ᕿᒫᕖᑦ

ᓄᑖᖑᓂᕐᐹᖑᓯᒪᔪᖅ ᑲᓇᑕᒥ ᓈᓴᖅᑕᐅᓯᒪᔪᖅ ᑕᑯᒃᓴᐅᓂᖃᐃᓐᓇᕐᑎᑦᑎᕗᖅ ᐅᑭᐅᖅᑕᕐᑐᖅ ᖁᕝᕙᓯᖕᓂᖅᐹᒃᑯᑦ ᐃᓚᒌᒃᑐᓂ ᐊᕐᓇᐅᓂᕐᒧᑦ/ᐊᖑᑕᐅᓂᕐᒧᑦ ᐋᓐᓂᕐᓯᕆᓂᖃᖃᑦᑕᕐᓂᖓᓂᒃ ᑲᓇᑕᓕᒫᒥ. 70 ᐳᓴᓐᑎ ᐅᖓᑎᐊᓄᑦ 53 ᐃᓄᐃᑦ ᓄᓇᓕᖏᑦ ᓯᐊᒻᒪᒃᑐᖅᓯᒪᕗᖅ ᑎᓴᒪᑦ ᓄᓇᓐᖑᐊᑎᒍᑦ ᐊᕕᒃᑐᖅᓯᒪᓂᕆᔭᖏᓐᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᑦᑕᕐᓇᖏᑦᑐᒥᒃ ᕿᒫᕕᖃᖏᒻᒪᑕ ᐊᕐᓇᓄᑦ ᓱᕈᓯᓄᓪᓗ ᐃᓚᒌᓂ ᐋᓐᓂᕐᓯᕆᓂᕐᒥ ᐊᑐᖅᓯᒪᔪᓂ. ᑕᒪᓐᓇ ᑐᑭᖃᕈᓐᓇᕐᐳᖅ ᐊᕐᓇᖅ ᐊᒃᓱᕈᑎᖃᕋᓱᐊᕐᓗᓂ ᓄᓇᓕᖓᓂ ᐃᓄᓕᕆᔨᒃᑯᓐᓂᒃ ᖃᖓᑕᓲᒃᑰᖅᑎᑕᐅᔪᓐᓇᕐᒪᖔᑦ ᐊᓯᖓᓄᑦ ᓄᓇᓕᒻᒧᐊᕈᒪᓂ ᐊᑦᑕᕐᓇᖏᑦᑐᒦᑲᐃᓐᓇᖁᓇᒍ. ᐊᒥᓱᓂᒃ ᐱᔾᔪᑎᒃᓴᖅᑕᖃᐅᓕᕐᓯᒪᕗᖅ ᐅᑭᐅᖅᑕᕐᑐᒥ ᐊᑐᐃᓐᓇᖃᕈᓐᓇᓐᖏᓗᐊᖅᑎᓪᓗᒋᑦ ᐊᑦᑕᕐᓇᖏᑦᑐᒦᒃᑲᔭᕐᓂᕐᒧᑦ ᓂᕈᐊᒐᒃᓴᐅᑎᑕᐅᔪᓄᑦ ᐃᓅᔪᓐᓃᕈᑕᐅᖃᑦᑕᕐᓯᒪᕗᖅ.

