ᐅᐃᓂᐸᐃᒡ ᒫᓂᑑᐸ – ᓯᑎᐱᕆ 24, 2025 — ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐱᔭᕇᖅᐳᑦ 2025-ᒥ ᐊᕐᕌᒍᑕᒫᖅᓯᐅᑎᒥ ᑲᑎᒪᓂᕐᔪᐊᖏᓐᓂᒃ, ᓯᕗᓪᓕᖅᐹᑦᓯᐊᕐᒥᒃ ᑲᑎᒪᔭᕆᐅᕐᓂᖏᓐᓂ ᑕᐃᑲᓂ ᐅᐃᓂᐸᐃᒡ, ᒫᓂᑑᐸᒥ. ᒪᕐᕈᖕᓂᒃ ᐅᓪᓘᖕᓂᒃ ᑲᑎᒪᓚᐅᖅᑐᑦ ᑕᒫᓂ ᓯᑎᐱᕆ 22-23−ᒥᒃ, ᑲᑎᒃᓱᑎᒃ ᐃᓄᐃᑦ ᐊᕐᓇᐃᑦ ᑕᒪᐃᓐᓂᒃ ᐃᓄᐃᑦ ᓄᓇᖏᓐᓃᖔᖅᑐᓂᒃ ᐊᒻᒪᓗ ᑲᓇᑕᒥ. ᖃᐅᔨᒪᔭᒥᓂᒃ ᑐᓴᐅᒪᑎᑦᑎᔭᖅᑐᓚᐅᖅᑐᑦ, ᐱᓕᕆᖃᑎᖃᑦᑎᐊᕈᓐᓇᕐᓂᕐᒥᒃ ᐱᕚᓪᓕᒋᐊᖅᑎᑦᓯᓱᑎᒃ, ᐊᒻᒪᓗ ᑕᒪᐃᓐᓂᒃ ᖃᓄᐃᓕᐅᕈᑎᒃᓴᖏᓐᓂᒃ ᐱᕙᓪᓕᐊᑎᑦᑎᓗᑎᒃ ᓯᕗᒧᑦ ᓄᑖᖑᓂᐊᓕᕐᒥᔪᒧᑦ ᐊᕐᕌᒎᓂᐊᖅᑐᒧᑦ. ᓴᙱᓂᖃᕐᓂᖏᑦ ᐃᓚᐅᑦᑎᐊᕐᓂᖏᓪᓗ ᑕᒪᐃᓐᓂ ᑲᑎᒪᓂᖏᓐᓂ ᓴᖅᑭᐅᒪᓪᓚᕆᓚᐅᖅᑐᑦ ᐃᓄᖕᓂ ᐊᕐᓇᐃᓂ ᐊᒻᒪᓗ ᐸᐅᒃᑑᑎᒃᑯᑦ ᑲᑎᒪᔨᖏᓐᓂ.
ᐊᕐᕌᒍᑕᒫᖅᓯᐅᑎᒃ ᑲᑎᒪᓂᕐᔪᐊᖏᑦ ᐃᓱᓕᒻᒪᑦ, ᐸᐅᒃᑑᑎᒃᑯᑦ ᐅᐱᒍᓱᓪᓚᕆᓚᐅᖅᑐᑦ ᓴᖅᑭᑎᑦᑎᔪᓐᓇᕐᓂᕐᒥᒃ ᑲᑎᒪᔨᒃᓴᖏᓐᓄᑦ ᓂᕈᐊᖅᑕᐅᔪᓂᒃ. ᑖᒃᑯᐊ ᑲᑎᒪᔨᑖᓵᖏᑦ ᐃᑲᔪᕐᓂᐊᓕᖅᑐᑦ ᓇᓗᓇᐃᔭᐃᕙᓪᓕᐊᓂᕐᒥᒃ ᑎᒥᖁᑎᒋᔭᑦᑕ ᐱᓕᕆᐊᒃᓴᕆᓂᐊᓕᖅᑕᖏᓐᓂᒃ, ᑕᐱᕆᔭᐅᖃᑦᑕᕐᓂᖏᓐᓂᒃ, ᐱᔪᓐᓇᐅᑎᖃᕐᓂᖏᓐᓄᑦ ᖃᓄᐃᑦᑕᐃᓕᒪᔭᕆᐊᖃᕐᓂᖏᓄᓪᓗ ᐃᓄᐃᑦ ᐊᕐᓇᐃᑦ, ᕿᑐᖓᖏᓪᓗ, ᖃᓄᐃᑦᑑᓂᕐᒥᓂᒃ ᐃᓱᒪᖅᓲᑎᔪᐃᑦ ᐊᓯᖏᓪᓗ ᓇᓂᑐᐃᓐᓇᖅ ᐃᓄᐃᑦ ᓄᓇᖏᓐᓂ ᑲᓇᑕᓕᒫᒥᓗ.
