ᐋᓐᓂᕐᑕᐃᓕᒪᑎᑦᑎᓂᖅ

ᐱᔮᖅᑯᑕᐅᖏᑦᑐᒃᑯᑦ ᐋᓐᓂᕈᑕᐅᕙᒃᑐᑦ ᐊᖏᓂᖅᐹᖑᔪᓄᑦ ᖃᓂᒻᒪᒃᑖᕈᑕᐅᕙᒃᐳᑦ ᐃᓅᔪᓐᓃᕈᑕᐅᕙᒃᐳᓪᓗ ᑲᓇᑕᒥᐅᑦ ᐃᓄᖕᓂᑦ. ᐃᓚᒋᔭᐅᓪᓗᓂ ᐃᒻᒥᓃᕐᓂᐅᔪᑦ, ᐋᓐᓂᕈᑕᐅᕙᒃᑐᑦ ᖁᕕᐊᓇᕈᓐᓃᕈᑎᐅᕙᒃᐳᑦ ᐃᓅᔪᓐᓃᕈᑕᐅᕙᒃᑐᓄᑦ ᐃᓄᐃᑦ ᐃᓐᓇᕈᖅᑐᓄᑦ ᑖᒃᑯᓇᓐᖓᓪᓗ ᑲᓇᑕᒥᐅᑕᐅᔪᓂᑦ. ᐊᖏᔪᒻᒪᕆᒻᒧᑦ ᒪᑭᒪᐅᑎᑎᒍᑦ ᐊᒃᑐᐃᔾᔪᑎᐅᕙᒻᒪᑦ ᖁᕝᕙᓯᒃᑐᒃᑯᑦ ᐱᔮᖅᑯᑕᐅᖏᑦᑐᒃᑯᑦ ᐋᓐᓂᕈᑕᐅᕙᒃᑐᓂ ᐅᑭᐅᖅᑕᖅᑐᒥ. ᐃᓄᐃᑦ, ᑕᐃᒪᐃᒃᑲᓗᐊᖅᑎᓪᓗᒍ, ᓵᔾᔪᑎᖃᖃᑦᑕᕐᒪᑕ ᐊᔾᔨᐅᖏᑦᑐᑦ ᐱᒡᒐᕐᓇᕈᑎᐅᔪᓂᒃ ᐊᒻᒪᓗ ᐱᓕᕆᐊᖑᔭᕆᐊᖃᕐᐳᖅ ᐃᓄᐃᑦ ᐊᔾᔨᐅᖏᑦᑐᒥ ᓄᓇᖃᖅᑎᓪᓗᒋᑦ, ᐱᖅᑯᓯᖃᖅᑎᓪᓗᒋᑦ, ᐅᖃᐅᓯᖏᑕᓗ ᐱᐅᓯᖏᑦ.

ᐃᓕᖅᑯᓯᑐᖃᒃᑯᑦ ᐊᖑᔭᕐᓂᖅ ᓱᓕ ᐱᒻᒪᕆᐅᖃᐅᕗᖅ ᐃᓅᓯᕆᔭᖏᓐᓂ ᐊᒥᓱᓄᑦ ᐊᒻᒪᓗ ᑕᒪᓐᓇ ᐃᓚᐅᓂᖃᖅᑎᑦᑎᕙᒻᒪᑦ ᐊᑐᕆᐊᖃᕐᓂᕐᒥᒃ ᖁᑭᐅᑎᓂᒃ, ᐊᖅᑯᑎᓕᕆᐊᕆᓯᒪᖏᑦᑐᒃᑯᑦ ᐃᖏᕐᕋᔾᔪᑕᐅᕙᒃᑐᑦ (ATV), ᖃᒧᑕᐅᔭᑦ, ᐅᒥᐊᑦ, ᓄᒃᑕᕆᐊᖃᖅᐸᖕᓂᖏᓐᓄᑦ ᓄᓇᐃᓐᓇᕐᒥ ᐊᖅᑯᑎᖃᖏᑦᑐᒃᑯᑦ ᐊᓯᔾᔩᕙᓪᓕᐊᓪᓗᓂ ᓇᓚᐅᑦᑖᕋᒃᓴᐅᖏᑦᑐᒃᑯᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᐱᕈᖅᐸᓪᓕᐊᔪᑦ ᐃᓄᐃᑦ ᓄᓇᓕᖏᓐᓂ ᐊᒥᓲᓂᕐᓴᐅᓕᕐᐳᑦ ᓄᓇᓯᐅᑏᑦ, ᐱᑕᖃᕆᐊᖃᕐᓂᕐᓴᐅᓕᕐᒪᓪᓗ ᐱᓱᒃᐸᒃᑐᑦ ᐊᑦᑕᕐᓇᖅᑐᒃᑰᖁᓇᒋᑦ, ᓯᓚᒥ ᐱᓐᖑᐊᕐᕕᒋᔭᐅᔪᑦ ᐊᑦᑕᕐᓇᖅᑑᔭᕆᐊᖃᖏᓐᓂᖏᓐᓂᒃ, ᐊᑦᑕᕐᓇᕈᑎᐅᖏᓐᓇᕐᐸᖕᓂᖓᓄᑦ ᐃᒡᓗᒥ ᐃᑭᑦᑐᑦ, ᓄᑖᓄᑦ ᐃᖅᑲᓇᐃᔮᖃᖔᓕᕈᑕᐅᓯᒪᔪᑦ ᐅᔭᕋᒃᓯᐅᕐᓂᒥ, ᐅᖅᓱᐊᓗᒃᓯᐅᓂᕐᒥᓗ ᐊᒻᒪᓗ ᖁᕝᕙᕆᐊᖅᑎᑦᑎᓇᓱᐊᕆᐊᖃᕐᐳᑦ ᐃᖅᑲᓇᐃᔭᕐᕕᒋᔭᖏᓐᓂ ᐊᑦᑕᕐᓇᖅᑕᐃᓕᒪᑎᑦᑎᓂᕐᒧᑦ ᐊᑐᐊᒐᕆᔭᐅᔪᓂᒃ. ᒪᓕᒐᓕᐊᖑᕙᓪᓕᐊᔪᑦ ᒪᓕᒐᕋᓛᓪᓗ  ᐊᐅᓚᑦᑎᓂᖃᕐᑐᑦ ᐊᑦᑕᕐᓇᖏᑦᑐᓄᑦ ᐱᖁᑎᓄᑦ ᐊᑐᓕᖅᑎᑦᑎᓂᕐᒧᑦ ᐊᕐᕌᒍᖃᖅᑎᑕᐅᔭᕆᐊᖃᕐᓂᖓ ᐊᐅᓚᐅᑕᐅᖁᓪᓗᒋᑦ ᐊᖅᑯᑎᓕᐊᕆᓯᒪᖏᑦᑐᒃᑯᑦ ᐃᖏᕐᕋᔾᔪᑎᒋᔭᐅᕙᒃᑐᑦ ᖃᒧᑕᐅᔭᓪᓗ ᐊᔾᔨᒌᒃᑎᑕᐅᖏᒻᒪᑕ ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᐅᓪᓗᒥᒨᖓᓕᖅᑎᑕᐅᔭᕆᐊᖃᖅᑐᒃᓴᐅᓪᓗᑎᒃ. ᐊᒻᒪᓗ, ᐊᑯᓂᐅᓕᕐᑐᒧᑦ ᐱᔾᔪᑎᒃᓴᐅᓕᕐᓯᒪᔪᑦ ᐱᕙᓪᓕᐊᔾᔪᑕᐅᓕᖅᐸᒻᒪᑕ ᐱᔾᔪᑎᒋᓪᓗᒋᑦ ᐋᓐᓂᕐᓯᕆᓂᕐᒧᑦ, ᐃᒻᒥᓃᖃᑦᑕᕐᓂᕐᒧᑦ, ᐱᔾᔪᑎᐅᓕᖅᐸᒃᑭᓪᓗᓂ ᐃᒥᐊᓗᒃ.

