ᑕᕝᕚᑭᒧᑦ ᓄᖅᑲᕐᓂᖅ

ᓱᐴᖅᑐᖃᑦᑕᕐᓂᖅ ᐃᓚᒋᔭᐅᓚᐅᖅᓯᒪᓐᖏᓚᖅ ᐃᓄᐃᑦ ᐱᖅᑯᓯᖓᓂᑦ. ᑕᕝᕚᑭ ᐅᔾᔨᕆᔭᐅᑎᑕᐅᓕᕐᓯᒪᕗᖅ ᐅᑭᐅᖅᑕᖅᑐᒧᑦ 100 ᐊᕐᕌᒍᐃᑦ ᐊᓂᒍᖅᓯᒪᓕᖅᑐᓂ ᓄᓇᐅᑉ   ᐱᐅᓯᕆᔭᐅᔪᖅ ᑕᕚᑭᒧᑦ ᐊᑐᖅᑕᐅᕙᖕᓂᖓ ᐊᓯᔾᔨᒻᒪᕆᒃᓯᒪᕗᖅ, ᐃᓗᓯᕐᒧᑦ ᐃᓄᓕᕆᓂᒃᑯᓪᓗ ᖃᓄᐃᓕᐃᔾᔪᑎᐅᓯᒪᓂᖓᓄᑦ ᐃᓚᓕᐅᔾᔨᓯᒪᓪᓗᓂ.

1994 ᓄᓐᖑᐸᓗᐊᓂ, ᐸᐅᒃᑑᑎᒃᑯᑦ ᐱᓕᕆᐊᖃᖅᐸᓪᓕᐊᓯᒪᕗᑦ ᓴᖅᑮᓂᕐᒥᒃ ᑲᓇᑕᒥ ᐅᔾᔨᕈᓱᓕᖅᑎᑦᑎᓇᓱᐊᕐᓂᕐᒧᑦ ᐊᒻᒪᓗ ᐱᓕᕆᐊᖑᖁᓪᓗᒍ ᖁᐊᖅᓵᕐᓇᖅᑐᑎᒍᑦ ᓈᓴᖅᑕᐅᓯᒪᔪᑦ ᑕᑯᒃᓴᐅᓂᖃᖅᑎᑦᑎᓪᓗᓂ 72 ᐳᓴᓐᑎᐅᔪᑦ ᐃᓄᐃᑦ ᐊᕐᕌᒍᖃᕐᑐᑦ 15 ᐅᖓᑎᐊᓄᓪᓗ ᓱᐴᖅᑐᖃᑦᑕᕐᓂᖏᓐᓂᒃ. ᑕᐃᔅᓱᒪᓂᐅᑎᓪᓗᒍ, ᑲᓇᑕᒥ ᐱᒋᐊᖅᑎᑦᑎᔪᖃᖅᓯᒪᓐᖏᓚᖅ ᐃᓄᐃᑦ ᓱᐴᖅᑐᖅᐸᒃᑐᓄᑦ ᓴᖅᑭᔮᖅᓯᒪᓇᓂ, ᐊᒻᒪᓗ ᑕᐃᒪᐃᑉᐳᖅ, ᑕᕝᕚᑭᐅᑉ ᐊᑐᖅᑕᐅᕙᖕᓂᖓ ᐃᓱᒪᓇᖅᑑᓂᖓᓄᑦ ᐱᔾᔪᑎᐅᓯᒪᓪᓗᓂ ᐅᑭᐅᖅᑕᖅᑐᒥ. ᐸᐅᒃᑑᑎᒃᑯᑦ ᓴᖅᑮᓯᒪᕗᑦ ᐃᓄᐃᑦ ᐱᓕᕿᐊᖃᕐᓂᒃᑯᑦ ᑲᑎᒪᔨᓂᒃ ᑭᒡᒐᖅᑐᕐᑕᐅᓪᓗᑎᒃ ᑎᒃᑯᐊᖅᑕᐅᓯᒪᔪᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᑎᒪᔨᑦ ᐊᕐᕕᓂᓖᑦ ᐊᕕᒃᑐᖅᓯᒪᓂᐊᓃᑦᑐᓂ (ᐅᐊᓕᓂᕐᒥ, ᕿᑎᕐᒥᐅᓂ, ᑭᕙᓪᓕᕐᒥ, ᕿᑭᖅᑖᓗᒻᒥ, ᓄᓇᕕᒻᒥ ᐊᒻᒪᓗ ᓛᐸᑐᐊᒥᐅᑦ ᓯᔾᔭᖅᐸᓯᖓᓃᑦᑐᓂ). ᑲᑎᖃᑎᒌᒃᓯᒪᕗᑦ ᓇᓗᓇᐃᖅᓯᖁᓪᓗᒋᑦ ᑐᕌᒐᕆᔭᐅᔪᓂᒃ ᐱᓕᕆᐊᒃᓴᕆᔭᐅᔪᓂᓪᓗ ᑲᓇᑕᒥ ᑕᕝᕚᑭᐅᑉ ᐊᑐᖅᑕᐅᕙᖕᓂᖓᓄᑦ ᐊᑐᖏᓐᓂᕐᓴᐅᑎᑦᑎᓇᓱᐊᕐᓂᕐᒧᑦ ᐃᓄᖕᓄᑦ.

