ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᔪᑦ

ᐃᒥᐊᓗᒃ ᐅᔾᔨᕆᔭᐅᑎᑕᐅᓯᒪᕗᖅ ᐃᓄᖕᓄᑦ ᐊᕐᕕᕐᓂᐊᖅᑎᓂᑦ. ᑖᔅᓱᒪ ᓯᕗᓂᐊᒍᑦ, ᐃᒥᐊᓗᒃ ᖃᐅᔨᒪᔭᐅᓚᐅᓐᖏᓚᖅ ᑭᓯᐊᓂ ᐃᓕᖅᑯᓯᑐᖃᒃᑯᑦ ᐃᓄᐃᑦ ᓇᔾᔨᔪᓄᑦ ᓂᕆᑦᑎᐊᖃᑦᑕᕆᐊᖃᕐᓂᕐᒧᑦ ᐅᖃᐅᔾᔪᕈᑎᐅᓯᒪᓪᓗᓂ ᓇᔾᔨᔪᑦ ᐸᐅᕐᖓᖅᑐᕆᐊᖃᖏᓐᓂᖏᓐᓂᒃ ᐊᕐᕌᒎᑉ ᐃᓚᖓᓂ ᐱᔾᔪᑎᒋᓪᓗᒍ ᓄᓇᒥ ᐳᕙᓪᓚᖅᓯᒪᔪᑐᖃᐅᓕᕐᓂᖏᓐᓄᑦ ᓄᑕᕋᓛᖅ ᐃᓅᑐᐃᓐᓇᕆᐊᖃᕋᔭᕐᓗᓂ ᓇᔾᔨᐊᖑᑎᓪᓗᒍ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᓗᓂ (FASD). ᑕᒪᓐᓇ ᑕᐃᒪᐃᖏᓐᓇᓕᕐᓯᒪᓂᖓ ᐊᒃᑐᐃᓂᖃᖃᑦᑕᕐᐳᖅ ᑎᒥᒃᑯᑦ, ᐃᓱᒪᒃᑯᑦ, ᐃᓕᖅᑯᓯᒃᑯᓪᓗ ᐱᕙᓪᓕᐊᓂᕆᔭᖓᓄᑦ ᐃᓄᒃ ᐊᒻᒪᓗ 100 ᐳᓴᓐᑎᒧᑦ ᐱᑦᑕᐃᓕᒪᑎᔾᔪᑎᐅᔪᓐᓇᕐᐳᖅ.

ᑐᓐᖓᒋᔭᐅᔪᓐᓇᕐᓂᖓ ᓇᓗᓇᐃᔭᐅᑎ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑕᐅᓯᒪᔪᑦ ᐃᓄᖕᓂ ᐊᑐᐃᓐᓇᐅᑲᐅᑎᒋᔪᓐᓇᖅᐸᖏᒻᒪᑕ. ᖃᐅᔨᔾᔪᑎᐅᓯᒪᔪᑦ ᓈᓴᖅᑕᐅᓯᒪᔪᓂ ᐊᒻᒪᓗ ᓄᓇᖃᖅᑳᕐᓯᒪᔪᓄᑦ ᖃᐅᔨᓴᕈᑎᐅᔪᑦ (APS) ᐃᔨᖅᓯᒪᔭᐅᕙᒻᒪᑕ ᐱᔾᔪᑎᓄᑦ ᓈᓴᖅᑕᐅᓯᒪᔪᑦ ᑐᓐᖓᒋᔭᐅᔭᕆᐊᖃᕐᓂᖏᓐᓄᑦ ᑲᓐᖑᓇᖅᑑᔭᕆᐊᖃᕐᓂᖏᓐᓄᓪᓘᓐᓃᑦ. ᐊᑑᑎᒋᓐᖑᐊᕐᓗᒍ, 2006 ᓄᓇᖃᖅᑳᕐᓯᒪᔪᓄᑦ ᖃᐅᔨᓴᕐᓂᕐᒧᑦ ᓇᓗᓇᐃᔭᐅᑎ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᔪᓄᑦ ᐃᓄᐃᑦ ᓱᕈᓯᓂᑦ ᐊᕐᕌᒍᖃᕐᑐᑦ ᐊᕐᕕᓂᓕᖕᓂᑦ-14-ᓄᑦ ᐃᔨᖅᓯᒪᔾᔪᑎᐅᕗᑦ ᑕᒪᕐᒥᒃ ᐃᓄᐃᑦ ᐊᕕᒃᑐᖅᓯᒪᓂᐊᓃᑦᑐᓄᑦ ᐱᔾᔪᑎᒋᓪᓗᒍ ᑲᓐᖑᓇᖅᑑᑎᑕᐅᔭᕆᐊᖃᕐᓂᖓᓄ ᓈᓴᖅᑐᓕᕆᓂᕐᒧᑦ ᐱᖁᔭᒥ. ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᓴᓂᕐᒥ ᐅᓂᒃᑳᓕᐅᖅᓯᒪᔪᖃᓐᖏᓚᖅ ᑕᓪᓕᒪᑦ ᐳᓴᓐᑎᓄᑦ ᑖᒃᑯᐊ ᐃᓄᐃᑦ ᓄᓇᖃᕐᑐᑦ ᐃᓄᐃᑦ ᓄᓇᖓᑕ ᓯᓚᑖᓂ ᓱᖅᑯᐃᖅᑕᐅᔾᔪᑎᑖᕐᓯᒪᓪᓗᑎᒃ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᓂᖏᓐᓄᑦ.

ᐊᓯᖓᑦᑕᐅᖅ ᑐᕌᑲᐅᑎᒋᖏᑦᑐᒃᑯᑦ ᐆᒃᑐᕌᐅᑕᐅᓯᒪᔪᖅ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᑐᐃᓐᓇᕆᐊᖃᕋᔭᕐᑐᑦ ᐱᔾᔪᑎᒋᓪᓗᒋᑦ ᐃᒥᐊᓗᒻᒧᑦ ᐊᑐᓂᕐᓗᖕᓂᐅᔪᖅ. ᐃᒥᑲᑕᐃᓐᓇᓗᐊᓕᕐᓂᖅ ᐃᓗᐊᖏᔾᔪᑎᐅᕙᒻᒪᑦ ᐃᓄᐃᑦ ᓄᓇᓕᖏᓐᓂ, ᐱᓗᐊᕐᑐᒥᒃ ᒪᒃᑐᒃᑐᓂᑦ. ᖃᐅᔨᓴᖅᑕᐅᕋᑖᕐᓂᑰᔪᖅ ᖃᐅᔨᓴᖅᑎᓂᑦ ᑐᕈᐊ-ᕆᕕᐅᕐ (ᐱᖓᓱᑦ ᑰᖑᔪᓂ) ᑯᐸᐃᒃ ᐃᓕᓐᓂᐊᕐᕕᔾᔪᐊᒻᒪᕆᖓᓂ ᒪᕐᕉᒃ ᓄᓇᓕᐅᔫ`ᓂ ᕿᑭᖅᑖᓘᑉ ᓂᒋᐊᓂ ᓄᓇᕗᒥ ᓇᓗᓇᐃᖅᓯᓯᒪᖕᒪᑕ ᒪᒃᑯᒃᑐᑦ ᐊᕐᕌᒍᓖᑦ 11-ᒥᑦ 20-ᒧᑦ ᒪᕐᕈᐊᖅᑎᕐᑐᑎᒍᑦ ᐱᖓᓱᐊᖅᑎᕐᑐᑎᒍᓪᓘᓐᓃᑦ ᐱᖃᑦᑕᕐᓂᖏᓐᓂᒃ ᐋᖓᔮᕐᓇᖅᑐᓂᒃ ᐃᒥᐊᓗᒻᒥᓪᓘᓐᓃᑦ ᓂᐅᖅᓯᕙᒃᑐᑦ ᖁᕝᕙᓯᖕᓂᕐᓴᐅᓪᓗᓂ ᑕᐃᒪᐃᓪᓗᐊᖃᑎᒋᔭᖏᓐᓂᑦ ᑲᓇᑕᐅᑉ ᓂᒋᐊᓃᑦᑐᓂᓪᓕ, ᐊᒻᒪ ᓂᕕᐊᖅᓵᑦ, ᒪᒃᑯᓛᕆᒐᔭᖅᑕᖓ 14 ᐊᕐᕌᒍᖃᕐᓗᓂ, ᐃᒦᓐᓇᓂᕐᓴᐅᕙᒃᐳᑦ ᓄᑲᑉᐱᐊᓂᓪᓕ. ᑖᒃᑯᐊ ᐃᓱᒫᓗᒍᑎᐅᔪᑦ, ᐃᓚᓕᐅᔾᔨᓯᒪᓪᓗᓂ ᒪᒃᑯᓗᐊᕐᑐᑦ ᐊᒥᓱᕈᖅᐸᓪᐊᓕᔪᒻᒪᕆᐅᓂᖏᑦ ᐃᓄᐃᑦ ᐊᒥᓲᓂᖓᒍᑦ, ᓴᓐᖏᓪᓕᒋᐊᖅᑎᑕᐅᓗᓂ ᐱᔭᐅᔭᕆᐊᓕᒃ ᐊᒃᓱᕈᓐᓇᕈᑎᐅᔪᑦ ᐱᓕᕆᐊᖑᔪᓐᓇᕐᓯᓗᑎᒃ, ᐱᖅᑯᓯᒋᔭᖏᓐᓄᑦ ᐊᑑᑎᖃᕐᑐᒥᒃ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᑎᑦᑕᐃᓕᒪᑎᑦᑎᓂᕐᒥᒃ ᐃᑲᔪᕐᓂᐅᓴᐅᔪᓄᐊᕐᑎᑦᑎᓂᕐᒧᑦ ᐃᑲᔪᖅᓱᐃᓂᒥᓪᓗ ᓇᔾᔨᔪᑦ ᐊᓈᓇᒃᓴᐅᔪᓄᑦ.

