ᐃᑲᔪᔅᓱᐃᓂᖅ
ᐸᐅᒃᑑᑎᒃᑯᓐᓂ, ᐃᑲᔪᔅᓱᐃᓂᕗᑦ ᑐᕌᖓᑎᑕᐅᒻᒪᑦ ᐱᓕᕆᒋᐊᓂᓐᓄᑦ ᐱᓕᕆᔾᔪᑎᓕᐊᕆᓯᒪᔪᓂᒃ ᐊᑲᐅᙱᓕᐅᕈᑎᓄᑦ ᑕᐃᒃᑯᓄᖓ ᐊᑦᑐᐃᔪᓂᒃ ᐃᓄᐃ ᐊᕐᓇᖏᓐᓂᒃ, ᓂᕕᐊᔅᓯᐊᓂᒃ, ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒌᔭᐅᖏᑦᑐᓂᒃ ᐃᒻᒥᓂᔅᓴᑦᑐᓂᒃ. ᐃᓚᓕᐅᑎᔭᐅᓂᖏᓐᓄᑦ ᐃᓄᐃᑦ−ᑕᐃᒃᑯᐊᓪᓗᐊᖅ ᓇᓪᓕᐊᖑᓂᖓᓂᒃ−ᑐᙵᕕᖃᑦᑎᑕᐅᔪᓂᒃ ᖃᐅᔨᓴᔅᓯᔨ ᐃᓚᖃᓪᓗᑎᒃ (ISGBA+) ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ (IQ) ᐃᓚᓕᐅᑎᓗᒋᑦ ᐃᖅᑲᓇᐃᔮᑦᑎᓐᓄᑦ, ᐊᒻᒪᓗ ᐱᓕᕆᒍᒪᓂᑦᑎᓐᓄᑦ ᒪᓕᑦᑕᐅᒋᐊᓕᓐᓄᑦ ᑲᑐᔾᔨᖃᑎᒌᑦ ᓄᓇᕐᔪᐊᓕᒫᒥ ᓇᓗᓇᐃᔅᓯᑦᑎᐊᓐᓂᖓᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐃᓄᖏᑕ (UNDRIP), ᐱᓕᕆᒍᒪᒐᑦᑕ ᓯᖁᑦᑎᕈᒪᓪᓗᑎᒍ ᐊᐳᑦᑕᖁᑏᑦ ᐊᒻᒪᓗ ᐱᔪᓐᓇᓐᓂᑦᑖᑦᑎᓪᓗᒋᑦ ᓄᓇᓕᕘᑦ.
ᐃᑲᔪᔅᓱᐃᕕᐅᔪᑦ
ᐃᑲᔪᔅᓱᐃᓂᕗᑦ ᐊᑦᑐᐃᒻᒪᑕ ᐱᓕᕆᐊᖃᓪᓗᐊᑕᓐᓂᒻᒥᒃ ᐱᑕᖃᕆᐊᖃᓪᓚᕆᑦᑐᓂᒃ, ᐃᓚᒋᔭᐅᓗᑎᒃ ᐋᓐᓂᐊᓱᑦᑕᐅᓂᒻᒥᒃ ᐱᕕᔅᓴᐅᔪᑦ, ᐊᔪᔅᓴᓗᐊᓐᓂᖅ ᒥᑭᓪᓕᒋᐊᑦᑕᐅᖁᓪᓗᒍ, ᐋᓐᓂᔅᓯᕆᓂᖅ ᓄᖃᑦᑎᑕᐅᓗᓂ, ᐊᒻᒪᓗ ᐃᒡᓗᖃᑦᑎᑦᑎᒍᑏᒃ, ᐃᓄᐃᑦ ᓂᐱᖏᑦ ᑐᓴᑦᑕᐅᓚᕆᖁᓪᓗᒋᑦ ᐊᒻᒪᓗ ᐃᑉᐱᒋᔭᐅᑦᑎᐊᓪᓗᑎᒃ ᐃᓱᒪᓕᐅᕈᑎᖃᓐᓃᑦ ᐱᓕᕆᐊᕆᔭᐅᓂᖏᑦ ᐊᑦᑐᐃᔪᑦ ᐃᓅᓯᑦᑎᓐᓂᒃ.
