ᓄᓕᐊᕐᓂᒃᑯᑦ ᐊᐃᑦᑐᕐᓗᖃᑦᑕᐅᑎᑦᑕᐃᓕᑎᑎᓂᖅ

ᐸᐅᒃᑑᑎᒃᑯᑦ ᓯᕗᓪᓕᖅᐹᒥᒃ ᑲᔪᓯᑎᑦᑎᓯᒪᕗᑦ ᐱᖁᔨᕗᖔᕈᑎᒥᒃ 1984 ᐊᕐᕌᒍᑕᒫᖅᓯᐅᑦ ᑭᒃᑯᓕᒫᖅᑎᑦᑎᓂᕐᒧᑦ ᑲᑎᒪᕕᔾᔪᐊᕐᓂᕆᓯᒪᔭᖓᓂ (AGM) ᐃᒃᐱᒍᓱᖁᔨᓕᖅᑎᑦᑎᓯᒪᓪᓗᑎᒃ ᓄᓕᐊᕐᓂᒃᑯᑦ ᐊᐃᑦᑐᕐᓗᖃᑦᑕᐅᑎᑦᑕᐃᓕᑎᑎᓂᕐᒧᑦ ᑕᒪᒃᑯᐊ ᐃᓄᐃᑦ ᓄᓇᓕᖏᓐᓂ ᐱᔭᐅᔭᕆᐊᓕᖕᓄᑦ ᐊᑐᓕᖅᑎᑦᑎᓂᕐᒥᒃ. ᑭᖑᓂᖓᒍᑦ, 1990-ᒥ, ᐊᕐᕌᒍᑕᒫᖅᓯᐅᑎᖓᓂ ᑲᑎᒪᕕᔾᔪᐊᕐᓂᐅᔪᒥ ᐱᖁᔨᕗᖔᕈᑎᓕᐅᖁᔨᓯᒪᕗᑦ ᑕᐃᔭᐅᓪᓗᓂ ᐊᓴᐱᒧᑦ ᐃᓕᓐᓂᐊᕐᑎᑦᑎᓂᖅ ᑲᑎᒪᓯᓐᓈᖅᑎᓪᓗᒋᑦ ᐅᑭᐅᖅᑕᖅᑐᒥ. ᒪᐃ 1995-ᖑᑎᓪᓗᒍ, ᐸᐅᒃᑑᑎᒃᑯᑦ ᓯᕗᓪᓕᖅᐹᒥᒃ ᑲᓇᑕᒥ ᐃᓄᖕᓄᑦ ᐊᓴᐱᒃᓴᒧᑦ/ᐊᓴᐱᒧᑦ ᐊᒻᒪᓗ ᓄᓕᐊᕐᓂᒃᑯᑦ ᐊᐃᑦᑐᕐᓗᖃᑦᑕᐅᑎᑦᑕᐃᓕᒪᑎᑦᑎᓂᕐᒧᑦ ᐃᓕᓐᓂᐊᕐᑎᑦᑎᓂᐅᔪᒥᒃ, ᐅᔾᔨᕈᓱᒃᑎᔾᔪᑎᐅᓇᓱᐊᕐᓯᒪᓪᓗᓂ ᖃᓂᒪᖃᕐᓇᖏᑦᑐᓕᕆᔨᒃᑯᓐᓂᑦ (CHR) ᐱᔾᔪᑎᒃᓴᐅᔪᓄᑦ ᐊᑦᑕᕐᓇᑐᐃᓐᓇᕆᐊᖃᕐᑐᓪᓗ ᐊᒃᑐᐊᓂᖃᑐᑦ ᐊᓴᐱᒃᓴᒧᑦ/ᐊᓴᐱᒧᑦ ᐊᒻᒪᓗ ᓄᓕᐊᕐᓂᒃᑯᑦ ᐊᐃᑦᑐᕐᓗᒍᑕᐅᒐᔭᕐᑐᓄᑦ. 1998-ᒥ, ᑮᓇᐅᔭᑎᒍᑦ ᐃᑲᔪᖅᑕᐅᓯᒪᓪᓗᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᑦ ᑲᓇᑕᒥ, ᐸᐅᒃᑑᑎᒃᑯᑦ ᐱᒋᐊᖅᓯᒪᕗᑦ ᐅᑭᐅᖅᑕᖅᑐᒥᐅᓂᒃ ᐊᓴᐱᒃᓴᒧᑦ/ᐊᓴᐱᒧᑦ ᐱᑦᑕᐃᓕᑎᑦᑎᓂᕐᒥᒃ ᖁᕝᕙᕆᐊᖅᑎᑦᑎᓇᓱᐊᕐᓂᕐᒥᓪᓗ ᐱᓕᕆᐊᒥᒃ ᓴᖅᑮᔾᔪᑎᐅᓯᒪᓪᓗᓂ ᑐᓂᐅᖅᑲᕐᑕᐅᓯᒪᓪᓗᓂᓗ ᐊᓴᐱᒃᓴᒧᑦ/ᐊᓴᐱᒧᑦ ᐊᒃᑐᐊᓂᖃᖅᑐᓄᑦ ᐅᖃᓕᒫᒐᒃᓴᓂᒃ ᖃᓪᓗᓈᑎᑐᑦ ᐃᓄᒃᑎᑐᓪᓗ. ᐸᐅᒃᑑᑎᒃᑯᑦ ᑖᒃᑯᑐᐊᖑᕗᑦ ᑲᓇᑕᒥ ᑲᑐᔾᔨᖃᑎᒌᖑᓪᓗᑎᒃ ᐃᒃᐱᒍᓱᖕᓂᕐᓴᐅᓯᒪᔪᑦ ᐃᓄᖕᓄᑦ ᐊᓴᐱᒃᓴᒧᑦ/ᐊᓴᐱᒧᑦ ᐱᔾᔪᑎᒃᓴᐅᔪᓂᒃ ᐱᒋᐊᕈᑎᐅᓯᒪᔪᓂᓪᓗ, ᐊᒻᒪᓗ ᑲᓇᑕᒥ ᓄᓇᕐᔪᐊᒥᓗ ᐃᓕᓴᕆᔭᐅᓯᒪᕗᑦ ᐱᒃᑯᒋᔭᐅᓯᒪᕗᓪᓗ ᓄᑖᒧᑦ ᐊᔾᔨᐅᖏᑦᑐᒻᒧᓪᓗ ᐱᓕᕆᓯᒪᓂᖏᓐᓄᑦ.

ᓄᑖᖑᓂᖅᐹᖑᔪᓂ ᖃᓄᐃᓕᐅᕐᓂᐅᔪᑦ ᐃᓚᖃᕐᐳᑦ ᐱᕙᓪᓕᐊᑎᑦᑎᓂᒧᑦ ᓇᓗᓇᐃᔭᖅᓯᒪᔪᓂᒃ ᓂᒋᐊᓂ ᐃᓅᓕᓴᐅᑎᓕᕆᓂᕐᒧᑦ ᖃᐅᔨᒪᔨᑕᓂᒃ ᐃᓄᖕᓂᒃ ᐋᓐᓂᐊᕕᓕᐊᕈᔾᔨᕙᒃᑐᑦ ᐊᓴᐱᒃᓴᖃᕐᑐᓄᑦ, ᐃᑲᔪᕈᑎᒃᓴᓂᒃ ᐅᖃᓕᒫᒐᖃᕐᓗᑎᒃ ᓄᓇᓕᐸᐅᔭᓕᖕᓂ ᐱᔨᑦᑎᕋᕈᑎᓄᑦ ᐱᑕᖃᖅᑎᑦᑎᔨᐅᕙᒃᑐᓄᑦ ᐃᓄᖕᓂᒃ ᐃᑲᔪᕆᐊᖃᖅᐸᒃᑕᖏᓐᓄᑦ, ᐊᒻᒪᓗ 2011/12-ᒥ ᐃᓕᓐᓂᐊᕐᑎᑦᑎᓯᒪᕗᑦ ᑲᑎᒪᓯᓐᓈᖅᑎᓪᓗᒋᑦ ᐱᕙᓪᓕᐊᑎᑦᑎᓯᒪᓪᓗᑎᒃ ᐃᓄᒃᑎᑑᖓᔪᑦ ᑕᐃᒎᓯᓂᒃ ᐃᓄᐃᑦ ᑐᑭᓯᕚᓪᓕᖁᓪᓗᒋᑦ ᐊᓴᐱᒃᓴᖃᓂᕆᔭᖏᓐᓄᑦ ᐊᒻᒪᓗ ᑲᒪᒋᔭᐅᔾᔪᑎᓄᑦ ᓂᕈᐊᒐᒃᓴᐅᒐᔭᖅᑐᓂᒃ. ᑖᒃᑯᐊ ᑕᐃᒎᓰᑦ ᓂᕆᐅᒋᔭᐅᓯᒪᕗᑦ ᐃᑲᔫᑎᖃᓂᐊᕐᓗᑎᒃ ᐱᔾᔪᑎᒋᓪᓗᒍ ᐃᓅᓕᓴᐅᑎᓕᕆᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ.