ᐃᒥᐊᓗᒻᒧᑦ ᐋᖓᔮᕐᓇᖅᑐᓄᓪᓗ ᐊᑐᓂᕐᓗᒃᓯᓂᖅ ᐊᑦᑕᕐᓇᖅᑐᑎᒍᑦ ᐱᔾᔪᑎᐅᓕᖃᑦᑕᕆᕗᖅ ᓄᓕᐊᕐᓂᒃᑯᑦ ᐊᐃᑦᑐᕈᑎᐅᕙᓪᓕᐊᒐᔭᕐᓂᖓ, ᐊᓴᐱᒃᓴᖅ/ᐊᓴᐱ ᐊᒻᒪᓗ ᑎᖑᓪᓗᖕᓇᕐᑐᖅ C, ᐱᔾᔪᑎᐅᓕᑐᐃᓐᓇᕆᐊᖃᕆᕗᖅ ᐃᓄᖕᓂ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔾᔪᑎᐅᓯᒪᕙᒃᑐᓄᑦ. ᖃᐅᔨᔭᐅᓯᒪᔪᑦ 2006 ᓄᓇᖃᖅᑳᕐᓯᒪᔪᓄᑦ ᖃᐅᔨᓴᕈᑎᐅᓯᒪᔪᓂ ᓴᖅᑮᓯᒪᖕᒪᑦ ᐃᒥᓗᐊᖃᑦᑕᕐᓂᖅ – ᓇᓗᓇᐃᖅᑕᐅᓯᒪᓪᓗᓂ ᑕᓪᓕᒪᓄᑦ ᐅᖓᑎᐊᓄᓪᓘᓐᓃᑦ ᐃᒥᖃᑦᑕᕐᕐᓗᑎᒃ ᐅᓪᓗᖅ ᐊᑕᐅᓯᕐᒥ ᐅᖓᑎᐊᓄᓪᓘᓐᓃᑦ ᐱᓇᓱᐊᕈᓯᑕᒫᑦ – ᓇᖕᒥᓂᖅ ᐅᓂᒃᑳᓕᐅᕈᑕᐅᓯᒪᕗᑦ ᖁᕝᕙᓯᒃᑐᒻᒪᕆᐅᓯᒪᓪᓗᓂ ᑎᑭᓪᓗᒍ 28 ᐳᓴᓐᑎᐅᔪᑦ ᐃᓄᐃᑦ ᐊᕐᓇᓂᑦ ᓄᓇᑦᓯᐊᕗᒥ. ᓄᓇᕗᒥ, ᑎᓴᒪᐅᔪᖅᑐᑦ ᓄᓇᓖᑦ ᐃᒥᐊᓗᖃᕈᓐᓇᕐᑎᑕᐅᓯᒪᓇᑎᒃ, ᐃᒥᐊᓗᓗᐊᖃᑦᑕᕐᓂᖅ ᐊᑦᑎᓐᓂᕐᓴᐅᓯᒪᓪᓗᓂ.

ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᔪᑦ ᐱᔾᔪᑎᐅᔪᓂ ᑕᐃᒎᓯᐅᕗᖅ ᐃᓚᓕᐅᔾᔨᓯᒪᓪᓗᓂ ᐊᒃᑐᐃᔾᔪᑎᐅᓯᒪᔪᑦ ᑕᒪᒃᑯᐊ ᑕᐃᒪᐃᑦᑐᓐᓇᕐᑐᑦ ᐃᓄᒃ ᐊᓈᓇᒋᔭᐅᔪᖅ ᐃᒥᐊᓗᒻᒥᒃ ᐃᒥᖃᑦᑕᕐᑐᕕᓂᐅᓪᓗᓂ ᓇᔾᔨᑎᓪᓗᒍ. ᑖᒃᑯᐊ ᐊᒃᑐᐃᔾᔪᑎᐅᔪᑦ ᐃᓚᖃᑐᐃᓐᓇᕆᐊᖃᕐᐳᑦ ᑎᒥᒃᑯᑦ, ᐃᓱᒪᒃᑯᑦ, ᐃᓕᖅᑯᓯᖓᒍᑦ ᐃᓕᓐᓂᐊᕐᓂᕐᒧᓪᓗ ᐱᒡᒐᕈᑎᖃᕐᑐᑦ ᐃᓅᓯᓕᒫᒧᑦ ᓇᓗᓇᐃᒃᑯᑎᐅᒐᔭᕐᑐᑦ. ᓱᕈᓰᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔭᐅᓯᒪᔪᑦ ᑕᑯᒃᓴᐅᑎᑦᑎᒐᔪᒃᐳᑦ ᐃᓕᖅᑯᓯᐅᔪᓂᒃ ᓲᕐᓗ ᐱᕋᓪᓚᐅᓪᓗᑎᒃ, ᓲᖑᓴᖃᑦᑕᕐᓗᑎᒃ, ᓇᓚᐅᑦᑎᒐᔪᖕᓇᑎᒃ, ᐅᖃᓪᓚᖕᓂᒃᑯᑦ ᐅᖃᐅᓯᕐᓄᓪᓗ ᐊᒃᓱᕈᓐᓇᕐᑐᕐᓯᐅᕈᑎᖃᖃᑦᑕᕐᓗᑎᒃ. ᖃᓄᐃᑦᑑᓂᖓ ᐊᖏᓂᖓᓗ ᓱᕋᒃᓯᒪᓂᖓᓄᑦ ᓄᑕᕌᓗᒧᑦ ᑐᓐᖓᓂᖃᕐᐳᖅ ᐱᔾᔪᑎᐅᓯᒪᔪᓄᑦ ᓲᕐᓗ ᐊᓈᓇᐅᔪᖅ ᓇᔾᔨᑎᓪᓗᒍ ᐃᒥᖅᐸᒃᑐᕕᓂᐅᓂᖓᓄᑦ, ᐱᐅᓯᕆᔭᖓ ᐊᑐᒐᔪᖕᓂᖓᓗ ᐃᒥᖃᑦᑕᕐᓂᕐᒧᑦ (ᐊᑑᑎᒋᓐᖑᐊᕐᓗᒍ ᐃᒦᓐᓇᓗᐊᓕᕐᓂᕐᒧᑦ); ᐊᑐᖅᑕᐅᕙᖕᓂᖏᑦ ᐊᓯᖏᑦ ᐋᖓ÷ᕐᓇᕐᑐᑦ ᐊᓯᖏᓪᓗ ᐊᖓᔪᖅᑳᖓᑕ ᑮᓇᖏᑕ ᖃᓄᐃᑦᑑᓂᖏᓐᓄᑦ ᓇᔾᔨᐊᖑᔪᒧᑦ ᐊᓈᓇᐅᔪᕐᓗ.