ᐋᓐᓂᐊᖃᖏᓐᓂᖅ
ᓵᓚᔅᓴᕋᓱᐊᕋᑦᑕ ᐊᑭᕋᑦᑐᓐᓂᒻᒥᒃ−ᓄᓇᖃᖅᑳᖅᓯᒪᔪᓂᒃ ᐅᕕᓂᖃᑎᖃᖏᓐᓂᒻᒥ ᐋᓐᓂᐊᓱᑦᑕᐅᕕᓐᓂ, ᐱᓕᕆᐊᖃᓪᓗᐊᑕᓪᓗᑕ ᓯᕘᕋᓵᕆᓂᒻᒥ ᓇᔾᔨᒍᓐᓇᐃᓕᑎᑕᐅᓂᒻᒥᒃ ᐊᒻᒪᓗ ᐃᓅᓕᓴᐅᑎᒃᑯᑦ ᐋᓐᓂᔅᓯᕆᓂᒻᒥᒃ ᐃᓄᐃᑦ ᐊᕐᓇᖏᓐᓂᒃ ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒋᔭᐅᖏᑦᑐᓂᒃ ᐃᓄᓐᓂᒃ. ᐱᓕᕆᒐᓱᐊᓐᓂᕗᑦ ᐱᖃᓯᐅᔾᔨᒻᒪᑕ ᑕᓱᑦᑕᐅᑎᑦᑎᒐᓱᐊᓐᓂᒻᒥᒃ ᐃᓄᐃᑦ ᐃᕐᓂᓱᔅᓰᒍᓯᖏᑕ ᐱᓕᕆᔾᔪᓯᖏᓐᓂᒃ ᐊᒻᒪᓗ ᐊᑐᑦᑕᐅᓂᔅᓴᐅᑎᑦᑎᒐᓱᐊᑦᑐᑕ ᐱᒍᓐᓇᓐᓂᒻᒥᒃ ᐃᓕᖅᑯᓯᒃᑯᑦ ᐊᑦᑕᓐᓇᖏᑦᑐᒥᒃ ᐋᓐᓂᐊᓱᑦᑕᐅᓂᒻᒥᒃ, ᐱᕕᖃᑦᑎᑕᐅᖁᓪᓗᒋᑦ ᐃᓄᐃᑦ ᐱᒍᓐᓇᓂᖏᑦ ᐱᔨᔅᓯᕈᑎᓂᒃ ᐱᔭᐅᒋᐊᓕᓐᓂᒃ ᐊᐅᓚᖏᒃᑲᓗᐊᓪᓗᑎᒃ ᓄᓇᓕᑦᑎᓐᓂᒃ.
ᖃᐅᔨᒃᑲᓐᓂᕈᒪᒍᕕᑦ
ᐊᔪᔅᓴᓗᐊᓐᓂᐅᑉ ᒥᑭᓪᓕᑎᑕᐅᒋᐊᓂᖓ
ᐱᒻᒪᕆᐅᓕᑦᑎᑦᑎᒐᑦᑕ ᓂᕆᔭᔅᓴᖃᑦᑎᐊᖃᑦᑕᕆᐊᖃᓐᓂᒻᒥᒃ ᐊᒻᒪᓗ ᒥᑭᓂᔅᓴᐅᓕᑦᑎᑕᐅᖁᓪᓗᒋᑦ ᐆᒪᒐᓱᐊᕈᑎᑦ ᐊᑭᖏᑦ ᐃᓄᐃᑦ ᐊᕐᓇᖏᓐᓄᑦ ᐊᒻᒪᓗ ᐃᓚᒌᓄᑦ, ᐱᓕᕆᐊᕆᔭᐅᓗᑎᒃ ᖁᕝᕙᓯᑦᑐᐊᓗᓂᖏᑦ ᐊᑭᖏᑕ ᓂᕆᔭᒃᓴᖃᑦᑎᐊᖏᓐᓂᒻᒧᑦ. ᐱᓕᕆᒋᐊᑉᐸᓪᓗᒍᑎᕗᑦ ᐱᓕᕆᒐᓱᐊᕈᑎᒋᒐᑦᑎᒍ ᑲᓱᑦᑎᑕᐅᒃᑲᓐᓂᖁᓪᓗᒋᑦ ᓄᓇᓖᑦ ᐱᖅᑯᓯᒃᑯᑦ ᓂᕿᖃᓐᓂᒻᒧᑦ ᐱᓕᕆᔾᔪᑎᖏᑦ, ᖃᐅᔨᒐᓱᐊᓪᓗᒋᑦ ᐊᑐᓐᓂᐅᓴᑐᐃᓐᓇᓐᓂᖏᑦ ᑮᓐᓇᐅᔭᔅᓵᕆᔭᐅᓪᓗᐊᑕᓲᑦ, ᐊᒻᒪᓗ ᐊᖏᓂᔅᓴᐅᓕᑦᑎᓪᓗᒋᑦ ᓯᕗᓕᑦᑎᐅᓂᒻᒥᒃ ᐱᓕᕆᒋᐊᕕᔅᓴᐅᓂᖏᑦ ᐃᓄᐃᑦ ᐊᕐᓇᖏᓐᓄᑦ ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒌᑦᑎᑕᐅᖏᑦᑐᓄᑦ ᐃᓄᓐᓄᑦ ᐃᓱᒪᓕᐅᑎᐅᔪᓄᑦ ᐱᓕᕆᓂᕆᔭᐅᔪᓂ.
ᖃᐅᔨᒃᑲᓐᓂᕈᒪᒍᕕᑦ
ᐋᓐᓂᖅᑎᕆᑎᑦᑕᐃᓕᒪᓂᖅ
ᐸᐅᒃᑑᑎᒃᑯᑦ ᐱᓕᕆᒋᐊᓲᖑᒻᒪᑕ ᐊᔅᓱᕈᓐᓇᓗᐊᓐᓂᖏᓐᓂᒃ ᐊᓯᐅᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ (MMIWG2S) ᐃᑲᔪᔅᓱᐃᓂᒃᑯᑦ ᑕᒪᒃᑯᐊ ᐊᑐᓕᑦᑎᑕᐅᖁᓪᓗᒋᑦ ᐅᖃᐅᔾᔨᒍᑎᒋᔭᐅᔪᑦ ᐱᖁᔭᑦᑎᒎᖁᓪᓗᒋᑦ ᐊᒻᒪᓗ ᐱᓕᕆᐊᕆᔭᐅᖁᓪᓗᒍ ᑕᒫᓂᒥᐅᑕᕈᔅᓯᒪᔪᑦ ᐱᖁᔭᑦᑎᒎᓐᓂᒻᒧᑦ ᐱᓕᕆᔾᔪᑎ. ᐃᑲᔪᔅᓱᐃᒐᑦᑕ ᐆᒻᒪᕈᑦᑎᑦᑎᑲᓐᓂᓐᓂᒻᒥᒃ ᐃᓄᐃᑦ ᐱᖁᔭᑦᑎᒍ ᐱᓕᕆᔾᔪᑎᖏᓐᓂᒃ ᐊᑦᑕᓐᓇᖁᓇᒋᑦ ᐊᒻᒪᓗ ᓇᒻᒥᓂᖅ−ᐱᓕᕆᒍᒪᓂᖃᑦᑎᐊᖁᓪᓗᒋᑦ ᐃᓄᐃᑦ ᐊᕐᓇᖏᑦ ᐊᒻᒪᓗ ᓇᓪᓕᐊᖑᓂᖓᓂᒃ−ᑐᙵᕕᖃᑦᑎᑕᐅᓂᖏᓐᓂᒃ ᐃᒻᒥᓂᔅᓴᑦᑐᑦ.