ᐸᐅᒃᑑᑎᒃᑯᑦ ᓴᖅᑮᓯᒪᒋᕗᑦ ᑲᓇᑕᒥ ᐃᓄᖕᓄᑦ ᐊᓴᐱᒃᓴᒧᑦ/ᐊᓴᐱᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᓂᕐᒥᒃ (CIHAN) ᑐᑭᒧᐊᒃᑎᑕᐅᖁᓪᓗᒋᑦ ᐊᓴᐱᒃᓴᒧᑦ/ᐊᓴᐱᒧᑦ ᐱᓕᕆᐊᖑᔪᑦ ᐃᓄᐃᑦ ᐊᕕᒃᑐᖅᓯᒪᓂᐊᓂ ᐊᒻᒪᓗ ᐱᓗᐊᖅᑐᒥᒃ ᐃᓄᐃᑦ ᑲᑎᓐᖓᐅᕐᑐᑦ ᑲᓇᑕᒥ ᐃᓄᖕᓄᑦ ᐊᓴᐱᒃᓴᒧᑦ/ᐊᓴᐱᒧᑦ ᑐᓴᐅᒪᖃᑦᑕᐅᑎᒌᒍᑎᐅᑉ ᐊᐅᓚᓂᕆᔭᖏᓐᓄᑦ ᐅᖃᖃᑎᒌᒍᑕᐅᔪᓐᓇᕐᓗᓂ ᖃᐅᔨᒪᔨᒋᔭᐅᓗᑎᓪᓗ ᑲᑐᔾᔨᖃᑎᒌᖑᓗᑎᒃ ᐸᐅᒃᑑᑎᒃᑯᓐᓂ ᓄᓕᐊᕐᓂᒃᑯᑦ ᐊᐃᑦᑐᕐᓗᖃᑦᑕᐅᑎᑦᑕᐃᓕᒪᑎᑦᑎᓂᕐᒧᑦ ᐱᓕᕆᐊᖓᑦ ᐱᔾᔪᑎᒃᓴᐅᔪᓄᑦ ᐱᔾᔪᑎᖃᕐᑐᖅ ᐊᓴᐱᒃᓴᒧᑦ/ᐊᓴᐱᒧᑦ ᐱᑦᑕᐃᓕᒪᑎᑦᑎᓂᕐᒥᒃ, ᐸᖅᑭᔭᐅᓗᑎᒃ ᑲᒪᒋᔭᐅᓗᑎᓪᓗ ᐃᓄᐃᑦ. ᑲᓇᑕᒥ ᐃᓄᖕᓄᑦ ᐊᓴᐱᒃᓴᒧᑦ/ᐊᓴᐱᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᓂᖅ ᐸᐅᒃᑑᑎᒃᑯᓐᓄᑦ ᖃᐅᔨᓴᕈᑎᐅᔪᓐᓇᕐᓗᓂ ᐊᕕᒃᑐᖅᓯᒪᓂᐅᔪᓄᑦ ᐊᒻᒪᓗ ᖃᐅᔨᓴᖅᐸᓪᓕᐊᔾᔪᑎᒋᔪᓐᓇᕐᓗᓂᔾᔪᒃ ᐃᓄᐃᑦ ᓄᓇᓕᖏᓐᓄᑦ. ᑕᕝᕘᓇ ᐱᐅᓯᒃᑯᑦ, ᑲᓇᑕᒥ ᐃᓄᖕᓄᑦ ᐊᓴᐱᓕᕆᓂᕐᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᔾᔪᑦ ᐱᓕᕆᑎᑦᑎᔾᔪᑕᐅᔪᓐᓇᕐᐳᖅ ᐸᐅᒃᑑᑎᒃᑯᓐᓄᑦ ᐃᑲᔪᕈᓐᓇᕐᓗᑎᒃ ᐃᓄᐃᑦ ᓄᓇᓕᖏᓐᓄᑦ ᑲᑐᔾᔨᖃᑎᒌᓄᓪᓗ ᐱᓕᕆᖃᑎᖃᕐᓗᑎᓪᓗ ᑲᓇᑕᒥ ᓄᓇᖃᖅᑳᕐᓯᒪᔪᑦ ᐊᓴᐱᒧᑦ ᑐᓴᐅᒪᖃᑦᑕᐅᑎᒌᒍᑎᖓᓂᒃ. ᑲᓇᑕᒥ ᐃᓄᖕᓄᑦ ᐊᓴᐱᓕᕆᓂᕐᒧᑦ ᑐᓴᐅᒪᖃᑦᑕᐅᑎᒌᒍᑎ ᐊᐅᓚᓂᖃᕆᕗᖅ ᐊᓴᐱᒃᓴᒧᑦ/ᐊᓴᐱᒧᑦ ᑐᑭᓯᖏᐊᕈᑎᒃᓴᑦ ᐊᒥᖅᑳᕈᑎᐅᔪᓐᓇᕐᓗᑎᒃ ᐊᕕᒃᑐᖅᓯᒪᓂᐅᔪᓕᒫᓂ.

ᐸᐅᒃᑑᑎᒃᑯᑦ ᐊᒻᒪᓗ ᑲᓇᑕᒥ ᐃᓄᖕᓄᑦ ᐊᓴᐱᓕᕆᓂᒧᑦ ᑐᓴᐅᒪᖃᑦᑕᐅᑎᒌᒍᑎᖓᒍᑦ ᐱᓕᕆᐊᓂ ᖃᓄᐃᓕᐅᕐᓂᐅᔪᑦ ᐃᓚᖃᕐᐳᑦ:

  • ᐅᔾᔨᕈᓱᓕᖅᑎᑦᑎᓂᖅ;
  • ᓴᖅᑮᓂᖅ ᑐᓂᐅᖅᑲᐃᓂᕐᓗ ᐱᕙᓪᓕᐊᔪᓂᒃ, ᓴᓂᕋᕐᒥᐅᑕᓂᒃ, ᕿᓪᓕᕐᑐᑦ ᓂᐱᒃᓴᔭᓂᒃ, ᐱᓕᒻᒪᒃᓴᐃᓂᒃᑯᓪᓗ ᑕᕐᕆᔭᒐᓂᒃ;
  • ᐱᕙᓪᓕᐊᑎᑦᑎᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᒃᓴᓂᒃ;
  • ᐱᓕᒻᒪᒃᓴᐃᓂᖅ ᐋᓐᓂᐊᖃᕐᓇᖏᑦᑐᓕᕆᓂᕐᒥ ᐃᖅᑲᓇᐃᔭᖅᑎᐅᔪᓄᑦ;
  • ᐃᑲᔪᖅᓱᐃᓂᖅ ᐊᓴᐱᓕᕆᓂᕐᒧᑦ ᑕᑯᔭᒐᕆᔭᐅᔪᓂᒃ ᐱᓱᒍᑎᒋᔭᐅᔪᓂᓪᓗ ᐃᓄᐃᑦ ᓄᓇᓕᖏᓐᓂ;
  • ᐃᓚᐅᖃᑕᐅᓂᖅ ᑲᑎᒪᔨᐅᔪᓂ ᐊᒥᖅᑳᕐᓗᑎᒃ ᑐᑭᓯᒋᐊᕈᑎᒃᓴᓂᒃ ᐊᔭᐅᖅᑐᐃᕆᓂᒧᓪᓗ ᐱᓕᕆᖃᑎᒌᒍᓐᓇᕐᓂᕐᒥᒃ ᓄᓕᐊᕐᓂᒃᑯᑦ ᐊᐃᑦᑐᕐᓗᒃᑕᐃᓕᑎᑦᑎᓂᕐᒧᑦ; ᐊᒻᒪᓗ
  • ᐱᔨᑦᑎᕋᕐᓗᑎᒃ ᐃᑲᔪᖅᓱᐃᓂᕐᒥᒃ ᐃᓄᖕᓄᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᓂᓗ.