ᖃᐅᔨᓴᕐᑎᐅᓪᓗᑎᒃ ᑲᑐᔾᔨᖃᑎᒌᒃᑐᑦ ᓱᕈᓯᓄᑦ ᒪᒃᑯᒃᑐᓄᓪᓗ ᐱᓕᕆᐊᖃᕐᓯᒪᕗᖅ ᐅᖃᖃᑎᒌᒍᑎᖃᕐᓯᒪᓪᓗᑎᒃ ᐋᓐᓂᐊᖅᑐᓕᕆᔨᐅᔪᓂᒃ ᐃᓕᓐᓂᐊᕐᑎᑦᑎᔨᐅᓪᓗ ᐃᓕᓯᑎᑕᐅᓗᑎᒃ. ᑭᒃᑯᓕᒫᓄᑦ ᐅᖃᖃᑎᒌᒍᑎᐅᓯᒪᓪᓗᓂ ᑕᓚᕖᓴᒃᑯᑦ ᓈᓚᐅᑎᒃᑯᓪᓗ ᐱᑕᖅᑎᑦᑎᓯᒪᓪᓗᑎᒃ ᑐᑭᓯᒋᐊᕈᑎᒃᓴᓂᒃ ᑐᑭᒧᐊᒍᑎᐅᓂᐊᕐᑐᓂᓪᓗ ᐋᖅᑭᒃᓱᐃᔨᐅᔪᓄᑦ. ᖃᓄᐃᓕᐅᕈᑕᐅᓯᒪᔪᓕᒫᑦ ᐱᔨᑦᑎᕋᕈᑎᐅᓯᒪᓪᓗᑎᒃ ᐅᔾᔨᕈᓱᓕᖅᑎᑦᑎᓂᕐᒧᑦ ᐱᔾᔪᑎᒃᓴᐅᔪᓂᒃ ᐊᑦᑕᕐᓇᕐᓂᖏᑦ ᐱᔾᔪᑎᒋᓪᓗᒍ ᑕᕝᕚᑭᐅᑉ ᐊᑐᖅᑕᐅᕙᖕᓂᖓᓄᑦ.

ᒪᕐᕉᒃ ᐅᓂᒃᑳᓕᐅᕈᑕᐅᓯᒪᕗᑦ ᑖᒃᑯᓇᓐᖓᑦ ᖃᓄᐃᓕᐅᕐᓂᕆᔭᐅᓯᒪᔪᓂᑦ:

