ᓇᔾᔨᔪᑦ ᑲᒪᒋᔭᐅᑦᑎᐊᕆᐊᖃᕐᓂᖏᑦ

ᐊᑐᓕᕐᑎᑦᑎᓂᖅ ᖃᐅᔨᒪᓂᑐᖃᕆᔭᐅᔪᓂᑦ ᐱᔭᐅᓯᒪᔪᑦ ᐊᐱᖅᓱᕐᓂᒃᑯᑦ ᐱᓕᕆᐊᖑᓯᒪᓪᓗᓂ 1992/23-ᒥ, ᐃᓚᓕᐅᔾᔨᓯᒪᓪᓗᓂ ᐅᓪᓗᒥᐅᓕᕐᑐᒧᑦ ᐃᓅᓕᓴᐅᑎᓄᑦ ᐅᖃᐅᔾᔪᐃᖃᑎᒌᖕᓂᕐᒧᑦ ᐊᒻᒪᓗ ᐸᐅᒃᑑᑎᒃᑯᑦ ᐱᓕᕿᐊᖓᑦ ᖃᓄᐃᖏᑦᑎᐊᕐᓗᑎᒃ ᓄᑕᕋᓛᓄᑦ ᐱᓕᕆᐊᑦ, ᐸᐅᒃᑑᑎᒃᑯᑦ ᓴᖅᑮᓯᒪᕗᑦ ᓇᔾᔨᔪᓄᑦ ᐅᓪᓗᕐᓯᐅᑎᒥᒃ ᑕᐃᔭᐅᓪᓗᓂ ᐃᓅᓂᖅ ᓄᓇᐃᓐᓇᕐᒥ ᐃᑲᔪᖅᑎᖃᕐᓂᒃᑯᑦ, ᐊᑐᐃᓐᓇᐅᓕᖅᓯᒪᔪᖅ ᑎᓴᒪᑦ ᐃᓄᒃᑎᑐᑦ ᐅᖃᐅᓯᒃᑯᑦ.

2008-2011-ᒥ, ᑮᓇᐅᔭᖃᖅᑎᑕᐅᓯᒪᓪᓗᓂ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖅᑐᓕᕆᓂᖅ ᓅᑕᐅᓂᖓᓄᑦ ᑮᓇᐅᔭᓄᑦ ᐸᐸᑦᑎᕕᖓᓂᑦ ᐋᓐᓂᐊᖅᑐᓕᕆᔨᒃᑯᓐᓂᑦ ᑲᓇᑕᒥ, ᐸᐅᒃᑑᑎᒃᑯᑦ ᓴᖅᑭᑦᑎᓯᒪᕗᑦ ᐃᓄᖕᓅᖓᔪᓂᒃ ᓇᔾᔨᔪᓕᕆᓂᕐᒧᑦ ᑕᕐᕆᔭᒐᓕᐊᒥᒃ ᐃᓗᓕᖃᕐᑐᖅ ᑎᓴᐅᒪᐅᔪᖅᑐᑦ ᐊᔾᔨᒌᖏᑦᑐᑦ ᐃᓚᒍᑕᖃᕐᑐᖅ ᐃᓚᒋᔭᐅᓪᓗᑎᒃ ᕿᒥᕐᕈᐊᒐᕋᓛᑦ ᐃᓚᒌᓄᑦ ᐊᒻᒪᓗ ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᕈᑕᐅᔪᓂᒃ ᐱᑕᖃᖅᑎᑦᑎᔨᐅᔪᓄᑦ. ᑖᓐᓇ ᐅᖃᓕᒫᒐᖅ ᐱᔾᔪᑎᐅᓇᓱᐊᕐᓯᒪᕗᖅ ᐃᓚᒌᖑᔪᑦ ᓇᔾᔨᔪᓪᓘᓐᓃᑦ ᐊᕐᓇᐃᑦ ᐋᓐᓂᐊᖅᑐᓕᕆᔨᖏᓪᓗ ᐅᖃᖃᑎᒌᒍᓐᓇᕐᓗᑎᒃ ᐃᕐᓂᓱᒃᓰᓂᕐᒧᑦ.

ᑐᓐᖓᓂᖃᕐᑐᖅ ᑭᐅᔾᔪᑕᐅᓯᒪᓂᖓᓄᑦ ᖃᐅᔨᓴᕐᓂᖅᑎᓪᓗᒋᑦ ᓇᔾᔨᔪᓕᕆᓂᕐᒧᑦ ᑕᕐᕆᔭᒐᓕᐊᖅ, ᑐᑭᓯᓇᕐᓯᓚᐅᕐᑐᖅ ᒪᒃᑯᒃᑐᑦ ᐊᖑᑎᑦ ᐃᓚᐅᓂᖃᕐᓂᕐᓴᐅᔪᒪᓯᒪᓪᓗᑎᒃ ᐱᕈᖅᓴᐃᓂᕐᒥᒃ ᐊᒻᒪᓗ ᓇᔾᔨᑎᓪᓗᒋᑦ. 2011/12 ᐸᐅᒃᑑᑎᒃᑯᑦ ᓴᖅᑮᓯᒪᕗᑦ ᑕᕐᕆᔭᒐᓕᐊᒥᒃ ᐊᑎᖃᕐᑐᖅ ᐱᕈᖅᓴᐃᓂᖅ- ᐃᓄᐃᑦ ᐊᑖᑕᐅᔪᑦ ᑐᑭᓯᐅᒪᔭᖓᒍᑦ. ᑕᕐᕆᔭᒐᓕᐊᖅ ᐃᓱᒪᒃᓴᕐᓯᐅᕈᑕᐅᓕᕈᓐᓇᕐᓗᓂ ᐊᒻᒪᓗ ᐃᑲᔪᖅᓱᐃᔾᔪᑎᐅᓗᓂ ᐊᑖᑕᐅᔭᕆᐅᕐᓂᐊᖅᑐᓄᑦ ᐅᖓᒋᖃᑦᑕᐅᑎᓂᕐᒧᓪᓘᓐᓃᑦ ᐊᒃᓱᕈᓐᓇᕐᑐᖅᓯᐅᖅᐸᒃᑐᓄᑦ ᓱᕈᓯᖏᓐᓂᒃ.

ᑖᓐᓇ ᑕᕐᕆᔭᒐᓕᐊᖅ ᑐᓂᐅᖅᑲᕐᑕᐅᓂᐊᕐᑐᖅ ᓄᓇᓕᐅᔪᓄᑦ ᐊᒻᒪᓗ ᐊᑐᐃᓐᓇᐅᓕᕐᓂᐊᕐᑐᖅ ᐸᐅᒃᑑᑎᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓᓂ ᐃᐳᕈ 2012-ᒥ.