ᓄᓇᒥ ᐲᔭᖅᑕᐅᔪᑦ

“]”]”].

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐅᖅᑰᓯᕙᓪᓕᐊᒻᒪᕆᒃᑎᓪᓗᒍ ᐅᑭᐅᖅᑕᕐᑐᒥ, ᐊᕕᒃᑐᖅᓯᒪᓂᐅᔪᒧᑦ ᐃᓯᖅᑕᐅᔪᓐᓇᓂᕐᓴᐅᓕᕐᓂᖓᓄᑦ ᐅᔭᕋᖕᓂᐊᕐᕕᐅᕙᓪᓕᐊᑐᐃᓐᓇᕐᒪᑦ ᐅᑭᐅᖅᑕᖅᑐᒥ.  ᐅᔭᕋᖕᓂᐊᕐᕖᑦ, ᐅᖅᓱᐊᓗᓕᕆᕝᕕᐅᔪᓪᓗ ᑮᓇᐅᔭᓕᐅᕐᑎᑦᑎᒻᒪᕆᒃᑎᓪᓗᒋᑦ ᐃᓄᖕᓄᑦ, ᐱᑕᖃᕆᕗᖅ ᐃᓄᓕᕆᓂᕐᒧᑦ , ᐊᕙᑎᒧᑦ ᐃᓅᓯᓕᕆᓂᕐᒧᓪᓗ ᐱᕙᓪᓕᐊᓂᖃᕐᑐᓂᒃ ᑖᒃᑯᐊ ᖃᓄᐃᓕᐅᕐᓂᕆᔭᐅᕙᒃᑐᑦ ᐊᓚᓐᖑᐊᕐᑕᐅᔭᕆᐊᖃᓐᖏᓚᑦ. ᐸᐅᒃᑑᑎᒃᑯᑦ ᐅᒃᐱᕈᓱᒃᐳᑦ ᑐᑭᓯᐅᒪᔭᐅᓂᕐᓴᐅᔭᕆᐊᖃᕐᓂᖓᓂᒃ ᐊᑕᖏᐅᒪᔪᑎᒍᑦ ᐃᓅᓯᓕᕆᓂᕐᒧᑦ ᖃᐅᔨᓴᕐᓂᐅᔪᓂᒃ ᐃᓚᓕᐅᔾᔨᓯᒪᓗᓂ ᖃᐅᔨᓴᕐᓂᕐᒥᒃ – ᑕᒪᕐᒥᒃ ᐃᑲᔫᑎᐅᔪᓄᑦ ᖁᕕᐊᓇᖏᑦᑐᓄᓪᓗ – ᐅᔭᕋᖕᓂᐊᕐᕕᐅᔪᓄᑦ ᖃᓄᐃᓕᐅᕈᑕᐅᔪᑦ ᐊᒃᑐᐃᔾᔪᑕᐅᒐᔭᕐᑐᑦ ᐃᓄᐃᑦ ᐊᕐᓇᓄᑦ.