ᐅᑭᐅᖅᑕᖅᑐᒥ, ᐃᓄᓕᕆᓂᕐᒧᑦ, ᐱᕙᓪᓕᐊᔪᓕᕆᓂᕐᒧᑦ, ᐊᕙᑎᒧᑦ, ᐊᒻᒪᓗ ᐃᓗᓯᕐᒧᑦ ᖃᓄᐃᓕᖓᓂᐅᔪᑦ ᐊᓯᔾᔨᖅᐸᓪᓕᐊᒻᒪᑕ.  ᐊᓯᔾᔨᖅᐸᓪᓕᐊᑎᓪᓗᒋᑦ ᓄᓇᓕᐅᔪᑦ ᐃᓅᓯᕆᔭᐅᔪᓪᓗ, ᓄᑖᓐᖑᕐᐸᓪᓕᐊᔪᑦ ᐊᑐᖅᑕᐅᔪᓐᓇᕐᑐᑦ ᐊᒻᒪᓗ ᓄᑖᑦ ᐱᕙᓪᓕᐊᔪᒃᑰᕐᑐᑦ, ᐃᓗᐊᖏᔾᔪᑎᐅᖏᓐᓇᕐᐸᒃᑐᓪᓗ ᐱᔮᖅᑯᒻᒨᖏᑦᑐᑦ ᐋᓐᓂᐊᕆᐅᕙᒃᑐᑦ ᐸᕐᓇᐅᑎᓕᐅᔾᔪᐅᑕᐅᖁᔭᐅᓯᒪᓕᕐᐳᑦ ᑖᒃᑯᐊ ᐊᑐᓂ ᐊᑑᑎᖃᑦᑎᐊᕈᓐᓇᕐᓗᑎᒃ ᑕᐅᑐᒐᖃᑦᑎᐊᕈᓐᓇᕐᓗᑎᒃ. ᐸᐅᒃᑑᑎᒃᑯᑦ ᐋᓐᓂᕐᑕᐃᓕᒪᑎᑦᑎᓂᕐᒧᑦ ᐸᕐᓇᐅᑎᓕᐊᕆᓯᒪᔭᖓᑦ ᓂᕈᐊᒐᒃᓴᐅᕗᑦ ᑐᕌᒐᖃᑐᕐᓗ ᖃᓄᐃᓕᐅᕈᑎᖃᕈᓐᓇᕐᓂᕐᒧᑦ, ᖃᓄᐃᒻᒪᑦ ᐱᓕᕆᐊᕆᓗᒍ, ᐊᒻᒪᓗ ᖃᓄᖅ ᐱᓕᕆᐊᖑᔪᓐᓇᕐᒪᖔᑦ ᐊᒃᓱᕈᓐᓇᕈᑎᐅᕙᒃᑐᑦ ᐋᓐᓂᕐᑕᐃᓕᒪᑎᑦᑎᓂᕐᒧᑦ ᐱᔭᐅᔭᕆᐊᓖᑦ ᐊᑐᓕᖅᑎᑕᐅᔪᓐᓴᖁᓪᓗᒋᑦ ᐅᑭᐅᖅᑕᖅᑐᒥ ᑭᖑᓪᓖᑦ ᑕᓪᓕᒪᑦ ᐊᕐᕌᒎᓂᐊᖅᑐᓄᑦ.

ᐱᔾᔪᑎᒋᓪᓗᒍ ᐋᓐᓂᕐᑕᐃᓕᒪᑎᑦᑎᓂᕐᒧᑦ, ᐸᐅᒃᑑᑎᒃᑯᑦ ᐱᖁᔨᕗᖔᕈᑎᒥᒃ ᑲᔪᓯᑎᑦᑎᓯᒪᕗᑦ 2007 ᐊᕐᕌᒍᑕᒫᖅᓯᐅᑦ ᑭᒃᑯᓕᒫᖅᑎᑦᑎᓂᕐᒧᑦ ᑲᑎᒪᕕᔾᔪᐊᕐᓂᕆᓚᐅᖅᑕᖓᓂ ᐱᓕᕆᖃᑎᖃᕐᓗᑎᒃ ᑲᓇᑕᐅᑉ ᐊᕕᒃᑐᖅᓯᒪᓂᐅᔪᖁᑎᖏᓐᓂ, ᐅᑭᐅᖅᑕᖅᑐᒥ, ᐊᒻᒪᓗ ᒐᕙᒪᒃᑯᖏᑕ ᑎᒥᖏᓐᓂᒃ, ᐊᓯᖏᓐᓂᓪᓗ ᑲᑐᔨᖃᑎᒌᖑᔪᓂᒃ, ᕿᒥᕐᕈᔪᓐᓇᖁᓪᓗᒋᑦ ᒪᓕᒐᓕᐊᕆᔭᐅᓯᒪᔪᑦ ᐊᒻᒪᓗ ᐅᔾᔨᕈᓱᓕᖅᑎᑦᑎᓂᕐᒧᑦ ᐋᓐᓂᕐᑕᐃᓕᒪᑎᑦᑎᓂᕐᒥᒃ. ᓯᕗᓂᐊᓂ ᐱᓕᕆᐊᕆᔭᐅᓯᒪᔪᑦ ᐃᓚᓕᐅᔾᔨᓯᒪᕗᑦ ᐃᓚᐅᖃᑕᐅᓂᕐᒧᑦ ᑲᓇᑕᒥ ᐊᓪᓚᓄᑦ ᐃᓄᖕᓄᓪᓗ ᐋᓐᓂᕐᑕᐃᓕᒪᑎᑦᑎᓂᕐᒧᑦ ᐱᓕᕆᐊᖃᓂᕐᒥᒃ ᑲᑐᔾᔨᖃᑎᒌᒃᑐᓂᒃ ᑖᓐᓇ ᓴᖅᑭᑕᐅᓯᒪᓪᓗᓂ 