ᐅᖃᐅᓯᖃᑦᑐᖅ ᔫᓇᐃᓯᐅᑉ ᓴᓇᓯᒪᓂᖁᑎᖓᓂᒃ
ᐅᐱᒍᓱᑦᑎᐋᑦᑐᖓ ᒥᔅᓱᓚᐅᔅᓯᒪᒋᐊᔅᓴᖅ ᐊᐅᐸᑦᑐᒥᒃ ᐊᑯᓕᒻᒥᒃ ᐊᒪᐅᑎᒥᒃ ᑕᐃᒃᑯᓄᖓ ᔭᒐᐃᔭᐅᓯᒪᔪᓄᑦ. ᑖᓐᓇ ᐊᒪᐅᑎ ᐱᖅᑯᓯᒃᑯᑦ ᓴᓇᓯᒪᒻᒪᑦ ᐃᒃᐱᐊᔅᔪᓐᓂᒃ ᐊᒻᒪᓗ ᑲᓇᓐᓇᖓᓂᒃ ᐅᑭᐅᑦᑕᑦᑑᑉ, ᕿᑭᖅᑖᓗᒻᒥᒃ, ᓄᓇᕗᑦ. ᐃᖅᑲᓇᐃᔮᖃᑎᖃᓚᐅᔅᓯᒪᒐᒪ ᓴᑭᓕᓚᐅᑦᑕᓐᓂᒃ ᑑᖓᖅᒥᒃ ᐊᒻᒪᓗ ᐊᓈᓇᓐᓂᒃ ᖄᐱᒃᒥᒃ, ᐃᓕᓐᓂᐊᑦᑐᒋᑦ ᐱᓕᕆᔾᔪᓰᑦ ᐊᒻᒪᓗ ᐊᔾᔨᒌᖏᑦᑐᑦ ᐆᒃᑑᑎᑦ ᖃᐅᔨᔭᐅᓚᐅᑦᑐᓂᒃ ᓯᕗᓕᓐᓃᙵᔅᓯᒪᓂᖏᓐᓂᒃ. ᑖᓐᓇ ᐊᐅᐸᖅᑐᖅ ᐊᑯᓕᒃ ᐊᒪᐅᑎ ᐱᐅᔪᐋᓗᒻᒥᒃ ᑎᕆᒐᓂᐋᕋᔭᒥᒃ ᓄᐃᓚᖃᒻᒪᑦ ᓇᓴᖓᓂ ᐊᒪᕆᓐᓄᒃ ᐅᖅᑰᔾᔪᑎᒋᔭᐅᖁᓪᓗᒍ.
ᐱᒻᒪᕆᐋᓗᒻᒪᑦ ᐅᕙᓐᓄᑎᑦ ᓇᓗᓇᕈᒪᓂᓐᓄᑦ ᑕᒪᒃᑯᐊ ᔭᒐᐃᔭᐅᓯᒪᔪᑦ ᐃᓄᐃᑦ ᐊᕐᓇᖏᑦ ᐊᒻᒪᓗ ᓱᕈᓰᑦ. ᐊᑯᓂᐅᓗᐋᑦᑐᐋᓗᓕᒻᒪᑦ ᐅᑕᖅᑭᓂᕆᔭᐅᔪᖅ ᑭᐅᔭᐅᒍᑎᓂᒃ ᑕᒪᒃᑯᓄᖓ ᔭᒐᐃᔭᐅᓯᒪᔪᓄᑦ. ᐋᓐᓂᐊᓂᖅ ᓂᙵᐅᒪᓂᓪᓗ ᑲᔪᓯᓯᒪᒻᒪᑎᒃ ᑎᑭᓪᓗᒍ ᐅᓪᓗᒥᒧᑦ ᓂᓪᓕᑦᑐᒥᒃ ᑐᓴᓚᐅᔅᓯᒪᓇᑕ.
ᐅᖃᐅᓯᖃᑦᑐᖅ ᔫᓇᐃᓯᒥᒃ
ᓈᓚᓚᐅᕈᒃ ᐅᓂᒃᑳᕆᔭᖓ
ᐊᑎᖃᑉᐳᖓ ᔫᓇᐃᓯ ᐊᑕᒍᑦᓯᐊᖅ ᑐᓐᕋᓗᒃᒥᒃ. ᐃᓅᓚᐅᔅᓯᒪᔪᖓ ᐱᕈᔅᓴᓯᒪᓪᓗᖓᓗ ᐃᒃᐱᐊᕐᔪᖕᒥ. ᐅᐄᒐᓗ ᐱᕈᑦᑎᑦᑎᓯᒪᔪᒍᒃ ᐱᖓᓲᔪᑦᑐ ᐊᑕᐅᓯᒻᒥᓪᓗ ᐅᐱᓇᑦᑐᐋᓗᓐᓂᒃ ᕿᑐᙵᑦᑎᓐᓂᒃ: ᑎᓴᒪᒃ ᐊᕐᓇᐃᑦ ᐊᒻᒪᓗ ᒪᕐᕉᒃ ᐊᖑᑏᒃ ᐊᒻᒪᓗ ᐊᑕᐅᓯᖅ ᐊᕐᓇᖅ ᑎᒍᐋᕆᓪᓗᑎᒃᑯᒃ. ᐃᓕᓴᐃᔨᐅᕗᖓ ᐊᒻᒪᓗ ᐃᓕᓴᐃᓕᔅᓱᖓ ᐅᖓᑖᓄᒃ 25 ᐊᕐᕌᒍᑦ ᐃᓅᔭᖅ ᐃᓕᓐᓂᐊᕐᕕᖕᒥ ᐃᒃᐱᐊᕐᔪᒥ.
