ᐃᒡᓗᖃᑦᑎᑦᑎᒍᑏᑦ
ᐃᓅᖃᑎᒋᓄᑦ ᐱᔪᓐᓇᐅᑎ
ᐱᔭᐅᒋᐊᖃᓐᓂᖏᓐᓄᑦ ᐊᑦᑕᓇᖏᑦᑐᒥᒃ ᐊᒻᒪᓗ ᐊᑭᑐᓗᐊᖏᑦᑐᓂᒃ ᐃᒡᓗᖃᑦᑎᑦᑎᒍᑎᓂᒃ ᐃᑳᑦᑎᑦᑎᕕᒋᓯᒪᓗᑎᒃ ᐃᓘᓐᓇᖏᓐᓂᒃ ᐊᑐᐊᒐᖃᕕᒋᔭᑦᑎᓐᓂᒃ. ᐊᒥᒐᓐᓂᖏᓐᓂᒃ ᐊᑭᑐᓗᐊᖏᑦᑐᑦ, ᐃᓕᖅᑯᓯᒻᒧᑦ ᓈᒻᒪᑦᑐᑦ, ᐊᒻᒪᓗ ᐊᑦᑕᓇᖏᑦᑐᑦ ᐃᒡᓗᖃᑦᑎᑦᑎᒍᑏᑦ ᑕᐃᒪᖓᑐᖃᓂᑦ ᐊᔅᓱᕈᓐᓇᓗᐊᓕᒻᒪᑕ ᐃᓄᓐᓂᒃ ᐊᑐᖃᑦᑕᖃᑦᑕᔅᓯᒪᓕᒻᒪᑕ ᑕᐃᒪᙵᓂᑦ ᐊᔪᐃᓐᓈᕆᔭᐅᓪᓗᑎᒃ ᓄᓇᓕᕈᑦᑎᑕᐅᓚᐅᔅᓯᒪᓂᖏᓐᓂᒃ. ᑖᓐᓇ ᐊᔅᓱᕈᓐᓇᓗᐊᓐᓂᖓ ᐱᔭᐅᑎᑦᑎᓯᒪᒻᒪᑦ ᐊᖏᓗᐊᑦᑐᐊᓗᒥᒃ ᐃᓅᖃᑎᒋᓄᑦ ᐊᒻᒪᓗ ᒪᑭᒪᒐᓱᐊᕈᑎᒧᑦ ᐊᔅᓱᕈᓐᓇᓗᐊᓕᓐᓂᖓᓂᒃ ᐃᓄᖏᓐᓄᑦ ᓄᓇᖓᑦᑕ, ᐊᑦᑕᑦᑐᓂᔅᓴᐅᓕᑦᑎᑦᑎᓗᓂ ᑕᐃᒫᓪᓗᐊᖃᑎᒋᔭᐅᖏᓐᓂᖏᓐᓂᒃ ᐊᒻᒪᓗ ᐊᔅᓱᐊᓗᓕᑦᑎᑦᑎᓯᒪᓪᓗᓂ ᐱᔮᕆᔭᐅᖏᒃᑲᓗᐊᑦᑐᑎᒃ ᐃᓄᐃᑦ ᐊᕐᓇᖏᑦ. ᐃᓄᒋᐊᓗᐊᓕᓐᓂᖅ ᐋᓐᓂᔅᓯᕆᑐᐃᓐᓇᖏᒻᒪᑦ ᑎᒥᒃᑯᑦ ᐊᒻᒪᓗ ᐃᓱᒪᒃᑯᑦ ᑭᓯᐊᓂ ᐊᖏᓂᔅᓴᐅᓕᑦᑎᑦᑎᒻᒪᑦ ᖁᒃᓴᓇᓂᖓᓂᒃ ᐋᓐᓂᑎᕆᓂᐅᑉ, ᐅᓄᑦᑐᓂᒃ ᐊᑦᑕᓇᖏᑦᑐᓂᒃ ᐱᔭᐅᖔᕝᕕᖃᕈᓐᓃᑦᑎᑦᑎᒻᒪᑦ. ᖃᔅᓰᓐᓇᐅᑎᓪᓗᒋᑦ ᐃᒡᓗᖃᑦᑎᑦᑎᒍᑎᓂᒃ ᓇᓖᕋᕕᔅᓴᐅᓂᖏᑦ, ᐃᓄᐃᑦ ᐊᕐᓇᓄᑦ, ᓱᕈᓯᓐᓄᑦ, ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᓄᑦ ᐃᒻᒥᓂᔅᓴᑦᑐᓄᑦ ᓇᔪᒐᖃᕆᐊᖃᓕᑦᑎᑕᐅᒐᔪᒪᑕ ᐊᑦᑕᓇᑦᑐᒦᒋᐊᖃᓕᓪᓗᑎᒃ ᐊᑲᐅᙱᓕᐅᕈᑎᓂ. ᒐᕙᒪᑐᖃᒃᑯᑦ ᓱᓕᒍᑎᖃᔅᓯᒪᒻᒪᑕ ᐊᑦᑕᓇᖏᑦᑐᓂᒃ, ᐊᑭᑐᓗᐊᖏᑦᑐᓂᒃ, ᐊᒻᒪᓗ ᓈᒻᒪᑦᑐᓂᒃ ᐃᒡᓗᖃᑦᑎᑦᑎᒍᑎᓂᒃ ᐃᓄᓐᓄᑦ. ᐊᔪᐃᓐᓈᖃᑉᐳᒍᑦ ᑲᓇᑕ ᐱᔭᐅᑎᑦᑎᖁᓪᓗᒍ ᑕᒪᒃᑯᓂᖓ ᓱᓕᒍᑎᒋᓯᒪᔭᖏᓐᓂᒃ.
