ᐊᓯᐅᔨᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᐊᕐᓇᐃᑦ ᓂᕕᐊᖅᓵᓪᓗ

ᐸᐅᒃᑑᑎᒃᑯᑦ ᐱᔾᔪᑎᖃᕐᓂᒃᑯᑦ ᐅᖃᐅᓯᖃᐃᓐᓇᕐᓯᒪᕗᑦ ᐊᒻᒪᓗ ᖁᕝᕙᓯᖕᓂᖅᐹᖓᒍᑦ ᓯᕗᓪᓕᐅᔾᔨᓯᒪᓪᓗᑎᒃ ᐱᓕᕆᐊᖃᓂᕐᒧᑦ ᐋᓐᓂᕐᓯᕆᔭᐅᕙᖕᓂᖏᓐᓄᑦ ᐱᓂᕐᓗᒃᑕᐅᕙᖕᓂᖏᓐᓄᓪᓗ ᐃᓄᐃᑦ ᐊᕐᓇᐃᑦ ᓱᕈᓰᓪᓗ. ᐊᒥᓱᒐᓚᐃᑦ ᐊᕐᕌᒎᓯᒪᓕᕐᑐᓄᑦ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᑲᑐᔾᔨᖃᑎᒌᒃᑯᖏᑦ ᑲᓇᑕᒥ, ᑲᑐᔾᔨᖃᑎᒋᔭᐅᓪᓗᑎᒃ  ᓄᓇᕐᔪᐊᒥ ᑭᒃᑯᓕᒫᓄᑦ ᓴᐳᒻᒥᕙᒃᑐᑦ ᐱᔪᓐᓇᐅᑎᖏᓐᓄᑦ ᐱᔾᔪᑎᒋᓪᓗᒋᑦ – Amnesty International, ᐅᔾᔨᕈᓱᓕᖅᑎᑦᑎᓯᒪᕗᑦ ᑲᓇᑕᒥ ᓄᓇᕐᔪᐊᒥᓗ ᐅᔾᔨᕈᓱᒃᑎᑦᑎᓇᓱᐊᓂᕐᒧᑦ ᐱᔾᔪᑎᒃᓴᐅᔪᖅ ᐃᓄᐊᖅᑕᐅᓯᒪᓂᖏᓐᓄᑦ ᐊᓯᐅᔨᔭᐅᓯᒪᔪᓪᓗ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᑲᓇᑕᒥ, ᐊᑐᐊᒐᓕᐅᕈᑕᐅᓯᒪᓪᓗᓂ ᐱᐅᓂᕐᓴᑎᒍᑦ ᐱᔾᔪᑎᒃᓴᖅ ᐱᓕᕆᐊᖑᖁᓪᓗᒍ ᐊᒻᒪᓗ ᐃᑲᔪᖅᓱᐃᓂᕐᓴᐅᓕᖅᓯᒪᕗᑦ ᐃᓚᒌᓄᑦ. ᑕᐃᒪᐃᒃᑲᓗᐊᖅᑎᓪᓗᒍ, ᐸᐅᒃᑑᑎᒃᑯᑦ ᐊᐅᓚᑦᑎᔨᐅᓪᓗᑎᒃ ᑲᑎᒪᔨᖏᑦ ᐃᓚᒋᔭᐅᔪᖁᑎᖏᓪᓗ ᓇᓗᓇᐃᖅᓯᓯᒪᕗᑦ ᐱᔭᐅᔭᕆᐊᖃᕐᓂᖓ ᐃᓄᖕᓅᖓᔪᓄᑦ ᐱᓕᕆᐊᒥᒃ ᑕᒪᓐᓇ ᐱᔾᔪᑎᒋᓪᓗᒍ. ᓂᕆᐅᒋᔭᐅᕗᖅ ᐸᐅᒃᑑᑎᒃᑯᑦ ᑐᑭᓯᒋᐊᕈᑎᒃᓴᖃᖅᑎᑦᑎᓇᓱᐊᕐᓂᐊᕐᓗᑎᒃ ᐱᔾᔪᑎᐅᓯᒪᔪᓂᒃ ᐊᓯᐅᔨᔭᐅᓯᒪᓂᖏᓐᓄᑦ ᐃᓄᐃᑦ ᐊᕐᓇᐃᑦ ᑲᓇᑕᓕᒫᒥ, ᐊᒻᒪᓗ ᖃᐅᔨᓴᕐᓗᑎᒃ ᐃᑲᔪᖅᓱᐃᔾᔪᑎᐅᒐᔭᕐᑐᓂᒃ ᐃᑲᔪᕈᑎᒃᓴᐅᒐᔭᕐᑐᓂᓪᓗ ᑕᒪᒃᑯᐊ ᐊᑐᖅᑕᐅᑐᐃᓐᓇᕆᐊᖃᕐᑐᑦ ᐃᓚᒋᔭᐅᔪᓂ ᐱᔾᔪᒋᓪᓗᒍ ᐅᖓᓯᒃᑑᓂᖏᓐᓄᑦ ᓄᓇᓕᐅᔪᑦ. ᐸᐅᒃᑑᑎᒃᑯᑦ ᐅᖃᖃᑎᖃᕐᓂᐊᕐᒥᔪᑦ ᓄᓇᕐᔪᐊᒥ ᓄᓇᐅᔪᓂ ᑲᑐᔾᔨᖃᑎᒌᒃᑯᖏᑕ ᑎᒃᑯᐊᖅᓯᒪᔭᖓᑦ ᖃᐅᔨᓴᕐᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐱᔾᔪᑎᒃᓴᐅᔪᓂᒃ ᖃᐅᔨᓴᕈᑕᐅᓕᒑᔪᒧᑦ ᐱᔾᔪᑎᒃᓴᐅᔪᒥᒃ ᑲᓇᑕᒥ.