪᑭᒪᐅᑎᓄᓪᓗ ᐱᓕᕆᕝᕕᐊ ᐱᓕᕆᐊᒃᓴᖃᕐᐳᖅ ᐊᔾᔨᒌᓐᖏᕈᓗᐃᔭᕐᑐᓂᒃ ᐃᓄᓕᕆᓂᕐᒧᑦ, ᒪᑭᒪᐅᑎᓕᕆᓂᕐᒧᑦ ᐊᒻᒪᓗ ᒐᕙᒪᓕᕆᓂᕐᒧᑦ ᐱᔾᔪᑎᒃᓴᐅᔪᓂᒃ. ᖁᕝᕙᕆᐊᖅᑎᑦᑎᓇᓱᐊᕐᑎᓪᓗᒋᑦ ᐃᓄᐃᑦ ᐱᕙᓪᓕᐊᔪᓕᕆᓂᖓᓄᑦ ᒫᓐᓇᐅᔪᒃᑯᑦ ᖁᑦᑎᓐᓂᖅᐹᖑᓪᓗᓂ ᓯᕗᓪᓕᐅᔾᔭᐅᓯᒪᕗᖅ, ᐱᔾᔪᑎᖃᓐᖏᓚᖅ ᐃᒃᐱᒋᔭᖃᕐᓂᑐᐊᖑᖏᑦᑐᒥᒃ. ᐸᕐᓇᐅᑎᓕᐊᖑᓯᒪᔪᑎᒍᑦ ᑐᑭᒧᐊᒃᑎᑕᐅᓚᐅᖅᑎᓪᓗᒋᑦ ᐊᐅᓚᑦᑎᔨᐅᓪᓗᑎᒃ ᑲᑎᒪᔨᓂᑦ, ᐊᓯᖏᑦ ᐱᓕᕆᐊᖑᓯᒪᔪᑦ ᐃᓚᖃᕐᐳᑦ ᒐᕙᒪᓕᕆᓂᕐᒥ ᐊᔾᔨᒌᒃᑎᑕᐅᓂᕐᒧᑦ ᐊᒻᒪᓗ ᐃᑲᔪᖅᓱᐃᓂᕐᒥᒃ ᐊᕐᓇᐃᑦ ᓯᕗᓕᖅᑎᐅᓂᖏᓐᓄᑦ, ᐃᓕᓐᓂᐊᕐᓂᓕᕆᓂᕐᒧᑦ, ᓴᐳᒻᒥᑦᑎᓂᕐᒧᑦ ᖁᕝᕙᕆᐊᖅᑎᑦᑎᓇᓱᐊᓂᕐᒧᓪᓗ ᖃᐅᔨᒪᓂᑐᖃᕆᔭᐅᔪᓂᒃ, ᓄᓇᒥ ᐲᔭᐃᕝᕕᐅᔪᓂᒃ, ᐊᕙᑎᓕᕆᓂᕐᒧᑦ ᐱᔾᔪᑎᒃᓴᐅᔪᓂᒃ ᐃᓚᒋᔭᐅᓪᓗᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᒻᒪᓗ ᑲᓇᑕᒥ ᓄᓇᕐᔪᐊᒥᓗ ᖃᓄᐃᓕᐅᖃᑕᐅᑎᑦᑎᓂᖅ.

ᓯᕗᓂᐊᓂ ᐱᒋᐊᖅᑎᔾᔪᑕᐅᓯᒪᔪᑦ ᐃᓚᖃᕐᐳᑦ ᖁᕝᕙᕆᐊᖅᑎᑦᑎᓂᕐᒥᒃ ᐱᐅᓯᕚᓪᓕᕐᑎᑦᑎᓂᕐᒥᓪᓗ ᓱᕈᓯᓄᑦ ᑲᒪᒋᔭᐅᓂᖏᓐᓄᑦ ᐃᑲᔪᖅᓱᐃᔾᔪᑎᓂᒃ ᐱᓕᕆᐊᓂᓗ ᐃᓄᐃᑦ ᓄᓇᓕᖏᓐᓂ ᐊᒻᒪᓗ ᓯᕗᓪᓕᖅᐹᒥᒃ ᐃᓕᓐᓂᐊᕐᑎᑦᑎᓂᒃᑯᑦ ᐅᖃᐅᔾᔪᐃᖃᑎᒌᖕᓂᕐᒥᒃ ᓴᐳᒻᒥᑦᑎᓂᕐᒧᑦ ᐊᒪᐅᑎᒥᒃ ᓇᓗᓇᐃᖅᓯᔾᔪᑎᐅᓪᓗᓂ ᐃᓄᐃᑦ ᐱᖅᑯᑎᓯᖓᑦ ᐊᒻᒪᓗ ᓴᓇᔭᐅᓯᒪᓂᖓᓂᒃ ᐃᔾᔪᐊᖅᑕᐅᑦᑕᐃᓕᒪᑎᑦᑎᓂᕐᒧᑦ ᐱᖅᑯᑎᒋᔭᐅᔪᓂᒃ. ᐃᓅᓯᕐᒧᑦ ᒪᑭᒪᐅᑎᓄᓪᓗ ᐱᓕᕝᕕᐊ ᓴᖅᑭᑦᑎᓯᒪᒋᕗᖅ ᖃᕋᓴᐅᔭᒃᑯᑦ ᐱᕙᓪᓕᐊᔪᓂᒃ ᑕᐃᔭᐃᓪᓗᓂ ᐊᕐᓇᐃᑦ ᑐᒥᖏᑦ – ᐊᕐᓇᐃᑦ ᑐᒥᖏᑦ ᐊᒥᖅᑳᕈᑎᐅᓇᓱᐊᕐᓯᒪᕗᖅ ᑐᑭᓯᒋᐊᕈᑎᒃᓴᒥᒃ ᐅᔾᔨᕈᓱᓕᖅᑎᑦᑎᓂᕐᒥᓪᓗ ᒪᓕᒐᑎᒍᑦ ᐱᔪᓐᓇᐅᑎᓂᒃ ᒐᕙᒪᓕᕆᓂᕐᒥᓗ ᐱᕙᓪᓕᐊᓂᐅᔪᓂᒃ. 