ᓄᓇᕐᔪᐊᒥᐅᓂ ᖃᓄᐃᓕᐅᖃᑕᐅᑎᑦᑎᓂᖅ

ᑲᓇᑕᒥ ᑭᒡᒐᖅᑐᐃᓂᒃᑯᑦ ᓂᐱᖃᖅᑎᒋᔭᐅᓪᓗᑎᒃ ᐃᓄᐃᑦ ᐊᕐᓇᓄᑦ, ᐸᐅᒃᑑᑎᒃᑯᑦ ᐱᓕᕆᐊᖃᖃᑦᑕᕐᐳᑦ ᐃᓄᐃᑦ ᐊᕐᓇᐃᑦ ᐃᓱᒪᒋᔭᖏᑦ ᓈᓚᒃᑕᐅᑦᑎᐊᕋᓗᐊᕐᒪᖔᑕ ᓄᓇᕐᔪᐊᒥ. ᐱᓗᐊᕐᑐᒥᒃ, ᐸᐅᒃᑑᑎᒃᑯᑦ ᐱᕙᓪᓕᐊᑎᑦᑎᓯᒪᕗᑦ ᐱᓕᕆᖃᑎᒌᑦᑎᐊᓂᕐᒥᒃ ᓄᓇᖃᖅᑳᕐᓯᒪᔪᑦ ᐊᕐᓇᓂᒃ ᑭᒡᒐᖅᑐᐃᕝᕕᒋᔭᖏᓐᓄᓪᓗ ᑲᑐᔾᔨᖃᑎᒌᖑᔪᓂᒃ  ᐊᒥᐊᕆᑲᐃᑦ ᓂᒋᐊᓃᓐᓂᕐᓴᖏᓐᓃᑦᑐᓂ.

ᑐᕌᑲᐅᑎᒋᔪᒃᑯᑦ ᐃᓚᐅᖃᑕᐅᕙᒃᑎᓪᓗᒋᑦ ᐊᒥᐊᕆᒃᑲᐃᑦ ᓂᒋᐊᓃᓐᓂᕐᓴᖓᓂ ᑐᓴᐅᒪᖃᑦᑕᐅᑎᒌᒍᑎᓕᕆᓂᕐᒧᑦ, ᐸᐅᒃᑑᑎᒃᑯᑦ ᐃᓚᐅᖃᑕᐅᓯᒪᔪᑦ ᓄᓇᕐᔪᐊᒥ ᑲᑎᒪᔾᔪᑕᐅᔪᓂ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᓇᑭᑐᐃᓐᓈᕐᓯᒪᔪᑦ ᐊᒥᐊᕆᒃᑲᐃᑦ ᐅᐊᖕᓇᖓᓂ, ᕿᑎᖅᐸᓯᒻᒥᐅᖑᓂᖓᓂ ᓂᒋᐊᓂᓗ ᐊᒥᖅᑳᕐᓗᑎᒃ ᑐᑭᓯᒋᐊᕈᑎᒃᓴᓂᒃ ᐱᔾᔪᑎᒃᓴᒧᑦ ᐃᓱᒫᓗᒍᑕᐅᔪᓄᑦ. ᐱᓕᕆᐊᖅ ᑕᒪᑐᒧᖓ ᑐᓴᐅᒪᖃᑦᑕᐅᑎᒌᒍᑎᓕᕆᓂᕐᒧᑦ ᓴᓐᖏᓪᓕᑎᑦᑎᓯᒪᕗᖅ ᐃᒻᒥᒃᑰᕈᓐᓇᕐᓂᕆᔭᖓᓄᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᓄᓇᕐᔪᐊᒥ ᖃᓄᐃᑉᐸᓪᓕᐊᓂᕆᔭᖓᒍᑦ ᐊᒻᒪᓗ ᐃᓚᐅᕙᒃᐳᑦ ᐊᕐᕌᒍᑕᒫᑎᒍᑦ ᓯᓚᕐᔪᐊᒥ ᓄᓇᐅᔪᓂ ᑲᑎᒪᔨᐅᖏᓐᓇᓕᕐᑐᓄᑦ ᓄᓇᖃᖅᑳᖅᓯᒪᔪᑦ ᐱᔾᔪᑎᒃᓴᓄᑦ (UNPFII). ᓯᓚᕐᔪᐊᒥ ᓄᓇᐅᔪᓂ ᑲᑐᔾᔨᖃᑎᒌᖏᑦ ᐃᓕᓴᖅᓯᓯᒪᕗᑦ 100 ᐅᖓᑎᐊᓂ ᐊᑐᓕᖁᔨᔾᔪᑎᒃᓴᓕᐊᖑᓯᒪᔪᑦ ᐱᑕᖃᕐᑎᑕᐅᓪᓗᑎᒃ ᐊᒥᐊᕆᒃᑲᐃᑦ ᓂᒋᐊᓃᓐᓂᕐᓴᖓᓂ ᑐᓴᐅᒪᖃᑦᑕᐅᑎᒌᒍᑎᓕᕆᔨᒃᑯᓐᓂᑦ, ᐱᓕᕆᐊᖃᕐᐸᒃᑐᑦ ᐱᔾᔪᑎᒃᓴᐅᔪᓂᒃ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐱᓂᕐᓗᒃᑕᐅᕙᖕᓂᖏᓐᓄᑦ, ᐊᑕᖏᕐᑐᑎᒍᑦ ᒐᕙᒪᓕᕆᓂᕐᒥ ᐃᓚᐅᔭᕆᐊᖃᕐᓂᖏᓐᓄᑦ,  ᐊᒻᒪᓗ ᑲᑐᔾᔨᖃᑎᒌᒃᑯᑦ ᐃᓄᐃᑦ ᐊᕐᓇᐃᑦ ᓂᐱᖏᑦ ᐃᓚᒋᔭᐅᑦᑎᐊᕋᓗᐊᕐᒪᖔᑕ ᐅᖃᖃᑎᒌᒍᑕᐅᖏᓐᓇᕐᐸᒃᑐᓂ.

