ᐋᓐᓂᐊᖃᕐᓇᖏᑦᑐᓕᕆᓂᖅ

ᐃᓄᐃᑦ ᑲᓇᑕᒥ ᓄᓇᖃᕐᐳᑦ 53 ᐅᖓᓯᒃᑐᕐᒥᐅᓂ ᓄᓇᓕᐅᔪᓂ ᓯᐊᒻᒪᒃᑎᕐᓯᒪᓪᓗᑎᒃ ᑎᓴᒪᓂ ᓄᓇᓐᖑᐊᑎᒍᑦ ᐊᕕᒃᑐᖅᓯᒪᓂᐅᔪᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑕᒪᕐᒥᐸᓗᒃ ᐃᓄᐃᑦ ᓄᓇᓕᖏᑦ ᐱᔨᑦᑎᕋᖅᑕᐅᕗᑦ ᐋᓐᓂᐊᕕᑐᐊᖃᕐᓗᑎᒃ ᐊᒻᒪᓗ ᐋᓐᓂᐊᕕᐊᓗᓕᐊᕆᐊᖃᖅᐸᒃᑐᑦ ᐊᒻᒪᓗ/ᐅᕝᕙᓗ ᓈᒻᒪᒃᓯᓕᖅᓯᒪᔪᑎᒍᑦ ᐱᔨᑦᑎᕋᕈᑎᓄᐊᕆᐊᖃᖅᐸᖕᓂᖏᑦ ᑕᐅᓴᖏᓐ ᒪᐃᓕᑎᒍᑦ ᖃᖓᑕᔭᕆᐊᖃᖅᐸᒃᑐᑦ ᐊᖏᕐᕋᒥᖕᓂᑦ ᐊᖏᓂᕐᓴᑦ ᐱᓕᕆᕝᕕᖕᓄᐊᕆᐊᖃᕐᓗᑎᒃ ᓲᕐᓗ ᐃᖃᓗᐃᑦ, ᐅᐃᓂᐱᐊᒡ, ᐃᐊᑦᒪᓐᑕᓐ, ᐊᑐᕚ, ᒪᓐᑐᕆᐊ ᐅᕝᕙᓘᓐᓃᑦ ᓴᐃᓐᑦ ᔮᓐᔅ.

ᐃᓄᐃᑦ ᓱᓕ ᐊᑦᑎᓐᓂᕐᓴᒦᑉᐳᑦ ᓱᓕ ᐃᓅᑯᑖᔅᓱᐃᔭᕈᓐᓇᕐᓂᖏᑦ ᑖᒃᑯᓇᓐᖓᓪᓕ ᐊᓯᖏᓐᓂᑦ ᑲᓇᑕᒥᐅᑕᐅᔪᓂᑦ, ᐃᓗᓕᖃᖏᓐᓂᕆᔭᖓᒍᑦ 10 ᐊᕐᕌᒍᓄᑦ ᐃᓄᐃᑦ ᐊᖑᑎᓄᑦ ᓄᓇᕕᒻᒥ ᐊᔾᔨᒌᓐᓂᕐᓯᐅᕐᓗᒍ ᓂᒋᐊᓃᓐᓂᕐᓴᐅᔪᓄᑦ ᓄᓇᖃᖅᑳᕐᓯᒪÔᖏᑦᑐᑦ ᑲᓇᑕᒥᐅᑕᐅᔪᓂᑦ. ᐊᒥᓲᓂᖏᑦ ᓄᑕᕋᓛᑦ ᐃᓅᔪᓐᓃᖅᐸᖕᓂᖏᑦ ᓱᓕ ᖁᕝᕙᓯᒐᓚᖕᓂᕐᓴᐅᓪᓗᓂ, ᐃᒻᒥᓃᕈᑕᐅᕙᒃᑐᓪᓗ ᐃᓚᖏᓐᓂ ᐊᕕᒃᑐᖅᓯᒪᓂᐅᔪᓂ ᖁᕝᕙᓯᖕᓂᕐᓴᐅᓪᓗᓂ ᖁᓕᐅᓐᖏᓱᖓᒃᑐᒃᑯᑦ ᑲᓇᑕᓕᒫᒥᓕ ᐊᑯᓪᓕᖅᓱᕐᐹᕐᓂᕆᔭᖓᒍᑦ. ᐊᓯᖏᑦ ᐋᓐᓂᐊᖅᑐᓕᕆᓂᕐᒧᑦ ᐊᔾᔨᒌᖏᓐᓂᕆᔭᖏᑦ ᐃᓚᖃᕐᐳᑦ ᖁᕝᕙᓯᖕᓂᕐᓴᒃᑯᑦ ᐋᓐᓂᐊᑯᑖᖃᑦᑕᕐᓂᖏᑦ ᐊᒻᒪᓗ ᐊᐃᑦᑐᕐᑕᐅᔪᓐᓇᕐᑐᑎᒍᑦ ᖃᓂᒻᒪᓯᖃᖃᑦᑕᕐᓂᖏᑦ, ᐆᒻᒪᑎᕐᓗᖕᓂᖅ, ᑎᒥᒥᒍᑦ ᓱᑲᖃᓗᐊᓕᓲᓄᑦ, ᐊᓂᖅᑎᕆᔾᔪᑎᒋᑦᑎᒍᑦ ᖃᓂᒻᒪᒃᑖᕐᓂᖅ. ᐳᕙᒡᓗᒃᑐᑦ ᐃᓄᐃᑦ ᒪᕐᕈᐊᖅᑎᕐᓯᒪᓪᓗᓂ 2006 ᐊᒻᒪᓗ 2010 ᐊᑯᓐᓂᖏᓐᓂ 185 ᐊᒥᓱᐊᖅᑎᓂᕐᓴᐅᓪᓗᓂ ᓄᓇᖃᖅᑳᕐᓯᒪÔᖏᑦᑐᑦ ᑲᓇᑕᒥᐅᑕᐅᔪᓂᓪᓕ. ᐊᒥᓱᑦ ᑕᒪᒃᑯᐊ ᐱᔾᔪᑎᒃᓴᐅᔪᑦ ᑕᐃᒪᐃᓕᖅᐸᒃᐳᑦ ᓈᒻᒪᓐᖏᓗᐊᖃᑦᑕᕐᓂᖏᑦ ᐃᓅᓰᑦ ᒪᑭᒪᐅᑏᓪᓗ ᖃᓄᐃᓕᖓᓂᕆᔭᖏᓐᓄᑦ ᐃᓄᐃᑦ ᓄᓇᓕᖏᓐᓂ ᓇᓗᓇᐃᖅᓯᔾᔪᑎᐅᓯᒪᓪᓗᓂ ᖁᕝᕙᓯᒃᑐᒧᑦ ᐊᔪᓴᖅᐸᒃᑐᑦ, ᐃᓕᓐᓂᐊᕐᓂᖃᑦᑎᐊᓐᖏᓗᐊᕐᓂᕐᒧᑦ, ᑭᒡᓕᖃᖅᑐᓄᑦ ᐃᖅᑲᓇᐃᔮᒃᓴᐅᕙᒃᑐᓄᑦ, ᐊᒻᒪᓗ ᓈᒻᒪᓐᖏᓗᐊᕐᓂᖏᑦ ᐃᓄᒋᐊᓗᐊᖅᐸᒃᑐᓪᓗ ᐃᒡᓗᒥ. ᐃᕐᓂᐊᖑᕙᒃᑐᑦ ᖁᕝᕙᓯᖕᓂᖓ, ᑕᐃᒪᐃᓯᒪᓪᓗᓂ 50 ᐳᓴᓐᑎᐅᑉ ᐅᖓᑎᐊᒍᑦ ᐃᓄᐃᑦ ᐊᒥᓲᓂᕆᔭᖏᑦ ᒫᓐᓇ 25 ᐊᕐᕌᒍᓖᑦ ᑐᖔᓃᑦᑐᑦ ᐊᖏᔪᒧᑦ ᐋᓐᓂᐊᖅᑐᓕᕆᓂᒃᑯᑦ ᐊᑐᐊᒐᑎᒍᑦ ᐱᓕᕆᐊᑎᒍᓪᓗ ᓇᓗᓇᐃᖅᓯᔾᔪᑎᐅᓯᒪᓪᓗᑎᒃ.