1995-ᒥᓂᑦ, ᐸᐅᒃᑑᑎᒃᑯᑦ ᐱᓕᕆᖃᑕᐅᓯᒪᕗᑦ ᐱᑎᑦᑎᑕᐃᓕᒪᓂᕐᒥᒃ ᑲᒪᒋᔭᖃᓂᕐᒧᓪᓗ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᓯᒪᔪᓄᑦ ᐃᓄᖕᓂᑦ ᐊᒻᒪᓗ ᐃᑲᔪᖅᓯᒪᕗᑦ ᐊᖏᓂᕐᓴᑎᒍᑦ ᐊᖏᖅᓯᒪᓂᒃᑯᑦ ᐱᖃᑕᐅᓯᒪᔪᓄᑦ ᐱᓕᕆᐊᖃᕐᓂᕐᒥᒃ ᐱᑕᖃᕈᓐᓃᕐᑎᑦᑎᓇᓱᐊᕐᒥᓂᕐᒧᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑕᐅᕙᒃᑐᓄᑦ ᐃᓄᐃᑦ ᓄᓇᓕᖏᓐᓂ. ᐸᐅᒃᑑᑎᒃᑯᑦ ᓱᓕᓂᐊᕐᓂᕋᕈᑎᖃᕐᓯᒪᕗᑦ ᐱᐅᓯᕚᓪᓕᕐᑎᑦᑎᓇᓱᐊᕐᓂᕐᒧᑦ ᐱᑦᑕᐃᓕᒪᑎᑦᑎᓂᕐᒧᑦ ᐊᑐᐃᓐᓇᖃᕈᓐᓇᕐᓂᒧᓪᓗ ᓱᖅᑯᐃᖅᓯᔾᔪᑎᐅᕙᒃᑐᓂᒃ ᐃᓄᐃᑦ ᓄᓇᓕᖏᓐᓂ ᐃᑲᔪᖅᑕᐅᓗᑎᓪᓗ ᐃᓄᐃᑦ ᐃᓚᒌᓪᓗ ᐊᔪᓐᖏᑕᖃᕋᓱᐊᕐᑐᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᓯᒪᔪᓄᑦ. ᐱᓕᕆᐊᖑᓇᓱᐊᕐᑐᖅ ᐃᓚᓕᐅᔾᔭᐅᓯᒪᕗᖅ ᐃᓚᐅᖃᑕᐅᓂᒃᑯᑦ ᑲᓇᑕᒥ ᖃᐅᔨᒪᔨᒋᔭᐅᓪᓗᑎᒃ ᑲᑎᒪᔨᕋᓛᓄᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᕙᒃᑐᓄᑦ.

1996-ᒥ, ᐸᐅᒃᑑᑎᒃᑯᑦ ᐱᓕᕆᐊᖃᕐᓯᒪᕗᑦ ᑐᑭᓯᒋᐊᕈᑎᒃᓴᓄᑦ ᐊᒥᖅᑳᕐᓂᕐᒥᒃ ᐊᔪᖏᓐᓂᐅᔭᕆᐊᓕᖕᓄᓪᓗ ᐱᕈᖅᑎᑦᑎᓂᕐᒥᒃ ᐃᓕᓐᓂᐊᕐᑎᑦᑎᓂᒃᑯᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᕙᒃᑐᓄᑦ. ᐊᒻᒪᓗ 1996-ᒥ, ᐸᐅᒃᑑᑎᒃᑯᑦ ᓴᓇᓯᒪᒋᕗᑦ ᐃᑲᔪᕈᑎᒃᓴᒥᒃ ᐊᑎᖃᕐᑐᖅ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᔪᑦ: ᐃᑲᔪᕈᑎᒃᓴᖅ ᐃᓄᐃᑦ ᓄᓇᓕᖏᓐᓂ ᑐᑭᓯᐅᒪᔭᐅᖁᓪᓗᒍ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᓂᖅ ᑭᓲᒻᒪᖔᑦ ᖃᓄᐃᓕᐅᕈᓐᓇᕐᒪᖔᑕᓗ ᐃᑲᔪᕐᓂᒃᑯᑦ. ᐊᓯᖓᑦᑕᐅᖅ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᕙᒃᑐᓄᑦ ᐃᑲᔪᕈᑎᒃᓴᖅ ᓴᓇᔭᐅᓯᒪᒋᕗᖅ 1998-ᒥ ᐊᑎᖃᕐᑐᖅ ᐃᑲᔪᖅᑎᒌᓐᓂᖅ ᑐᓐᖓᓂᖃᕐᑐᖅ ᑐᑭᓯᒋᐊᕈᑎᒃᓴᐃᑦ ᓄᐊᑕᐅᓯᒪᔪᑦ ᑲᓇᑕᒥ ᐃᓄᖕᓄᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᔪᓄᑦ ᐃᓕᓐᓂᐊᕐᑎᑦᑎᓂᖅ ᑲᑎᒪᓯᓐᓈᕐᑎᓪᓗᒋᑦ.

