ᐱᓂᕐᓗᒃᑕᐃᓕᒪᑎᑦᑎᓂᖅ

ᐋᓐᓂᕐᓯᕆᑦᑕᐃᓕᒪᑎᑦᑎᓂᖅ ᐱᓂᕐᓗᒃᑕᐃᓕᒪᑎᑦᑎᓂᕐᓗ ᐸᐅᒃᑑᑎᒃᑯᑦ ᖁᑦᑎᓐᓂᖅᐹᖓᑏᓯᒪᕙᔾᔪᒃ ᐱᖓᓱᑦ ᓯᕗᓪᓕᐅᔾᔨᔭᕆᐊᓕᖏᓐᓂ 1984-ᒥᓂᑦ. ᒪᕐᕈᑐᐃᓐᓇᐅᓯᒪᖕᒪᑕ ᑭᖑᕚᕇᖑᔪᓂ ᑕᐃᒪᐃᓐᖓᓂᑦ ᐃᓄᐃᑦ ᑲᓇᑕᒥ ᐃᓂᒌᓐᓇᕐᓂᐊᓕᖅᑕᒥᖕᓄᑦ ᓄᓇᓕᖕᓄᐊᖅᑕᐅᓚᐅᕐᓯᒪᑎᓪᓗᒋᑦ, ᑕᒪᓐᓇ ᐊᓯᐅᕙᓪᓕᐊᓕᕐᑎᑦᑎᓯᒪᓪᓗᓂ ᐃᓕᖅᑯᓯᑐᖃᖏᖕᓐᓂᒃ, ᖃᐅᔨᒪᓂᑐᖃᕆᔭᖏᓐᓂᒃ, ᐱᓕᒻᒪᒃᓴᖃᑦᑕᕐᑕᖏᓐᓂᒃ, ᐃᓅᓯᑐᖃᕆᔭᖏᓐᓂᒃ ᐊᑐᕐᓂᖃᐅᑎᒋᔭᖏᓐᓂᓪᓗ ᐃᓚᒌᒍᔪᓂ ᓄᓇᓕᐅᔪᒥᓗ. ᐃᓕᖅᑯᓯᑐᖃᒃᑯᑦ ᐊᕐᓇᐃᑦ ᐊᖑᑎᓪᓗ ᐊᑐᕐᓂᖃᐅᑎᖏᑦ ᐊᔾᔨᒌᒃᑎᑕᐅᓯᒪᕗᑦ ᐊᔾᔨᒌᒥᓪᓗ ᐱᒻᒪᕆᐅᔪᑎᒍᑦ ᒪᑭᒪᓇᓱᐊᖅᑎᑦᑎᔨᐅᓪᓗᑎᒃ ᐃᓚᒌᓄᑦ ᓄᓇᓕᐅᔪᓄᓪᓗ, ᐃᓄᖕᓄᓪᓗ ᐃᓅᖃᑎᒌᖕᓂᒃᑯᑦ. ᐃᓄᐃᑦ ᐊᕐᓇᐃᑦ ᐱᒃᑯᒋᔭᖃᒻᒪᕆᖕᓂᒃᑯᑦ ᐅᖅᑰᔪᓂᒃ ᐃᔅᓴᔭᖏᑦᑐᓂᒃ ᐋᓐᓄᕌᓕᐅᖃᑦᑕᕐᓯᒪᕗᑦ ᓇᓗᐊᖕᓂᓪᓗ ᐊᖑᑎᓄᑦ, ᐊᖑᓇᓱᒋᐊᖃᕐᑎᓪᓗᒋᑦ ᐅᖓᓯᒋᒻᒪᕆᒃᑕᖏᓐᓄᑦ ᐊᑯᓂᐅᔪᒧᓪᓗ ᓂᕿᒃᓴᕐᓯᐅᕐᓗᑎᒃ ᕿᓯᒃᓯᐅᕐᓗᑎᒃ/ᐊᒥᕋᖅᓯᐅᕐᓗᑎᒃ ᐃᓚᒋᔭᖏᑕ ᐃᓅᓇᓱᐊᕆᐊᖃᕐᓂᖏᓐᓄᑦ ᐊᒻᒪᓗ ᐊᔪᖏᓐᓂᕆᔭᖏᑦ ᐊᒻᒪᓗ ᐊᕙᑎᒥᒃ ᖃᐅᔨᒪᓂᖃᑦᑎᐊᓂᕐᒧᑦ. ᐊᕐᓇᐃᓪᓗ ᑲᒪᒋᔭᖃᕆᐊᖃᖃᑦᑕᓚᐅᕆᕗᑦ ᑲᔪᓯᑎᑦᑎᐊᖏᓐᓇᖁᓪᓗᒋᑦ ᐃᓚᒋᔭᓂ ᐃᓅᖃᑎᒌᑦᑎᐊᕆᐊᖃᕐᓗᑎᓪᓗ ᐊᖑᑎᑦ ᐊᐅᓪᓚᕐᓯᒪᑎᓪᓗᒋᑦ. ᐊᒥᓱᓂᒃ ᐱᒡᒐᓇᕐᑐᖃᐅᕋᓗᐊᕐᑎᓪᓗᒍ ᐊᒃᓱᕈᓐᓇᖅᑐᕐᓯᐅᖃᑦᑕᕋᓗᐊᖅᑎᓪᓗᒋᓪᓗ, ᐃᓚᒌᑦᑎᐊᖏᓐᓇᕈᓐᓇᓚᐅᕐᑐᑦ ᐊᔾᔨᒌᒃᑎᑕᐅᒻᒪᕆᓪᓗᑎᓪᓗ ᐊᖑᑎᐅᒐᓗᐊᖅᐸᑕ ᐊᕐᓇᐅᒐᓗᐊᖅᐸᑕᓘᓐᓃᑦ. ᓱᕈᓰᑦ ᐱᓐᓇᕆᔭᐅᑦᑎᐊᕐᓗᑎᒃ ᐃᓚᒋᔭᖏᓐᓂᑦ ᓄᓇᓕᖕᓂᓗ.

ᐊᑐᕆᐊᖃᓕᖅᑎᑕᐅᓯᒪᓂᖏᑦ ᖃᓪᓗᓈᓂ ᐊᔪᕆᖅᓲᔾᔪᓯᖏᑦ ᐊᐅᓚᑦᑎᓂᕐᒧᑦ, ᐃᓕᓐᓂᐊᕐᓂᕐᒧᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓄᓕᕆᓂᕐᒧᓪᓗ ᐱᔨᑦᑎᕋᕈᑕᐅᔪᑦ ᑐᓂᔭᐅᕙᖕᓂᖏᑦ, ᐃᓚᒋᔭᐅᓪᓗᓂ ᐅᔾᔨᕆᔭᐅᑎᑕᐅᓕᖅᓯᒪᓂᖓ ᑮᓇᐅᔾᔭᒃᓴᕐᓂᖅ, ᐊᒥᓱᑦ ᐊᖑᑎᓄᑦ ᐊᕐᓇᓄᓪᓗ ᐃᓕᖅᑯᓯᑐᖃᖓᒍᑦ ᐊᑐᕐᓂᖃᐅᑎᖏᓐᓄᑦ ᐃᓂᖓᓃᑎᑦᑎᔪᓐᓃᕐᓯᒪᓪᓗᓂ. ᐊᒥᓱᑦ ᐊᖑᑎᑦ ᐃᓂᒋᓐᖏᑕᖏᓐᓃᕋᓱᒋᓕᖅᓯᒪᕗᑦ ᐃᓕᖅᑯᓯᑐᖃᒃᑯᑦ ᐊᑐᕐᓂᖃᐅᑎᒋᔭᖏᓐᓂ ᐊᖑᓇᓱᒃᑎᐅᓂᕐᒧᑦ ᓂᕿᖃᖅᑎᑦᑎᔨᐅᓂᒧᓪᓗ, ᐊᒥᓱᓪᓗ ᐃᓄᐃᑦ ᐊᕐᓇᐃᑦ ᐃᖅᑲᓇᐃᔭᓂᕐᓴᐅᕙᓪᓕᐊᓪᓗᑎᒃ ᐊᒻᒪᓗ ᑮᓇᐅᔭᓕᕆᓂᒃᑯᑦ ᐱᑕᖃᕐᑎᑦᑎᓂᕐᓴᐅᑐᐃᓐᓇᕆᐊᖃᕐᑎᓪᓗᒋᑦ ᐃᓚᒋᔭᒥᖕᓄᑦ. ᐃᓕᓐᓂᐊᕆᐊᕐᑎᑕᐅᕙᓚᐅᕐᓯᒪᓂᖏᓐᓄᑦ, ᐊᒥᓱᑦ ᐃᓕᓐᓂᐊᖁᔭᐅᓯᒪᓐᖏᓚᑦ ᐱᕈᖅᓴᐃᑦᑎᐊᕐᓂᕐᒥᒃ ᓇᖕᒥᓂᖅ ᐊᖓᔪᖅᑳᕆᔭᖏᓐᓂᑦ ᐊᒻᒪᓗ ᐊᒃᓱᕈᕈᑎᖃᑐᐃᓐᓇᕆᐊᖃᑐᐃᓐᓇᕆᐊᖃᓕᕐᓯᒪᕗᑦ ᓇᖕᒥᓂᖅ ᐱᕈᖅᓴᐃᓇᓱᐊᕐᑎᓪᓗᒋᑦ ᕿᑐᕐᖓᖏᓐᓂᒃ ᐃᓐᓇᐅᓕᕐᑎᓪᓗᒋᑦ. ᐅᓪᓗᒥᐅᓕᕐᑐᒥ ᐃᓄᓕᕆᓂᒃᑯᑦ ᖃᓄᐃᓕᖓᓂᕆᔭᖏᑦ ᓲᕐᓗ ᓈᒻᒪᓐᖏᓗᐊᓕᕐᓂᖏᓐᓄᑦ ᐃᓄᒋᐊᓗᐊᓕᕐᓂᖏᓐᓄᓪᓗ ᐃᒡᓗᒥ, ᖁᕝᕙᓯᒃᑐᒥᒃ ᐃᖅᑲᓇᐃᔭᖏᒐᓚᒃᑑᕗᑦ ᐊᔪᖅᓴᕐᓗᑎᓪᓗ, ᐃᓕᓐᓂᐊᕐᓂᖃᓗᐊᖅᓯᒪᔪᓐᓃᕐᓯᒪᓪᓗᑎᒃ, ᓂᕿᒃᓴᖃᑦᑎᐊᕐᐸᖕᓇᑎᒃ ᐊᒻᒪᓗ ᐊᒥᓲᓂᕐᓴᐅᓕᕐᓯᒪᓪᓗᑎᒃ ᐅᓪᓗᒥᐅᓕᕐᑐᒥ ᐃᓗᐊᖏᔾᔪᑎᐅᕙᓕᕐᑐᑦ ᓲᕐᓗ ᓱᓐᓂᕐᓇᕐᑐᓂᒃ ᐊᑐᕐᓂᕐᓗᒃᓯᓂᕐᒧᑦ ᐊᒻᒪᓗ ᖁᕝᕙᓯᒃᑐᒻᒪᕆᒻᒥᒃ ᐃᒻᒥᓃᕈᔾᔨᓂᖅᐹᖑᕙᒃᐳᑦ ᓄᓇᓕᕐᔪᐊᑦᑎᓐᓂ ᐃᓄᐃᑦ ᐊᕕᒃᑐᖅᓯᒪᓂᐊᓃᑦᑐᓄᑦ ᖁᕝᕙᓯᖕᓂᖅᐹᒃᑯᑦ ᐱᕋᔭᖕᓂᖃᖃᑦᑕᓕᕐᓗᓂ ᓄᓇᓕᕐᔪᐊᕆᔭᑦᑎᓐᓂ. ᑕᒪᕐᒥᐸᓗᒃ ᓄᓇᓕᐅᔪᑦ ᓈᒻᒪᒃᓯᓕᕐᓯᒪᔪᓂᒃ ᐃᑲᔪᕐᑎᖃᖏᑦᑐᑦ ᐃᑲᔪᖅᓱᐃᓂᒃᑯᓪᓘᓐᓃᑦ ᐱᔨᑦᑎᕋᕈᑎᖃᖏᑦᑐᑦ ᐱᓕᕆᐊᖑᖁᓪᓗᒋᑦ ᐋᖅᑭᒃᑕᐅᔪᓐᓇᕐᓯᓯᒪᖏᑦᑐᑦ ᑭᖑᕚᕇᖑᖃᑎᒌᒃᑐᓂ ᖁᐊᖅᓵᕐᓇᕈᑎᐅᓯᒪᔪᑦ, ᐊᖏᓂᖅᐹᒃᑯᑦ ᐃᓱᒪᓕᕆᓂᒃᑯᑦ ᐱᔾᔪᑎᒃᓴᐅᓕᕐᓯᒪᓪᓗᓂ ᐃᓄᖕᓂ.