ᐱᐅᓯᕚᓪᓕᕐᑎᑦᑎᓂᖅ ᐃᓄᐃᑦ ᐊᕐᓇᐃᑦ ᐃᓚᒋᔭᖏᑕᓗ ᐃᓗᓯᖏᑦ ᓯᕗᓪᓕᐅᔾᔭᐅᓯᒪᕗᑦ ᑕᐃᒪᓐᖓᓂᑦ ᐸᐅᒃᑑᑎᒃᑯᑦ ᐱᓐᖑᕐᑎᑕᐅᓚᐅᕐᓯᒪᑎᓪᓗᒋᑦ 1984-ᒥ. ᐊᑑᑎᒋᓐᖑᐊᕐᓗᒍ, ᐃᓕᖅᑯᓯᑐᖃᒃᑯᑦ ᐃᕐᓂᓱᒃᓰᕙᖕᓂᖅ ᐃᓇᖏᖅᓱᔾᔪᑎᐅᓯᒪᖕᒪᑦ ᐊᑐᓕᖅᑎᑕᐅᖔᕐᓯᒪᓪᓗᓂ ᖃᓪᓗᓈᑎᑐᑦ ᐃᓅᓕᓴᐃᓂᒃᑯᑦ ᐃᔾᔪᐊᒐᒃᓴᖅ 1950-ᖏᓐᓂ ᐊᒻᒪᓗ ’60-ᖏᓐᓂ, ᐊᒻᒪᓗ ᐊᑯᓂᐅᓕᕐᑐᒧᑦ ᑕᒪᓐᓇ ᖃᐅᔨᒪᓂᕆᔭᐅᔪᖅ ᐊᑦᑕᕐᓇᖅᑐᒦᓕᕐᓯᒪᕗᖅ ᐊᓯᐅᑐᐃᓐᓇᕆᐊᖃᓕᖅᑎᑕᐅᓯᒪᓂᖓᓄᑦ. ᒫᓐᓇᐅᔪᒥ ᐊᒥᓱᑦ ᐃᓄᐃᑦ ᐊᕐᓇᐃᑦ ᓱᓕ ᕿᒪᐃᔭᕆᐊᖃᖃᑦᑕᕐᒪᑕ ᐊᖏᕐᕋᒥᖕᓂᒃ ᐃᓚᒋᔭᒥᓐᓂᓪᓗ ᐃᕐᓂᔭᖅᑐᕐᓗᑎᒃ ᐋᓐᓂᐊᕕᐊᓗᖕᓂ ᒫᓐᓇᐅᓕᖅᑐᕐᓕ ᐅᑎᖅᑎᑕᐅᒃᑲᓐᓂᕋᓱᐊᕐᓯᒪᕗᖅ ᐃᑲᔪᖅᓱᕐᑕᐅᓂᕐᓴᐅᓕᖅᐳᓪᓗ ᐃᓄᐃᑦ ᐃᕐᓂᓱᒃᓰᕙᑯᖕᓂᖏᑦ ᐊᒥᓱᒐᓚᐃᑦ ᐊᕕᒃᑐᖅᓯᒪᓂᐅᔪᓂ. ᐅᑭᐅᖅᑕᖅᑐᒥ ᖁᕝᕙᓯᖕᓂᖅᐹᒃᑯᑦ ᐋᓐᓂᕐᓯᕆᓂᖃᖃᑦᑕᕐᐳᖅ ᑲᓇᑕᒥ, ᑐᑭᖃᕐᑐᖅ ᐃᓄᐃᑦ ᐊᕐᓇᐃᑦ ᐋᓂᕐᓯᖅᑕᐅᕙᖕᓂᖏᑦ ᐱᓂᕐᓗᒃᑕᐅᕙᖕᓂᖏᓪᓗ ᐱᒻᒪᕆᐅᔪᑎᒍᑦ ᑎᒥᒃᑯᑦ ᐃᓱᒪᒃᑯᓪᓗ ᐱᔾᔪᑎᒃᓴᐅᓂᖏᓐᓂᒃ. ᓄᓕᐊᕐᓂᒃᑯᑦ ᐊᐃᑦᑐᕐᓗᒃᑕᐃᓕᒪᖃᑦᑕᐅᑎᑦᑎᓂᖅ ᐊᒻᒪᓗ ᐃᓚᒌᓄᑦ ᐸᕐᓇᐅᑎᓕᐅᕐᓂᖅ ᒫᓐᓇᐅᔪᒧᑦ ᐱᔾᔪᑎᒃᓴᕆᔭᐅᓯᒪᕗᑦ ᐊᐅᓚᑦᑎᔨᐅᔪᓄᑦ ᐃᖅᑲᓇᐃᔭᖅᑎᓄᓪᓗ.

