ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᑦ

ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᑦ ᓄᓇᖃᖅᑳᖅᓯᒪᔪᑦ ᓱᕈᓯᓄᑦ ᐃᓚᒋᔭᐅᓕᖅᓯᒪᖕᒪᑦ ᑲᓇᑕᒥ ᖃᓄᐃᓕᐅᒋᐊᓐᖓᕐᑕᐅᓯᒪᔪᓂ ᑕᐃᒪᓐᖓᓂᑦ 19-ᒋᓕᖅᑕᖓᓂ ᕼᐊᓇᓚᐃᑦ ᐊᕐᕌᒍᓂ, ᒐᕙᒪᒃᑯᑦ ᐊᑐᐊᒐᖓᑦ ᐊᓯᔾᔨᖅᑕᐅᑎᓪᓗᒍ ᐅᓪᓗᒥᐅᓕᖅᑐᒥ ᖃᐅᔨᒪᔭᕗᑦ ᓄᓇᖃᖅᑳᖅᓯᒪᔪᑦ ᓱᕈᓰᑦ ᐊᑐᓕᖅᑎᑕᐅᓇᓱᐊᖅᑎᓪᓗᒋᑦ.

ᐃᓕᓐᓂᐊᕆᐊᖅᐸᓚᐅᖅᓯᒪᓂᕐᒧᑦ ᖃᐅᔨᔪᑎᒋᔭᐅᓯᒪᔪᑦ ᓄᓇᖃᖅᑳᖅᓯᒪᔪᓂᑦ, ᐃᓚᒋᔭᐅᓪᓗᑎᒃ ᐃᓚᖏᑦ ᐃᓄᐃᑦ, ᓄᓇᑦᓯᐊᕐᒥ ᐱᓪᓚᕿᐅᓕᓚᐅᖅᓯᒪᖕᒪᑦ 1860 ᓄᓐᖑᐸᓗᖏᓐᓂ. ᓯᕗᓪᓕᖅᐹᖑᓪᓗᓂ ᒐᕙᒪᒃᑯᑦ- ᒪᓕᒐᒃᓴᖃᓕᖅᑎᑎᓯᒪᕗᑦ ᐃᓕᓐᓂᐊᕐᕕᒻᒥᒃ ᐃᓄᖕᓄᑦ ᒪᑐᐃᖅᑕᐅᓯᒪᓪᓗᓂ 1951-ᖑᑎᓪᓗᒍ ᐃᒡᓗᓕᒑᕐᔪᒻᒥ. 1950 ᑭᖑᓂᖓᒍᑦ, ᐃᓄᐃᑦ ᓄᓇᖃᖅᑎᒌᓕᖅᑎᑕᐅᑎᓪᓗᒋᑦ, ᑕᒪᕐᒥᓕᒫᐸᓗᒃ ᐃᓄᐃᑦ ᓱᕈᓰᑦ ᐃᓕᓐᓂᐊᖁᔭᓕᓚᐅᖅᓯᒪᕗᑦ ᐃᓕᓐᓂᐊᕐᑎᓪᓘᓐᓃᑦ ᓇᔪᒐᖏᓐᓄᐊᕐᓗᑎᒃ ᐃᓕᓴᕆᔭᐅᓯᒪᔪᑎᒍᑦ ᐃᓕᓐᓂᐊᕈᓐᓇᕐᓂᐊᕐᒪᑕ. ᑖᒃᑯᐊ ᐃᓕᓐᓂᐊᕐᕖᑦ ᐅᖓᓯᓗᐊᖅᑑᕙᓚᐅᕐᑐᑦ ᐃᓄᐃᑦ ᓄᓇᓕᒋᓕᖅᓯᒪᔭᖏᓐᓂ ᓱᕈᓯᓄᑦ ᒪᒃᑯᒃᑐᓄᓪᓗ ᐊᕕᒃᑎᔾᔪᑎᐅᓕᖅᓯᒪᓪᓗᓂ ᐊᖓᔪᖅᑳᒥᖕᓂᑦ, ᐃᓚᓐᓇᒌᖕᓂᒃᑯᑦ ᐃᓕᖅᑯᓯᑐᖃᒃᑯᓪᓗ ᐃᓅᓯᕆᔭᖏᓐᓂᒃ. ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᑦ ᐃᓄᖕᓄᑦ ᒪᑐᐃᖅᐸᓪᓕᐊᖏᓐᓇᓚᐅᖅᓯᒪᕗᑦ 1960-ᖏᓐᓂ ᐊᒻᒪᓗ 1963-ᖑᑎᓪᓗᒍ, 3,997 ᐃᓄᐃᑦ ᓱᕈᓰᑦ ᑖᒃᑯᓇᓂ ᐃᓕᓐᓂᐊᕐᕕᐅᔪᓂ ᐃᓕᓐᓂᐊᓕᓚᐅᖅᓯᒪᕗᑦ. ᔫᓂ 1964-ᖑᓕᖅᑎᓪᓗᒍ, 75 ᐳᓴᓐᑎᐅᔪᑦ ᐃᓄᐃᑦ ᓱᕈᓰᑦ ᒪᒃᑯᒃᑐᓪᓗ ᐊᕐᕌᒍᖃᕐᑐᑦ ᐊᕐᕕᓂᖕᓕᑦ ᑎᑭᓪᓗᒍ 15 ᐊᕐᕌᒍᓕᖕᓄᑦ ᐃᓕᓐᓂᐊᓕᓚᐅᖅᓯᒪᕗᑦ.[1]