ᐃᓄᐃᑦ ᓄᓇᓕᖏᑦ ᐅᓂᒃᑳᓕᐅᖏᓐᓇᕐᐳᑦ ᓱᓕ ᐱᔭᕆᐊᖃᕐᓂᖏᓐᓂᒃ ᐊᑦᑕᕐᓇᖅᑐᒃᑰᖅᑐᓄᑦ ᐊᑯᓂᐅᔪᒧᓪᓗ ᐃᑲᔪᖅᑎᖃᕆᐊᖃᕐᓂᖏᓐᓂᒃ, ᐊᑦᑕᓇᖏᑦᑐᒥ ᕿᒫᕕᖃᕆᐊᖃᕐᓂᖏᓐᓂᒃ, ᑭᖑᓂᖓᒍᑦ ᐃᒡᓗᒋᔭᐅᓚᐅᑲᒃᑲᔭᕐᑐᒥᒃ ᐱᓕᒻᒪᒃᓴᖅᑕᐅᔭᕆᐊᖃᖅᑎᓪᓗᒋᓪᓗ ᐃᓄᐃᑦ ᐃᖅᑲᓇᐃᔭᖅᑎᐅᔪᑦ ᐱᓕᕆᐊᖑᓪᓗᑎᒃ ᑕᒪᒃᑯᐊ ᐱᔾᔪᑎᒃᓴᐅᔪᑦ. ᐃᓱᒪᓕᕆᓂᖅ ᓇᓗᓇᐃᖅᑕᐅᓯᒪᕗᖅ ᓯᕗᓪᓕᖅᐹᖑᓪᓗᓂ ᐋᓐᓂᐊᖅᑐᓕᕆᓂᕐᒧᑦ ᐱᔾᔪᑎᒃᓴᐅᓕᕐᓯᒪᓂᖓᓂᒃ ᓵᔾᔪᑕᐅᓯᒪᔪᖅ ᐃᓄᖕᓂᑦ, ᐃᓚᒋᔭᐅᓪᓗᑎᒃ ᐱᔾᔪᑎᒃᓴᐅᔪᑦ ᐊᒃᑐᐊᓂᖃᕐᑐᖅ ᐋᓐᓂᕐᓯᕆᕙᖕᓂᕐᒧᑦ, ᐱᓂᕐᓗᒃᓯᓂᕐᒧᑦ ᐋᖅᑭᒋᐊᖅᑕᐅᓯᒪᖏᓐᓂᖏᓐᓄᑦ ᖁᐊᖅᓵᕈᑕᐅᓯᒪᔪᑦ, ᑭᓯᐊᓂ ᐱᑕᖃᓐᖏᑎᓪᓗᒍ ᐃᑲᔪᕈᑎᒃᓴᐅᖏᓐᓇᕋᔭᕐᑐᑦ ᑐᑭᖃᓕᕐᓯᒪᕗᖅ ᓱᒃᑲᐃᓗᐊᕐᒪᑦ ᐊᓯᔾᔨᕈᑎᒋᔭᐅᒐᔭᕐᑐᖅ.

ᐊᕐᓇᐃᑦ, ᓱᕈᓰᓪᓗ, ᐊᖏᕐᕋᕆᔭᖏᓐᓂ ᐊᑐᕐᐸᒃᑐᑦ ᐋᓐᓂᕐᓯᕆᔭᐅᓂᒃᑯᑦ ᐱᓂᕐᓗᒃᑕᐅᕙᖕᓂᖏᓐᓄᓪᓗ ᐃᓂᒃᑕᖃᖃᑦᑕᖏᒻᒪᑕ ᓄᓇᓕᒋᔭᖏᓐᓂ ᕿᓂᕋᓱᐊᕐᓗᑎᒃ ᐊᑦᑕᕐᓇᖏᑦᑐᒦᒃᑲᔭᕐᓂᕐᒧᑦ. 70 ᐳᓴᓐᑎ ᐅᖓᑎᐊᓄᑦ 53 ᐃᓄᐃᑦ ᓄᓇᓕᖏᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᕿᒫᕕᖃᖏᒻᒪᑕ ᐊᕐᓇᓄᑦ, ᐊᒻᒪᓗ ᐃᓚᒋᔭᖏᑕ ᐱᖃᓐᓇᕆᔭᑎᓪᓗ ᐊᖏᕐᕋᖏᑦ ᑕᑕᓗᐊᖅᐸᒃᑐᑦ. ᖃᖓᑦᑕᐅᑎ ᐊᓯᖓᓄᑦ ᓄᓇᓕᐅᔪᒧᑦ ᐊᑭᑲᑐᐃᓐᓇᕆᐊᖃᕆᓪᓗᓂ ᑕᐅᓴᖏᓐᓃᑦᑐᓄᑦ ᑮᓇᐅᔭᓄᑦ, ᐃᑲᔪᖅᑕᐅᔭᕆᐊᖃᓗᐊᓐᖑᐊᕐᑐᓄᑦ ᐊᑦᑕᕐᓇᖅᑐᒦᑎᓪᓗᒋᑦ ᐃᑲᔫᑎᐅᔪᓐᓇᕐᐸᖏᑦᑐᑦ. ᐃᓄᐃᑦ ᐊᕐᓇᓄᑦ, ᑕᒪᓐᓇ ᑐᑭᖃᕈᓐᓇᕐᐳᖅ ᐊᑦᑕᕐᓇᖏᑦᑐᒧᐊᕋᔭᕐᓂᖏᓐᓄᑦ ᓇᒧᓐᖓᕐᕕᒃᓴᖃᖅᐸᖏᑦᑐᑦ, ᐊᒥᓱᓪᓗ ᐊᕐᓇᐃᑦ ᐃᓅᔪᓐᓃᖃᑦᑕᕐᓯᒪᓪᓗᑎᒃ ᐃᓚᒌᓂ ᐋᓐᓂᕐᓯᕆᓂᐅᔪᒧᑦ.

ᐃᑲᔪᕐᓂᒃᑯᑦ ᐃᑲᔪᖅᓱᐃᓂᒃᑯᓪᓗ ᐸᐅᒃᑑᑎᒃᑯᑦ ᐊᐅᓚᑦᑎᔨᐅᓪᓗᑎᒃ ᑲᑎᒪᔨᖏᑦ ᐃᓚᒋᔭᐅᔪᓪᓗ, ᑲᑐᔾᔨᖃᑎᒌᒃᑯᑦ ᐱᓕᕆᐊᖃᓕᖅᓯᒪᕗᑦ ᐊᔾᔨᒌᖏᑦᑐᑦ ᐱᓕᕆᐊᓂᒃ ᐊᕐᕌᒍᑕᒫᒃᑰᕐᑐᓂᒃ ᐱᓕᕆᐊᖃᕐᓂᕐᒧᑦ ᐃᓚᒌᓂ ᐋᓐᓂᕐᓯᕆᓂᐅᕙᒃᑐᒧᑦ, ᐃᓚᒋᔭᐅᓪᓗᓂ ᓱᕈᓰᑦ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᕙᖕᓂᖏᓐᓄᑦ. ᓯᕗᓂᐊᓂ ᐱᓕᕆᐊᖑᓯᒪᔪᑦ ᐃᓚᓕᐅᔾᔨᓯᒪᕗᑦ ᐱᕙᓪᓕᐊᑎᑦᑎᓂᕐᒥᒃ ᒪᕐᕈᐃᑎᒍᑦ ᑐᑭᓯᓇᕐᑐᑦ ᐅᖃᐅᓯᒃᑯᑦ ᐃᑲᔪᕈᑎᒃᓴᓂᒃ ᓲᕐᓗ ᐊᑦᑕᕐᓇᖅᑕᐃᓕᒪᑎᑦᑎᓂᕐᒧᑦ ᐸᕐᓇᐅᑎᓕᐊᖑᓯᒪᔪᑦ ᐊᕐᓇᓄᑦ ᐅᖓᓯᒃᑐᕐᒥᐅᑦ ᓄᓇᓕᐅᔪᓄᑦ, ᐅᔾᔨᕈᓱᓕᖅᑎᑦᑎᓇᓱᐊᕐᓂᕐᒥᒃ ᐱᔾᔪᑎᒃᓴᓄᑦ ᑭᓱᓕᒫᓅᖓᔪᑎᒍᑦ. ᐊᓯᖏᑦ ᖃᓄᐃᓕᐅᕐᓂᐅᔪᑦ ᐃᓚᖃᕐᓯᒪᕗᑦ ᑐᓴᐅᒪᖃᑦᑕᐅᑎᒌᒍᑎᓕᕆᓂᕐᒥᒃ ᐃᓄᐃᑦ ᕿᒫᕕᒻᒧᑦ ᑐᑭᒧᐊᒃᑎᑦᑎᔨᐅᔪᓄᑦ ᐊᒻᒪᓗ ᐱᓕᒻᒪᒃᓴᐃᓂᕐᒧᑦ ᐃᑲᔪᕈᑎᒃᓴᓪᓗ ᐅᖃᓕᒫᒐᑦ ᕿᒫᕕᒻᒧᑦ ᐃᖅᑲᓇᐃᔭᖅᑎᐅᔪᓂᒃ ᐃᓄᐃᑦ ᓄᓇᓕᖏᓐᓂ. ᐸᐅᒃᑑᑎᒃᑯᑦ ᐃᑲᔪᕈᑎᒃᓴᖏᑦ, ᓲᕐᓗ ᐃᔾᔪᐊᒐᒃᓴᑦ ᐱᕙᓪᓕᐊᓂᖃᕐᑐᑦ ᓄᓇᓕᐅᔪᓂ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᓂᒃ ᐋᓐᓂᕐᓯᕆᓂᐅᕙᒃᑐᑦ ᐱᓕᕆᐊᖑᖁᓪᓗᒍ, ᐊᒻᒪᓗ ᐊᑐᕈᑎᒃᓴᓕᐊᖑᓯᒪᕗᖅ ᐊᒻᒪᓗ/ᐅᕝᕙᓗ ᓈᒻᒪᒃᓯᓕᖅᑕᐅᓗᑎᒃ ᓄᓇᓕᐅᔪᓂᑦ ᐊᕕᒃᑐᖅᓯᒪᓂᐅᔪᓂᓘᓐᓃᑦ ᐱᔭᕆᐊᓕᖏᓐᓄᑦ ᓯᕗᓪᓕᐅᔾᔨᔭᕆᐊᖃᖅᑕᖏᓐᓄᓪᓗ ᐊᑑᑎᖃᕈᓐᓇᖁᓪᓗᒋᑦ. ᓄᑖᖑᓛᖑᓯᒪᔪᖅ ᐸᐅᒃᑑᑎᒃᑯᓐᓂᑦ ᐱᓕᕆᐊᖑᕙᓪᓕᐊᓕᕐᓯᒪᔪᖅ ᐱᔾᔪᑎᒃᓴᖅ ᐃᓄᑐᖃᐃᑦ ᐱᓂᕐᓗᒃᑕᐅᕙᖕᓂᖏᓐᓄᑦ ᐃᓄᐃᑦ ᓄᓇᓕᖏᓐᓂ, ᐃᓄᐊᖅᑕᐅᓯᒪᔪᑦ ᐊᓯᐅᔨᔭᐅᓯᒪᔪᓪᓗ ᐃᓄᐃᑦ ᐊᕐᓇᐃᑦ ᐊᒻᒪᓗ ᖁᕝᕙᕆᐊᖅᑎᑦᑎᓯᒪᕗᑦ ᐃᑲᔪᕐᓂᕆᕙᒃᑕᖏᓐᓄᑦ ᒪᒃᑯᒃᑐᓂᒃ ᑲᑐᔾᔨᖃᑎᒌᖕᓂᒃᑯᑦ ᑲᑐᔾᔨᖃᑎᒌᖑᔪᓂᒃ ᓲᕐᓗ ᐃᑲᔪᕋᓱᐊᖅᐸᒃᑐᑦ ᒪᒃᑯᒃᑐᓂᒃ – BluePrintForLife.

