ᐸᐅᒃᑑᑎᒃᑯᑦ ᑲᑎᒪᔨᖏᑦ ᓂᕈᐊᓚᐅᕐᑐᑦ ᐃᓐᓇᖕᒥᖕ ᐃᓅᓱᑦᑐᒥᓪᓗ ᐊᕐᖕᓇᒥᑦ ᐊᕐᕌᒍᑦᑎᓂ ᐃᓕᑕᕆᔭᐅᔫᓐᓂᖕ      

ᐃᖃᓗᐃᑦ, ᓄᓇᕗᑦ ᕕᕝᔪᐊᕆ 23, 2023.  ᐸᐅᒃᑑᑎᒃᑯᑦ ᑲᑎᒪᔨᖏᑦ ᓂᕈᐊᓚᐅᕐᑐᑦ ᐊᕐᕌᒍᑦᑎᓂ ᐃᓕᑕᕆᔭᐅᓂᐊᕐᑑᓐᓂᖕ ᐊᕐᖕᓇᒥᖕ ᐃᓐᓇᖕᒥᑦ ᐃᓅᓱᑦᑐᒥᓪᓗ ᐊᕐᕌᒍᑕᒫᕐᓯᐅᑎᒃᑯᑦ ᑲᑎᒪᕕᔾᔪᐊᕐᑎᓪᓗᒋᑦ.    

“ᑕᐃᒫᖕ ᐃᓕᑕᕐᓯᓂᒃᑯᑦ ᑐᓂᕈᓯᐊᕐᑎᑦᓯᕙᒃᑲᑦᑕ ᐃᑲᔪᕐᔪᐊᕐᓯᒪᔪᓂᑦ ᐃᓅᖃᑎᒥᓂᖕ ᓄᓇᒥᓐᓂ ᐊᒻᒪ ᑲᔪᖏᕐᓴᐃᒃᑲᐅᓂᖏᓐᓄᑦ ᐊᓯᒥᓂᖕ ᐃᓄᐃᑦ ᐊᕐᖕᓇᖏᓂᑦ,” ᐅᖃᓚᐅᕐᑐᖅ ᔨᐅᕆ ᓵᑉ, ᐸᐅᒃᑑᑎᒃᑯᑦ ᐊᖏᔪᖅᑳᖓᑦ.  “ᑲᑐᔾᔨᖃᑎᒌᖑᓪᓗᑕ,  ᐅᑉᐱᕆᒐᑦᑎᒍ ᓴᓐᖓᑎᕆᕙᓪᓕᐊᔭᕆᐊᖃᕐᓂᑎᓐᓂᑦ ᐃᓄᓐᓂᑦ ᐊᕐᖕᓇᓂᑦ ᓯᕗᓕᕐᑎᐅᖁᓗᒋᑦ, ᐱᓗᐊᕐᑐᒥᖕ ᐊᕐᖕᓇᐃᑦ ᐃᓄᐃᑦ ᓄᓇᖓᓂ ᖃᓪᓗᓈᓂᓗ ᓄᓇᖃᐅᕐᑐᑦ (ᐃᓄᒋᐊᑦᑐᓂ) ᑲᓱᖅᑎᑕᐅᕙᓪᓕᐊᖁᓪᓗᒋᑦ.”  

