ᐋᑐᕚ,˙ᐊᓐᑎᐅᕆᐅ
ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕ ᖁᕕᐊᓱᒃᐳᑦ ᑖᓐᓇ ᓈᓐᓯ ᐃᑐᒃ ᐃᓂᖓᓄᐊᒃᑲᓐᓂᖅᑐᖅ ᐊᖓᔪᖅᑳᖅ ᐊᒻᒪᓗ ᑐᑭᒧᐊᒃᑎ ᐃᓇᖐᓚᐅᑲᒃᓯᒪᓗᓂ ᐃᓚᖓᒍᑦ ᑲᔪᓯᓂᐊᕐᒪᑕ ᓯᕗᓕᐅᖅᑎᑦ ᐊᓯᖑᖅᐸᓪᓕᐊᓂᖏᑦ. ᓈᓐᓯ ᑲᔪᓯᔪᒥᒃ ᐃᑲᔪᖅᑐᖅ ᐊᐅᓚᑦᓯᔨᓂᒃ ᐊᒻᒪᓗ ᕿᓂᖅᑐᑦ ᐸᐅᒃᑑᑎᒃᑯᓂ ᐊᑕᐃᓐᓇᕐᓂᐊᖅᑐᒥᒃ ᐊᖓᔪᖅᑳᒃᓴᒥᒃ ᐊᒻᒪᓗ ᑐᑭᒧᐊᒃᑎᒃᓴᒥᒃ.
ᑲᑎᒪᔨᑦ ᒫᓐᓇ ᐃᒡᓯᕙᐅᑕᖃᖅᑐᖅ ᓚᐃᓴ ᐊᐅᓪᓚᓗᒃ-ᒍᐊᔅᑯ, ᐅᓇ ᐃᓕᓯᒪᓂᐊᖅᑐᖅ ᐃᓇᖐᓯᒪᖃᑦᑕᕐᓗᓂ. ᐊᑖᒍᑦ ᓯᕗᓕᐅᖅᑎᖓᓂᖓ, ᑲᑎᒪᔨᑦ ᓱᓕ ᐊᖏᖅᓯᒪᔪᑦ ᑐᑭᒧᐊᒃᑎᑦᑎᓗᓂ ᐸᐅᒃᑑᑎᒃᑯᓂᒃ ᑕᒪᓐᓇ ᐋᕿᒃᐸᓪᓕᐊᓂᖓᓄᑦ ᐊᒻᒪᓗ ᐋᕿᑦᑎᐊᖅᓯᒪᓂᐊᕐᒪᑕ ᐊᒻᒪᓗ ᑲᔪᓯᑦᑎᐊᕐᓗᑎᒃ.
“ᐅᐱᒍᓱᒃᐳᖓ ᐃᓂᖓᓂᒃ ᐃᓇᖐᓯᒪᓂᐊᕐᕋᒪ ᐊᖓᔪᖅᑳᖅ ᐊᒻᒪᓗ ᑐᑭᒧᐊᒃᑎ ᐊᒻᒪᓗ ᐃᖅᑲᓇᐃᔭᖃᑎᒋᓂᐊᖅᑕᕋ ᓚᐃᓴ ᐊᒻᒪᓗ ᐊᖏᖅᓯᒪᑦᑎᐊᖅᑐᓂᒃ ᐱᓕᕆᖃᑎᖏᓐᓂᒃ,” ᐅᖃᓚᐅᖅᑐᖅ ᓈᓐᓯ ᐃᑐᒃ.
“ᓯᕗᓪᓕᐅᑎᓂᐊᖅᑕᕗᑦ ᑲᑕᒃᐸᓪᓕᐊᖁᓇᒍ ᐊᒻᒪᓗ ᐱᕙᓪᓕᐊᑎᐊᖁᓪᓗᒍ ᕿᓂᕐᓂᑦᑎᓐᓂ ᓯᕗᓕᐅᖅᑎᒃᓴᒥᒃ ᐅᓇᓗ ᐱᓕᕆᔪᓐᓇᑦᑎᐊᖅᑐᖅ ᐸᐅᒃᑑᑎᒃᑯᑦ ᑕᑯᔪᒪᔭᖏᓐᓂᒃ ᐊᒻᒪᓗ ᐊᖏᖅᓯᒪᔭᖏᓐᓂᒃ ᐃᓄᖕᓄᑦ ᐊᕐᓇᓄᑦ ᐊᒻᒪᓗ ᐃᓚᒌᓄᑦ.”