ᖃᐅᔨᒃᑲᓐᓂᕈᒪᒍᕕᑦ
ᐊᑦᑕᓇᖏᑦᑐᒥᒃ ᐊᒻᒪᓗ ᐊᑭᑐᓗᐊᖏᑦᑐᓂᒃ ᐃᒡᓗᖃᑦᑎᑦᑎᒍᑎᓂᒃ
ᐃᑲᔪᔅᓱᐃᒐᑦᑕ ᐊᑦᑕᓐᓇᖏᓐᓂᒻᒥᒃ, ᐊᑭᑐᓗᐊᖏᑦᑐᓂᒃ ᐃᒡᓗᖃᑦᑎᑦᑎᒍᑎᓂᒃ ᐱᒻᒪᕆᐅᓗᐊᙳᐊᑦᑐᓂᒃ ᐱᔭᐅᒋᐊᓕᓐᓂᒃ ᐃᓄᐃᑦ ᓄᓇᓕᖏᓐᓄᑦ. ᐱᓕᕆᐊᖃᓪᓗᐊᑕᕋᓱᐊᓐᓂᕗᑦ ᐱᖃᓯᐅᔾᔨᒻᒪᑕ ᐱᒍᓐᓇᓐᓂᒻᒥᒃ ᕿᒫᕕᓐᓂᒃ ᐊᒻᒪᓗ ᐱᖅᑯᓯᒃᑯᑦ ᐃᒡᓗᖃᑦᑎᑦᑎᒍᑎᓄᑦ ᐃᑲᔪᑦᑕᐅᒍᑎᓂᒃ ᐱᔨᔅᓯᕈᑎᖏᓂᒃ ᐊᕐᓇᓄᑦ ᓵᙵᔅᓯᔪᓄᑦ ᐋᓐᓂᔅᓯᑕᐅᓂᒻᒥᒃ ᐅᕝᕙᓘᓐᓃᑦ ᐊᓯᕈᑦᑕᓗᐊᓂᒻᒧᑦ. ᐱᓕᕆᒋᐊᖃᑦᑎᒃᑲᑦᑎᒍ ᒐᕙᒪᑐᖃᒃᑯᑦ ᓵᑕᔅᓴᐅᓂᖏᓐᓄᑦ ᐱᔭᐅᑎᑦᑎᒋᐊᖃᓂᖏᓐᓂᒃ ᓱᓕᒍᑎᒋᓯᒪᔭᖏᓐᓂᒃ ᐊᑦᑕᓐᓇᖏᑦᑐᓂᒃ ᐃᒡᓗᖃᑦᑎᑦᑎᒍᑎᓂᒃ, ᑕᒪᒃᑯᐊᓗ ᐱᑕᖃᕆᐊᖃᓪᓚᕆᑦᑐᑎᒃ ᐃᓄᓐᓄᑦ ᐃᓚᒌᑦᑐᓄᑦ ᑲᔪᓯᑦᑎᐊᖁᓪᓗᒋᑦ.
ᖃᐅᔨᒃᑲᓐᓂᕈᒪᒍᕕᑦ
ᐃᑲᔪᔅᓱᐃᓂᑦᑎᓐᓄᑦ ᑐᙵᕖᑦ
ᐃᑲᔪᔅᓱᐃᓂᕗᑦ ᐊᒫᖃᒻᒪᑦ ᓇᒻᒥᓂᖅ ᐊᑐᔅᓯᒪᔭᑦᑎᓐᓂᒃ, ᖃᐅᔨᒪᓂᑦᑎᓐᓂᒃ, ᐊᒻᒪᓗ ᓯᕗᓪᓕᐅᑎᖁᔭᐅᔪᓂᒃ ᐃᓄᐃᑦ ᐊᕐᓇᖏᓐᓄᑦ, ᓱᕈᓯᖏᓐᓄᑦ, ᐊᒻᒪᓗ ᓇᓪᓕᐊᖑᓂᖏᓐᓄᑦ−ᐊᔾᔨᒌᔭᐅᖏᑦᑐᓄᑦ ᐃᓅᓐᓄᑦ. ᐃᖅᑲᓇᐃᔭᓲᖑᒐᑦᑕ ᐱᓕᕆᐊᖃᕋᓱᐊᑦᑐᑕ ᐱᓕᕆᔾᔪᑎᓕᐊᕆᓯᒪᔪᑦ ᑕᐃᒫᓪᓗᐊᖃᑎᒌᑦᑎᑦᑎᖏᓐᓂᖏᓐᓂᒃ ᐋᖅᑭᔅᓱᔅᓯᒪᕕᒋᔭᖏᓐᓂ ᑕᐃᑯᓂᖓ ᑕᑯᔅᓴᐅᑎᑦᑎᔪᓂᒃ ᐃᓄᐃᑦ ᐊᓐᓂᓐᓇᑦᑐᖁᑎᖏᓐᓂᒃ, ᐱᔪᓐᓇᐅᑎᖏᓐᓂᒃ, ᑕᐃᔅᓱᒪᓂᐅᓚᐅᑦᑐᖅ ᐊᑐᑦᑕᐅᖃᑦᑕᓚᐅᔅᓯᒪᔪᓂᒃ, ᐊᒻᒪᓗ ᒫᓐᓇᐅᓕᑦᑐᖅ−ᐅᓪᓗᖏᓐᓂ ᐊᑐᓪᓚᕆᑦᑐᓂᒃ. ᑕᒪᒃᑯᐊ ᑐᙵᕕᐅᔪᑦ ᒪᓕᑦᑎᑦᑎᒻᒪᑕ ᐱᓕᕆᒋᐊᓐᓂᑦᑎᓐᓂᒃ ᐃᑲᔪᔅᓱᐃᓂᒻᒥ ᐊᑐᐊᒐᐃᑦ ᐊᓯᕈᑦᑕᐅᖁᔭᐅᓂᖏᓐᓂᒃ, ᐱᔨᔅᓯᕈᑎᑦ ᐋᖅᑭᔅᓱᑦᑕᐅᓂᖏᓐᓂᒃ, ᐊᒻᒪᓗ ᓄᓇᓕᒻᒧᑦ−ᓯᕗᓕᑦᑕᐅᓗᑎᒃ ᐊᑲᐅᙱᓕᐅᕈᑎᖃᕈᓐᓃᑦᑎᑕᐅᖁᓪᓗᒋᑦ.