ᓯᕗᓪᓕᐅᑎᒋᐊᖃᑦᑎᑦᑎᕕᒋᔭᕗᑦ
ᐱᒍᓐᓇᔅᓯᓂᖅ ᐊᑦᑕᓇᖏᑦᑐᒥᒃ ᐊᒻᒪᓗ ᐊᑭᑐᓗᐊᖏᑦᑐᒥᒃ ᐃᒡᓗᖃᑦᑎᑦᑎᒍᑎᒥᒃ
ᐊᑦᑕᓇᖏᑦᑐᒥᒃ ᐊᒻᒪᓗ ᐊᑭᑐᓗᐊᖏᑦᑐᒥᒃ ᐃᒡᓗᖃᑦᑎᑕᐅᓂᖅ ᐱᒻᒪᕆᐅᓂᑉᐹᖑᒻᒪᑦ ᖃᓄᐃᖏᑦᑎᐊᓐᓂᒻᒧᑦ. ᓇᔪᒐᖃᓐᓂᖅ ᐃᒡᓗᖃᑦᑎᑕᐅᖏᓪᓗᓂ ᐃᓄᐃᑦ ᓄᓇᖓᓂ ᐃᓅᓯᒻᒥ−ᐅᓗᕆᐊᓇᑦᑐᒦᓐᓇᒻᒪᑦ ᐊᑲᐅᖏᓕᐅᕈᑎᒥ. ᐃᒡᓗᖃᑦᑎᑕᐅᓂᖅ ᐱᓪᓗᐊᑕᐅᓗᐊᙳᐊᒻᒪᑦ ᐃᓅᖃᑎᒋᓄᑦ ᐱᔾᔪᓐᓇᐅᑎᒋᔭᐅᔪᓂ ᑕᒪᓐᓇᓗ ᐊᑦᑕᓇᖏᑦᑐᒥᒃ ᐊᒻᒪᓗ ᖃᓄᐃᖏᑦᑎᐊᓂᒻᒦᒍᑎᒋᔭᐅᓪᓗᓂ ᐃᓄᐃᑦ ᐊᕐᓇᖏᓐᓄᑦ, ᓂᕕᐊᔅᓯᐊᓄᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ ᐃᒻᒥᓂᔅᓱᑦᑐᓂᒃ. ᑕᒪᓐᓇ ᐱᑕᖃᕆᐊᖃᓪᓚᕆᒻᒪᑦ ᒐᕙᒪᑐᖃᒃᑯᑦ ᐊᑐᑦᑎᐊᖁᓪᓗᒋᑦ ᐱᓕᕆᓂᐊᓐᓂᕋᔅᓯᒪᓂᒻᒥᓐᓂᒃ ᐊᒻᒪᓗ ᐱᔭᐅᑎᑦᑎᓗᑎᒃ ᐊᑦᑕᓇᖏᑦᑐᒥᒃ, ᓈᒻᒪᑦᑐᒥᒃ, ᐊᒻᒪᓗ ᐊᑭᑐᓗᐊᖏᑦᑐᒥᒃ ᐃᒡᓗᖃᑦᑎᑦᑎᒍᑎᒥᒃ.