  • ·   ᒪᓕᒐᐃᑦ ᐃᓄᐃᑦ ᓄᓇᓕᖏᓐᓄᑦ ᐱᓕᕆᐊᖃᕐᑐᑦ ᐊᑦᑎᒃᓯᒋᐊᖅᑎᑦᑎᓂᕐᒧᑦ ᑕᕝᕚᑭᐅᑉ ᐊᑐᖅᑕᐅᕙᖕᓂᖓᓄᑦ ᓇᓗᓇᐃᔭᐃᓯᒪᓪᓗᓂ ᐱᔾᔪᑎᒃᓴᐅᔪᓄᑦ, ᐊᒡᕕᐊᕈᑎᐅᔪᑦ ᐋᖅᑭᒋᐊᕈᑎᒃᓴᐃᓪᓗ ᐱᔾᔪᑎᖃᕐᑐᑦ ᐱᖓᓱᑦ ᐱᔾᔪᑎᐅᔪᓄᑦ ᖁᕝᕙᕆᐊᖅᑎᔾᔪᑕᐅᓇᓱᐊᕐᓯᒪᓪᓗᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᑕᕝᕚᑭ ᐊᑐᖅᑕᐅᖏᓐᓂᕐᓴᐅᓕᖁᓪᓗᒍ ᐸᕐᓇᐅᑎᓕᐊᓯᖅ – ᐱᑦᑕᐃᓕᒪᑎᑦᑎᓂᖅ, ᓄᖅᑲᕐᑎᑦᑎᓂᖅ ᐊᒻᒪᓗ ᓴᐳᒻᒥᑦᑎᓂᖅ; ᐊᒻᒪᓗ
  • ᐃᓄᐃᑦ ᐊᒻᒪᓗ ᑕᕝᕚᑭ ᐅᓂᒃᑳᓕᐊᖑᓯᒪᓪᓗᓂ ᐸᐅᒃᑑᑎᒃᑯᑦ ᐅᖃᐅᔾᔪᐃᖃᑎᒌᒍᑎᓯᒪᔭᖓᒍᑦ ᐊᒻᒪᓗ ᖃᐅᔨᓴᕈᑎᐅᓯᒪᔪᑦ ᐊᒻᒪᓗ ᑐᓐᖓᓂᖃᕐᑐᑦ ᖃᐅᔨᔭᐅᓯᒪᔪᓄᑦ, ᐊᑐᓕᖁᔨᔾᔪᑎᒃᓴᐅᓕᐅᕐᓯᒪᓪᓗᑎᒃ ᐱᓕᕆᐊᖑᓇᓱᐊᕐᑐᒧᑦ ᐋᖅᑭᒃᓯᒪᓂᖓᒍᑦ.

ᖃᐅᔨᓴᖅᑕᐅᓯᒪᔪᖅ ᐱᓕᕆᐊᖑᕙᓪᓕᐊᓂᖓᓂᑦ ᓯᕗᓪᓕᖅᐹᖓᓂᑦ ᑕᑯᒃᓴᐅᑎᑦᑎᓯᒪᒐᓗᐊᖅᑎᓪᓗᒍ ᓴᓐᖏᔪᒥᒃ ᐃᓄᓂᓕᕆᔨᒃᑯᑦ ᓂᐅᕐᕈᑎᖃᕐᓂᒃᑯᑦ ᐊᑐᐃᓐᓇᐅᑎᑕᐅᓂᖓ ᐱᓕᕆᐊᖑᓇᓱᐊᕐᑐᒧᑦ ᐊᑑᑎᖃᕋᔭᕐᓗᓂ ᑲᑎᓕᒫᕐᓗᒋᑦ ᑲᔪᓯᔾᔪᑕᐅᑦᑎᐊᕐᓯᒪᔪᓄᑦ, ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᐅᔪᖅ ᓈᒻᒪᓐᖏᓗᐊᕐᓯᒪᖕᒪᑦ ᐃᑲᔪᖅᓱᐃᔾᔪᑎᐅᓗᓂ ᑖᒃᑯᓄᖓ ᐸᕐᓇᐅᑕᐅᓯᒪᔪᑦ ᖃᓄᐃᓕᐅᕐᓂᕐᒧᑦ. ᐱᓕᕆᐊᒥ ᐃᒃᐱᒍᓱᖕᓂᕐᓴᐅᑎᑦᑎᓇᓱᒃᓯᒪᕗᖅ ᐱᕙᓪᓕᐊᑎᑦᑎᓂᕐᒥᒃ ᐃᑲᔪᕈᑎᒃᓴᐅᒐᔭᕐᑐᑦ ᐅᖃᓕᒫᒐᒃᓴᓄᑦ, ᑐᓐᖓᒋᔭᖃᕐᓂᖅ ᐊᑭᖃᖏᑦᑐᒃᑯᑦ ᐱᕙᓪᓕᐊᔪᒃᑯᑦ ᐱᕙᓪᓕᐊᔪᕆᔭᐅᔪᓂᒃ, ᐱᕈᖅᓴᐃᓇᓱᐊᕐᓂᖅ ᐊᓯᖏᓐᓂᒃᑮᓇᐅᔭᖃᖅᑎᑕᐅᓂᐅᔪᓂᒃ ᐃᑲᔪᖅᓱᖅᑕᐅᖁᓪᓗᒍ ᐊᑦᑎᒃᓯᒋᐊᖅᑎᑦᑎᒻᒪᕆᒃᓯᒪᖕᒪᑦ ᐸᕐᓇᐅᑕᐅᓯᒪᔪᖅ ᐃᓄᓕᕆᓂᒃᑯᑦ ᒪᑭᒪᐅᑎᓄᑦ ᐊᑐᐃᓐᓇᐅᑎᑦᑎᓂᕐᒧᑦ ᖃᓄᐃᓕᐅᕐᓂᐅᔪᓂᒃ.