ᐃᓅᓱᑦᑐᖅ ᐃᓄᖕ ᐊᕐᖕᓇᐅᓪᓗᓂ ᐊᕐᕌᒍᑦᑎᓂ ᐃᓕᑕᕆᔭᐅᔪᖅ

ᒪᓚᐃᔭ ᐱᓯᑉ ᐃᖃᓗᒻᒥᐅᑕᑦᓴᔭᐅᓪᓗᓂ ᐊᕐᕌᒍᑦᑎᓂ ᐃᓅᓱᑦᑐᖅ ᐃᓅᓪᓗᓂ ᐊᕐᖕᓇᖅ ᐃᓕᑕᕆᔭᐅᓚᐅᕐᑐᖅ ᐊᕐᕌᒍᑦᑎᓂ.  ᐊᖅᑲᐅᒪᔨᐅᓪᓗᓂ ᖃᐅᔨᓴᖃᑕᐅᕙᑦᑐᖅ ᐃᖅᑲᖓᓂ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᒃᑯᖏᓐᓄᑦ ᐊᖅᑲᐅᒪᓪᓗᑎᑦ ᐃᑦᑕᕐᓂᓴᖅᓯᐅᑦᑎᖏᓐᓄᑦ, ᒪᓚᐃᔭ ᖃᐅᔨᓴᖃᑕᐅᓪᓗᐊᑕᑉᐸᑦᑐᖅ ᑯᐃᓐ ᐅᒥᐊᕐᔪᐊᖁᑎᒥᓂᖏᓐᓂᖕ ᐅᒥᐅᔪᒥᓃᓐᓂᖕ HMS ᐃᕇᐸᔅ ᐊᒻᒪ HMS ᑎᐅᕈ ᑲᓇᑕᐅᑉ ᒥᕐᖑᐃᓯᕐᕕᖓᓂ.  ᖃᐅᔨᓴᕐᐸᑦᑐᓂ ᐃᓄᐃᑦ ᐅᔾᔨᕆᓯᒪᔭᖏᓐᓂᑦ ᓯᕗᓕᑦᑎᓐᓃᓐᖔᕐᑐᓂᓪᓗ ᑎᑎᕋᕐᑕᐅᕙᓪᓕᐊᓯᒪᔪᓂᑦ − ᐊᒻᒪ ᓂᐱᒋᔭᐅᕙᑦᑐᓂ − ᓄᓇᓕᓐᓄᑦ ᑐᓴᕐᑕᐅᕙᓪᓕᐊᖁᓪᓗᒋᑦ ᖃᓄᑎᒋ ᓄᓇᖏᑦ ᐊᑦᑐᖅᑕᐅᓂᑰᒻᒪᖔᑕ ᐊᑦᓱᕈᕐᑎᑕᐅᓂᒃᑯᑦ.     

ᒪᓚᐃᔭ ᐃᓕᓐᓂᐊᕐᓯᒪᓂᖓ ᐊᔾᔨᒌᖏᑦᑐᕈᓘᔭᓂᑦ ᖁᕕᐊᒋᔭᖃᒧᑦ ᓴᓇᓪᓘᓪᓗᓂ, ᐊᐅᓚᐃᓐᓇᐸᑦᑐᖅ, ᐊᑲᐃᓪᓕᐅᕈᑎᓂᑦ ᖃᓄᖅᑑᒃᑲᐅᓪᓗᓂ, ᓄᓇᓕᓐᓂᑦ ᐃᓚᐅᑎᑦᓯᓂᖕᒥᑦ ᐊᒻᒪ ᐅᔾᔨᕈᓱᓐᓂᖕᒥᑦ ᐃᓄᐃᑦ ᐱᐅᓯᖏᓐᓂᑦ.  ᐱᔭᕇᓚᐅᕐᑐᖅ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᕐᑕᒥᓂᖕ ᐱᕙᓪᓕᐊᔪᓕᕆᔨᐅᓂᖕᒧᑦ ᑐᓴᐅᑎᒃᑰᕋᑦᓴᓂᑦ ᐃᓕᓐᓂᐊᕐᑕᒥᓂᖕ ᓯᓚᑦᑐᖅᓴᕐᕕᔾᔪᐊᒥ ᐱᔭᕇᖅᑳᓚᐅᕋᓂ ᐃᓱᒪᒍᓯᖕᒥᑦ ᐃᓱᒪᓕᕆᔨᐅᓂᖕᒧᑦ ᐊᒻᒪ ᐸᐃᑉᐹᖁᑎᑖᖅᓯᒪᔪᖅ ᓄᓇᖅᑲᑎᒌᓂᑦ ᐃᓚᐅᑎᑦᓯᓂᖕᒥᑦ ᐱᔨᑦᓯᕐᑎᐅᓂᖕᒧᓪᓗ.  ᒪᓚᐃᔭ ᐱᔭᕇᓕᓚᐅᕆᓪᓗᓂ ᖁᑦᓯᓂᕐᐹᒥᑦ ᐃᓕᓐᓂᐊᕐᑕᒥᓂᖕ ᐅᑭᐅᖅᑕᖅᑐᒥᐅᓂᑦ ᖃᐅᔨᓴᕐᓂᖕᒥᑦ.     