2001-ᒥ, ᐸᐅᒃᑑᑎᒃᑯᑦ ᐱᔭᕇᖅᓯᓯᒪᕗᑦ ᑕᕐᕆᔭᒐᓕᐊᒥᒃ ᐊᑎᖃᕐᑐᖅ ᐃᓅᓚᐅᖅᑎᓐᓇᖓ ᑐᑭᓯᒋᐊᕈᑎᒃᓴᓕᐊᖑᓯᒪᓪᓗᓂ ᐃᓄᐃᑦ ᒪᒃᑯᒃᑐᓄᑦ ᖃᓄᐃᓕᔾᔪᑎᐅᔪᓐᓇᕋᔭᖕᓂᖓ ᐃᒥᐊᓗᖃᑦᑕᕐᓂᕐᒧᑦ ᓇᔾᔨᑎᓪᓗᒋᑦ ᐊᒻᒪᓗ ᐃᑲᔪᖅᑕᐅᔪᓐᓇᕐᓗᑎᒃ ᐃᓚᒌᑦ ᐃᒡᓗᒥᐅᖃᑎᖃᕐᑐᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔭᐅᓯᒪᔪᒥᒃ. ᑖᓐᓇ ᑕᕐᕆᔭᒐᓕᐊᖅ ᐃᓚᒋᔭᐅᓯᒪᓪᓗᓂ ᐊᖏᓂᕐᓴᑎᒍᑦ ᑐᑭᓯᒋᐊᕈᑎᒃᓴᓕᐅᓂᕐᒧᑦ ᐃᓚᓕᐅᔾᔨᓯᒪᓪᓗᓂ ᑕᐅᑐᒃᑲᔭᕐᑐᓄᑦ ᐃᑲᔪᕈᑎᓂᒃ, ᓈᓚᐅᑎᒃᑯᑦ ᐱᓐᖑᐊᕐᑕᐅᔪᒃᓴᖅ, ᐊᒻᒪᓗ ᓴᓂᕋᕐᒥᐅᑕᖅ. 2003-ᒥ, ᐃᓄᖕᓅᖓᔪᓄᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᓯᒪᔪᑦ ᖃᓄᐃᖏᑦᑎᐊᕋᓱᐊᕐᑎᑦᑎᓂᕐᒧᑦ ᐃᑲᔪᕈᑎᒃᓴᖅ ᑕᐃᔭᐅᓪᓗᓂ ᓱᕈᓰᑦ ᓯᕗᓪᓕᐅᔾᔭᐅᓗᑎᒃ: ᐃᑲᔪᕈᑎᒃᓴᖅ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᕙᒃᑐᓄᑦ ᓴᖅᑭᑕᐅᓯᒪᒋᕗᖅ. ᐃᑲᔪᕈᑎᒃᓴᖅ ᐃᓚᓕᐅᔾᔨᓯᒪᓪᓗᓂ ᐊᖏᔪᑦ ᐸᐃᑉᐹᑎᒍᑦ ᒪᒃᐱᖅᑎᒐᐃᑦ ᐊᒻᒪᓗ ᐊᑐᐊᒐᒃᓴᑦ. ᑕᒪᕐᒥᒃ ᒪᕐᕉᒃ ᐃᑲᔪᕈᑎᒃᓴᐅᔫᒃ ᐊᑐᕐᑕᐅᓯᒪᕘᒃ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᑎᑦᑎᑕᐃᓕᒪᓂᕐᒧᑦ ᐃᓕᓐᓂᐊᕐᑎᑦᑎᓂᕐᒧᑦ ᐃᖅᑲᓇᐃᔭᖅᑎᐅᔪᓂᒃ ᐃᖃᓗᖕᓂ, ᑲᖏᖅᖠᓂᕐᒥ, ᐳᕕᕐᓂᖅᑐᒥ, ᐊᑐᕚᒥᓗ. ᐃᓄᖕᓂᒃ ᐱᑕᖃᕐᓂᕐᓴᐅᑎᑦᑎᓂᖅ ᑐᓂᔭᐅᖁᓪᓗᒋᑦ ᑖᒃᑯᐊ ᐱᓕᕆᐊᑦ ᐱᒻᒪᕆᐅᕗᑦ ᐃᓄᐃᑦ ᓄᓇᓕᖏᓐᓂ ᐊᑑᑎᖃᑦᑎᐊᕐᑐᒃᑯᑦ ᐱᓕᕆᐊᖑᔪᓐᓇᕐᓂᐊᕐᒪᑕ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᔪᓄᑦ ᐊᒃᑐᐊᓂᖃᕐᑐᑦ ᐱᔾᔪᑎᒃᓴᐅᔪᑦ.

2005-ᒥ, ᖃᐅᔨᓴᕐᓂᖅ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔾᔪᐅᕙᒃᑐᓄᑦ ᐱᓕᒻᒪᒃᓴᐃᔾᔪᑎᒃᓴᑦ ᐃᓄᐃᑦ ᓄᓇᓕᖏᓐᓂ ᐱᓕᕆᐊᖑᓯᒪᕗᑦ ᐸᐅᒃᑑᑎᒃᑯᓐᓂᑦ ᑲᑐᔾᔨᖃᑎᒋᔭᐅᓪᓗᑎᒃ ᐊᓪᓚᐃᑦ ᓱᕈᓯᓄᑦ ᐃᓚᒌᓄᓪᓗ ᑲᒪᒋᔭᖃᕐᓂᕐᒧᑦ ᑲᑐᔾᔨᖃᑎᒌᑦ ᑲᓇᑕᒥ. ᖃᐅᔨᓴᓂᕐᒧᑦ ᑭᐅᔾᔪᑕᐅᓯᒪᔪᑦ ᐃᓕᓴᖅᓯᔾᔪᑕᐅᓯᒪᕗᑦ ᐱᔭᐅᔭᕆᐊᖃᕐᓂᖓ ᐅᔾᔨᕆᔭᐅᓂᕐᓴᐅᓗᓂ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔾᔪᑎᐅᕙᒃᑐᑦ ᓄᓇᓕᐅᔪᓂ, ᐱᓗᐊᖅᑐᒥᒃ ᐱᔾᔪᑎᒋᓪᓗᒋᑦ ᓱᖅᑯᐃᖅᑕᐅᓂᕐᒧᑦ ᐃᑲᔪᕐᓂᕐᓴᐅᔪᓄᐊᖅᑎᑦᑎᓂᒧᓪᓗ ᐱᓕᒻᒪᒃᓴᐃᓂᕐᒥᒃ.