ᐸᐅᒃᑑᑎᒃᑯᑦ ᐱᓕᕆᐊᖓᑦ ᐊᖏᓪᓕᒋᐊᖅᑎᑦᑎᓯᒪᕗᖅ ᐊᓴᐱᒃᓴᒧᑦ/ᐊᓴᐱᒧᑦ ᐅᖓᑎᐊᓄᑦ ᐃᓚᓕᐅᔾᔭᐅᓯᒪᓪᓗᑎᒃ ᐊᓯᖏᑦ ᓄᓕᐊᕐᓂᒃᑯᑦ ᐊᐃᑦᑐᕐᓗᒃᑕᐃᓕᑎᑦᑎᓂᐅᔪᓄᑦ. ᐊᓯᖏᑦ ᐱᔾᔪᑎᐅᓯᒪᔪᑦ ᐃᓄᖕᓄᑦ ᐋᓐᓂᐊᖅᑐᓕᕆᓂᕐᒧᑦ, ᓄᓕᐊᕐᓂᒃᑯᑦ ᐋᓐᓂᐊᖅᑐᓕᕆᓂᖅ ᐊᑕᐅᖏᐅᒪᔪᑎᒍᑦ ᐱᓕᕆᐊᖑᔭᕆᐊᖃᖅᐳᑦ. ᐊᓴᐱᒃᓴᒧᑦ/ᐊᓴᐱᒧᑦ ᖃᓂᒻᒪᒃᑖᕈᑎᐅᓯᒪᔪᑦ ᐊᒃᑐᐊᖓᔪᓐᓇᕆᕗᑦ ᐊᔾᔨᑦᑕᐃᓐᓇᖓ ᖁᕝᕙᓯᒃᑐᒧᑦ ᒪᒃᑯᒃᑐᓄᑦ ᓇᔾᔨᓕᕈᑕᐅᓕᖅᐸᒻᒪᑦ ᐊᒻᒪᓗ ᖁᕝᕙᓯᒃᑐᒥᒃ ᓄᓕᐊᕐᓂᒃᑯᑦ ᐊᐃᑦᑐᓗᒍᑕᐅᕙᒃᑐᖅ. ᐃᓄᓕᕆᓂᒃᑯᑦ ᓇᓗᓇᐃᖅᓯᔾᔪᑎᐅᔪᑦ ᐋᓐᓂᐊᖅᑐᓕᕆᓂᕐᒥ ᓲᕐᓗ ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᕈᑎᑦ, ᓈᒻᒪᓐᖏᓗᐊᕐᓂᖓᓄᑦ ᐃᒡᓗᓕᕆᓂᕐᒧᑦ, ᓂᕆᔭᒃᓴᑦᑎᐊᕙᐃᑦ, ᒪᑭᒪᐅᑎᒃᓴᐅᒐᔭᕐᑐᑦ, ᐊᔾᔨᒌᖏᑦᑐᓪᓗ ᐋᓐᓂᕐᓯᕆᓂᐅᔪᑦ ᐱᓂᕐᓗᒍᑎᐅᕙᒃᑐᑦ ᐱᔾᔪᑎᐅᓕᖅᐸᒃᑭᕗᑦ ᐊᔭᐅᖅᑐᐃᕆᓂᕐᒧᑦ ᐃᓄᖕᓄᑦ ᓄᓇᓕᐅᔪᓂᓗ ᓄᓕᐊᕐᓂᒃᑯᑦ ᐊᐃᖅᑐᕐᓗᖃᑦᑕᐅᑎᑦᑕᐃᓕᒪᓂᕐᒧᑦ.

