ᓱᕈᓰᑦ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᕙᖕᓂᖏᑦ

ᓱᕈᓰᑦ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᕙᖕᓂᖏᓐᓄᑦ ᐃᓕᓐᓂᐊᕐᑎᑦᑎᔾᔪᑦ ᐊᒻᒪᓗ ᐱᓂᕐᓗᒃᑕᐃᓕᒪᑎᑦᑎᓂᖅ ᓯᕗᓪᓕᐅᔾᔭᐅᓯᒪᕗᖅ ᐸᐅᒃᑑᑎᒃᑯᓐᓂᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑕᐃᒪᓐᖓᓂᑦ ᑎᒥᕈᓚᐅᖅᓯᒪᑎᓪᓗᒋᑦ 1984-ᒥ. 1990 ᐱᒋᐊᓕᓵᕐᓂᕆᔭᖏᓐᓂ, ᐸᐅᒃᑑᑎᒃᑯᑦ ᓴᖅᑭᑦᑎᓯᒪᕗᑦ ᐃᔨᕋᕐᑐᐊᖃᕈᓐᓃᕐᓂᖅ: ᐃᓕᓴᖅᓯᓂᖅ ᐃᓗᐊᖏᔾᔪᑎᒥᒃ ᓱᕈᓰᑦ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᕙᖕᓂᖏᓐᓄᑦ ᐃᓄᐃᑦ ᓄᓇᓕᖏᓐᓂ, ᖃᐅᔨᓴᕈᑕᐅᒋᐊᓐᖓᕐᓯᒪᔪᖅ, ᑕᐃᔅᓱᒪᓂᐅᑎᓪᓗᒍ, ᓇᓗᓇᐃᖅᓯᔾᔪᑎᐅᓯᒪᕗᖅ 85 ᐳᓴᓐᑎᐅᔪᑦ ᐋᓐᓂᐊᖃᕐᓇᖏᑦᑐᓕᕆᔨᐅᔪᑦ, ᐸᓖᓯᒃᑯᑦ ᐃᓄᓕᕆᔨᒃᑯᑦ ᖃᐅᔨᒋᐊᕐᕕᐅᓯᒪᔪᑦ ᐅᖃᕐᓯᒪᖕᒪᑕ ᖃᐅᔨᓯᒪᓪᓗᑎᒃ ᓱᕈᓯᒥᒃ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᓯᒪᔪᒥᒃ, ᐱᓂᕐᓗᒃᑕᐅᓯᒪᔪᒥᓪ¬ᓐᑦ ᐅᓂᒃᑳᓕᐊᖑᓯᒪᓇᓂ. ᖃᐅᔨᓴᕈᑕᐅᔪᓐᓇᕐᓯᓯᒪᓐᖏᓚᖅ ᓇᓗᓇᐃᖅᓯᔾᔪᑎᐅᓗᓂ ᐅᓪᓗᒥᐅᓕᕐᑐᒥ ᓈᓴᐅᑎᐅᔪᑦ 2004-ᖑᑎᓪᓗᒍ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕈᑕᐅᓯᒪᔪᖅ ᓄᓇᕕᒻᒥ ᓴᖅᑮᓯᒪᕗᖅ 40 ᐳᓴᓐᑎ ᐅᖓᑎᐊᓃᑦᑐᑦ ᐃᓐᓇᐃᑦ ᓇᓗᓇᐃᖅᓯᓯᒪᓪᓗᑎᒃ ᐱᕋᔭᒃᑕᐅᓯᒪᓂᖏᓐᓄᑦ ᐱᔪᒪᑎᓐᓇᒋᑦ ᓄᓕᐊᕐᓂᒃᑯᑦ ᐅᕝᕙᓘᓐᓃᑦ ᐸᒡᕕᓵᕆᔭᐅᓯᒪᓪᓗᑎᒃ ᒪᒃᑯᓗᐊᖅᑎᓪᓗᒋᑦ. ᐊᓯᖏᑦ ᐸᐅᒃᑑᑎᒃᑯᓐᓂ ᖃᓄᐃᓕᐅᕈᑕᐅᓯᒪᔪᑦ ᐃᓚᓕᐅᔾᔨᓯᒪᕗᖅ ᑎᑎᕋᖅᐸᓪᓕᐊᓂᕐᒥᒃ ᐱᔨᑦᑎᕋᕈᓂᒃ ᐊᑐᐃᓐᓇᐅᔪᑦ ᐱᕋᔭᒃᑕᐅᓯᒪᔪᑦ ᓱᕈᓯᐅᑎᓪᓗᒋᑦ ᓄᓕᐊᕐᓂᒃᑯᑦ ᐱᓂᕐᓗᒃᑕᐅᓯᒪᔪᓂ ᑕᐃᒪᐃᒃᑲᓗᐊᖅᑎᓪᓗᒍ ᑕᒪᓐᓇ ᒫᓐᓇᐅᓕᕐᑐᒥ ᐃᓱᒪᒋᔭᐅᓕᕐᓯᒪᕗᖅ ᐱᑐᖃᐅᓕᕐᓂᖓᓄᑦ. ᐱᓕᕆᐊᖃᒻᒪᕆᒃᓯᒪᒐᓗᐊᖅᑎᓪᓗᒋᑦ ᖃᓄᐃᓕᐅᕈᑕᐅᔭᕆᐊᓕᖕᓂᒃ ᑭᒡᓕᖃᖅᑐᒦᓯᒪᕗᖅ ᐱᔾᔪᑎᒋᓪᓗᒍ ᐱᔾᔪᑎᐅᓯᒪᔪᓄᑦ ᐃᓚᒋᔭᐅᓪᓗᓂ ᐱᓕᕆᐊᓄᑦ ᑮᓇᐅᔭᖃᖅᑎᑕᐅᓐᖏᓗᐊᕐᓂᕐᒥᒃ. ᐊᑐᐊᒐᓕᕆᓂᒃᑯᑦ ᐸᐅᒃᑑᑎᒃᑯᑦ ᐃᓚᒋᔭᐅᖃᑕᐅᒻᒪᕆᒃᓯᒪᕗᑦ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᑦ ᑲᑎᒪᔨᕋᓛᖏᓐᓂ ᓂᐅᕐᕈᑕᐅᕙᒃᑐᑦ ᓄᓕᐊᕐᓂᒃᑯᑦ ᐊᑐᕐᓂᓗᒍᑕᐅᕙᖕᓂᖏᑦ ᓱᕈᓯᐅᑎᓪᓗᒋᑦ ᐊᒻᒪᓗ ᐅᓂᒃᑳᓕᐅᕐᓯᒪᕗᑦ ᐊᒥᓱᒐᓚᖕᓂᒃ ᑲᑎᒪᔨᕋᓛᖑᐃᓐᓇᕐᑐᓂᒃ ᐊᓯᖏᓐᓄᓪᓗ ᐱᖃᑕᐅᓯᒪᔪᓂᒃ ᐱᕕᒃᓴᖅᑕᖃᓕᕌᖓᑦ.