ᑕᒫᓂᒐᓚᒃ 15 ᓴᖅᑭᔮᖅᐸᒌᖅᑐᑦ ᕿᒫᕖᑦ ᑐᔪᕐᒥᕕᐅᓚᐅᑲᒍᓐᓇᕐᑐᓪᓗ ᐃᒡᓗᐃᑦ, ᐊᒥᓱᓄᑦ ᓇᔪᕐᕕᐅᓗᐊᕐᓂᖓ ᖃᐅᑕᒫᑎᒍᑦ ᐊᒃᓱᕈᓐᓇᒐᓚᖕᓂᐅᕙᒃᐳᖅ ᐊᐅᓚᑦᑎᓇᓱᐊᕐᓂᕐᒧᑦ ᐃᖅᑲᓇᐃᔭᖅᑎᖃᕆᐊᖃᓂᕐᒧᓪᓗ ᖁᕝᕙᓯᒃᑐᑎᒍᑦ ᐃᖅᑲᓇᐃᔭᖅᑎᓄᑦ ᐃᓇᖏᕐᓯᔾᔪᑎᐅᔭᕆᐊᖃᓕᕐᐸᒃᑐᖅ ᑕᖃᓗᐊᖃᑦᑕᕐᓂᖏᓐᓄᑦ, ᑕᐃᒪᐃᓪᓗᐊᖃᑎᒋᔭᖏᓐᓂᑦ ᐃᑲᔪᖅᓱᖅᑕᐅᕙᖏᓐᓂᖏᓐᓄᑦ ᐊᒻᒪᓗ ᒥᑭᓗᐊᖅᑐᑎᒍᓪᓘᓐᓃᑦ ᐱᓕᒻᒪᒃᓴᖅᑕᐅᓯᒪᓪᓗᑎᒃ ᐱᓕᒻᒪᒃᓴᖅᑕᐅᓯᒪᓇᑎᓪᓘᓐᓃᑦ ᐱᔾᔪᑎᒋᓪᓗᒍ ᓄᓇᓐᖑᐊᒥ ᐅᖓᓯᒃᑐᒦᓗᐊᕐᓂᖏᓐᓄᑦ ᑭᒡᓕᖃᖅᑎᑕᐅᕙᖕᓂᖓᓄᓪᓗ ᑮᓇᐅᔭᑎᒍᑦ ᐃᑲᔪᕈᑎᒃᓴᐅᒐᔭᕐᑐᑦ ᐱᓕᒻᒪᒃᓴᖅᑕᐅᒐᔭᕐᓂᕐᒧᑦ. ᕿᖑᓪᓕᕆᓕᖅᑕᖓᒍᑦ ᐃᒻᒥᒃᑰᓕᕈᑎᒃᓴᓄᑦ ᐃᒡᓗᒃᓴᖅᑕᖃᕐᓇᓂᓗ ᐅᑭᐅᖅᑕᖅᑐᒥ, ᐊᑑᑎᖃᒻᒪᕆᒃᑲᔭᕐᑐᖅ ᐊᕐᓇᐃᑦ ᐃᓅᓯᖓᓄᑦ ᐃᓂᓪᓚᒃᑲᓐᓂᕋᓱᐊᕋᔭᖕᓂᖓᓄᑦ ᐋᓐᓂᕐᓯᕆᓂᖃᖏᑦᑐᒥ.

ᐊᒥᓱᓂᒃ ᐱᔾᔪᑎᖃᐅᕐᒪᑦ ᐃᓄᐃᑦ ᐊᕐᓇᓄᑦ ᓂᕕᐊᖅᓵᓄᓪᓗ ᐊᑦᑕᕐᓇᕐᑐᒧᐊᕈᑎᐅᕙᒃᑐᑦ ᐱᕋᔭᒃᑕᐅᒐᔭᕐᓂᖏᓐᓄᑦ. ᐃᒡᓗᒋᔭᐅᓚᐅᑲᑐᐃᓐᓇᕐᓯᒪᔪᑦ ᐋᖅᑭᒃᓱᕐᓯᒪᓂᖏᓪᓗ ᐊᑐᖅᑕᐅᓯᒪᔪᑦ ᓄᓇᓕᐅᖏᓐᓇᓕᕐᑎᔾᔪᑕᐅᓯᒪᔪᑦ 70 ᐊᕐᕌᒍᑦ ᐊᓂᒍᖅᓯᒪᓕᕐᑐᓂ ᐊᑯᓂᐅᓂᕐᓴᑎᒍᑦ ᐊᑐᕐᑕᐅᓯᒪᕗᖅ ᐊᑯᓂᐅᓂᕆᔭᖓᓂᓪᓕ ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᑕᖃᓐᖏᓗᐊᕐᑐᖅ ᓄᓇᓕᐅᔪᓕᒫᓂ. 