ᒫᓐᓇᓕ, ᓂᐱᒋᔭᐅᕙᓕᕐᒥᔪᖅ ᐊᖅᑲᐅᒪᓂᖅ ᐃᓕᑕᕆᔭᐅᖁᓪᓗᒍ ᐊᒻᒪ ᐅᑉᐱᕆᔭᐅᓕᖁᓪᓗᒍ ᐊᖅᑲᐅᒪᔨᐅᓂᖅ ᐃᖅᑲᓇᐃᔮᓪᓚᑦᑖᑎᑐᑦ ᐃᖅᑲᓇᐃᔮᖑᔪᓐᓇᕐᓂᖓᓂᑦ ᓄᓇᕗᑦ ᐃᒪᖓᓂ.  “ᐱᔭᑦᓴᖃᕈᓐᓃᕋᐃᒐᒥ” ᐃᓅᖃᑎᒥᓂᖕ ᓄᓇᓕᓐᓂ ᐱᖃᑎᖃᕐᐸᑦᑐᖅ ᐃᓕᓐᓂᐊᕐᕕᓄᓪᓗ ᐅᓂᒃᑳᕆᐊᕐᑐᐸᑦᑐᓂ ᐊᖅᑲᐅᒪᓂᒃᑯᑦ ᐃᑦᑕᕐᓂᓴᖅᓯᐅᕐᑎᐅᓂᖕᒥᑦ ᐃᖅᑲᓇᐃᔮᕆᑦᓲᔭᕈᒥᓇᕐᑐᓂᓪᓗ. ᓈᓚᒍᒪᑐᐃᓐᓇᑦᓯᐊᖅᑐᖅ ᐅᓂᒃᑳᕐᑐᐊᓂᑦ ᐊᒻᒪ ᐊᖅᑲᐅᒪᓂᒃᑯᑦ ᐃᑦᑕᕐᓂᓴᖅᓯᐅᕐᓂᖕᒥᑦ.    

ᐃᓄᖕ ᐊᕐᖕᓇᖅ ᐊᕐᕌᒍᑦᑎᓂ ᐃᓕᑕᕆᔭᐅᔪᖅ

ᓂᑭ ᑯᒪᑦᓯᐅᑎᑦᓴᖅ ᐃᒡᓗᓕᒑᔪᖕᒥᐅᖅ, ᓄᓇᕗᑦ, ᐊᕐᕌᒍᑦᑎᓂ ᐃᓄᐃᑦ ᐊᕐᖕᓇᐃᑦ ᐃᓕᑕᕆᔭᐅᓂᖏᓐᓄᑦ ᓂᕈᐊᕐᑕᐅᓚᐅᕐᑐᖅ ᐃᓕᑕᕆᔭᐅᖁᓪᓗᒍ.  ᐊᐅᓚᑦᑎᔨᐅᓪᓗᓂ ᑐᓐᖓᓱᒋᑦ ᐃᖅᑲᓇᐃᔭᕐᕕᖓᓂ, ᑲᓇᑕᐅᑉ ᐱᓇᓐᓇᖅᐸᓯᐊᓂ ᓯᕗᓪᓕᖅᐹᑦᓯᐊᖅ ᐃᓄᓐᓂᑦ ᐃᑲᔪᖅᑏᑦ ᕕᓂᐱᒡᒦᑦᑐᖅ, ᒫᓂᑑᕙᒥ, ᓂᑭ ᐃᓚᒋᔭᐅᖏᓐᓇᑦᓯᐊᕐᑐᖅ ᐃᓄᓐᓄᑦ ᓄᓇᒥᓂ ᐊᒻᒪ ᑐᑭᓯᐅᒪᓂᖓ ᓄᓇᖃᓕᓂᐅᓂᖓᓄᑦ ᖃᓪᓗᓈᓂ ᐃᑲᔪᕋᓱᐊᕐᐸᑦᑐᖅ ᐃᓄᓐᓂᑦ ᐊᓯᖏᓐᓂᑦ ᓅᑉᐸᓪᓕᐊᔪᓂᑦ ᓄᓇᓕᕐᔪᐊᓄᑦ.     