- ᑯᕆᔅᑐᓪ ᓕᐊᓂ − ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ
- ᓗᐃᓴ ᐊᓗᓂᒃ, ᓂᕈᐊᖅᑕᐅᒃᑲᓐᓂᖅᑐᖅ − ᓄᓇᓕᒡᔪᐊᖓᓂ−ᔭᓗᓇᐃᕝ
- ᓕᐅᓂ ᖃᐅᒪᕆᐊᖅ − ᓄᓇᕗᑦ−ᐃᖃᓗᐃᑦ
- ᐋᐱᒋᐅᓪ ᐅᐊᑉ, ᓂᕈᐊᖅᑕᐅᒃᑲᓐᓂᑐᖅ − ᓄᓇᓕᒡᔪᐊᖓᓂ−ᕼᐋᐱ ᕚᓕ−ᒎᔅᐸᐃ
- ᒥᓕᓐᑕ ᐃᖃᓪᓗᐊᖅ − ᓄᓇᓕᒡᔪᐊᕐᒥ−ᓂᒋᐊᑕ−ᐱᖓᓐᓇᖅᐸᓯᖓᓂ
- ᕆᔭ ᒪᒃᐸ−ᒐᕕᓐ − ᓄᓇᓕᒡᔪᐊᕐᒥ−ᒪᒃᑯᒃᑐᓂᒃ
ᑲᔪᓯᓂᖏᑦ ᑲᑎᒪᔨᐅᔪᑦ ᓱᓕ ᐊᑐᐃᓐᓇᐅᕗᑦ ᖃᕆᑕᐅᔭᒃᑯᑦ ᑕᑯᒋᐊᖅᑕᐅᕕᒃᑎᓐᓂ ᐅᕙᓂ ᑐᕌᕈᑎᓕᒻᒥ www.pauktuutit.ca. ᐸᐅᒃᑑᑎᑦ ᖁᔭᓕᒋᕗᖅ ᖃᓄᐃᑦᑕᐃᓕᖁᓪᓗᒋᓪᓗ ᑲᔪᓯᙱᑐᐃᑦ ᑲᑎᒪᔨᓂᒃ, ᐃᒃᓯᕙᐅᑕᖅ ᓈᓐᓯ ᐃᑦᑐᖅ ᑭᒡᒐᖅᑐᐃᓚᐅᖅᑐᖅ ᓄᓇᕕᒃ-ᐅᖓᕙᒥᒃ, ᑮᓇᐅᔭᓕᕆᔨᒥ ᐸᐃᔾ ᑭᒥᒃᓴᓇ-ᑯᕆᐊᑉᔅ ᑭᒡᒐᖅᑐᐃᓚᐅᖅᑐᒥ ᐅᕕᒐᖅᑐᓂᒃ ᐃᓄᐃᑦ ᓄᓇᖓᑕ ᓯᓚᑖᓂᒥᐅᓂᒃ, ᐊᒻᒪᓗ ᓕᓕᐊᓐ ᓚᓐᑐᕆᒐ ᓐ ᑭᒡᒐᖅᑐᐃᓚᐅᖅᑐᒥᒃ ᓄᓇᓕᒡᑉᔪᐊᕐᒥ-ᓂᒋᐊᑕ−ᐱᖓᓐᓇᖅᐸᓯᖓᓂ. ᓇᑯᕐᒦᒃ!
ᐊᒻᒪᓗ ᑲᑎᒪᔩᑦ ᓂᕈᐊᖅᑕᐅᓯᒪᔪᑦ ᓴᓂᐊᓂ, ᐸᐅᒃᑑᑎᒃᑯᑦ ᖁᕕᐊᓱᑦᑎᐊᕆᕗᑦ ᖃᐅᔨᑎᑦᑎᔪᓐᓇᖅᓯᓂᕐᒥᒃ ᐊᕐᕌᒍᑕᒪᖅ ᑐᓂᔭᐅᓂᖏᓐᓂᒃ ᐃᓕᑕᕆᔭᐅᓂᖏᓐᓄᑦ ᐊᔪᖏᑦᑎᐊᖅᑐᑦ ᐃᑲᔪᖃᑦᑕᕐᓂᖏᑦ ᐃᓄᐃᑦ ᐊᕐᓇᐃᑦ:
- ᐃᓄᒃ ᐊᕐᓇᖅ ᐃᓕᑕᕆᔭᐅᔪᖅ − ᑏᓇ ᑳᑭ
- ᒪᒃᑯᒃᑐᖅ ᐃᓄᒃ ᐊᕐᓇ ᐃᓕᑕᕆᔭᐅᔪᖅ − ᔭᓂᕗᑦ ᕿᓚᕝᕙᖅ
“ᑕᒪᒃᑯᐊ ᐃᓕᑕᕆᔭᐅᓂᖏᑦ ᓴᖅᑭᑦᑎᕕᐅᓯᒪᔪᑦ ᓴᙱᓂᖃᕐᓂᖏᓐᓂᒃ, ᑲᔪᓰᓐᓇᕈᓐᓇᕐᓂᖏᓐᓂᒃ ᐊᒻᒪᓗ ᐊᔪᙱᑦᔪᐊᕐᓂᖏᓐᓂ ᐃᓄᐃᑦ ᐊᕐᓇᐃᑦ,” ᐅᖃᓚᐅᖅᑐᖅ ᑲᑎᒪᔨᖏᓐᓂ ᐃᒃᓯᕙᐅᑕᕆᔭᐅᕌᓂᒃᑐᖅ ᓈᓐᓯ ᐃᑦᑐᖅ. “ᐅᐱᒋᑦᑎᐊᖅᑕᕗᑦ ᓂᕈᐊᖅᑕᐅᓯᒪᓂᖏᑦ ᑕᒪᒃᑯᐊ ᐊᕐᓇᐃᑦ ᐱᓯᑎᐅᓂᖏᓐᓄᑦ ᑕᐃᒪᙵᑦ ᐃᑲᔪᖃᑦᑕᐃᓇᕐᓂᖏᓐᓄᑦ ᖃᓄᐃᓕᖓᕙᓪᓕᐊᔪᓐᓇᕐᓂᖏᓐᓂ ᓄᓇᓖᑦ ᐊᒻᒪᓗ ᐊᓯᒥᓂᒃ ᐃᑲᔪᖃᑕᐅᔪᒪᓂᕐᒥᒃ ᐊᑐᓕᖅᑎᑦᑎᕙᓪᓕᐊᖏᓐᓇᖅᓱᑎᒃ.”