2007-ᒥ, ᐸᐅᒃᑑᑎᒃᑯᑦ ᐊᐅᓚᑦᑎᔨᐅᓪᓗᑎᒃ ᑲᑎᒪᔨᖏᑦ ᐱᖁᔨᕗᖔᕈᑎᒥᒃ ᑲᔪᓯᑎᑦᑎᕋᑖᓚᐅᕐᑐᑦ ᖃᐅᔨᓴᖅᑕᐅᖁᓪᓗᒋᑦ ᐊᒃᑐᐃᔾᔪᑎᐅᕙᒃᑐᑦ ᐅᔭᕋᖕᓂᐊᕐᓂᕐᒧᑦ ᖃᓄᐃᓕᐅᕐᓂᐅᕙᒃᑐᑦ ᐃᓄᐃᑦ ᐊᕕᒃᑐᖅᓯᒪᓂᐊᓂ. ᐱᓗᐊᖅᑐᒥᒃ, ᐃᓱᒫᓗᒋᔭᐅᓕᕐᓯᒪᖕᒪᑕ ᓄᓕᐊᕐᓂᒃᑯᑦ ᖃᓂᒻᒪᒃᑖᖅᑕᐃᓕᑎᑦᑎᓂᕐᒧᑦ ᐊᕐᓇᓂᒃ ᓄᓇᖃᕐᑐᑦ ᐅᔭᕋᖕᓂᐊᕐᕖᑦ ᖃᓂᒋᔭᖏᓐᓂ. ᓈᓴᖅᑕᐅᓯᒪᔪᓂ ᑕᑯᒃᓴᐅᓂᖃᖅᑎᑦᑎᕗᖅ ᐃᓄᐃᑦ ᓵᔾᔪᑎᖃᓕᕇᖅᓯᒪᓂᖏᓐᓂᒃ ᑎᓴᒪᐅᔪᖅᑐᑎᒍᑦ ᖁᕝᕙᓯᖕᓂᕐᓴᐅᓂᖓ ᑲᓇᑕᒥᓕ ᐊᑯᓪᓕᖅᐹᖅᓱᕐᓂᕆᔭᖓᒍᑦ ᓄᓕᐊᕐᓂᒃᑯᑦ ᐋᓐᓂᐊᕐᓇᖅᑖᕆᔭᐅᓯᒪᔪᑦ/ᐊᒻᒪᑎᕐᓂᐅᔪᑦ ᐊᐃᑦᑐᕐᓗᒍᑎᐅᕙᒃᑐᓂ (STD/STIs) ᐊᒻᒪᓗ ᐊᒥᓲᓂᖏᓐᓄᑦ ᐃᖅᑲᓇᐃᔭᕆᐊᖅᓯᒪᕙᒃᑐᓪᓗ ᓄᓇᓕᐅᔪᓂ ᐅᔭᕋᖕᓂᐊᕐᕕᖕᓂ ᖃᓂᒋᔭᖏᓐᓃᑦᑐᑦ ᐊᑦᑕᕐᓇᕐᑐᒃᑰᕐᑎᑦᑎᕙᓪᓕᐊᑐᐃᓐᓇᕐᐳᖅ ᐃᓄᖕᓄᑦ. ᐸᐅᒃᑑᑎᒃᑯᑦ ᓯᕗᓪᓕᖅᐹᒧᑦ ᑲᓇᑕᒥ ᑲᑎᒪᕕᔾᔪᐊᕐᑎᑦᑎᓯᒪᕗᑦ ᓄᓇᒥ ᐲᔭᖅᑕᐅᔪᓄᑦ ᐊᒃᑐᐃᔾᔪᐅᓯᒪᔪᑦ ᐃᓄᐃᑦ ᓄᓕᐊᕐᓂᒃᑯᑦ ᖃᓂᒻᒪᒃᑖᖅᑕᐃᓕᑎᑦᑎᓂᕐᒧᑦ 2008-ᒥ. ᑲᑎᒪᕕᔾᔪᐊᕐᓂᐅᔪᒥ ᓴᖅᑮᓯᒪᕗᖅ ᑲᑎᒪᓂᐅᔪᒥᒃ ᓄᓇᖃᖅᑎᐅᔪᓄᑦ, ᐱᔨᑦᑎᕋᕈᑎᓄᑦ ᐱᑕᖃᖅᑎᑦᑎᔨᐅᔪᓄᑦ ᐊᒻᒪᓗ ᐱᓕᕆᕝᕕᒻᒥ ᐱᖃᑕᐅᓯᒪᔪᓄᑦ ᓇᓗᓇᐃᔭᖅᑕᐅᖁᓪᓗᒋᑦ ᐅᖃᐅᓯᐅᖁᓪᓗᒋᓪᓗ ᖃᓄᖅ ᐊᑦᑎᒃᓯᒋᐊᖅᑎᑦᑎᔪᓐᓇᕐᒪᖔᑦ ᓈᒻᒪᖏᑦᑐᓄᑦ ᐊᒃᑐᐃᔾᔪᑎᐅᕙᒃᑐᓄᑦ ᐅᔭᕋᖕᓂᐊᕐᓂᕐᒥ ᐊᖏᓪᓕᒋᐊᖅᑎᑦᑎᓇᓱᐊᕐᓯᒪᑎᓪᓗᒋᑦ ᒪᑭᒪᔾᔪᑎᒃᓴᐅᔪᓐᓇᓕᕋᔭᕐᑐᓂᒃ ᐃᓄᐃᑦ ᐃᓚᒌᓄᑦ. ᑕᐃᒪᓐᖓᓂᑦ, ᐸᐅᒃᑑᑎᒃᑯᑦ ᐱᓕᕆᖃᑎᖃᓂᕐᓴᐅᓯᒪᓕᕐᐳᑦ ᖃᐅᔨᓴᖅᑎᓂᒃ, ᓄᓇᓕᖕᓂ ᐋᖅᑭᒃᓱᐃᔨᓂᒃ ᐊᒻᒪᓗ ᐱᖃᑕᐅᓯᒪᓪᓚᕆᒃᑐᓂᒃ ᐃᓄᐃᑦ ᐊᕐᓇᐃᑦ ᓂᐱᖏᑦ ᓈᓚᒃᑕᐅᑦᑎᐊᕋᓗᐊᕐᒪᖔᑕ ᐱᔾᔪᑎᖃᕐᑐᖅ ᓄᓇᒥ ᐲᔭᐃᓂᕐᒧᑦ ᖃᓄᐃᓕᐅᕐᓂᐅᕙᒃᑐᓂ.

ᑲᑐᔾᔨᖃᑎᖃᕐᓂᒃᑯᑦ ᑲᓇᑕᒥ ᓄᓇᖃᖅᑳᕐᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᑲᑐᔾᔨᖃᑎᒌᒃᑯᓐᓂᒃ (NAHO), ᐸᐅᒃᑑᑎᒃᑯᑦ ᓴᖅᑭᑎᖃᑎᖃᕐᓯᒪᕗᑦ ᑐᑭᓯᒋᐊᕐᕕᒻᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᓂᕐᒥᒃ ᑕᐃᔭᐅᔪᖅ ᐊᕐᓇᐃᑦ ᐊᒻᒪᓗ ᐅᔭᕋᖕᓂᐊᕐᓂᕐᒧᑦ ᐱᓕᕆᕝᕕᐅᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ (WEICN). ᑕᒪᓐᓇ ᐱᓕᕆᐊᖅ ᐃᓚᐅᓂᖃᕐᑎᑦᑎᕗᖅ ᐱᕙᓪᓕᐊᑎᑦᑎᓯᒪᕗᖅ ᐱᓕᕆᖃᑎᒌᖕᓂᕐᒥᒃ ᐊᒥᖅᑳᕐᓂᕐᒥᓪᓗ ᑐᑭᓯᒋᐊᕈᑎᒃᓴᓂᒃ ᐊᓯᖏᓐᓄᑦ ᑲᑐᔾᔨᖃᑎᒌᖑᔪᓂᒃ, ᓄᓇᓕᖕᓂ ᐱᑕᖃᑕᐅᔪᓂᒃ, ᐃᓕᓐᓂᐊᕐᕕᐅᔪᓂᒃ ᐊᒻᒪᓗ ᐃᒻᒥᒃᑰᕐᑐᑦ ᖃᐅᔨᓴᖅᑎᓂᒃ ᖃᔨᐅᓴᕐᑕᐅᖁᓪᓗᒍ ᐱᔾᔪᑎᒃᓴᐅᔪᖅ ᑐᕌᖓᔪᖅ ᐊᕐᓇᓄᑦ ᐅᑭᐅᖅᑕᖅᑐᒥ. ᐊᕐᕌᒎᓯᒪᓕᕐᑐᒧᑦ, ᐸᐅᒃᑑᑎᒃᑯᑦ ᐃᒃᓯᕙᐅᑕᐅᖃᑕᐅᖃᑦᑕᕐᓯᒪᕗᑦ ᑲᑎᒪᓂᐅᔪᓂ ᐊᒥᖅᑳᖁᓪᓗᒋᑦ ᑐᑭᓯᒋᐊᕈᑎᒃᓴᓂᒃ ᑕᒪᑐᒧᖓ ᐱᒻᒪᕆᐅᔪᖅ ᐱᔾᔪᑎᒃᓴᐅᔪᒧᑦ.