ᐊᑐᐊᒐᓕᕆᓂᒃᑯᑦ, ᐸᐅᒃᑑᑎᒃᑯᑦ ᐱᓕᕆᖃᑎᖃᖃᑦᑕᕐᐳᑦ ᐊᔾᔨᒌᓐᖏᕈᓗᐃᔭᕐᑐᑦ ᒐᕙᒪᒃᑯᑦ ᑲᑐᔾᔨᖃᑎᒋᔭᐅᔪᓂᒃ ᐃᓚᒋᔭᐅᓪᓗᓂ ᑭᓯᐊᓂ ᑭᒡᓕᖃᕐᓇᓂ ᐊᕐᓇᐃᑦ ᑲᑎᒪᔨᕐᔪᐊᖏᑦ ᑲᓇᑕᒥ, ᒪᓕᒐᓕᕆᔨᒃᑯᑦ ᑲᓇᑕᒥ, ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᒐᕙᒪᑐᖃᒃᑯᑦ ᐅᓂᕐᓗᒍᑎᒋᔭᐅᔪᓂᒃ ᖃᐅᔨᓴᖅᑏᑦ ᐱᕋᔭᒃᑕᐅᓯᒪᔪᓄᑦ ᐸᕐᓇᐅᑎᓕᐅᖁᓪᓗᒋᑦ ᐃᑲᔪᕐᓂᕐᓴᐅᔪᓄᐊᖅᑎᑦᑎᓂᕐᒧᓪᓗ ᐊᑦᑎᒃᓯᒋᐊᖅᑎᔾᔪᑕᐅᓇᓱᐊᕐᓯᒪᕗᖅ ᐋᓐᓂᕐᓯᕆᓂᐅᕙᒃᑐᓄᑦ ᐃᓄᐃᑦ ᐊᕐᓇᓄᑦ ᓱᕈᓯᓄᓪᓗ. 2011-ᒥ, ᐃᖅᑲᓇᐃᔭᖅᑎᑦ ᑲᑎᖃᑎᖃᕐᓯᒪᕗᑦ ᒐᕙᒪᑐᖃᒃᑯᑦ ᐱᓕᕆᕝᕕᖁᑎᖏᓐᓂᒃ ᐱᓕᕆᐊᖃᕐᓂᕐᒧᑦ ᑲᑐᔾᔨᖃᑎᒌᒃᑐᑦ ᐃᓚᒌᓂ ᐋᓐᓂᕐᓯᕆᓂᐅᕙᒃᑐᑲᓄᑦ ᐅᔾᔨᕈᓱᓕᖅᑎᑦᑎᓇᓱᐊᕐᓂᕐᒥᒃ ᐊᔾᔨᐅᖏᑦᑐᑦ ᖃᓄᐃᓕᐅᓂᐅᕙᒃᑐᑦ ᓯᕗᓪᓕᐅᔾᔭᐅᔭᕆᐊᓖᓪᓗ ᐃᓄᐃᑦ ᐊᕐᓇᓄᑦ ᑕᒪᑐᒧᖓ ᐱᒻᒪᕆᐅᔪᑎᒍᑦ ᐱᔾᔪᑎᒃᓴᒧᑦ.