ᕿᒫᕖᑦ ᐊᒻᒪᓗ ᐋᖅᑭᒍᑎᓂᒻᒧᑦ ᐃᒡᓗᖃᑦᑎᑦᑎᒍᑎᑦ
ᕿᒫᕖᑦ ᐊᒻᒪᓗ ᐋᖅᑭᒍᑎᓂᒻᒧᑦ ᐃᒡᓗᖃᑦᑎᑦᑎᒍᑎᑦ: ᐱᔭᐅᒋᐊᖃᓪᓚᕆᒻᒪᑕ ᑕᒪᐃᑎᒍᑦ ᐃᑲᔪᑦᑕᐅᒍᑎᑦ ᐱᔨᔅᓯᕈᑎᖏᓐᓂᒃ, ᐃᓚᒋᔭᐅᓗᑎᒃ ᕿᒫᕕᖃᑦᑎᑦᑎᓂᑦ ᐊᒻᒪᓗ ᐊᖅᑭᒍᑎᓂᒻᒧᑦ ᐃᒡᓗᖃᑦᑎᑦᑎᒍᑎᓂᒃ, ᐱᒻᒪᕆᐅᓂᑉᐹᖑᒪᑕ ᑕᒪᑯᓄᖓ ᐊᑐᓕᑦᑐᓂᒃ ᖃᓂᒋᓛᖏᓐᓄᑦ ᐱᖃᑎᖏᓐᓄᑦ ᐋᓐᓂᔅᓯᑕᐅᓂᒻᒥᒃ, ᑎᒍᔭᐅᓯᒪᔪᑦ ᐊᓂᑎᑕᐅᑎᓪᓗᒋᑦ, ᐅᕝᕙᓘᓐᓃᑦ ᐋᓐᓂᐊᕕᒻᒥ ᖃᓄᐃᒍᓐᓃᑦᑎᓪᓗᒋᑦ. ᐸᐅᒃᑑᑎᑦ ᐱᓕᕆᓚᕆᑦᑐᑎᒃ ᐃᑲᔪᑉᐸᒻᒪᑕ ᓴᓇᔭᐅᓂᖏᓐᓂᒃ ᕿᒫᕕᕆᔭᐅᓂᐊᑦᑐᑦ ᐊᒻᒪᓗ ᐋᖅᑭᒍᑎᓂᒻᒧᑦ ᐊᖏᕐᕋᕆᔭᐅᔪᓂᒃ ᐃᓘᓐᓇᓕᒫᖓᓂ ᐃᓄᐃᑦ ᓄᓇᖓᓂ ᐊᒻᒪᓗ ᓄᓇᓕᔾᔪᐊᖃᕕᐅᔪᓂ. ᑕᒪᒃᑯᐊ ᐱᑕᖃᕆᐊᖃᓪᓚᕆᒻᒪᑕ ᐃᓂᔅᓴᐃᑦ ᐱᔭᐅᑎᑦᑎᒍᑎᒋᓗᒋᑦ ᐊᑦᑕᓇᖏᑦᑐᒥ ᕿᒫᕕᒋᔭᐅᓗᑎᒃ ᐊᒻᒪᓗ ᐱᑕᖃᕆᐊᖃᓪᓚᕆᑦᑐᑎᒃ ᐱᔨᔅᓯᕈᑎ ᑕᒪᒃᑯᐊ ᐱᒋᐊᖃᑦᑐᓄᑦ. ᐊᑦᑕᓇᖏᑦᑐᒦᓐᓂᖅ ᐱᓪᓗᐊᑕᐅᓗᐊᙳᐊᒻᒪᑦ ᐱᔪᓇᐅᑎ ᐅᖃᐅᓯᕆᔭᐅᔪᖅ ᑲᑐᔾᔨᖃᑎᒌᑦ ᓄᓇᕐᔪᐊᓕᒫᒥ ᓇᓗᓇᐃᔅᓯᑦᑎᐊᓐᓂᖓᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐃᓄᖏᑕ (UNDRIP). ᐊᑎᓕᐅᕈᑎᖃᔅᓯᒪᓂᖏᓐᓄᑦ ᑲᑐᔾᔨᖃᑎᒌᑦ ᓄᓇᕐᔪᐊᓕᒫᒥ ᓇᓗᓇᐃᔅᓯᑦᑎᐊᓐᓂᖓᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐃᓄᖏᑕ, ᑲᓇᑕ ᐊᑐᕆᐊᖃᓕᒻᒪᑦ ᐃᓚᓕᐅᑎᒋᐊᖃᓕᓪᓗᓂᒋᑦ ᑕᒃᑯᐊᓕᒪᖅ ᒐᕙᒪᑐᖃᒃᑯᑦ ᐱᖁᔭᖏᓐᓄᑦ.