ᐃᓕᓐᓂᐊᕆᐊᖅᑎᑕᐅᓂᖅ ᓇᒧᓐᖔᕈᓗᐃᔭᖅᓯᒪᓪᓗᓂ ᐊᖏᔪᒥᓪᓗ ᐊᒃᑐᐃᔾᔪᑎᐅᓯᒪᕗᖅ. ᐅᒃᐱᕆᔭᐅᓯᒪᕗᖅ ᒥᑭᓐᓂᖅᐹᖓᒍᑦ 3,000 ᐃᓄᐃᑦ ᐃᓕᓐᓂᐊᕆᐊᖅᑎᑕᐅᓯᒪᔪᕕᓃᑦ ᐅᓪᓗᒥᒧᑦ ᓱᓕ ᐆᒪᔪᑦ, ᒪᓕᓪᓗᒍ ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᖅ, ᐊᕝᕙᓪᓗᐊᐸᓗᖏᑦ (44 ᐳᓴᓐᑎᖅ) 44-ᒥᑦ 54-ᓄᑦ ᐊᕐᕌᒍᖃᕐᑐᑦ ᐃᓚᒋᔭᖓᓂᒃ ᐃᓕᓐᓂᐊᕆᐊᕈᔾᔨᓂᑰᕗᑦ ᑖᒃᑯᓄᖓ ᐃᓕᓐᓂᐊᕐᕕᖕᓄᑦ[1].. ᐃᓄᐃᑦ ᐅᖃᐅᓯᖓᑦ, ᐱᖅᑯᓯᖓᑦ ᐅᒃᐱᕆᔭᑐᖃᖏᓪᓗ ᐊᓯᐅᕙᓪᓕᐊᓕᓚᐅᖅᓯᒪᔪᑦ ᐊᑐᓕᖅᑎᑕᐅᓇᓱᐊᕐᑎᓪᓗᒋᑦ. ᐊᒃᑐᐃᔾᔪᑎᐅᕈᓗᐃᔭᖅᓯᒪᓂᑰᓪᓗᓂ ᐃᓚᒌᓄᑦ ᓄᓇᓕᐅᔪᒧᓪᓗ. ᐃᓄᖕᓄᑦ ᐃᓕᓐᓂᐊᕐᑎᑦᑎᔾᔪᓯᑐᖃᕆᔭᐅᔪᖅ ᐃᓕᓐᓂᐊᕐᑎᑦᑎᔾᔪᑕᐅᓯᒪᕗᖅ ᓄᑕᕋᓄᑦ ᐃᓐᓇᕐᓂᑦ ᐱᓕᒻᒪᒃᓴᐃᔾᔪᑎᐅᓪᓗᓂᓗ ᐱᖅᑯᓯᑐᖃᒃᑯᑦ ᐱᒻᒪᕆᐅᒋᔭᐅᔪᓄᑦ. ᐃᓄᐃᑦ ᐊᔪᕈᓐᓃᕐᓴᕈᓯᑐᖃᖏᑦ ᐃᓚᖃᕐᐳᑦ ᐊᖑᓇᓱᖕᓂᒃᒥ, ᓂᕿᓕᕆᓂᕐᒥᒃ ᕿᓯᓕᕆᓂᒥᓪᓗ, ᒥᖅᓱᕐᓂᕐᒥᒃ, ᐃᒡᓗᕕᒃᑲᓕᐅᓂᕐᒥᒃ ᓇᒧᓐᖓᕋᕐᓂᕐᓗ ᓄᓇᒃᑯᑦ ᐃᒪᒃᑯᓪᓗ[2] ᐅᓂᒃᑳᖅᑐᐊᕈᓯᑐᖃᕐᓂᒃ ᐅᓂᒃᑳᑐᐊᕐᓂᖅ, ᐱᓯᑐᖃᐃᑦ, ᒧᒥᕐᓂᖅ ᓴᓇᐅᕈᓗᐃᔭᕐᓂᖅ ᐊᒻᒪᓗ ᐃᖅᑲᒋᔭᖃᑦᑎᐊᕐᓂᖅ ᐊᕙᑎᒧᑦ ᐃᓚᒋᔭᐅᒻᒪᕆᒃᓯᒪᕗᑦ ᐃᓄᐃᑦ ᖃᐅᔨᒪᓂᑐᖃᕆᔭᖏᓐᓂ ᐃᓅᓯᕆᔭᐅᔪᕐᓗ ᐊᓯᐅᕙᓪᓕᐊᑎᑕᐅᓯᒪᕗᖅ ᐃᓕᓐᓂᐊᕆᐊᖅᑎᑕᐅᓯᒪᓂᑰᓂᖏᓐᓄᑦ. ᐅᓪᓗᒥᐅᓕᕐᑐᖅ, ᒪᒥᓴᕐᓂᒃᑯᑦ ᐊᖏᕈᑎᖃᓕᕐᓂᒃᑯᓪᓗ, ᐃᓄᐃ ᐃᓚᒌᑦ ᓄᓇᓖᓪᓗ ᐱᓕᕆᖃᑎᒌᒃᐸᓪᓕᐊᕗᑦ ᐅᑎᖅᑎᕙᓪᓕᐊᓂᒃᑯᑦ ᐱᒻᒪᕆᐅᒋᔭᐅᓯᒪᔪᓂᒃ ᐃᓕᖅᑯᓯᑐᖃᕆᔭᐅᓯᒪᔪᓂᓪᓗ.