ᑭᐅᔾᔪᑎᒋᔭᐅᓯᒪᓂᖓ ᑐᑭᒧᐊᒃᑎᑦᑎᓂᕐᒧᑦ ᐃᓚᒋᔭᐅᔪᖁᑎᖏᓐᓄᑦ ᐊᐅᓚᑦᑎᔨᓂᓪᓗ, ᐸᐅᒃᑑᑎᒃᑯᑦ ᐊᑐᖁᔨᔾᔪᑎᒃᓴᓕᐅᕐᓯᒪᕗᑦ ᑲᔪᓯᓂᖃᑦᑎᐊᕋᔭᕐᑐᑦ ᐋᓐᓂᐊᖅᑖᖅᑕᐃᓕᒪᑎᑦᑎᓂᕐᒧᑦ ᐊᒻᒪᓗ ᖁᕝᕙᕆᐊᖅᑎᑦᑎᓇᓱᐊᕐᓂᕐᒧᑦ ᐱᓕᕆᐊᓂᒃ ᐱᔾᔪᑎᒃᓴᐅᔪᓂᒃ ᐃᓚᒋᔭᐅᓪᓗᓂ ᐊᓈᓇᐅᔪᖅ ᐃᕐᓂᐊᕆᓯᒪᔭᖓᓄᑦ ᐋᓐᓂᐊᖅᑐᓕᕆᓂᖅ ᐊᒻᒪᓗ ᐃᕐᓂᓱᒃᓰᔪᓕᕆᓂᖅ, ᑕᕝᕚᑭᒧᑦ ᓄᖅᑲᕐᓂᖅ, ᐊᓴᐱᒃᓴᖅ/ᐊᓴᐱ, ᓱᓐᓂᕐᓇᖅᑐᓄᑦ ᐊᑐᕐᓂᕐᓗᒃᑕᐅᕙᒃᑐᑦ, ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᔪᑦ, ᓱᕈᓯᓛᓄᑦ ᐃᓕᓐᓂᐊᕐᑎᑦᑎᓂᖅ, ᐋᓐᓂᕐᑕᐃᓕᒪᑎᑦᑎᓂᖅ, ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕐᓂᖅ ᐊᓯᖏᓪᓗ. ᐅᔾᔨᕈᓱᓕᖅᑎᑦᑎᓂᖅ ᐊᒻᒪᓗ ᐃᓗᓕᖃᕐᓂᕆᔪᓐᓇᕐᑕᖓᓂᒃ ᐱᕈᖅᑎᑦᑎᓂᖅ ᐃᓄᖕᓂᒃ ᑐᓂᓯᔪᓐᓇᖁᓪᓗᒋᑦ ᐋᓐᓂᐊᖅᑐᓕᕆᓂᕐᒧᑦ ᐱᓕᕆᐊᓂᒃ ᐱᒻᒪᕆᐅᓪᓗᓂ ᐃᓚᒋᔭᐅᖃᑕᐅᕗᖅ ᐱᓕᕆᐊᖑᑎᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᔨᓂᑦ ᐸᐅᒃᑐᑎᒃᑯᓐᓂ.