ᐸᐅᒃᑑᑎᒃᑯᑦ ᐃᓵᒃᓯᕗᑦ ᑕᒪᐃᓐᓂᑦᑎᐊᖅ ᓂᕈᐊᒐᒃᓴᓕᐊᕆᔭᐅᓚᐅᖅᑐᑦ, ᓂᕈᐊᖅᑕᐅᓯᒪᓂᖏᓪᓗ ᑲᑎᒪᔨᐅᓂᐊᓕᖅᑐᑦ, ᐃᓕᑕᕆᔭᐅᔪᑯᓗᐃᓪᓗ ᓯᕗᒧᓪᓗ ᓂᕆᐅᖕᓂᖃᖅᓱᑎᒃ ᐊᕐᕌᒍᒥᒃ ᑲᑐᔾᔨᖃᑎᒌᕈᓐᓇᕐᓂᖏᓐᓂᒃ ᐊᒻᒪᓗ ᐱᕙᓪᓕᐊᖏᓐᓇᕈᓐᓇᕐᓂᖏᓐᓂᒃ.
-30-
ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑲᓇᑕᒥ ᑮᓇᐅᔭᓕᐅᖅᑎᐅᖏᔅᓱᑎᒃ ᑎᒥᖁᑎᒋᔭᐅᔪᑦ ᑭᒡᒐᖅᑐᐃᔨᐅᓗᑎᒡᓗ ᑕᒪᐃᓐᓂᒃ ᐃᓄᖕᓂᒃ ᐊᕐᓇᓂᒃ ᑲᓇᑕᓕᒫᒥ. ᑎᓕᔭᐅᓯᒪᕗᑦ ᑖᒃᑯᐊ ᐱᕙᓪᓕᐊᑎᑦᑎᔨᐅᓂᖅ ᖃᐅᔨᒪᔭᐅᑎᑦᑎᕙᓪᓕᐊᓂᖅ ᐃᑲᔪᖅᑕᐅᖃᑕᕆᐊᖃᕐᓂᖏᓐᓂ ᐃᓄᐃᑦ ᐊᕐᓇᐃᑦ ᐊᒻᒪᓗ ᐱᔫᒥᓴᐃᓂᕐᒧᑦ ᐃᓚᐅᖃᑕᕈᓐᓇᕐᓂᖏᓐᓂ ᓄᓇᓕᖕᓂ, ᐊᕕᒃᑐᖅᓯᒪᓂᖏᓐᓂ, ᑲᓇᑕᓕᒫᒥᓗ ᐃᓱᒪᓘᑕᐅᕙᒃᑐᓂᒃ ᐱᔾᔪᑎᖃᖅᑐᓂᒃ ᐃᓅᖃᑎᒌᒃᑐᓂᒃ, ᐃᓕᖅᑯᓯᓕᕆᓂᕐᒥᒃ ᐊᒻᒪᓗ ᑮᓇᐅᔭᓕᐅᖃᑕᐅᕙᓪᓕᐊᔪᓐᓇᕐᓂᖏᓐᓂᒃ ᐱᕙᓪᓕᐊᖃᑕᐅᔪᓐᓇᕐᓂᖏᓐᓂ.
ᑐᑭᓯᒋᐊᑎᐊᒃᑲᓂᕈᒪᒍᕕᑦ, ᐊᑏᑐᖅ ᐅᖃᕐᕕᐅᓂᐊᖅᐳᑦ ᐅᕙᓇ ᑐᕌᕈᑎᒃᑯᑦ: communications@pauktuutit.ca