1994-ᒥᓂᑦ, ᐸᐅᒃᑐᑎᒃᑯᑦ ᐱᒋᐊᖅᑎᑦᑎᔨᐅᓯᒪᕗᑦ (ᑲᓇᑕᒥ) ᐃᓚᒋᔭᐅᖃᑕᐅᒻᒪᕆᒃᓯᒪᓪᓗᑎᒃ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐊᒥᐊᕆᒃᑲᓐᓂ ᑐᓴᐅᒪᖃᑦᑕᐅᑎᒌᒍᑎᓕᕆᓂᖓᓄᑦ (ENLACE). ENLACE-ᑯᑦ ᐱᑕᖃᕐᑎᑦᑎᕙᒃᐳᑦ ᑲᑎᒪᑎᑦᑎᓂᕐᒧᑦ ᑐᑭᓯᒋᐊᕈᑎᒃᓴᓂᒃ ᑕᐅᖅᓰᖃᑦᑕᐅᑎᑦᑎᓂᕐᒧᑦ ᓄᓇᖃᖅᑳᕐᓯᒪᔪᑦ ᐊᕐᓇᓄᑦ 20 ᓄᓇᓕᕐᔪᐊᑦ ᐅᖓᑎᐊᓃᑦᑐᓂᒃ ᐊᒥᐊᕆᒃᑲᓂ, ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᐃᓂᒋᔭᖏᓐᓂᒃ ᐃᑲᔪᕐᓂᕐᓴᐅᑎᑦᑎᓂᕐᒧᓪᓗ ᓯᕗᒧᐊᒃᑎᑕᐅᓯᒪᔪᑦ ᐊᔾᔨᒌᖏᑦᑐᑦ ᓄᓇᕐᔪᐊᒥ ᑲᑎᒪᓂᐅᔪᓂᒃ ᐃᓚᒋᔭᐅᓪᓗᓂ ᓯᓚᕐᔪᐊᓕᒫᒥ ᓄᓇᐅᔪᓂ ᐃᓕᖓᐃᓐᓇᓕᕐᑐᒃᑯᑦ ᑲᑎᒪᑎᑦᑎᓂᖅ ᓄᓇᖃᖅᑳᖅᓯᒪᔪᓄᑦ ᐱᔾᔪᑎᒃᓴᐅᔪᓂᒃ.

ᐸᐅᒃᑑᑎᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᖃᕐᓯᒪᕗᑦ ᐊᓯᖏᓐᓂᒃ ᐃᓗᐊᓃᑦᑐᒥ ᐱᓕᕆᕝᕕᖏᓐᓂᒃ, ᓯᓚᑖᓂᓐᖔᕐᓯᒪᔪᑦ ᑲᑐᔾᔨᖃᑎᒋᔭᐅᔪᓂᒃ, ᑮᓇᐅᔭᖃᖅᑎᑦᑎᔨᐅᔪᓂᒃ ᐊᒻᒪᓗ ᓄᓇᓕᖕᓂ ᐱᖃᑕᐅᓯᒪᔪᓂᒃ ᐱᓕᕆᐊᒃᓴᖏᑦ ᐱᓕᕆᐊᖑᔪᓐᓇᖁᓪᓗᒋᑦ. ᑕᒪᓐᓇ ᑐᑭᖃᓕᖃᑦᑕᕐᐳᖅ ᕿᓂᓂᕐᒥᒃ ᐃᓕᔭᐅᒐᔭᕐᑐᓂᒃ ᑕᐅᑐᒐᕆᔭᐅᔪᓂᓪᓗ ᓄᓇᖃᖅᑎᐅᔪᓂᑦ, ᐊᓯᖏᓐᓂᑦ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᑭᒡᒐᖅᑐᐃᔨᓂᒃ, ᐃᓄᑐᖃᓂᑦ, ᒪᒃᑯᒃᑐᓂᑦ ᐊᒻᒪᓗ ᐱᔾᔪᑎᐅᔪᒧᑦ ᖃᐅᔨᒪᔨᑕᐅᓂᒃ ᐱᓕᕆᐊᓄᑦ ᖃᐅᔨᒪᔨᒋᔭᐅᓪᓗᑎᒃ ᑲᑎᒪᔨᕋᓛᓃᓕᕐᓯᒪᔪᑦ. ᐸᐅᒃᑑᑎᒃᑯᑦ ᐱᓕᕆᐊᖓᑦ ᑲᔪᓯᔪᓐᓇᕋᔭᓚᐅᖏᑦᑐᖅ ᐃᑲᔪᖅᓱᖅᑕᐅᖏᑉᐸᑕ ᐊᔾᔨᒋᔭᖏᓐᓂᒃ ᐃᓱᒪᒋᔭᖃᕐᓯᒪᔪᑦ ᑲᑐᔾᔨᖃᑎᒋᔭᐅᔪᓂᒃ ᐊᖏᖅᓯᓂᖃᑦᑎᐊᕐᓯᒪᔪᑦ ᐊᓯᔾᔩᑎᑦᑎᓂᕐᒧᑦ ᐃᓄᐃᑦ ᐊᓇᐃᑦ ᐃᓚᒋᔭᖏᑕᓗ ᐊᒻᒪᓗ ᓄᓇᓖᑦ ᐃᓅᓯᖏᓐᓂᒃ.