ᐃᓄᐃᑦ ᖃᐅᔨᒪᔭᑐᖃᖏᑦ (IQ) ᑐᙵᕕᒋᒐᑦᑎᒍ ᐃᖅᑲᓇᐃᔮᑦᑎᓐᓄᑦ, ᐃᒪᓐᓇᐅᓚᕆᖁᓪᓗᒋᑦ ᑕᒪᒃᑯᐊ ᐃᑲᔪᔅᓱᐃᓂᕗᑦ ᐋᖅᑭᒍᑎᓯᒪᖁᓪᓗᒋᑦ ᐃᓄᐃᑦ ᐱᖅᑯᓯᖏᓐᓄᑦ ᖃᐅᔨᒪᓂᖏᓐᓄᑦ, ᐃᓅᖃᑕᐅᖁᓂᒻᒧᑦ, ᐊᒻᒪᓗ ᐱᓕᕆᓂᖏᓐᓄᑦ. ᑕᒪᒃᑯᐊ ᑲᓱᔅᓯᒪᖃᑎᒌᓐᓂᖏᑦ ᒪᓕᑦᑕᐅᒋᐊᓕᑦ – ᓲᕐᓗ ᒪᑯᐊ ᐱᓕᕆᖃᑎᒌᓐᓂᖅ (ᐃᖅᑲᓇᐃᔭᖃᑎᒌᓪᓗᑎᒃ) ᐊᒻᒪᓗ ᐋᔩᖃᑎᒌᓐᓂᖅ (ᐊᖏᖃᑎᒋᔭᐅᓯᒪᓗᓂ ᐃᓱᒪᓕᐅᕈᑎᖃᓐᓂᖅ) – ᐃᓗᑦᑎᔅᓯᒻᒪᑦ ᖃᓄᖅ ᐱᓕᕆᖃᑎᖃᓲᖑᓂᑦᑎᓐᓂᒃ ᓄᓇᓕᓐᓂᒃ ᐊᒻᒪᓗ ᐊᑐᐊᒐᓕᐅᑦᑎᓂᒃ. ᐃᓄᐃᑦ ᐊᑲᐅᙱᓕᐅᕈᑎᖃᕈᓐᓃᑦᑎᑦᑎᒍᑎᖏᑦ ᓯᕗᓕᒃᑕᐅᒋᐊᖃᒻᒪᑕ ᐃᓄᓐᓂᒃ. ᐊᑐᑦᑕᐅᓂᑉᐹᖑᑎᓪᓗᑎᒍ ᐃᓄᐃᑦ ᖃᐅᔨᒪᔭᑐᖃᖏᑦ, ᓴᙱᓂᔅᓴᐅᓕᑦᑎᑦᑎᓲᖑᒐᑦᑕ ᐱᓕᕆᒋᐊᓐᓂᐅᔪᓂᒃ ᑕᐃᒃᑯᓂᖓ ᐃᓕᖅᑯᓯᒃᑯᑦ ᑐᑭᖃᑦᑎᐊᑦᑐᓂᒃ ᐊᒻᒪᓗ ᐋᖅᑭᐅᒪᑎᒐᔅᓴᐅᔪᓂᒃ.