ᐸᐅᒃᑐᑎᒃᑯᑦ ᐱᓕᕆᐊᖓᑦ ᐋᓐᓂᐊᖅᑐᓕᕆᓂᕐᒧᑦ ᐊᐅᓚᔾᔭᐃᔾᔪᑎᐅᓇᓱᐊᕐᓯᒪᕗᖅ ᐊᑐᐊᒐᓕᐅᕐᓂᕐᒧᑦ ᐱᓕᕆᐊᓪᓗ ᐱᕙᓪᓕᐊᑎᑕᐅᖁᓪᓗᒋᑦ ᐱᐅᓂᕐᓴᑎᒍᑦ ᐊᑐᓕᕐᑎᑕᐅᖁᓪᓗᒋᑦ ᐃᓄᐃᑦ ᐊᕐᓇᓄᑦ ᐃᓚᒋᔭᖏᓐᓄᓪᓗ ᐱᔭᐅᔭᕆᐊᓖᑦ, ᐊᒻᒪᓗ ᓴᖅᑮᓂᕐᒥᒃ ᑐᑭᓯᓇᕐᑐᒃᑯᑦ ᐅᖃᐅᓯᖃᕐᑐᒥᒃ ᒪᕐᕈᐃᑎᒍᑦ ᐅᖃᐅᓯᖃᖅᑐᒃᑯᑦ ᑐᑭᓯᒋᐊᕈᑎᒃᓴᓂᒃ ᐊᑐᕐᑕᐅᔪᓐᓇᕐᓂᐊᕐᓗᑎᒃ ᐃᓄᖕᓄᑦ, ᐃᖅᑲᓇᐃᔭᖅᑎᓄᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᖃᐅᔨᒪᔨᑕᓂᒃ. ᐊᑐᖃᑦᑕᕐᐳᖅ ᐃᓄᐃᑦ ᐃᓗᓯᖏᓐᓄᑦ ᐱᓕᕆᐊᕋᓱᐊᕐᓂᕐᒥᒃ ᐊᑕᖏᐅᒪᔪᑎᒍᑦ ᑕᐅᑐᒐᕆᔭᐅᓗᓂ ᐱᓕᕆᐊᖑᖁᓪᓗᒋᑦ ᐃᓄᓕᕆᓂᕐᒧᑦ ᓇᓗᓇᐃᖅᓯᔪᑎᐅᕙᒃᑐᑦ ᐋᓐᓂᐊᖅᑐᓕᕆᓂᕐᒥ ᐃᓚᒋᔭᐅᓪᓗᓂ ᐅᖃᐅᓯᓕᕆᓂᖅ, ᐱᖅᑯᓯᓄᑦ ᐊᒻᒪᓗ ᐊᕐᓇᐅᓂᖓᓄᑦ/ᐊᖑᑕᐅᓂᖓᓄᑦ ᑐᓐᖓᓂᖃᕐᑐᑦ ᐃᓱᒪᒃᓴᕐᓯᐅᕈᑕᐅᓗᑎᒃ. ᐸᐅᒃᑑᑎᒃᑯᑦ ᐃᓱᒪᒋᔭᖃᕐᐳᑦ ᐊᔾᔨᐅᖏᑦᑐᓄᑦ ᐱᔭᐅᔭᕆᐊᖃᕐᓂᖏᑦ ᓯᕗᓪᓕᐅᔾᔭᐅᒋᐊᓖᓪᓗ ᐊᕐᓇᐃᑦ, ᐊᖑᑎᑦ, ᐃᓄᑐᖃᐃᑦ ᒪᒃᑯᒃᑐᓪᓗ ᐊᑐᐊᒐᓕᐊᕆᕙᒃᑕᖏᓐᓂ ᐱᓕᕆᐊᒃᓴᕆᕙᒃᑕᖏᓐᓂᓗ.