2005-ᒥ, ᐸᐅᒃᑑᑎᒃᑯᑦ ᓴᖅᑭᑎᑦᑎᓯᒪᕗᑦ ᓯᕗᒧᐊᐸᓪᓕᐊᓂᖅ: Journey Forward. ᑲᓇᑕᓕᒫᒥ ᐃᓄᖕᓄᑦ ᐃᓕᓐᓂᐊᕆᐊᖅᓯᒪᓂᑰᔪᓄᑦ ᒪᒥᓴᕈᑎᖏᓐᓄᑦ ᐸᕐᓇᐅᑎᓕᐊᖑᓯᒪᔪᖅ. ᑕᕝᕙᓐᖓᑦ ᑐᓐᖓᕕᖓᓂᑦ ᐱᓂᕐᓗᒃᑕᐃᓕᒪᑎᑦᑎᔨᓕᕆᔨᒃᑯᑦ ᓯᕗᒧᐊᒍᑎᖃᖅᓯᒪᕗᑦ ᐱᔾᔪᑎᐅᔪᓂᒃ ᐃᓚᒋᔭᐅᓪᓗᑎᒃ ᒪᒥᓴᕐᓂᕐᒧᑦ ᐃᔾᔪᐊᒐᒃᓴᓕᐊᖑᓯᒪᔪᑦ ᐃᓕᓐᓂᐊᕆᐊᕐᓯᒪᓂᑰᔪᓄᑦ ᐃᓚᒋᔭᖏᓐᓄᓪᓗ, ᕿᓪᓕᕐᑐᓕᐊᕆᓯᒪᔪᖅ ᑕᕐᕆᔭᒐᒃᓴᔭᖅ ᐱᓕᕆᐊᖃᑎᒌᒍᑕᐅᓯᒪᓪᓗᓂ ᑲᓇᑕᒥ ᐃᓄᐃᑦ ᒪᒃᑯᒃᑐᑦ ᑲᑎᒪᔨᕐᔪᐊᖏᓐᓄᑦ.