2006-ᒥ, ᐸᐅᒃᑐᑎᒃᑯᑦ, ᑲᑐᔾᔨᖃᑎᖃᕐᓗᑎᒃ ᑲᓇᑕᒥ ᓄᓇᖃᖅᑳᕐᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᑲᑐᔾᔨᖃᑎᒌᖏᓐᓂᒃ (NAHO), ᐋᖅᑭᒃᓱᐃᓯᒪᕗᑦ ᓯᕗᒧᐊᒃᓯᒪᔪᑎᒍᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔾᔪᑕᐅᓯᒪᔪᓄᑦ ᐱᓕᒻᒪᒃᓴᐃᓂᕐᒧᑦ ᐃᖅᑲᓇᐃᔭᖅᑎᓂᒃ ᐊᓯᖏᓐᓂᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒥ ᑲᒪᔨᐅᕙᒃᑐᓄᑦ. ‘ᑲᑐᔾᔨᖃᑎᒌᑦᓱᓂ ᓴᓐᖏᓂᖅ: ᐱᓕᕆᖃᑎᒌᖕᓂᖅ ᑐᑭᓯᔭᐅᖁᓪᓗᒍ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔭᐅᓯᒪᔪᓄᑦ ᐱᔾᔪᑎᐅᓪᓗᐊᑕᕐᓯᒪᔪᑦ ᐸᕐᓇᐅᑎᓕᐊᖑᔪᓂ ᐃᑲᔪᖅᓱᖅᑕᐅᖁᓪᓗᒋᑦ ᐊᕐᓇᐃᑦ ᐊᑦᑕᕐᓇᖅᑐᒦᒃᑲᔭᕐᑐᑦ ᐊᒻᒪᓗ ᐃᓚᖏᔭᐅᓪᓗᓂ ᐊᖏᓂᕐᓴᒥ ᐸᕐᓇᒍᑎ ᐃᑲᔪᖅᑕᐅᖁᓪᓗᒋᑦ ᓄᓇᓕᐅᔪᑦ ᖃᐅᔨᓴᕐᓂᕐᒥᒃ ᓇᓗᓇᐃᒃᑯᑎᐅᒐᔭᕐᑐᑦ ᐋᓐᓂᐊᖅᑐᓕᕆᓂᕐᒥ ᐊᒃᑐᐃᓂᖃᕐᐸᒃᑐᑦ ᐃᓅᓯᕆᔭᐅᔪᓄᑦ ᓇᔾᔨᔪᓂᑦ ᐊᒻᒪᓗ ᐊᕐᓇᐃᑦ ᕿᑐᕐᖏᐅᕈᓐᓇᕐᑐᑦ ᐊᑐᖅᐸᒃᑐᑦ ᐃᒥᐊᓗᒻᒥᒃ ᐋᖓᔮᕐᓇᖅᑐᓂᓪᓘᓐᓃᑦ. ᐊᕕᒃᑐᖅᓯᒪᓂᐊᓂ ᐃᓕᓐᓂᐊᕐᑎᔾᔪᑎᐅᓯᒪᔪᑦ ᑲᑎᒪᓯᓐᓈᖅᑎᓪᓗᒋᑦ ᐱᓕᕆᐊᖑᓯᒪᕗᑦ ᐃᓅᕕᒻᒥ, ᐃᖃᓗᒃᑑᑦᑎᐊᕐᒥ, ᑰᔾᔪᐊᕐᒥ, ᐃᓄᒃᔪᐊᒥᓗ.

2007-ᒥ, ᐸᐅᒃᑑᑎᒃᑯᑦ ᑲᑐᔾᔨᖃᑎᖃᓕᕐᓯᒪᕗᑦ ᑲᓇᑕᒥ ᐅᓇᑕᖅᑐᒃᓴᒃᑯᑦ ᐱᓕᕆᕝᕕᐊᓂᒃ ᐊᒻᒪᓗ ᑲᓇᑕᒥ ᓄᑲᖅᓯᐅᓂᕐᓴᑦ ᐅᓇᑕᖅᑐᒃᓴᓐᖑᐊᓂᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖃᓂᕐᒧᓪᓗ ᓯᕗᒧᐊᒃᓯᒪᔪᑎᒍᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᓯᒪᔪᓂᒃ ᐱᓕᒻᒪᒃᓴᐃᓂᕐᒧᑦ ᐱᓕᒻᒪᒃᓴᐃᔨᐅᔪᓂᒃ.