ᐸᐅᒃᑑᑎᒃᑯᑦ ᐱᓕᕆᖃᑎᖃᖃᑦᑕᕐᐳᑦ ᐊᒥᓱᑦ ᑲᓇᑕᒥ, ᐊᕕᒃᑐᖅᓯᒪᓂᐊᓂ ᓄᓇᓕᖕᓂᓗ ᑲᑐᔾᔨᖃᑎᒋᔭᐅᕙᒃᑐᓂᒃ ᐃᓚᒋᔭᐅᓪᓗᑎᒃ ᐃᓄᐃᑦ ᓄᓇᖓᑖᕆᔭᐅᓯᒪᔪᓄᑦ ᑲᑐᔾᔨᖃᑎᒌᒃᑯᑦ, ᐊᕕᒃᑐᖅᓯᒪᓂᐅᔪᓂ ᒐᕙᒪᒃᑯᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑎᒪᔨᖏᓐᓂᒃ, ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᓂᒃ ᐊᒻᒪᓗ ᐃᓕᓐᓂᐊᕐᓂᓕᕆᔨᓂᒃ. ᐱᓕᕆᐊᖓᑦ ᐃᑲᔪᖅᓱᕐᑕᐅᖃᑦᑕᕐᐳᖅ  ᐱᐅᓯᕚᓪᓕᕐᑎᑕᐅᓪᓗᓂᓗ ᐃᓚᐅᖃᑕᐅᕙᓐᓂᒃᑯᑦ ᐅᑯᓇᓂ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᓇᑕᒥ ᐃᓄᐃᑦ ᑲᑎᒪᔨᕋᓛᖏᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ (NICOH), ᐃᓄᐃᑦ ᑕᐱᕇᑦ ᐊᓕᐊᓇᐃᑦ ᐃᓱᒪᓕᕆᓂᕐᒧᑦ ᐱᓕᕆᐊᖃᕐᓂᕐᒥᒃ ᑲᑐᔾᔨᖃᑎᒌᑦ ᐊᒻᒪᓗ ᑲᓇᑕᒥ ᐃᓄᐃᑦ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᓂᕐᒧᑦ ᐱᓕᕆᐊᖃᕐᓂᕐᒧᑦ ᑲᑐᔾᔨᖃᑎᒌᑦ. ᐃᓕᓴᕆᔭᐅᓯᒪᔪᑎᒍᓪᓗ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᖃᑎᒌᒍᑎᖃᖅᓯᒪᕗᑦ ᑲᓇᑕᒥ ᓄᓇᖃᖅᑳᕐᓯᒪᔪᓄᑦ ᐊᓴᐱᓕᕆᓂᕐᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᔨᖏᓐᓂᒃ ᐊᓯᖏᓐᓂᓪᓗ ᑲᑐᔾᔨᖃᑎᒌᓂᒃ ᐃᑲᔪᖅᓱᐃᓂᒃᑯᑦ ᐱᓕᕆᖃᑎᖃᕐᓂᒧᑦ ᑐᕌᒐᕆᔭᐅᓯᒪᓂᒃ ᓯᕗᓪᓕᐅᔾᔭᐅᒋᐊᓕᖕᓂᓪᓗ.

ᐸᐅᒃᑑᑎᒃᑯᑦ ᐱᓕᕆᐊᖓᑦ ᐋᓐᓂᐊᖅᑐᓕᕆᓂᕐᒧᑦ ᐱᔾᔪᑎᒃᓴᐅᔪᑦ ᐊᔾᔨᒋᔭᐅᓐᖏᓚᖅ ᐅᖃᐅᔾᔪᖅᑕᐅᔪᒪᕙᒻᒪᑕ ᐃᓄᖕᓅᖓᔪᓄᑦ ᐱᔾᔪᑎᒃᓴᓄᑦ ᖃᐅᔨᒪᔨᑕᐅᔪᓂᑦ ᐊᓯᖏᓐᓂᓪᓗ ᑲᑐᔾᔨᖃᑎᒋᔭᐅᕙᒃᑐᓂᒃ ᖃᐅᔨᒪᔨᒋᔭᐅᓪᓗᑎᒃ ᑲᑎᒪᔨᕋᓛᑎᒍᑦ ᐱᓕᕆᐊᕆᓇᓱᐊᖅᑕᖏᓐᓄᑦ. ᐃᑲᔪᕈᑎᒃᓴᑦ ᓴᖅᑭᑕᐅᓯᒪᔪᑦ ᐊᑐᖅᑕᐅᔪᒃᓴᓕᐊᖑᓯᒪᕗᑦ ᐋᖅᑭᒋᐊᖅᑕᐅᔪᓐᓇᕐᓗᑎᓪᓘᓐᓃᑦ ᑕᒪᕐᒥᒃ ᐃᓄᐃᑦ ᓄᓇᓕᖏᓐᓂ, ᐊᒻᒪᓗ ᑐᑭᓕᐅᖅᑕᐅᔪᓐᓇᖅᑐᓕᒫᖑᓇᐊᓱᕐᓯᒪᕗᑦ ᐊᒥᓱᒐᓚᐃᑦ ᐅᖃᐅᓯᕆᔭᐅᔪᓄᑦ ᐃᓄᒃᑎᑐᑦ.