ᒫᓐᓇᐅᔪᒥ, ᐊᐅᒃᑑᑎᒃᑯᑦᑭ ᓇᓕᖅᑲᖏᓐᓃᑦᑐᓂᒃ ᐱᓕᕆᐊᖃᖅᐸᓪᓕᐊᕗᑦ:

  • ᑐᑭᓯᕖᑦ – Do you understand?ᐃᓄᖕᓄᑦ ᓄᓕᐊᕐᓂᒃᑯᑦ ᐊᐃᑦᑐᕐᓗᖃᑦᑕᐅᑎᑦᑕᐃᓕᓂᒃᑯᑦ ᑎᑎᕋᕐᓂᕐᒧᑦ ᑲᑎᒪᓂᖅ ᐊᒻᒪᓗ ᐋᓐᓂᐊᖅᑐᓕᕆᓂᕐᒧᑦ ᑕᐃᒎᓯᓂᒃ;
  • ᑎᖑᓪᓗᖕᓂᖅ C-ᒧᑦ ᑐᑭᓯᒋᐊᕈᑎᒃᓴᑦ ᐃᑲᔪᕈᑎᒃᓴᒧᓪᓗ ᐱᕙᓪᓕᐊᑎᑦᑎᓂᖅ;
  • ᐃᓕᓐᓂᐊᕐᕕᖕᒥ ᓄᓕᐊᕐᓂᕐᒧᑦ ᐊᐃᑦᑐᕐᓗᒃᑕᐃᓕᒪᑎᑦᑎᓂᕐᒧᑦ ᐃᓕᓐᓂᐊᕈᑎᒃᓴᓕᐅᕐᓂᖅ;
  • ᐱᓕᕆᖃᑎᖃᕐᓂᖅ ᓇᔾᔨᔪᓕᕆᓂᕐᒧᑦ ᐃᒡᓕᐊᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂᒃ ᑲᓇᑕᒥ ᐃᑲᔪᕈᑎᖓᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᒃ ᐱᓕᕆᖃᑎᖃᕐᑐᑦ ᓄᓇᖃᖅᑳᖅᓯᒪᔪᓂᒃ;
  • ᐃᓚᐅᖃᑕᐅᓂᖅ ᑲᓇᑕᒥ ᓄᓇᖃᖅᑳᕐᓯᒪᔪᑦ ᑲᑎᒪᔨᕐᔪᐊᖏᓐᓄᑦ ᐊᓴᐱᒃᓴᒧᑦ/ᐊᓴᐱᒧᑦ (NACHA); ᐊᒻᒪᓗ
  • ᑲᓇᑕᒥ ᐃᓄᖕᓄᑦ ᐊᓴᐱᒃᓴᒧᑦ/ᐊᓴᐱᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᓂᖅ.

ᑲᑐᔾᔨᖃᑎᒋᔭᐅᔪᑦ

  • ᐊᓪᓚᓄᑦ ᐃᓄᖕᓄᓪᓗ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
  • ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᓂᕐᒧᑦ ᑎᒥᖓᑦ ᑲᓇᑕᒥ
  • ᑲᓇᑕᒥ ᓄᓇᖃᖅᑳᕐᓯᒪᔪᓄᑦ ᐊᓴᐱᓕᕆᓂᕐᒧᑦ ᑐᓴᐅᒪᖃᑦᑕᐅᑎᒌᒍᑎᓕᕆᔨᒃᑯᑦ
  • CATIE – ᑲᓇᑕᒥ ᐊᓴᐱᒃᓴᒧᑦ ᐊᒻᒪᓗ ᑎᖑᓪᓗᖕᓂᖅ C-ᒧᑦ ᑐᑭᓯᒋᐊᕐᕕᖓᑦ