ᑲᑐᔾᔨᖃᑎᖃᕐᓂᖅ ᐃᓚᐅᓂᖃᖅᑎᑦᑎᓯᒪᕗᖅ ᓴᖅᑮᒥᓂᕐᒥᒃ ᐃᑲᔪᕈᑎᒃᓴᓄᑦ ᐱᓕᕆᐊᖑᕙᓪᓕᐊᓂᖓᑕ ᑭᖑᓪᓕᖓᓂ ᐱᓕᕆᐊᑦ ᐱᓕᕆᐊᖑᓯᒪᒻᒪᕆᒃᐳᑦ, ᐃᓄᐃᑦ ᐃᓕᓐᓂᐊᕐᑎᑦᑎᔨᐅᔪᑦ, ᐅᖃᓕᒫᒐᓕᐅᖃᑦᑕᕐᑐᑦ, ᑕᕐᕆᔭᒐᓕᐅᖅᑎᑦ, ᐃᔾᔪᐊᕈᒥᓇᕐᑐᑦ ᐃᓄᐃᑦ, ᐱᓐᖑᐊᕐᑏᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᔨᐅᔪᑦ, ᓴᓇᓐᖑᐊᕐᑎᑦ ᐊᓯᖏᓪᓗ ᐊᖏᔪᒻᒪᕆᒻᒧᑦ ᐱᓕᕆᖃᑕᐅᓯᒪᕗᑦ ᓴᖅᑮᓂᕐᒥᒃ ᐱᖁᑎᓂᒃ. ᒪᕐᕉᒃ ᐃᑲᔪᕈᑎᒃᓴᓕᐊᖑᓯᒪᔪᑦ ᓴᓇᔭᐅᓯᒪᕗᑦ, ᐊᑕᐅᓯᖅ ᓄᓇᓕᐅᔪᓄᑦ ᐊᒻᒪᓗ ᐊᐃᑉᐸᖓ ᐊᑐᖅᑕᐅᓂᐊᕐᓗᓂ ᐃᓕᓐᓂᐊᕐᕕᖕᓂ.

ᑖᒃᑯᐊ ᐱᓕᕆᔾᔪᑎᒃᓴᐅᔪᑦ ᑐᓂᐅᖅᑲᖅᑕᐅᓯᒪᓪᓗᑎᒃ ᐋᓐᓂᐊᕕᖕᓄᑦ ᐃᓕᓐᓂᐊᕐᕕᖕᓄᓪᓗ 53 ᐃᓄᐃᑦ ᓄᓇᓕᖏᓐᓄᑦ ᐅᑭᐅᖅᑕᖅᑐᒥ. ᐊᓯᖏᑦ ᐱᓕᕆᕝᕕᐅᔪᑦ ᓄᓇᓕᐅᔪᓂ ᓄᓇᓕᐸᐅᔭᓕᖕᓂᓗ ᐱᓕᕆᕝᕕᐅᔪᑦ ᑐᒃᓯᕋᐅᑎᖃᖅᓯᒪᕗᑦ ᐊᔾᔨᖓᓂᓪᓗ ᐱᓯᒪᓪᓗᑎᒃ, ᐊᓯᖏᓪᓗ ᐃᓄᐃᑦ.