ᐸᐅᒃᑑᑎᒃᑯᑦ ᐋᓐᓂᐊᖅᑐᓕᕆᓂᕐᒧᑦ ᐱᓕᕆᔨᖏᑦ ᐊᒥᓲᓇᑎᒃ ᐱᓕᕆᔨᐅᕗᑦ ᑐᓐᓂᖅᑯᑎᒋᓯᒪᔪᑦ ᐊᔾᔨᒌᓐᖏᕈᓗᐃᔭᕐᑐᑦ ᐱᔾᔪᑎᒃᓴᐅᔪᓄᑦ ᖃᐅᔨᒪᔨᑕᐅᓪᓗᑎᒃ. ᐱᓕᖃᑎᒌᑦ, ᐱᔨᑦᑎᕋᖅᑎᐅᓇᑎᒃ, ᐅᖃᖃᑎᖃᖃᑦᑕᕐᐳᑦ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐱᓕᕆᖃᑎᖃᑦᑎᐊᖃᑦᑕᕐᐳᑦ ᓄᓇᓕᐅᔪᒥ. ᐊᐅᓚᑦᑎᔨᐅᓪᓗᑎᒃ ᑲᑎᒪᔩᑦ ᐊᓂᒍᐃᔾᔪᑎᖃᕈᓐᓇᕐᓯᓯᒪᕗᑦ ᐊᒥᓱᑦ ᐋᓐᓂᐊᖅᑐᓕᕆᓂᕐᒧᑦ ᐱᒋᐊᖅᑎᔾᔪᑕᐅᓯᒪᔪᓂᒃ ᐊᒻᒪᓗ ᐱᑕᖃᕐᑎᑦᑎᕙᒃᐳᑦ ᑐᑭᒧᐊᒃᑎᑦᑎᓂᕐᒥᒃ, ᐊᕕᒃᑐᖅᓯᒪᐅᓂᔪᓂ ᐃᓱᒪᒋᔭᐅᓯᒪᔪᓄᑦ ᐊᒻᒪᓗ ᐱ0ᔪᑎᒃᓴᓄᑦ ᖃᐅᔨᒪᔨᑕᐅᓪᓗᑎᒃ.

ᐸᐅᒃᑑᑎᒃᑯᑦ ᐱᓕᕆᐊᖓᑦ ᐊᔪᕐᓇᕋᔭᐅᓚᐅᕐᑐᖅ ᐃᑲᔪᖅᓱᖅᑕᐅᓚᐅᖏᑉᐸᑕ ᐊᒥᓱᑦ ᐃᓱᒪᖃᑎᖃᕐᓯᒪᔪᑦ ᑲᑐᔾᔨᖃᑎᒋᔭᐅᕙᒃᑐᑦ ᑐᓐᓂᖅᑯᑎᒋᓯᒪᔪᑦ ᐊᓯᔾᔩᓇᓱᐊᕐᓂᕐᒥᒃ ᐃᓅᓯᕆᔭᐅᔪᓄᑦ ᐃᓄᐃᑦ ᐊᕐᓇᓄᑦ ᐃᓚᒋᔭᖏᓐᓄᓪᓗ, ᓄᓇᓕᖕᓄᓪᓗ.