ᐸᐅᒃᑑᑎᒃᑯᑦ ᐱᓕᕆᖃᑕᐅᓂᕐᓴᐅᔪᒪᓂᖏᓐᓄᑦ ᐱᔾᔪᑎᖃᕐᑐᖅ ᐃᓄᐃᑦ ᐊᕐᓇᓄᑦ ᐊᒻᒪᓗ ᓄᓇᒥ ᐲᔭᕐᕕᐅᔪᓄᑦ, ᐸᐅᒃᑑᑎᒃᑯᑦ ᐱᓯᒪᕗᑦ ᒥᑭᑦᑐᖅ ᑮᓇᐅᔭᓂᒃ ᑐᓐᓂᖅᑯᑕᐅᓯᒪᔪᓂᒃ ᑲᓇᑕᒥ ᐊᕐᓇᐃᑦ ᑲᑐᔾᔨᖃᑎᒌᒃᑯᖏᓐᓂᑦ (CWF) ᐱᕙᓪᓕᐊᑎᑦᑎᖁᓪᓗᒋᑦ ᐊᖏᓂᕐᓴᖅ ᑐᒃᓯᕋᐅᑎᓂᒃ ᐅᔭᕋᖕᓂᐊᓂᕐᒨᖓᔪᓄᑦ. ᑐᒃᓯᕋᐅᑕᐅᓯᒪᔪᖅ, ᑐᓂᔭᐅᓯᒪᓪᓗᓂ ᕕᕗᐊᕆ, 2012-ᒥ, ᐱᓕᕆᐊᖃᕈᒪᔾᔪᑕᐅᓯᒪᕗᖅ ᐊᕐᓇᐅᓂᖏᓐᓄᑦ/ᐊᖑᑕᐅᓂᖏᓐᓄᑦ ᑐᓐᖓᓂᖃᕐᑐᒧᑦ ᖃᐅᔨᓴᓂᕐᒥᒃ (GBA) ᖃᒪᓂᑦᑐᐊᖅ ᐅᔭᕋᖕᓂᐊᕐᕕᒻᒥ, ᐱᓕᕆᐊᖅ ᑮᓇᐅᔭᖃᕐᑎᑕᐅᑉᐸᑦ, ᖃᐅᔨᓴᕐᓂᖅ ᓴᖅᑮᑎᑎᒐᔭᕐᑐᖅ ᐊᕐᓇᐅᓂᖓᓄᑦ/ᐊᖑᑕᐅᓂᖓᓄᑦ ᖃᐅᔨᓴᕐᓂᕐᒧᑦ, ᓄᐊᑦᑎᓗᑎᒃ ᐃᓱᒪᒋᔭᐅᓯᒪᔪᑦ ᐃᓄᐃᑦ ᐊᕐᓇᓂᑦ ᐊᕐᕌᒍᖃᑎᒌᖏᑦᑐᓂ ᖃᐅᔨᓴᖅᑕᐅᖁᓪᓗᒍ ᑐᕌᑲᐅᑎᒋᔪᒃᑯᑦ ᐊᒃᑐᐃᔾᔪᑕᐅᕙᒃᑐᑦ ᐅᔭᕋᖕᓂᐊᕐᓂᒥ ᓄᓇᓕᖓᓂ.