ᐅᖃᐅᓯᖃᑦᑐᖅ ᓇᓐᓯᐅᑉ ᓴᓇᓯᒪᓂᖁᑎᖓᓂᒃ
ᐊᐅᐸᑦᑐᖅ ᐊᒪᐅᑏᑦ ᑭᒡᒐᑦᑐᐃᒋᐋᖃᒻᒪᑦ ᐊᔅᓱᐋᓗᕈᓐᓃᑦᑎᑦᑎᓗᓂ ᐅᖓᓂᕆᔭᓐᓂᒃ ᐊᑐᑦᑕᐅᓲᒥᒃ ᑭᒃᑯᓕᒫᓄᑦ. ᑭᒡᒐᑦᑐᐃᒋᐋᖃᒻᒪᑦ ᓇᓪᓕᒍᓱᓐᓂᒻᒥᒃ ᑕᐃᒃᑯᓂᖓ ᐃᓚᐃᔅᓯᒪᔪᓂᒃ ᓇᓪᓕᒋᔭᖏᓐᓂᒃ. ᐊᐅᐸᑦᑐᖅ ᐊᒪᐅᑏᑦ ᑲᓇᑕᒧᑦ ᐃᖅᑲᐅᒪᒍᑎᒋᔭᐅᒋᐋᖃᒻᒪᑦ ᐊᒻᒪᓗ ᐃᓕᓴᕆᔭᐅᓗᑎᒃ ᑕᐃᒃᑯᐊ ᐃᓚᐃᔅᓯᒪᔪᑦ ᓇᓪᓕᒋᔭᖏᓐᓂᒃ, ᑭᓯᐊᓂᑦᑕᐅᖅ ᑐᕌᑦᑎᑕᐅᒋᐊᓕᐅᒐᓗᐊᖅ ᓄᓇᔾᔪᐋᓕᒫᒧᖓᓕᓪᓗᓂ. ᐃᓚᒋᔭᐅᒃᑲᓐᓂᓪᓗᓂ ᑕᒪᑐᒧᖓ, ᑖᓐᓇ ᐊᒪᐅᑎ ᐊᓐᓄᕌᑐᐊᖑᖃᑦᑕᓚᐅᒻᒪᑦ ᐊᕐᓇᓄᑦ ᐊᑐᑦᑕᐅᖃᑦᑕᓪᓗᓂ.
ᐆᑦᑑᑎᑦ ᑕᐃᒃᑯᐊ ᐊᑐᖃᑦᑕᓚᐅᑦᑕᒃᑲ ᐊᑐᖃᑦᑕᔅᓯᒪᔭᕗᑦ ᓄᓇᐃᓇᒥᐅᑕᐅᓪᓗᑕ ᐃᓅᓪᓗᑕ ᑕᐃᔅᓱᒪᓂᑐᖄᓗᓂᑦ. ᓯᕗᓪᓕᑉᐹᑦᑎᐊᖑᒻᒪᑦ ᓴᓇᓯᒪᓂᖓ ᐊᒻᒪᓗ ᐆᑦᑐᔅᓯᒪᓂᖓ ᒥᔅᓱᓚᐅᔅᓯᒪᔭᓕᒫᓐᓂᒃ ᐊᒻᒪᓗ ᐱᕈᕈᑎᒋᓯᒪᓪᓗᒍ. ᖃᐅᔨᒪᓚᐅᖏᑦᑐᒍᑦ ᐊᓯᑦᑕ ᐃᓄᐃᑦ ᐊᕐᓇᖏᑕ ᐊᒪᐅᑎᖏᓐᓄᑦ ᐆᑦᑐᕈᑎᓂᒃ, ᓄᓇᐃᓇᒻᒥᐅᑕᐅᓪᓗᑕ ᐃᓅᓚᐅᕋᑦᑕ, ᑕᑯᓚᐅᔅᓯᒪᓚᐅᖏᑦᑐᒍ ᐅᕝᕙᓘᓐᓃᑦ ᖃᐅᔨᒪᓚᐅᖏᑦᑐᒍᑦ ᓯᒡᔭᕐᒥᐅᑕᓂᒃ ᐊᒻᒪᓗ ᐊᓯᖏᓐᓂᒥᐅᑕᓐᓂᒃ ᐊᕕᒃᑐᔅᓯᒪᓂᑦ ᓴᓇᒍᓯᖏᓐᓂᒃ ᐊᒪᐅᑎᓂᒃ. ᓂᒡᔭᖃᑦᑐᑎᒃ, ᓂᕕᖓᓪᓗᑎᒃ ᓈᒻᒪᑦᑎᔅᓯᒪᓪᓗᑎᒃ ᐋᖅᑭᔅᓱᔅᓯᒪᓂᖏᑦ ᑕᒪᒃᑭᖏᓐᓂᒃ ᓯᕗᓂᖓᓂ ᑐᓄᐋᓂᓗ ᓇᓴᖓᓂᓗᑦᑕᐅᖅ ᐊᒫᔅᓯᕕᖓᓂᒃ ᓄᑕᕋᒻᒥᒃ.