ᐸᐅᒃᑑᑎᒃᑯᑦ ᐱᓕᕆᐊᖓᑦ ᐅᒃᐱᕆᔭᖃᕐᐳᑦ ᐊᑐᐊᒐᓂ ᐱᓕᕆᖃᕐᓂᕐᒧᑦ ᐊᑕᖏᐅᒪᔪᑎᒍᑦ ᐱᓕᕆᐊᖑᓇᓱᐊᕐᑐᓂᒃ ᐃᓚᓕᐅᔾᔨᓯᒪᔪᖅ ᐊᕐᓇᓂᒃ, ᓱᕈᓯᓂᒃ, ᐃᓚᒌᓂᒃ, ᐊᒻᒪᓗ ᓄᓇᓕᐅᔪᓂᒃ. ᐅᓇ ᐊᑑᑎᒋᓐᖑᐊᕐᓗᒍ ᑕᒪᑐᒥᖓ ᓴᓐᖏᓂᐅᔪᒥᒃ ᐱᓕᕆᖃᑎᖃᕐᓂᕐᒧᑦ ᐃᑲᔪᖅᑕᐅᓂᕐᒧᓪᓗ ᐃᓄᑐᖃᓂᑦ, ᐃᓄᐃᑦ ᑲᑐᔾᔨᖃᑎᒌᓂᑦ ᐊᒻᒪᓗ ᐱᔾᔪᑎᐅᔪᒧᑦ ᖃᐅᔨᓴᔨᑕᐅᔪᓂᒃ ᖃᐅᔨᒪᔨᑕᐅᓪᓗᑎᒃ ᑲᑎᒪᔨᕋᓛᖑᖁᑎᒋᓕᖅᓯᒪᔭᕗᑦ. ᐸᐅᒃᑑᑎᒃᑯᑦ ᐱᓂᕐᓗᒃᑕᐃᓕᒪᔪᓕᕆᔨᒃᑯᖏᑦ ᒥᑭᑦᑑᓪᓗᑎᒃ ᑲᑐᔾᔨᖃᑎᒌᑦ ᑐᓐᓂᖅᑯᑎᒋᓯᒪᔭᖓᓄᑦ ᐃᓄᖕᓄᑦ ᐊᔾᔨᒌᓐᖏᕈᓗᐃᔭᖅᑐᓂᒃ ᐱᔾᔪᑎᐅᔪᒧᑦ ᖃᐅᔨᒪᔨᑕᐅᔪᑦ. ᐱᓕᕆᔨᐅᔪᑦ, ᐱᔨᑦᑎᕋᕈᑎᓄᑦ ᐱᑕᖃᕐᑎᑦᑎᔨᐅᓇᑎᒃ, ᐅᖃᖃᑎᖃᖃᑦᑕᕐᐳᑦ ᐊᒥᓱᑦ ᐱᕙᓪᓕᐊᕆᐊᖃᖅᑐᑦ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐱᓕᕆᖃᑎᖃᑦᑎᐊᖃᑦᑕᕐᐳᑦ ᐱᓕᕆᔨᐅᔪᓂᒃ. ᐊᐅᓚᑦᑎᔨᐅᓪᓗᑎᒃ ᑲᑎᒪᔩᑦ ᑲᔪᓯᓂᖃᑦᑎᐊᕈᑎᖃᕐᓯᒪᕗᑦ ᐊᒥᓱᑦ ᐱᓂᕐᓗᒃᑕᐃᓕᒪᑎᑦᑦᓂᐅᔪᓄᑦ ᐱᒋᐊᕈᑕᐅᓯᒪᔪᓂᒃ ᐃᑲᔪᖃᑦᑕᕐᓯᒪᓪᓗᑎᓪᓗ, ᐊᕕᒃᑐᖅᓯᒪᓂᐅᔪᓄᑦ ᑐᑭᓯᐅᒪᓂᕆᔭᐅᔪᓂᒃ ᐊᒻᒪᓗ ᐱᔾᔪᑎᒃᓴᒧᑦ ᖃᐅᔨᒪᔨᑕᐅᓂᕐᒥᒃ. ᐸᐅᒃᑑᑎᒃᑯᑦ ᐱᓕᕆᐊᖓᑦ ᐃᓚᒌᓂ ᐋᓐᓂᕐᓯᕆᓂᕐᒧᑦ ᐊᒻᒪᓗ ᓱᕈᓰᑦ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᕙᖕᓂᖏᓐᓄᑦ ᐱᔪᓐᓇᕐᑎᑕᐅᒐᔭᓚᐅᓐᖏᓚᖅ ᐊᖏᕐᓯᒪᓂᖃᕋᔭᓚᐅᖏᑉᐸᑕ ᐃᑲᔪᖅᓱᐃᓯᒪᖏᑉᐸᑕᓗ ᐊᒥᓱᑦ ᑲᑐᔾᔨᖃᑎᒋᔭᐅᕙᒃᑐᑦ.