ᐃᓚᒌᓂ ᐋᓐᓂᕐᓯᕆᕙᖕᓂᖅ

ᐸᐅᒃᑑᑎᒃᑯᑦ ᑕᐅᑐᒐᖓᑦ ᐃᓄᐃᑦ ᖃᓄᐃᖏᑦᑎᐊᕐᓗᑎᒃ ᐃᖅᑲᒋᔭᖃᑦᑎᐊᕐᑐᑦ ᓯᕗᓂᕆᔭᐅᓯᒪᔪᒥᒃ ᐊᒻᒪᓗ ᑐᓐᖓᓱᒃᑎᑦᑎᐊᕐᓗᑎᒃ ᓯᕗᓂᒃᓴᒥᒃ ᐃᓅᓪᓗᑎᒃ, ᐃᒡᓗᒥᐅᖃᑎᖃᕐᑐᑦ ᐃᑲᔪᖅᓱᐃᑦᑎᐊᕐᐸᒃᑐᑦ ᐃᓚᒌᓂ ᑲᒪᒋᔭᖃᑦᑎᐊᕐᑐᓂᓗ ᓄᓇᖃᖅᑎᒌᓂ. ᑕᐅᑐᒐᕆᔭᐅᔪᒥ, ᐋᓐᓂᕐᓯᕆᕙᖕᓂᖅ ᐱᓂᕐᓗᒃᓯᕙᖕᓂᕐᓗ ᐱᕙᓪᓕᐊᒐᔪᓗᐊᖏᑦᑐᑦ ᓈᒻᒪᒃᑐᑎᒍᑦ ᐱᓕᕆᐊᕆᔭᐅᑲᐅᑎᒋᕙᒃᑐᑦ ᐃᓄᐃᑦ ᐱᐅᓯᖓᒍᑦ. ᐱᓂᕐᓗᒃᓯᕙᒃᑐᑦ ᐸᓯᔭᐅᕙᒃᐳᑦ ᖃᓄᐃᓕᐅᕐᓂᖏᓐᓄᑦ, ᐊᒻᒪ ᑕᒪᕐᒥᒃ ᐱᕋᔭᒃᑕᐅᔪᖅ ᐱᓂᕐᓗᒃᓯᔪᕐᓗ ᐃᑲᔪᖅᑕᐅᓪᓗᑎᒃ ᒪᒥᓴᖅᐸᓪᓕᐊᓂᖏᑦᑎᒍᑦ.

ᐅᓪᓗᒥᐅᓕᕐᑐᒥ ᐃᓄᐃᑦ ᐊᕐᓇᐃᑦ ᐋᓐᓂᕐᓯᖅᑕᐅᕙᖕᓂᖏᑦ 14 ᐊᒥᓱᐊᖅᑎᓂᕐᓴᐅᔪᑎᒍᑦ ᖁᕝᕙᓯᖕᓂᕐᓴᐅᕗᖅ ᑲᓇᑕᒥᐅᓕᒫᓂᓕ ᐊᑯᓪᓕᖅᐹᖅᓱᕐᓂᕆᔭᖓᒍᑦ ᐊᒻᒪᓗ ᓇᓚᐅᑦᑖᕐᑕᐅᓯᒪᔪᖅ 29 ᐳᓴᓐᑎ ᐊᐃᑉᐸᕇᓂ ᐱᓂᕐᓗᖕᓂᐅᔪᑦ ᐅᓂᒃᑳᓕᐊᖑᕙᒃᐳᑦ.[1] ᓱᓕ, ᒫᓐᓇᓕᓴᐅᔪᑎᒍᑦ ᐋᓐᓂᕐᓯᕆᓂᐅᕙᒃᑐᑦ ᐅᑭᐅᖅᑕᖅᑐᒥ ᑎᓴᒪᐅᔪᖅᑐᑎᒍᑦ ᖁᕝᕙᓯᖕᓂᕐᓴᐅᓪᓗᓂ ᑲᓇᑕᓕᒫᒥᓕ ᐊᑯᓪᓕᖅᐹᖅᓱᕐᓂᕆᔭᖓᒍᑦ, ᖁᓄᔪᕐᓂᐊᖅᑕᐅᕙᒃᑐᓪᓗ ᖁᓕᓄᑦ ᖁᕝᕙᓯᖕᓂᕐᓴᐅᓪᓗᓂ ᑲᓇᑕᓕᒫᒥᓕ ᐊᑯᓪᓕᖅᓱᖅᐹᕐᓂᕆᔭᖓᒍᑦ.[2] 2006-ᒥ, ᐸᐅᒃᑑᑎᒃᑯᑦ ᓴᖅᑭᑦᑎᓯᒪᕗᑦ ᑲᓇᑕᓕᒫᒥ ᐱᓂᕐᓗᒃᑕᐃᓕᒪᑎᑦᑎᓂᕐᒧᑦ ᐃᓄᐃᑦ ᓄᓇᖏᓐᓂ. ᑖᓐᓇ ᑎᑎᕋᖅᑕᐅᓯᒪᔪᖅ ᒪᑐᐃᖓᔪᑎᒍᑦ ᐱᔾᔪᑎᖃᑐᐃᓐᓇᕐᓯᒪᓐᖏᓚᖅ ᐱᓂᕐᓗᖕᓂᐅᔪᒥᒃ ᑭᓯᐊᓂᑦᑕᐅᖅ ᐸᕐᓇᐅᑎᓕᐊᖑᓯᒪᔪᑎᒍᑦ ᓯᕗᓪᓕᐅᔾᔨᓯᒪᕗᑦ ᐃᑲᔪᕈᑎᐅᓯᒪᓪᓗᓂ ᐸᐅᒃᑑᑎᒃᑯᑦ ᐱᓕᕆᐊᕆᓯᒪᔭᖏᓐᓄᑦ ᑕᓪᓕᒪᑦ ᐊᕐᕌᒎᔪᓂ:

  1. ᐱᓂᕐᓗᖕᓂᐅᕙᒃᑐᖅ ᐃᓄᐃᑦ ᓄᓇᓕᖏᓐᓂ ᓯᕗᓪᓕᐅᔾᔭᐅᓂᒃᑯᑦ ᐱᔾᔪᑎᒃᓴᐅᑎᑕᐅᓪᓗᓂ;
  2. ᐅᔾᔨᕈᓱᓕᖅᑎᑦᑎᓂᖅ ᐊᑦᑎᒃᓯᒋᐊᖅᑎᑦᑎᓂᕐᓗ ᐱᓂᕐᓗᖕᓂᐅᕙᒃᑐᒧᑦ ᐊᖏᖅᓯᒪᑦᑕᐃᓕᓂᕐᒥᒃ;
  3. ᑮᓇᐅᔭᓕᐅᕈᑎᖃᕐᓂᖅ ᐱᓕᒻᒪᒃᓴᐃᓂᕐᒧᑦ ᐃᓗᓕᖃᕐᓂᕆᒐᔭᖅᑕᖓᓂᓪᓗ ᐱᕙᓪᓕᐊᑎᑦᑎᓂᖅ;
  4. ᐱᓯᒪᑦᑏᓐᓇᕐᓂᖅ ᐃᖅᑲᓇᐃᔭᖅᑎᓂᒃ ᓄᓇᓕᖕᓂᓗ ᐱᔨᑦᑎᕋᕈᑎᓄᑦ;
  5. ᑐᓂᓯᓂᖅ ᐱᔨᑦᑎᕋᕈᑎᓂᒃ ᒪᒥᓴᕈᑕᐅᔪᓐᓇᑦᑎᐊᕐᑐᑦ ᐃᓄᖕᓄᑦ; ᐊᒻᒪᓗ
  6. ᐊᖏᓪᓕᒋᐊᖅᑕᐅᓗᑎᒃ ᐱᓕᕆᐊᒃᓴᐃᑦ ᐱᕈᖅᑎᑦᑎᔪᓐᓇᕐᑐᑦ ᐃᓄᐃᑦ ᓴᓐᖏᓂᕆᔭᖏᓐᓂᒃ ᐱᑦᑕᐃᓕᒪᑎᑦᑎᓂᕐᒧᓪᓗ ᐱᓂᕐᓗᖕᓂᐅᔪᒥᒃ.

ᐃᓕᖅᑯᓯᑐᖃᒃᑯᑦ ᐱᒻᒪᕆᐅᒋᔭᐅᔪᑦ ᐊᑐᐊᒐᕆᔭᐅᔪᓪᓗ ᒪᒥᓴᓂᕐᒧᑦ ᐊᒻᒪᓗ ᐱᓕᕆᖃᑎᒌᖕᓂᕐᒧᑦ, ᐸᐅᒃᑑᑎᒃᑯᑦ ᑐᓐᖓᓂᖃᕐᑎᑕᖏᑦ ᐱᓕᕆᐊᖏᓐᓄᑦ, ᐃᓚᓕᐅᔾᔨᓯᒪᕗᑦ:

  1. ᐱᓕᕆᖃᑎᒌᖕᓂᖅ – ᐱᓕᕆᖃᑎᒌᖕᓂᖅ ᖃᓄᐃᖏᑦᑎᐊᕐᑐᐃᓐᓇᖁᓪᓗᒋᑦ;
  2. ᐊᕙᑎᒥᒃ ᑲᒪᑦᑎᐊᕐᓂᖅ – ᐅᕙᑎᒧᑦ ᖃᓄᐃᖏᑦᑎᐊᕐᑎᑦᑎᓇᓱᖕᓂᖅ;
  3. ᐱᓕᔨᑦᓯᐊᕐᓂᖅ – ᐱᔨᑦᑎᕋᕐᓂᖅ ᐊᓯᖏᓐᓄᑦ ᓯᕗᓕᖅᑎᐅᓂᕐᓗ;
  4. ᐱᓕᒻᒪᒃᓴᕐᓂᖅ – ᓴᓐᖏᓂᖃᓕᕐᑎᑦᑎᓂᖅ;
  5. ᖃᓄᖅᑑᕈᓐᓇᕐᓂᖅ – ᐃᑲᔪᕈᑎᒃᓴᑦᑎᐊᕙᖃᕐᑎᑦᑎᓂᖅ ᓱᖏᐅᑎᑦᑎᔪᓐᓇᓂᕐᓗ; ᐊᒻᒪᓗ
  6. ᐋᔩᖃᑎᒌᖕᓂᖅ – ᐱᓕᕆᖃᑎᒌᖕᓂᖅ ᐊᖏᖃᑎᒌᓐᓂᕐᓗ.