ᐸᐅᒃᑑᑎᒃᑯᑦ ᐱᓕᕆᖃᑎᖃᕐᓯᒪᕗᑦ ᐊᒥᐊᕆᒃᑲᐃᑦ ᓂᒋᐊᓃᓐᓂᕐᓴᖓᓂ ᑐᓴᐅᒪᖃᑦᑕᐅᑎᒌᒍᑎᓕᕆᔨᒃᑯᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒥᐊᕆᒃᑯᑲᓐᓂ (“ᐊᒥᐊᕆᒃᑲᐃᑦ ᓂᒋᐊᓃᓐᓂᕐᓴᖓᓂ ᑐᓴᐅᒪᖃᑦᑕᐅᑎᒌᒍᑎᓕᕆᔨᒃᑯᑦ”). ᑖᓐᓇ ᑭᒡᒐᖅᑐᐃᓂᒃᑯᑦ ᑐᓴᐅᒪᖃᑦᑕᐅᑎᒌᒍᑎᓕᕆᓂᐅᕗᖅ ᐅᖃᖃᑎᒌᒍᑕᐅᔪᓐᓇᕐᓗᓂ ᓄᓇᖃᖅᑳᕐᓯᒪᔪᑦ ᐊᕐᓇᓂᑦ ᑕᐅᖅᓰᔪᓐᓇᕐᓂᐊᕐᒪᑕ ᑐᑭᓯᒋᐊᕈᑎᒃᓴᓂᒃ ᐃᓱᒫᓘᑎᒋᔭᐅᓯᒪᔪᓂᒃ. ᑲᑎᒪᓂᐅᔪᓂ, ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒥᐊᕆᒃᑲᐅᑉ ᐅᐊᖕᓇᖓᓃᕐᓂᕐᓴᐅᔪᓂ ᑕᐅᖅᓰᖃᑎᒌᒃᐸᒃᐳᑦ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᑦ ᐸᕐᓇᒍᑏᓪᓗ ᐊᑐᐊᒐᓕᐅᕈᓐᓇᖁᓪᓗᒋᑦ ᐱᕙᓪᓕᐊᑎᑦᑎᓗᑎᓪᓗ ᓄᓇᓕᕐᔪᐊᕆᔭᖏᓐᓂ. ᑭᒡᒐᖅᑐᐃᓪᓗᑎᒃ ᐃᓄᐃᑦ ᐊᕐᓇᓂᒃ, ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᓂᐱᖏᓐᓂᒃ ᑐᓴᖅᑕᐅᑦᑎᐊᕐᑎᑦᑎᓇᓱᖃᑦᑕᕐᐳᑦ ᓄᓇᕐᔪᐊᑉ ᖁᕝᕙᓯᖕᓂᕆᔭᖓᒍᑦ.

ᐱᒋᐊᕐᓗᓂ ᓄᕕᐱᕆ 7, 2011-ᒥ, ᐸᐅᒃᑑᑎᒃᑯᑦ ᐃᓚᐅᖃᑕᐅᓯᒪᕗᑦ ᐱᓇᓱᐊᕈᓯᓕᒫᒥ ᑲᑎᒪᓂᕆᔭᐅᓯᒪᔪᖅ ᐊᒥᐊᕆᒃᑲᐃᑦ ᓂᒋᐊᓃᓐᓂᕐᓴᐅᖓᓂ ᑐᓴᐅᒪᖃᑦᑕᐅᑎᒌᒍᑎᓕᕆᓂᕐᒥ ᑲᑎᒪᔾᔪᑕᐅᓯᒪᔪᖅ ᐳᕉᒥ. ᑲᑎᒪᓂᕐᒧᑦ ᑐᕌᒐᕆᔭᐅᓯᒪᔪᖅ ᓴᖅᑮᓗᑎᒃ ᐸᕐᓇᐅᑎᓕᐊᒃᓴᒥᒃ 2012-2022-ᒧᑦ. ᒪᓕᒐᕋᓛᑦ ᒪᓕᒐᐃᓪᓗ ᐃᓚᓕᐅᔾᔨᓯᒪᓪᓗᑎᒃ ᐅᖃᖃᑎᒌᒍᑕᐅᓯᒪᔪᓂᒃ ᒫᔨ 2011-ᒥ ᑭᒃᑯᓕᒫᕐᑎᑦᑎᓂᒃᑯᑦ ᑲᑎᒪᕕᔾᔪᐊᕐᓂᖃᕐᑎᓪᓗᒋᑦ ᑯᐊᓇᕚᑲ, ᒥᐊᒃᓯᑰᒥ. ᑖᒃᑯᐊᓗ ᕿᒥᕐᕈᔭᐅᓂᖃᓚᐅᕐᒥᔪᑦ ᐱᕙᓪᓕᐊᑎᑦᑎᓂᕐᒥᒃ ᐊᕐᕌᒍᑕᒫᖅᓯᐅᑦ , ᐱᖓᓱᑦ ᐊᕐᕌᒍᑕᒫᑎᒍᑦ ᐊᒻᒪᓗ ᖁᓕᑦ ᐊᕐᕌᒍᑕᒫᑎᒍᑦ ᐸᕐᓇᐅᑎᓕᐅᕐᓂᒧᑦ ᖃᓄᖅ ᑐᓴᐅᒪᖃᑦᑕᐅᑎᒌᒍᑎᓕᕆᓂᖅ ᓯᕗᒧᐊᒃᑎᑕᐅᔪᓐᓇᕐᒪᖔᑦ.