ᓂᑭ ᓇᓗᖅᑯᑎᓐᖏᑦᓯᐊᖅᑐᖅ ᓇᑭᓐᖔᕐᓂᑰᓂᖕᒥᓂᖕ ᐃᑉᐱᒍᓱᓪᓚᕆᑦᑐᖅ.  ᑲᑕᔾᔭᒃᑲᐅᓪᓗᓂ, ᐃᓕᓴᐃᕙᑦᑐᖅ ᐃᓄᐃᑦ ᓯᕗᓕᖏᓐᓃᓐᖔᕐᑐᓂᑦ ᐊᒻᒪ ᐃᓐᖏᑎᒻᒪᕆᐅᓪᓗᓂ.  ᓂᑭ ᐱᖃᑕᐅᓂᑰᒻᒥᔪᖅ ᓯᓚᕐᔪᐊᕐᒥᐅᖃᑎᒌᑦ ᐱᓐᖑᐊᕐᑎᑕᐅᑎᓪᓗᒋᑦ, ᑭᒡᒐᕐᑐᐃᖃᑕᐅᓪᓗᓂ ᒫᓂᑑᕙᒥᑦ ᐊᒻᒪ ᐃᓄᓐᓂᑦ 1996ᒥ ᐊᑦᓛᓐᑎᒃᒥ ᐅᓕᒻᐱᒃᑯᑦ ᓯᓚᕐᔪᐊᒥ ᐱᓐᖑᐊᕐᑎᕐᔪᐊᑦ ᐊᐅᔭᒃᑯᑦ ᐱᓐᖑᐊᕐᑎᓪᓗᒋᑦ ᐊᒻᒪ ᒫᓐᓇᓂᓴᐅᓂᖅᐹᖅ, 2015ᒥ ᓄᓇᖃᖅᑳᕐᓯᒪᔪᓂᑦ ᓂᔾᔭᐅᓯᔭᕐᑎᐅᓂᖕᒧᑦ ᐃᓕᑕᕆᔭᐅᓚᐅᕐᑐᖅ ᕕᓂᐱᒡᒥ.     

-30-

ᐸᐅᒃᑑᑎᑦ ᐃᓄᐃᑦ ᐊᕐᖕᓇᐃᑦ ᐃᓕᑕᕆᔭᐅᔾᔪᑎᖓ ᑲᓇᑕᒥ ᑮᓇᐅᔭᓕᐅᕋᓱᑐᐃᓐᓇᕋᑎᖕ ᑭᒡᒐᕐᑐᐃᔩᑦ ᐃᓄᓐᓂᑦ ᐊᕐᖕᓇᓂᑦ ᑲᓇᑕᒥ.  ᑎᓕᔭᐅᓯᒪᔪᑦ ᐅᔾᔨᕈᓱᓕᖅᑎᑦᓯᕙᓪᓕᐊᖁᓪᓗᒋᑦ ᐃᓄᐃᑦ ᑭᓐᖒᒪᔭᖏᓐᓂᑦ, ᐊᒻᒪ ᐃᓚᒋᔭᐅᑎᑦᓯᓯᐊᕐᓂᖕᒥᑦ ᓄᓇᖅᑲᑎᖏᓐᓄᑦ, ᐊᒡᒍᑐᖅᓯᒪᔪᓄᑦ ᑲᓇᑕᒥᓗ ᐃᓱᒫᓗᒋᔭᐅᕙᑦᑐᓂᑦ ᐃᓄᓕᕆᓂᖕᒧᑦ, ᐃᓕᖅᑯᓯᓕᕆᓂᖕᒧᑦ ᐊᒻᒪ ᒪᑭᓇᓱᐊᕐᓂᖕᒥᑦ ᐱᕙᓪᓕᐊᓂᒃᑯᑦ.   

ᑐᑭᓯᒋᐊᒃᑲᓂᕈᒪᒍᕕᑦ ᖃᐅᔨᒋᐊᕈᓐᓇᕐᑐᑦ ᐅᕗᖓ ᐃᕐᖕᓃᓈᕈᑎᒃᑯᑦ: communications@pauktuutit.ca