ᑐᓴᕈᒪᒻᒪᕆᒃᓯᒪᓪᓗᑎᒃ ᐊᕕᒃᑐᖅᓯᒪᓂᐊᓃᑦᑐᑦ, ᑎᑎᖅᑲᐃᑦ ᐃᑲᔪᖅᓱᐃᓂᒃᑯᑦ ᐱᓕᕆᐊᖑᓇᓱᐊᕐᓯᒪᔪᓪᓗ ᐸᐅᒃᑑᑎᒃᑯᓐᓂ, ᑮᓇᐅᔭᖃᖅᑎᑕᐅᓂᖅ ᐊᓂᖅᓵᑦᑎᐊᕐᓂᖅ-Breathing Easy ᐱᓕᕆᐊᖑᔪᖅ ᐃᓱᓕᓯᒪᓪᓗᓂ ᒫᔨ 1997-ᒥ. ᖃᓄᐃᓕᐅᕈᑕᐅᓯᒪᔪᑦ ᐃᓚᖃᕐᐳᖅ ᐱᓕᕆᖃᑎᖃᕐᓂᕐᒥᒃ ᒪᒃᑯᒃᑐᓂᒃ ᓄᓇᓕᖕᓂᓗ ᐱᓕᕆᑎᑦᑎᔨᐅᔪᓂᒃ ᓄᓇᕕᒻᒥ ᐃᓅᕕᐊᓗᖕᓂ 2004/05 ᐊᐱᖅᓱᖅᑕᐅᓗᑎᒃ ᐃᓄᑐᖃᐃᑦ ᖃᓄᖅ ᑕᕝᕚᑭ ᐅᔾᔨᕆᔭᐅᑎᑕᐅᓕᖅᓯᒪᖕᒪᖔᑦ ᓄᓇᓕᒋᔭᖏᓐᓄᑦ ᖃᓄᐃᑦᑐᓂᓪᓗ ᐊᒃᑐᐃᓂᖃᖅᓯᒪᖕᒪᖔᑦ. ᐅᖃᓕᒫᒐᖅ ᐊᒻᒪᓗ ᓴᓂᕋᕐᒥᐅᑕᖅ ᐊᑎᖃᕐᑐᖅ ᓯᕗᓕᕗᑦ ᓯᒡᒐᓕᐊᖅᑐᖃᑦᑕᕐᓯᒪᓐᖏᓚᑦ ᓴᖅᑭᑕᐅᓯᒪᓪᓗᓂ ᑐᓂᐅᖅᑲᖅᑕᐅᓯᒪᓪᓗᓂᓗ 2005/06-ᒥ, ᖁᓕᐅᓐᖏᓱᖓᕐᑐᑦ ᒪᒃᑯᒃᑐᑦ ᐱᖓᓱᓂᑦ ᓄᓇᕗᑦ ᓄᓇᓕᖏᓐᓂ ᐊᒻᒪᓗ ᐊᑕᐅᓯᖅ ᓄᓇᑦᓯᐊᕐᒥ ᐱᓕᒻᒪᒃᓴᖅᑕᐅᓯᒪᕗᑦ ᐱᓇᓱᐊᕈᓯᓕᒫᕐᒧᑦ ᐃᓕᓐᓂᐊᕐᑎᑕᐅᓪᓗᑎᒃ ᐃᖃᓗᒃᑑᑦᑎᐊᕐᒥ, ᑭᖑᓂᐊᒍᑦ ᓄᓇᓕᒋᔭᖏᓐᓄᑦ ᐅᑎᕐᓯᒪᓪᓗᑎᒃ ᐊᒻᒪᓗ ᐸᕐᓇᐅᑎᓕᐅᕐᓯᒪᕗᑦ ᐊᑐᓕᖅᑎᑦᑎᓯᒪᓪᓗᑎᓪᓗ ᓄᓇᓕᖕᓂ ᐱᓕᕆᐊᓂᒃ.