ᐸᐅᒃᑑᑎᒃᑯᑦ ᓴᖅᑮᓯᒪᕗᑦ ᐊᑐᐊᒐᒥᒃ ᓱᕈᓯᓛᓄᑦ ᐃᓕᓐᓂᐊᕐᓂᓕᕆᓂᕐᒥᒃ ᐊᑎᖃᕐᑐᖅ ᐱᐊᕋᓄᑦ: ᐱᐅᔪᑎᒍᑦ ᐱᓕᒻᒪᒃᓴᐃᔾᔪᑎᑦ ᐃᓄᐃᑦ ᓱᕈᓯᓛᓄᑦ ᐃᓕᓐᓂᐊᕆᐅᖅᓴᑎᑦᑎᓂᕐᒥᒃ.’ ᑖᓐᓇ ᐃᑲᔪᕈᑎᒃᓴᖅ ᐃᓚᓕᐅᔾᔨᓯᒪᕗᖅ ᐃᓚᖓᓂ ᐊᒃᓱᕈᓐᓇᕐᑐᖅᓯᐅᕐᓂᒃᑯᑦ ᐃᓕᖅᑯᓯᕆᔭᐅᔪᒥᒃ, ᐃᒃᐱᒋᔭᖃᕐᓂᕐᓴᐅᓪᓗᑎᒃ ᐃᓕᖅᑯᓯᕆᔭᐅᕙᒃᑐᓂᒃ ᑕᒪᒃᑯᐊ ᑕᐃᒪᐃᓕᑐᐃᓐᓇᕆᐊᖃᕐᑐᑦ ᐱᔾᔪᑎᐅᓕᕐᓯᒪᓗᑎᒃ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᒃ ᐊᒃᑐᐃᔾᔪᑕᐅᓯᒪᔪᓄᑦ, ᐅᐃᒪᔮᓂᕐᒥᓄᑦ ᐊᔪᕈᑎᓕᖕᓄᑦ, ᐃᓕᑦᑎᒡᒐᖃᑦᑕᕐᑐᓄᑦ, ᐅᖃᕆᐅᖅᓵᓕᕙᖏᑦᑐᓄᑦ ᐅᖃᐅᓯᕐᓄᓪᓗ ᐊᔪᖏᓐᓂᕐᒥᒃ ᓱᑲᐃᑦᑐᒃᑰᕐᐸᒃᑐᑦ. ᐃᓱᒪᒋᔭᐅᓯᒪᓂᖓ ᓴᖏᓂᖃᓕᕐᑎᑦᑎᓂᕐᒥᒃ ᑐᓐᖓᓂᖃᕐᑐᑎᒍᑦ ᐱᓕᕆᐊᖃᕐᓂᖅ – ᐃᒃᐱᒋᔭᐅᓂᕐᓴᐅᔭᕆᐊᖃᕐᓂᖓ ᐱᐅᔪᑎᒍᑦ ᐊᒻᒪᓗ ᓱᕈᓯᐅᑉ ᐊᔾᔨᐅᖏᑦᑐᒃᑯᑦ ᓴᓐᖏᓂᕆᔪᓐᓇᕐᑕᖏᑦ – ᐃᑲᔪᖅᑕᐅᖁᓪᓗᒍ ᓱᕈᓯᖅ ᐱᕈᖅᐸᓪᓕᐊᔪᓐᓇᕐᓗᓂ ᐃᓕᖅᑯᓯᖃᑦᑎᐊᕈᓐᓇᕐᓂᒃᑯᑦ. ᑕᒪᕐᒥᒃ ᐃᓄᐃᑦ ᓱᕈᓰᑦ ᐱᕈᖅᐸᓪᓕᐊᑦᑎᐊᕆᐊᖃᕐᒪᑕ ᑲᔪᓯᓂᖃᑦᑎᐊᕈᓐᓇᕐᓗᑎᒃ ᑲᒪᒋᔭᐅᑦᑎᐊᕐᑐᒥ. ᓴᓐᖏᓂᕆᔭᖓᓄᑦ ᑐᓐᖓᓂᖃᕐᑐᖅ ᐱᓕᕆᐊᖑᓇᓱᐊᕐᑐᒧᑦ ᐃᑲᔪᖅᑕᐅᖁᓪᓗᒋᑦ ᑕᒪᒃᑯᐊ ᐊᒃᓱᕈᓐᓇᕐᑐᖅᓯᐅᕐᓂᒃᑯᑦ ᐃᓕᖅᑯᓯᖃᕐᑐᑦ ᑲᔪᓯᑦᑎᐊᕈᓐᓇᕐᓗᑎᒃ ᐃᓕᓐᓂᐊᕆᐅᖅᓴᔾᔪᑕᐅᔪᓂ, ᐸᐃᕆᕕᖕᓂ ᐃᓕᓐᓂᐊᕐᕕᒻᒥᓗ.

ᐊᓯᖓᑦᑕᐅᖅ ᐊᑑᑎᖃᕐᑐᖅ ᐃᑲᔪᕈᑎᒃᓴᖅ ᐃᓅᓂᖅ ᓄᓇᐃᓐᓇᕐᒥ ᐃᑲᔪᖅᑎᖃᕐᓂᒃᑯᑦ: ᐃᓄᐃᑦ ᐊᕐᓇᓄᑦ ᐃᑲᔫᑎ ᖃᓄᐃᖏᑦᑎᐊᕐᓂᒃᑯᑦ ᓇᔾᔨᔪᓐᓇᖁᓪᓗᒋᑦ. ᑖᓐᓇ ᐊᑑᑎᖃᕐᑐᖅ ᓇᔾᔨᔪᓄᑦ ᐅᓪᓗᖅᓯᐅᑎ ᐱᑕᖃᓕᕐᑎᑦᑎᓪᓗᓂ ᐱᒻᒪᕆᐅᔪᑦ ᓂᕆᔭᒃᓴᑦᑎᐊᕙᖕᓂᒃ ᐊᒻᒪᓗ ᐃᓅᓕᓴᐅᑎᓄᑦ ᖃᐅᔨᒪᔭᕆᐊᖃᓂᕐᒥᒃ ᓇᔾᔨᔪᓐᓇᑦᑎᐊᖁᓪᓗᒋᑦ ᐊᒻᒪᓗ ᑐᑭᓯᒋᐊᕈᑎᒃᓴᑦ ᐃᓕᖅᑯᓯᑐᖃᒃᑯᑦ ᐃᕐᓂᓱᒃᓰᓂᕐᒧᑦ.