ᓱᓕᓪᓗᖓ ᖁᕕᐊᒋᓪᓚᕆᑦᑕᕋ ᐃᓕᓴᐃᔨᐅᓂᕋ. ᐃᓕᓴᑎᑕᐅᓯᒪᕗᖓ ᐱᖅᑯᓯᒃᑯᑦ ᒥᖅᓱᓐᓂᒻᒥᒃ ᐱᓕᕆᑦᑎᐊᕈᓐᓇᓐᓂᒻᒥᒃ ᐅᖅᑰᔪᓂᒃ ᐊᓐᓄᕌᓕᐅᕈᓐᓇᖁᓪᓗᖓ ᐊᒥᓐᓂᑦ ᐊᒻᒪᓗ ᒥᖅᑯᓕᓐᓂᒃ ᑕᒪᒃᑯᓂᖓ ᐊᖑᓇᓱᑦᑕᐅᓲᓂᒃ ᐃᑲᔪᑦᑎᒋᔭᓐᓄᑦ ᐅᐄᓐᓄᑦ ᕈᕙᓐ ᑐᓐᕋᓗᒃᒧᑦ. ᑕᒪᓐᓇ ᐱᖃᓯᐅᔾᔨᒻᒪᑦ ᐱᕈᓇᖅᓴᐃᓂᕐᒥᒃ ᐊᒻᒪᓗ ᓱᕈᔾᔭᐃᑦᑐᒋᑦ ᐊᒦᒃ ᐊᑐᓲᒃᑲ ᒥᔅᓱᑦᑐᖓ. ᐅᓄᑦᑐᐋᓗᒻᒪᑲ ᐃᓚᒐᓛᓗᒃᑲᑦ ᑕᒪᒃᑭᑦᑎᓐᓂᒃ ᐅᕙᖓ ᐃᓚᖏᓐᓂᒃ ᐊᒻᒪᓗ ᐅᐄᒪ ᐃᓚᖏᓐᓂᒃ. ᐃᓘᓐᓇᑎᒃ ᐊᕐᓇᑦᑎᐋᕙᐅᑎᐋᓗᐃᑦ ᒥᖅᓱᖅᑏᓐᓇᐅᒻᒪᑕ ᐊᒻᒪᓗ ᐃᓕᓴᕆᔭᐅᓯᒪᓪᓗᑎᒃ ᐱᖅᑯᓯᒻᒥᒍᑦ ᐆᑦᑑᑎᖃᓐᓂᖏᓐᓂᒃ ᐊᒻᒪᓗ ᐊᓐᓄᕌᑦᑎᐊᕙᓕᐋᕆᕙᑦᑕᖏᓐᓄᑦ.
ᐊᒃᓱᐋᓗᒃ ᖁᕕᖓᒋᕙᑦᑕᒃᑲ ᐱᖅᑯᓯᒃᑯᑦ ᐊᓐᓄᕌᓕᐊᑦᑎᐊᕚᓗᒋᕙᑦᑕᒃᑲ. ᐃᓕᑦᑎᔾᔪᐋᔅᓯᒪᒐᒪ ᓴᑭᒋᓚᐅᑦᑕᓐᓂᒃ ᑑᖓᖅ ᑐᓐᕋᓗᒃᒥᑦ ᐊᒻᒪᓗ ᐊᓈᓇᓐᓂᒃ ᖄᐱᒃ ᐊᑦᑕᒍᑦᐊᒻᒥᒃ, ᑕᐃᓐᓇᓗ 101−ᓂᒃ ᐅᑭᐅᖃᓕᓚᐅᑦᑐᓂ. ᐃᓕᑉᐸᓪᓕᐋᓯᒪᒐᒪ ᓄᑖᓂᒃ ᐱᓕᕆᒋᐅᕈᓯᓐᓂᒃ ᐊᒻᒪᓗ ᐊᔾᔨᒌᖏᑦᑐᓂᒃ ᐆᑦᑑᑎᓂᒃ ᐃᓅᓯᓕᒫᓐᓂ. ᓯᓚᑐᓂᖅ, ᐱᓕᕆᒍᓰᑦ ᐊᒻᒪᓗ ᐆᑦᑑᑎᑦ ᑐᓂᔭᐅᖃᑦᑕᔅᓯᒪᒻᒪᑕ ᐅᕗᓐᓄᑦ ᑭᖑᕚᕆᓂᒃ, ᐱᒋᐋᓚᐅᔅᓯᒪᓪᓗᓂ ᐊᒪᐅᓐᓂᑦ. ᓴᐃᒻᒪᑦᑎᑕᐅᓯᒪᑦᑎᐋᓐᓂᓐᓂᒃ ᐃᑉᐱᒍᓱᖃᑦᑕᑦᑐᖓ ᐊᔅᓱᐋᓗᒃ ᐃᓕᓴᐃᔨᑦᑎᐊᕙᖃᖃᑦᑕᓐᓂᓐᓂᒃ.