ᐃᓄᐃᑦ−ᑕᐃᒃᑯᐊᓪᓗᐊᖅ ᓇᓪᓕᐊᖑᓂᖓᓂᒃ−ᑐᙵᕕᖃᑦᑎᑕᐅᔪᓂᒃ ᖃᐅᔨᓴᔅᓯᔨ ᐃᓚᖃᓪᓗᑎᒃ (ISGBA+)
ᓇᓪᓕᐊᖑᓂᖓᓂᒃ−ᑐᙵᕕᖃᑦᑎᑕᐅᔪᓂ ᖃᐅᔨᓴᔅᓯᔨ ᓴᖅᑭᑎᑦᑎᒋᐊᖃᒻᒪᑦ ᐊᑐᓪᓚᕆᑦᑐᓂᒃ ᐃᓄᐃᑦ ᐊᕐᓇᖏᓐᓄᑦ ᐊᒻᒪᓗ ᓇᓪᓕᐊᖑᓂᖏᓐᓄᑦ−ᐊᔾᔨᒋᔭᐅᖏᑦᑐᓄᑦ ᐃᓄᓐᓄᑦ. ᐃᓄᐃᑦ−ᑕᐃᒃᑯᐊᓪᓗᐊᖅ ᓇᓪᓕᐊᖑᓂᖓᓂᒃ−ᑐᙵᕕᖃᑦᑎᑕᐅᔪᓂᒃ ᖃᐅᔨᓴᔅᓯᔨ ᐃᓚᖃᓪᓗᑎᒃ ᐃᓱᒪᒋᖃᓯᐅᔾᔨᒻᒪᑦ ᓇᓗᓇᖏᑦᑎᐊᓐᓂᖏᓐᓂᒃ ᐃᓅᖃᑎᒌᓄᑦ, ᐃᓕᖅᑯᓯᒻᒧᑦ, ᐊᒻᒪᓗ ᑕᐃᔅᓱᒪᓂᐅᓚᐅᑦᑐᖅ ᖃᓄᐃᓕᖓᓂᕆᔭᐅᔪᓂᒃ ᐃᓗᑦᑎᔅᓯᔪᓂᒃ ᐃᓄᐃᑦ ᐊᑐᖃᑦᑕᔅᓯᒪᔭᖏᓐᓂᒃ, ᐅᖓᑖᓄᓪᓗᓂ ᐱᓕᕆᔾᔪᑎᓕᐊᕆᓯᒪᔪᑉ ᐋᖅᑭᔅᓱᔅᓯᒪᓂᖏᓐᓄᑦ ᑕᒃᑯᓄᖓ ᓵᑕᔅᓴᐅᖏᑦᑐᓄᑦ ᑕᒫᓂᒥᐅᑕᕈᔅᓯᒪᔪᓄᑦ ᐊᑐᐊᒐᖏᓐᓄᑦ, ᓄᓇᐅᓂᖓᓄᑦ ᐅᐸᑦᑕᐅᒍᓐᓇᖏᑦᑐᒧᑦ, ᐊᒻᒪᓗ ᐱᓕᕆᔾᔪᑎᓕᐊᕆᓯᒪᔪᓄᑦ ᐊᐳᑦᑕᕈᑎᓄᑦ. ᐃᑲᔪᔅᓱᐃᓂᕗᑦ ᐃᒪᓐᓇᐅᓚᕆᑦᑎᑦᑎᒐᓱᐊᒻᒪᑦ ᐊᑐᐊᒐᓐᓂᒃ ᐊᒻᒪᓗ ᐱᓕᕆᔾᔪᑏᑦ ᓴᖅᑭᔮᑦᑎᑦᑎᔪᑦ ᐃᓄᐃᑦ ᓯᕗᓪᓕᐅᑎᔭᐅᖁᔭᖏᓐᓂᒃ, ᐃᓚᒋᔭᐅᓗᑎᒃ ᐋᓐᓂᔅᓯᑕᐅᑎᑦᑎᑕᐃᓕᒪᓃᑦ, ᐱᒍᓐᓇᓪᓗᑎᒃ ᐊᑦᑕᓇᖏᑦᑐᒥᒃ ᐃᒡᓗᖃᑦᑎᑦᑎᒍᑎᒥᒃ, ᐃᓕᖅᑯᓯᒃᑯᑦ ᐊᑑᑎᖃᑦᑎᐊᑦᑐᒥᒃ ᐋᓐᓂᐊᓱᑦᑕᐅᒍᑎᓂᒃ, ᐊᒻᒪᓗ ᒪᑭᒪᒐᓱᐊᕈᑎᒥ ᐱᓕᕆᒋᐊᕕᔅᓴᓂᒃ ᐊᒫᖃᑦᑐᓂᒃ ᓇᒻᒥᓂᖅ−ᐱᓕᕆᒍᒪᓂᖃᑦᑎᐊᓐᓂᒻᒧᑦ.