ᐱᓕᕆᐊᖃᕐᓂᕐᒧᑦ ᖃᓄᐃᓕᐅᕐᓂᐅᔪᑦ ᐃᓚᖃᖅᓯᒪᕗᑦ:

ᐱᓕᒻᒪᒃᓴᐃᓂᖅ ᐃᓄᐃᑦ ᓯᒡᒐᓕᐊᕐᑐᖅᐸᒃᑯᑐᓄᑦ ᐃᑲᔪᑎᖅᓂᒃ ᐊᑐᕐᓗᑎᒃ ᐅᖓᓯᒃᑐᓄᑦ ᐃᓕᓐᓂᐊᕐᑎᑦᑎᓂᒃᑯᑦ 2005/06 (ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ)

ᓴᓐᖏᓪᓕᑎᑦᑎᓂᖅ ᐃᓗᓕᖃᕐᓂᕆᔭᖓᓂᒃ ᐅᖓᕙᕆᐊᖅᑎᑦᑎᓂᓪᓗ ᐃᑲᔪᕐᓂᕐᒧᑦ – ᑕᕝᕚᑭᐅᑉ ᐊᐅᓚᑕᐅᓕᕐᓂᖓ ᐃᓄᐃᑦ ᓄᓇᓕᖕᓂ. 2006/07 (ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ – ᐊᓪᓚᓄᑦ ᐃᓄᖕᓄᓪᓗ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ)

ᐊᓂᖅᓵᑦᑎᐊᕐᓕᕐᑎᑦᑎᓂᖅ 2006/07 (ᓄᓇᕗᑦ ᒐᕙᒪᒃᑯᖏᑦ)

ᓇᔾᔨᔪᑦ ᐃᓱᒪᓕᐅᕆᓂᖓᑦ: ᐃᓕᓐᓂᐊᕐᑎᑦᑎᓂᕐᒧᑦ ᑲᑎᒪᓯᓐᓈᕐᑎᓪᓗᒋᑦ ᐃᔾᔪᐊᒐᒃᓴᖅ 2007/08 (ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ)

ᐸᐅᒃᑐᑎᒃᑯᑦ ᐱᓕᕆᐊᖃᕐᐸᓪᓕᐊᔪᑦ ᐸᕐᓇᐅᑎᓕᐅᕐᓂᕐᒥᒃ, ᑐᑭᒧᐊᒃᑎᑦᑎᓂᕐᒧᑦ ᐱᓕᕆᐊᖃᕐᓂᕐᒧᓪᓗ ᐱᕙᓪᓕᐊᑎᑦᑎᓂᕐᒧᑦ ᐃᓄᖕᓅᖓᔪᓄᑦ ᐊᑐᓕᖅᑎᑦᑎᓂᖅ ᐃᓱᒪᓕᐅᕈᑎᖃᕐᓂᖅ ᐊᑦᑎᒃᓯᒋᐊᖅᑕᐅᖁᓪᓗᒍ ᐊᓯᒧᑦ ᓱᐴᖅᑐᕐᑕᐅᕙᒃᑐᒧᑦ ᐱᓕᕆᐊᒥᒃ (STARSS) ᓴᖅᑭᑕᐅᓯᒪᓪᓗᓂ ᖃᓄᐃᓕᐅᕈᑎᖃᕐᓂᖅ ᐃᓄᐃᑦ ᐅᐃᕆᓯᒪᓂᕆᔭᖏᓐᓄᑦ – ᖃᐅᔨᓴᕐᓂᖅ ᐃᓕᓐᓂᐊᕐᑎᑦᑎᓂᕐᓗ (AWARE). ᐊᑯᓂᐅᓂᕆᔭᖓ ᐱᓕᕆᐊᖑᔪᒧᑦ ᓄᕕᐱᕆ 2011 ᑎᑭᓪᓗᒍ ᒪᐃ 2013-ᒧᑦ.