ᐱᕙᓪᓕᐊᑎᑕᐅᓯᒪᓂᖓ ᓄᑖᖑᓛᖑᓪᓗᓂ ᐃᓄᖕᓄᑦ ᑕᓪᓕᒪᑦ ᐊᕐᕌᒍᓄᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑕᐅᓯᒪᔪᓄᑦ ᐸᕐᓇᐅᑎᓕᐊᖑᓯᒪᔪᖅ ᑐᑭᒧᐊᒃᑎᑕᐅᓯᒪᓪᓗᓂ ᑎᓴᒪᑦ ᐸᕐᓇᐃᔩᑦ ᑲᑎᒪᓂᐅᔪᑦ ᑲᑎᒪᑎᑦᑎᔾᔪᑕᐅᓪᓗᓂ 2010 ᐱᒋᐊᓕᓵᕐᓂᕆᔭᖓᓂ ᐸᐅᒃᑑᑎᒃᑯᓐᓂᑦ ᑐᑭᓯᐅᒪᔭᐅᓂᕐᓴᐅᓕᖁᓪᓗᒋᑦ ᐃᓄᐃᑦ ᖃᐅᔨᒪᓂᑐᖃᖓᑦ, ᐱᐅᓯᕆᔭᖏᑦ, ᐃᓕᖅᑯᓯᕆᔭᖏᓪᓗ ᐱᔾᔪᑎᖃᕐᑐᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑕᐅᓯᒪᔪᓄᑦ ᐊᒻᒪᓗ ᐃᑲᔪᕐᓗᑎᒃ ᐃᓕᓴᖅᓯᓂᕐᒧᑦ, ᑲᑐᔾᔨᖃᑎᖃᕐᓂᒃᑯᑦ, ᓯᕗᓪᓕᐅᔾᔭᐅᒋᐊᓖᑦ ᖃᓄᐃᓕᐅᕈᑎᖃᓂᕐᒧᑦ ᐊᕐᕌᒎᓂᐊᖅᑐᓂ. ᐸᕐᓇᐃᔩᑦ ᒫᓐᓇᓕᓴᐅᔪᒧᑦ ᖃᐅᔨᒪᓂᕆᔭᐅᔪᓂᒃ ᐃᓕᓯᐅᖅᑲᐃᓪᓗᑎᒃ ᐊᒻᒪᓗ ᐃᑲᔪᕐᓯᒪᓪᓗᑎᒃ ᐸᕐᓇᐅᑎᓕᐅᖅᐸᓪᓕᐊᓂᕐᒧᑦ ᑐᑭᒧᐊᒍᑎᐅᔪᓂᒃ ᐱᐅᓂᖅᐹᒃᑯᑦ ᐱᓕᕆᐊᖑᖁᓪᓗᒋᑦ ᐱᔭᐅᔭᕆᐊᖃᕐᑐᑦ ᐃᓄᖕᓂᑦ, ᐃᓚᒌᓂᑦ, ᐊᒻᒪᓗ ᓄᓇᓕᐅᔪᓂᑦ. ᐅᖃᖃᑎᒌᒍᑎᖃᕐᓯᒪᕗᑦ ᒪᕐᕉᒃ ᐅᓪᓘᖕᓄᑦ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᕙᒃᑐᓄᑦ ᐸᕐᓴᐅᑎᓕᐅᓂᕐᒧᑦ ᑲᑎᒪᓂᐅᔪᓂᒃ ᑕᒪᓐᓇ ᐊᑐᖅᑕᐅᓯᒪᓪᓗᓂ ᕼᐊᐱ ᕚᓕ-ᒎᔅ ᐸᐃ, ᓛᐸᑐᐊᒥ, ᒫᔨ 2010-ᖑᑎᓪᓗᒍ. ᐃᓚᐅᖃᑕᐅᓯᒪᔪᑦ ᓇᓗᓇᐃᔭᖅᑕᐅᓂᖓ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑎᐅᕙᒃᑐᓄᑦ, ᓱᕈᓯᓛᓄᑦ ᐃᓕᓐᓂᐊᕆᐅᕐᓴᑎᑦᑎᓂᕐᒥᒃ, ᐊᒻᒪᓗ ᐸᐃᕆᕕᖕᓄᑦ ᐃᓕᓐᓂᐊᕐᑎᑦᑎᓂᖅ ᓄᐊᑕᐅᓯᒪᔪᑦ ᐃᓄᐃᑦ ᓄᓇᓕᒫᖏᓐᓂᑦ ᐅᖃᖃᑎᒌᒍᑕᐅᖁᓪᓗᒍ ᐃᓗᐊᖏᔾᔪᑎᐅᕙᖕᓂᖓ ᓇᔾᔨᐊᖑᓪᓗᑎᒃ ᐃᒥᐊᓗᒻᒧᑦ ᐊᒃᑐᐃᔾᔪᑕᐅᕙᒃᑐᑦ ᐊᒻᒪᓗ ᓯᕗᓂᒃᓴᒧᑦ ᐸᕐᓇᐅᑎᓕᐅᓂᕐᒥᒃ.