ᑲᑐᔾᔨᖃᑎᒌᑦ ᓄᓇᕐᔪᐊᓕᒫᒥ ᓇᓗᓇᐃᔅᓯᑦᑎᐊᓐᓂᖓᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐃᓄᖏᑕ (UNDRIP)
ᑲᑐᔾᔨᖃᑎᒌᑦ ᓄᓇᕐᔪᐊᓕᒫᒥ ᓇᓗᓇᐃᔅᓯᑦᑎᐊᓐᓂᖓᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐃᓄᖏᑕ ᓇᓗᓇᐃᔅᓯᒻᒪᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓇᒻᒥᓂᖅ−ᐱᓕᕆᒍᒪᓂᖃᑦᑎᐊᓐᓂᖏᓐᓂᒃ, ᓄᓇᒥᒃ, ᐃᓕᖅᑯᓯᒻᒥᒃ, ᐊᐅᓚᑦᑎᓂᒻᒥᒃ ᐊᒻᒪᓗ ᐊᑐᓪᓚᕆᑦᑐᒥᒃ ᑕᐃᒫᓪᓗᐊᖃᑎᒋᓐᓂᒻᒧᑦ ᐱᔭᕆᔅᓯᒍᑎᓂᒃ. ᐃᑲᔪᔅᓱᐃᓂᕗᑦ ᐊᔪᐃᓐᓇᕈᑎᖃᒻᒪᑦ ᒐᕙᒪᒃᑯᑦ ᐊᑐᕆᐊᖃᓐᓂᖏᓐᓂᒃ ᑕᒪᒃᑯᓂᖓ ᐱᔪᓐᓇᐅᑎᓂᒃ ᓇᓗᓇᐃᑯᑕᕆᔭᐅᑐᐃᓐᓇᐅᖏᓪᓗᑎᒃ. ᐊᑐᓪᓚᕆᑦᑐᓂᒃ ᐊᑐᓕᑦᑎᑦᑎᓃᑦ ᑐᑭᖃᒻᒪᑕ ᐊᐅᑦᑕᐅᓚᕆᑦᑎᑦᑎᓂᖏᓐᓂᒃ ᐃᓄᓐᓂᒃ−ᓯᕗᓕᑦᑕᐅᔪᓂᒃ ᐱᔨᔅᓯᕈᑏᑦ ᐱᖃᑦᑕᖁᓪᓗᒋᑦ ᑕᐃᒫᓪᓗᐊᖃᑎᒋᔭᐅᔪᓂᒃ ᑮᓇᐅᔭᖃᑦᑎᑦᑎᒍᑎᓂᒃ, ᑕᒪᒃᑯᐊ ᐊᑐᐊᒐᐃᑦ ᓴᖅᑭᔮᑦᑎᑦᑎᖁᓪᓗᒋᑦ ᐃᓄᐃᑦ ᓯᕗᓪᓕᐅᑎᖁᔭᖏᓐᓂᒃ, ᐊᒻᒪᓗ ᑕᒪᒃᑯᐊ ᓄᓇᓕᖁᑎᕗᑦ ᐃᓘᓐᓇᖏᓐᓂᒃ ᐊᐅᓚᑦᑎᕕᖃᕈᓐᓇᓪᓗᑎᒃ ᐃᓱᒪᓕᐅᕈᑎᖃᓐᓂᒻᒥ ᑕᐃᒃᑯᓂᖓ ᐊᑦᑐᐃᔪᓂᒃ ᐃᓅᓯᑦᑎᓐᓂᒃ. ᐃᓄᐃᑦ ᐊᕐᓇᖏᑦ, ᓱᕈᓯᖏᑦ, ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ ᐃᓄᐃᑦ ᐃᓘᓐᓇᓕᒫᖓᓂ ᐱᓕᕆᖃᑎᒋᔭᐅᒋᐊᖃᒻᒪᑕ ᐃᓗᑦᑎᑦᑕᐅᓂᖏᓐᓂ ᐱᓕᕆᔾᔪᑏᑦ ᑕᐃᒃᑯᐊ ᐊᑦᑐᐃᔪᑦ ᑖᒃᑲᓂᖓ