2000-ᒥ. ᐊᒻᒪᓗ, ᐸᐅᒃᑑᑎᒃᑯᑦ ᐱᓕᕆᖃᑎᖃᑦᑎᐊᕐᓯᒪᒋᕗᑦ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ ᖃᓄᖅ ᐱᕙᓪᓕᐊᑎᑦᑎᔪᓐᓇᑦᑎᐊᕐᒪᖔᑕ ᑐᑭᒧᐊᒃᑎᑕᐅᓯᒪᔪᑎᒍᑦ ᐱᔾᔪᓯᐅᔪᑎᒍᓪᓗ ᐱᓕᕆᐊᖃᕋᓱᐊᓂᕐᒧᑦ ᐋᓐᓂᕐᑕᐃᓕᒪᑎᑦᑎᓂᕐᒥᒃ. 2004-ᒥ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓴᓇᓯᒪᕗᑦ ᐃᓄᖕᓅᖓᔪᓂᒃ ᐋᓐᓂᕐᑕᐃᓕᒪᑎᑦᑎᓂᕐᒧᑦ ᐋᖅᑭᒃᓯᒪᓂᖓ ᓇᓗᓇᐃᔭᐃᓯᒪᓪᓗᓂ ᖁᑦᑎᓐᓂᖅᐹᒃᑯᑦ ᐋᓐᓂᕈᑕᐅᕙᒃᑐᓄᑦ ᐱᔾᔪᑎᒃᓴᐅᔪᓂᒃ ᐊᒻᒪᓗ ᐅᓂᒃᑳᕐᓯᒪᔪᖅ ᖁᓕᐅᓐᖏᓱᖓᕐᑐᑦ ᐸᕐᓇᐅᑎᓕᐊᖑᔪᓄᑦ ᓯᕗᓪᓕᐅᔾᔭᐅᒋᐊᓖᑦ. ᖃᓄᐃᓕᖓᓕᕐᒪᖔᑦ ᖃᐅᔨᓴᖅᑕᐅᕙᓪᓕᐊᓪᓗᓂ, 2005-ᒥ ᐸᐅᒃᑑᑎᒃᑯᑦ ᐊᒻᒪᓗ ᐃᓄᐃᖅ ᑕᐱᕇᒃᑯᑦ ᐅᖃᐅᔾᔪᐃᖃᑎᒌᒃᓯᒪᕗᑦ ᑲᑐᔾᔨᖃᑎᒋᔭᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᐊᓃᑦᑐᑦ ᐃᓕᓯᔪᓐᓇᕐᒪᖔᑕ ᐊᑐᓕᕐᑎᑕᐅᓗᑎᓪᓗ ᖁᓕᐅᓐᖏᓱᖓᕐᑐᑦ ᓯᕗᓪᓕᐅᔾᔭᐅᒋᐊᓖᑦ. ᖃᐅᔨᔭᐅᓯᒪᔪᑦ ᐅᓂᒃᑳᕆᔭᐅᓯᒪᔪᓂ ᑎᑎᖅᑲᖁᑎᒥ ᐋᓐᓂᕐᑕᐃᓕᒪᑎᑦᑎᓂᖅ: ᑕᐅᑐᒐᕆᔭᐅᔪᖅ ᐃᓄᖕᓅᖓᓪᓗᓂ ᐋᖅᑭᒃᓯᒪᓂᖓ ᐃᓄᐃᑦ ᓄᓇᓕᓕᒫᖏᑦ ᐊᕕᒃᑐᖅᓯᒪᓂᐊᓃᑦᑐᓪᓗ ᐋᓐᓂᖏᓐᓂᕐᓴᐅᓕᕈᓐᓇᖁᓪᓗᒋᑦ. ᑕᕝᕙᓂᑦᑕᐃᓐᓇᖅ ᐊᕐᕌᒍᖓᓂ, ᐸᐅᒃᑑᑎᒃᑯᑦ ᐱᔭᕇᖅᓯᓯᒪᕗᑦ ᓯᓚᕐᔪᐊᒥ ᐅᑭᐅᖅᑕᖅᑐᖓᓄᑦ ᕿᒥᕐᕈᓂᕐᒥᒃ ᐋᓐᓂᕐᑕᐃᓕᒪᑎᑦᑎᓂᕐᒧᑦ ᐱᒋᐊᕈᑎᐅᓯᒪᔪᓂᒃ ᐊᑎᖃᕐᑐᖅ ᓯᓚᕐᔪᐊᒥ ᐅᑭᐅᖅᑕᖅᑐᖓᓂ ᐱᔮᖅᑯᒻᒨᖏᑦᑐᖅ ᐋᓐᓂᕐᑕᐃᓕᒪᑎᑦᑎᓇᓱᐊᕐᓂᖅ.