2007 ᓂᐱᕋᓛᕆᔭᐅᔪᑦ ᓄᓇᕗᒥ: ᖃᐅᔨᓴᕐᓂᖅ ᐃᓄᐃᑦ ᐊᖏᕐᕋᖃᖏᓐᓂᖏᓐᓂᒃ ᓄᓇᕐᔪᐊᑎᒍᑦ ᐅᑭᐅᖅᑕᖅᑐᒥ 60-ᒋᔭᖓᓂ ᑐᑭᖓᓂ, ᓴᓇᔭᐅᓯᒪᔪᖅ ᖁᓪᓖᑦ ᓄᓇᕗᒥ ᐊᕐᓇᐃᑦ ᑲᑎᒪᔨᖏᓐᓄᑦ, ᓇᓚᐅᑦᑖᕐᓯᒪᕗᖅ “54 ᐳᓴᓐᑎ ᐃᓄᐃᑦ ᒫᓐᓇᐅᔪᒥ ᐃᓄᒋᐊᓗᐊᖅᑐᓃᑉᐳᑦ, ᐊᒻᒪᓗ ᑖᒃᑯᓇᓂ 38.7 ᐳᓴᓐᑎᐅᔪᑦ ᐃᓱᒪᒋᔭᐅᓪᓗ ᐱᔭᕆᐊᖃᒻᒪᕆᖕᓂᖏᓐᓂᒃ. ᑕᒪᓐᓇ ᓈᓴᖅᑕᐅᓯᒪᔪᖅ ᖁᕝᕙᓯᒃᑐᒻᒪᕆᐅᕗᖅ ᐱᔾᔪᑎᒋᓪᓗᒍ ᐃᒡᓗᑭᒃᓴᓗᐊᕐᓂᐅᔪᖅ ᐃᓄᖕᓄᑦ ᓵᔾᔪᑎᐅᔭᕆᐊᖃᓕᖃᑦᑕᕐᓂᑰᒻᒪᑦ ᐱᖃᓐᓇᕆᔭᒥᓄᑦ ᐃᓚᒋᔭᒥᓄᓪᓗ,” 2011 ᐅᓂᒃᑳᓂᐊᒥ ᒫᓐᓇᐅᖏᑉᐸᑦ…ᖃᖓᓕ? ᐱᔾᔪᑎᖃᕐᑐᖅ ᐃᓄᐃᑦ ᐃᒡᓗᑭᒃᓴᕐᓂᕆᔭᖏᓐᓄᑦ ᑲᓇᑕᒥ, ᓴᖅᑭᑕᐅᓯᒪᔪᖅ ᐃᓄᐃᑦ ᑐᑦᑕᕐᕕᖓᓂᑦ ᑲᓇᑕᒥ ᓄᓇᖃᖅᑳᕐᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᖏᓐᓂᑦ ᑲᓇᑕᒥ, ᐅᖃᐅᓯᖃᕐᓯᒪᕗᖅ 2006-ᒥ ᓈᓴᖅᑕᐅᓯᒪᔪᑦ ᓇᓗᓇᐃᖅᓯᔾᔪᑎᐅᒻᒪᑦ 31 ᐳᓴᓐᑎᐅᔪᑦ ᐃᓄᐃᑦ ᐃᓄᒋᐊᓗᐊᖅᑐᓃᓐᓂᖏᓐᓂᒃ, ᐊᔾᔨᒌᓐᓂᕐᓯᐅᕐᓗᒍ 3 ᐳᓴᓐᑎᓄᑦ ᑲᓇᑕᒥ ᑲᑎᓕᒫᕐᓗᒋᑦ ᐊᒥᓲᓂᕆᔭᖓᒍᑦ.

ᑐᑭᓕᕇᒃᓱᕐᓯᒪᖏᑦᑐᒃᑯᑦ ᑮᓇᐅᔭᖃᖅᑎᑕᐅᓗᐊᕐᓯᒪᓇᑎᒃ ᐱᓕᕆᐊᑦ ᐱᔨᑦᑎᕋᕈᑎᓪᓗ ᑐᓐᓂᖅᑯᑕᐅᕙᒃᑐᑦ ᑲᔪᓰᓐᓇᕐᑎᑕᐅᔪᓐᓇᕋᑎᒃ, ᐃᓄᖕᓅᖓᑎᑕᐅᓇᑎᒃ, ᐅᕝᕙᓘᓐᓃᑦ ᒪᓕᖕᓂᖃᖅᐸᖕᓇᑎᒃ ᓄᓇᓕᖕᓄᑦ. ᐊᒥᓱᑦ ᐃᖅᑲᓇᐃᔮᒃᓴᐅᔪᑦ ᐅᑭᐅᖅᑕᕐᑐᒥ ᐱᔨᑦᑎᕋᕈᑎᓄᑦ ᐱᑕᖃᕐᑎᑦᑎᔨᐅᔪᓂ ᐱᓕᕆᐊᒃᓴᐅᔪᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥ, ᐃᓱᒪᓕᕆᓂᕐᒥ, ᐃᓄᓕᕆᓂᕐᒧᓪᓗ ᐃᓄᒃᑕᐅᖐᓐᓇᖃᑦᑕᕐᒪᑕ. ᐊᓯᖏᑦ ᑲᓇᑕᐅᑉ ᐊᕕᒃᑐᖅᓯᒪᓂᐊᓃᑦᑐᑦ ᐅᑭᐅᖅᑕᕐᑐᖏᓪᓗ ᑲᒪᒋᔭᒃᓴᖃᖅᐸᒃᑎᓪᓗᒋᑦ ᐃᒡᓗᓕᕆᓂᕐᒧᑦ ᕿᒫᕕᖕᓂᓪᓗ ᐊᕐᓇᓄᑦ. ᐃᓄᓕᕆᔨᑐᖃᒃᑯᑦ ᑲᓇᑕᒥ ᐱᑕᖃᕐᑎᑦᑎᕙᒃᐳᑦ ᐊᐅᓚᓂᕆᔭᖏᓐᓄᑦ ᑮᓇᐅᔭᖃᕐᑎᑦᑎᓂᕐᒥᒃ ᕿᒫᕕᖕᓄᑦ ᓄᓇᖁᑎᒋᔭᐅᔪᓂ, ᐊᒻᒪᓗ “ᐊᑭᓖᔾᔪᑕᐅᓂᑯᕕᓂᕐᒥᒃ ᐅᑎᕐᑎᑦᑎᕙᒻᒪᑕ ᓄᓇᖁᑎᒋᔭᐅᖏᑦᑐᓂ ᕿᒫᕕᖕᓄᑦ ᐊᑐᖅᑕᐅᕙᒃᑐᑦ ᐊᓪᓚᓄᑦ ᓄᓇᖃᕋᓗᐊᕐᑎᓪᓗᒋᑦ ᓄᓇᖁᑎᒋᔭᐅᔪᓂ.” ᐃᓄᐃᑦ ᓄᓇᓕᖏᑦ ᓄᓇᖁᑎᒋᔭᐅᔪᒦᖏᒻᒪᑕ, ᕿᒫᕖᓪᓗ ᐱᔨᑦᑎᕋᕐᑐᑦ ᐃᓄᐃᑦ ᐊᕐᓇᓄᑦ ᐅᑭᐅᖅᑕᖅᑐᒥ ᐊᑐᐃᓐᓇᖃᕈᓐᓇᕋᑎᒃ ᑕᒪᑐᒥᖓ ᑮᓇᐅᔭᖃᖅᑎᑕᐅᒐᔭᕐᓂᕐᒧᑦ.

2007/08-ᒥ, ᐸᐅᒃᑑᑎᒃᑯᑦ ᐱᓕᕆᖃᑎᖃᕐᓯᒪᕗᑦ ᕿᒫᕕᖕᓄᑦ ᐊᒡᓚᕝᕕᒻᒥ ᐊᖓᔪᖅᑳᓄᑦ ᐃᓄᐃᑦ ᓄᓇᓕᖏᓐᓂ ᓴᖅᑮᖁᓪᓗᒋᑦ ᐃᓄᐃᑦ ᐊᕐᓇᐃᑦ ᕿᒫᕕᖏᓐᓄᑦ ᐊᒡᓚᕝᕕᒻᒥ ᐊᖓᔪᖅᑳᑦ ᑲᑎᑐᔾᔨᖃᑎᒌᖏᓐᓂᒃ. ᓂᕆᐅᒋᔭᐅᓯᒪᕗᖅ ᐱᓐᖑᕐᑎᑕᐅᓂᖓ ᐃᓄᖕᓅᖓᔪᖅ ᑲᑐᔾᔨᖃᑎᒌᒃᑯᑦ ᐃᑲᔪᕈᓐᓇᓕᕋᔭᕐᓗᑎᒃ ᐃᓄᐃᑦ ᓄᓴᓕᖏᓐᓂ ᐊᑐᐃᓐᓇᖃᕈᓐᓇᕐᓂᕐᒧᑦ ᑮᓇᐅᔭᖃᖅᑎᑕᐅᒃᑲᓐᓂᕐᓂᐅᔪᓂᒃ ᐃᑲᔪᖅᑕᐅᖁᓪᓗᒋᑦ ᐃᓗᐊᓂ ᐃᓗᓕᖃᕈᓐᓇᕐᓂᕆᔭᖏᓐᓄᑦ ᐱᓕᒻᒪᒃᓴᐃᔾᔪᑎᐅᓕᕈᓐᓇᕐᓗᑎᓪᓗ ᕿᒫᕕᒻᒥ ᐃᖅᑲᓇᐃᔭᖅᑎᐅᔪᓄᑦ ᐅᖓᓯᒃᑐᕐᒥᐅᑦ ᓄᓇᓕᐅᔪᓂ, ᐊᒻᒪᓗ ᐃᑲᔪᖅᓱᐃᓗᑎᒃ ᓄᑖᑦ ᕿᒫᕕᓐᖑᓕᓵᕐᑐᓄᑦ ᐊᒥᓲᓂᕐᓴᑦ ᐃᓄᐃᑦ ᓄᓇᓕᖏᓐᓂ.