ᓈᓐᓯ ᐃᑐᒃ ᐊᖏᔪᒥᒃ ᖃᐅᔨᒪᑦᑎᐊᖅᑐᖅ ᐃᓄᖕᓂᒃ ᑐᑭᒧᐊᒃᑎᑦᑎᓂᕐᒥᒃ ᐊᒻᒪᓗ ᑭᒡᒐᖅᑐᐃᓂᕐᒥᒃ, ᐃᖅᑲᓇᐃᔭᖅᓯᒪᔪᖅ ᐱᒋᐊᖅᑎᑕᐅᓯᒪᔪᓂ ᐅᑯᐊᓗ ᓴᖕᖏᒃᑎᒋᐊᖅᑎᓪᓗᒋᑦ ᓄᓇᓕᖕᓂ ᖃᓄᐃᖏᑦᑎᐊᖁᓪᓗᒋᑦ ᐊᒻᒪᓗ ᐱᐅᓯᑐᖃᖏᑦ ᐆᒻᒪᕆᐊᖅᑎᒃᑲᓐᓂᕐᓗᒋᑦ. ᓚᐃᓴ ᐊᐅᓚᓗᒃ-ᒍᐊᔅᑯ, ᐃᒃᐱᒋᔭᐅᑦᑎᐊᖅᑐᖅ ᓯᕗᓕᐅᖅᑎ ᐊᕐᕌᒍᓄᑦ ᐊᒥᒧᓄᑦ ᐱᓕᕆᖃᑕᐅᓯᒪᔪᖅ ᐊᐅᓚᑦᓯᔨᓂ ᑐᑭᒧᐊᒃᑎᑦᑎᓂᕐᒧᑦ ᐊᒻᒪᓗ ᓄᓇᓕᖕᓂ ᐱᓕᕆᖃᑎᖃᖅᐸᒃᑐᖅ, ᑐᓂᓯᓯᒪᕗᖅ ᓴᖕᖏᔫᒐᒥ ᑐᑭᒧᐊᒃᑎᑦᑎᔪᓐᓇᖅᑐᖅ ᑲᑎᒪᔨᓂᒃ ᐊᓯᖑᖅᐸᓪᓕᐊᓂᖏᓐᓂ.
ᑲᑎᒪᔨᑦ ᐊᒻᒪᓗ ᓯᕗᓕᐅᖅᑎᑦ ᐱᓕᕆᖃᑎᒌᑦ ᐊᐅᓪᓗᑎᔪᑦ ᓇᓂᓯᔪᒪᓪᓗᑎᒃ ᐃᖅᑲᓇᐃᔭᖅᑎᒃᓴᒥᒃ ᐃᖅᑲᓇᐃᔭᖃᑎᒌᑦᑎᐊᕐᓂᐊᖅᑐᑦ ᓴᖕᖏᒃᑎᑉᐸᓪᓕᐊᑎᓪᓗᒋᑦ ᐱᓕᕆᑎᑦᑎᔾᔪᑕᐅᔪᑦ, ᐱᓕᕆᖃᑎᒌᑦ, ᐊᒻᒪᓗ ᑭᒡᒐᖅᑐᐃᓂᖅ ᐃᑲᔪᖅᑎᐅᓂᖅ ᐅᑯᐊᓗ ᓴᖕᖏᓂᖅᑖᖅᑎᑦᑎᓯᒪᓂᐊᕐᒪᑕ ᐃᓄᖕᓂᒃ ᐊᕐᓇᓂᑦ ᑕᒪᐃᓐᓂ ᑲᓇᑕᒥ.
ᑐᓴᒐᒃᓴᓕᕆᔨᒃᑯᑦ ᑐᑭᓯᒋᐊᕈᓐᓇᖅᑐᑦ, ᐊᑏ ᐅᖃᕐᕕᒋᓗᒋᑦ ᐅᕘᓇ communications@pauktuutit.ca.
-30-
ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕ ᑲᓇᑕᒥ ᑮᓇᐅᔭᓕᐅᕋᓱᐊᖅᑎᐅᓇᑎᒃ ᐊᐅᓚᑦᓯᔨᑦ ᑭᒡᒐᖅᑐᐃᔪᑦ ᑕᒪᐃᓐᓂᒃ ᐃᓄᖕᓂᒃ ᐊᕐᓇᓂᒃ ᑲᓇᑕᒥ. ᐅᑯᐊᓗ ᑎᓕᔭᐅᓯᒪᔪᑦ ᐊᑐᖅᓯᓗᑎᒃ ᖃᐅᔨᒪᑎᑦᑎᓂᕐᒥᒃ ᑭᓐᖒᒪᒋᔭᖏᓐᓂᒃ ᐱᔪᒪᔭᖏᓐᓂᒃ ᐃᓄᐃᑦ ᐊᕐᓇᐃᑦ, ᓂᕕᐊᖅᓵᑦ ᐊᒻᒪᓗ ᐊᖑᑕᐅᔭᕆᐊᖃᖅᑐᕆᔪᑦ ᐊᕐᓇᐅᔭᕆᐊᖃᖅᑐᕆᔪᑦ ᐃᓄᐃᑦ, ᐊᒻᒪᓗ ᑲᔪᖏᖅᓴᕐᓗᒋᑦ ᐃᓚᐅᖁᓪᓗᒋᑦ ᓄᓇᓕᖕᓂ, ᐊᕕᒃᑐᖅᓯᒪᔪᓂ ᐊᒻᒪᓗ ᑲᓇᑕᒥ ᐃᓱᒫᓘᑎᑦ ᐱᔾᔪᑎᒋᓪᓗᒋᑦ ᐃᓅᓯᓕᕆᓂᖅ, ᐱᐅᓯᑐᖃᓕᕆᓂᖅ, ᐊᒻᒪᓗ ᑮᓇᐅᔭᓕᐅᕋᓱᐊᕐᓂᖅ.