2009-2011-ᒥ, ᐸᐅᒃᑑᑎᒃᑯᑦ ᐱᓕᕆᖃᑎᖃᕐᓯᒪᕗᑦ 16 ᐃᓄᐃᑦ ᓄᓇᓕᖏᓐᓂᒃ ᑐᓂᔭᐅᖁᓪᓗᒍ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᓇᑕᒥ ᐱᓕᕆᐊᖅ ᐃᓕᓐᓂᐊᕐᑎᑦᑎᕙᓪᓕᐊᓂᖅ (JTT) ᐊᑐᕐᑕᐅᓪᓗᓂ ᓄᓇᓕᖕᓄᑦ ᐱᕙᓪᓕᐊᑎᑦᑎᓂᕐᒥᒃ ᐊᒻᒪᓗ ᓄᓇᓕᖕᓄᑦ ᐊᐅᓚᔾᔭᐃᓇᓱᐊᕐᓂᖅ. ᑕᒪᓐᓇ ᐱᓕᕆᐊᖅ ᐃᑲᔪᖅᓯᒪᓂᖃᕐᐳᖅ ᓄᓇᓕᐅᔪᑦ ᐱᕙᓪᓕᐊᑎᑕᐅᔪᓐᓇᖁᓪᓗᒋᑦ ᓇᖕᒥᓂᖅ ᓄᓇᓕᖓᓄᑦ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᒥᒃ ᐋᓐᓂᕐᑕᐃᓕᒪᑎᑦᑎᓂᕐᒧᑦ.

ᑲᑎᓕᒫᕐᓗᒍ, ᐱᓕᕆᐊᕆᔭᐅᓯᒪᔪᑦ ᐸᐅᒃᑑᑎᒃᑯᓐᓄᑦ ᐱᕙᓪᓕᐊᑎᔾᔪᑕᐅᓪᓗᐊᑕᕈᒥᓇᕆᔭᐅᕗᖅ ᑐᓂᓯᓂᕐᒧᓪᓗ ᐊᑑᑎᖃᑦᑎᐊᕐᑐᓂᒃ ᐱᖅᑯᓯᒨᖓᔪᓂᒃ ᐸᕐᓇᐅᑎᓕᐊᖑᔪᓄᑦ ᐱᒋᐊᖅᑎᔾᔪᑕᐅᔪᓂᒃ ᖁᕝᕙᕆᐊᖅᑎᑦᑎᓇᓱᐊᕐᓂᕐᒧᑦ ᓂᕈᐊᒐᒃᓴᑦᑎᐊᕙᐅᔪᓂᒃ ᒥᑭᓪᓕᕚᓪᓕᖁᓪᓗᒍ ᐃᓅᖃᑎᒌᓕᒫᓂ, ᓂᕈᐊᒐᒃᓴᐃᑦ ᐊᔭᐅᖅᑐᖅᑕᐅᒻᒪᕆᒃᑲᓗᐊᖅᐳᑦ ᐃᓄᓕᕆᓂᒃᑯᑦ, ᐱᕙᓪᓕᐊᔪᓕᕆᓂᒃᑯᑦ, ᐊᒻᒪᓗ ᐊᕙᑎᓪᓚᕆᖓᒍᑦ ᐃᓄᐃᑦ ᓄᓇᖃᕐᕕᒋᔭᖓᓂ, ᐃᖅᑲᓇᐃᔭᕐᕕᒋᔭᖓᓂ, ᐃᓕᓐᓂᐊᕐᕕᒋᕙᒃᑕᖓᓂ, ᐱᓐᖑᐊᕐᕕᒋᕙᒃᑕᖓᓂ.