ᐸᐅᒃᑑᑎᒃᑯᑦ ᐱᓕᕆᐊᖃᐃᓐᓇᕐᓯᒪᕗᑦ ᑖᒃᑯᓄᖓ ᑖᒃᑯᓂᖓᓗ ᐃᓄᐃᑦ ᐊᕐᓇᓂᒃ, ᐃᓚᒋᔭᖏᓐᓂ ᓄᓇᓕᐅᔪᓂᓪᓗ ᒪᒥᓴᖅᑕᐅᕙᓪᓕᐊᖁᓪᓗᒋᑦ ᐃᓕᓐᓂᐊᕆᐊᖅᐸᓚᐅᕐᓯᒪᔪᑦ. ᐅᓪᓗᒥᐅᔪᒥ ᐱᓕᕆᐊᑦ ᐃᓚᓕᐅᔾᔨᓯᒪᕗᖅ ᐅᔾᔨᕈᓱᓕᖅᑎᑦᑎᕙᓪᓕᐊᓂᕐᒥᒃ ᑲᓇᑕᒥᐅᑕᐅᔪᑦ ᒪᒃᑯᒃᑐᓂᒃ ᑲᑐᔾᔨᖃᑎᒌᖕᓂᒃᑯᑦ ᑎᐅᕆ ᕚᒃᔅ ᑲᓇᑕᒥᐅᑕᐅᔪᓄᑦ ᒪᒃᑯᒃᑐᓄᑦ ᐱᓕᕆᕝᕕᐊᓂᒃ ᐊᒻᒪᓗ ᑐᓂᐅᖅᑲᐃᓂᕐᒥᒃ ᑐᓴᒐᒃᓴᓕᐊᕆᔭᐅᓯᒪᔪᑦ ᐱᔾᔪᑎᖃᓪᓗᐊᑕᕐᑐᑦ ᒪᑐᕝᕕᒃᓴᓕᐊᕆᔭᐅᓯᒪᔪᑦ ᐃᓕᓐᓂᐊᕆᐊᕐᐸᓚᐅᖅᓯᒪᔪᑦ ᐊᖏᖃᑎᒌᒍᑎᖏᓐᓄᑦ ᐊᖏᖃᑎᒌᒍᑎᒧᑦ. ᐸᐅᒃᑑᑎᒃᑯᑦ ᓂᐅᕆᐅᒃᑭᕗᑦ ᐱᓕᕆᖃᑎᖃᕐᓂᐊᕐᓗᑎᒃ ᐃᓅᖃᑎᒌᑦᓯᐊᒃᑲᓐᓂᕈᓐᓇᕐᓂᕐᒧᑦ ᓇᓛᒎᖅᑐᓂᒃ ᑭᒡᓯᓂᐊᖅᑎᓂᒃ ᐊᔾᔨᐅᖏᑦᑐᑦ ᓂᐱᒋᔭᐅᔪᑦ ᐃᓱᒪᒋᔭᐅᔪᓪᓗ ᐃᓄᐃᑦ ᐊᕐᓇᓂᑦ ᐊᑐᓕᖅᑎᑕᐅᕙᓪᓕᐊᒐᓗᐊᕐᒪᖔᑕ ᐱᓕᕆᐊᖏᑦᑎᒍᑦ.


[1] ᓄᓇᖅᑳᖅᓯᒪᔪᑦ ᐃᓄᖕᓄᑦ ᖃᐅᔨᓴᕈᑕᐅᔪᑦ, 2001 – ᖃᐅᔨᔭᐅᓐᖓᕐᓯᒪᔪᑦ: ᖃᓄᐃᖏᑦᑎᐊᕆᐊᖃᕐᓂᖏᑦ ᐊᓪᓚᐃᑦ ᓄᓇᖁᑎᒋᓐᖏᑕᖏᓐᓃᑦᑐᑦ ᓄᓇᖃᖅᑳᖅᓯᒪᔪᓄᑦ. ᓈᓴᖅᑐᓕᕆᔨᒃᑯᑦ ᑲᓇᑕᒥ, ᐊᑐᕚ, 2003.

[2] ᑐᑭᓯᒋᐊᕈᑎᒃᓴᖅ ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᓄᑦ ᐃᓄᖕᓄᑦ ᓯᕗᓪᓕᐅᔾᔭᐅᓂᖓ ᓇᐃᒡᓕᒋᐊᖅᓯᒪᔪᖅ ᐅᓂᒃᑳᓕᐊᖑᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᓕᓐᓂᐊᕆᐊᕐᑎᑦᑎᓯᒪᓂᖓᑦ ᐃᓄᖕᓂᒃ ᐆᒪᓐᖓᑦ ᑕᐃᕕᑎ ᑭᖕ, ᓴᓇᔭᐅᓯᒪᔪᖅ ᐅᑯᓄᖓ ᓄᓇᖃᖅᑳᖅᓯᒪᔪᓄᑦ ᒪᒥᓴᖅᑐᓕᕆᔨᒃᑯᓐᓄᑦ, ᐊᑐᕚ, 2006


[1] ᑐᑭᓯᒋᐊᕈᑎᒃᓴᖅ ᐃᓕᓐᓂᐊᕆᐊᕐᑎᑕᐅᕙᓚᐅᖅᓯᒪᓂᖏᑦ ᐃᓄᐃᑦ ᓯᕗᓪᓕᐅᔾᔭᐅᓯᒪᓪᓗᓂ ᓇᐃᒡᓕᒋᐊᖅᓯᒪᔪᖅ ᐅᓂᒃᑳᓕᐊᖅ ᑲᓇᑕᐅᑉ ᒐᕙᒪᒃᑯᖏᑕ ᐃᓕᓐᓂᐊᕆᐊᕐᑎᑦᑎᓯᒪᓂᖓᑦ ᐃᓄᖕᓂᒃ ᐆᒪᓐᖓᑦ ᑕᐃᕕᑎ ᑭᖕ, ᓴᓇᔭᐅᓯᒪᔪᖅ ᐅᑯᓄᖓ ᓄᓇᖃᖅᑳᖅᓯᒪᔪᓄᑦ ᒪᒥᓴᖅᑐᓕᕆᔨᒃᑯᓐᓄᑦ, ᐊᑐᕚ, 2006