ᓄᓇᕐᔪᐋᓕᒫᒥ, ᐊᑐᓂ ᓄᓇᓕᓐᓂ, ᐃᓚᐃᔅᓯᒪᒐᑦᑕ ᓇᓪᓕᒋᔭᑦᑎᓐᓂᒃ. ᐅᑎᓚᐅᓇᑎᓪᓗᐃ ᐅᕙᑦᑎᓐᓄᑦ. ᐃᓕᓴᑎᑕᐅᓯᒪᒐᒃᑕ ᐃᓐᓇᒪᕆᑦᑎᓐᓄᑦ ᐃᓱᒫᓗᓗᐊᖁᔭᐅᓇᑕ, ᑕᑎᑐᒐᓱᐋᓪᓗᑕ, ᓱᕐᕋᒃᑕᐃᓕᒪᓗᑕ ᐊᒻᒪᓗ ᐃᓅᒐᓱᐊᖁᔭᐅᓪᓗᑕ ᑕᖃᓗᐋᑦᑕᐃᓕᒪᓗᑕ ᐅᕙᒍᑦ ᓇᒻᒥᓂᖅ ᐃᓱᒪᑰᕈᑎᖃᖁᓇᑕ ᐊᒻᒪᓗ ᖃᓄᐃᖏᑦᑎᐊᖁᓪᓗᑕ. ᐊᐅᐸᑦᑐᖅ ᐊᒪᐅᑎ ᑕᑯᔅᓴᐅᑎᑦᑎᒻᒪᑦ ᐊᐅᑦᑖ ᐃᓅᑎᒻᒫᑎᒍᑦ, ᐃᓅᒍᒪᓂᕗᑦ ᐱᐅᓂᔅᓴᒥᒃ ᐃᓅᓯᖃᓪᓗᑕ ᐊᒻᒪᓗ ᑕᒪᓐᓇ ᓱᕐᕋᑦᑕᐃᓕᒪᓂᖅ ᐊᑕᐃᓐᓇᓪᓗᓂ ᐃᓅᓯᑦᑎᓐᓄᑦ.
ᐅᖃᐅᓯᖃᒃᑐᖅ ᓇᓐᓯᒥᒃ
ᐃᓅᓚᐅᔅᓯᒪᕗᖓ ᐊᐃᕆᓕ 28, 1948−ᒥ ᓄᓇᒥ ᐋᕈᐊᓐᓄᐊᖅ. ᖃᓂᒋᔭᖓᓃᑦᑐᓂ ᐅᖅᓱᖅᑑᑉ ᐊᒻᒪᓗ ᐊᑯᓐᓂᖓᓂ ᕼᐊᓐᓂᖓᔪᐸᓯᒻᒥ. ᐃᒡᓗᕕᒐᖃᕝᕕᒋᔭᑦᑎᓐᓂ (ᓄᓇᒥ), ᑐᒃᑐᕋᔭ ᐊᓐᓄᕌᕗᑦ ᓴᓇᔭᐅᓯᒪᕙᓚᐅᒻᒪᑕ ᐱᐅᓯᑎᑕᐅᑦᑎᐊᕆᐋᖃᑦᑐᑎᒃ ᐊᒻᒪᓗ ᓴᓕᒍᑦᑕᐅᓪᓗᑎᒃ ᕿᑐᒻᒪᑦᑎᑕᐅᓪᓗᑎᒃ ᐱᒪᓴᑦᑕᐅᑦᑎᐋᑦᑐᑭᒃ ᐱᓕᕆᒍᓯᕆᔭᐅᒋᐋᓕᒃᑯᑦ. ᐅᖃᓚᐅᔅᓯᒪᒐᒪ ᐊᑎᒋᑖᕈᒪᓂᕋᑦᓱᖓ ᑐᓱᒐᒪ ᐊᓯᒃᑲ ᑕᐃᒃᑯᐊ ᑕᐃᒪᓐᓇᐃᑐᓂᒃ ᐊᓐᓄᕌᖃᒃᑐᓂᒃ. ᖃᐅᔨᒪᖏᒃᑲᓗᐊᑦᑐᖓ ᖃᓄᑎᒋ ᐅᑭᐅᖃᓐᓂᒻᒪᖔᒻᒪ, ᐅᖃᐅᑎᔭᐅᓚᐅᔅᓯᒪᒐᒪ ᑲᒪᒋᒋᐋᖃᓐᓂᐊᓂᕋᑦᑕᐅᓪᓗᓂ ᓴᓇᒐᓱᐋᓪᓗᒍ ᐊᒥᖅ ᓇᒻᒥᓂᖅ (ᓴᓗᒻᒪᓪᓗᒍ, ᑕᓯᓯᓪᓗᒍ ᐊᒻᒪᓗ ᕿᑐᒻᒪᔅᓴᓪᓗᒍ) ᐱᒍᒪᓂᐋᕈᒪ ᐊᑎᒋᒥᒃ. ᑐᒃᑐᕋᔭᒥᒃ ᐅᓕᒃᓱᖓ ᐅᕕᓂᓐᓅᑦᑎᑦᓱᒍ ᓯᓂᓕᑦᑐᒥᓂᐅᓪᓗᖓ. ᐅᓪᓛᒃᑯᑦ, ᐅᖃᐅᑎᔭᐅᓕᑦᑐᖓ ᐲᑦᑕᐅᖁᔭᐅᓪᓗᓂ, ᐲᑐᐃᓐᓇᕆᓪᓗᒍ ᖃᐅᔨᓕᕆᓪᓗᖓ ᓂᒡᓕᓇᓐᓂᖓᓂᒃ ᒥᖅᑯᖓ ᐊᑦᑐᐋᙱᖔᑦᑐᓂ ᐅᕕᓂᓐᓄᑦ. ᐅᖃᐅᑎᔭᐅᓕᕆᓪᓗᖓ ᓴᓕᒍᖁᔭᐅᓪᓗᓂ ᐊᒥᖅ (ᐊᒥᖓ ᑐᒃᑑᑉ) ᐱᓕᕆᐊᕆᒋᐊᖃᓕᑦᑐᒍ, ᖃᐅᓯᓕᑦᑎᑦᑐᒍ ᕿᑐᒻᒪᑦᑎᐊᖁᓪᓗᒍ ᓴᓕᒍᑦᑎᓪᓗᒍ. ᐆᓴᖅ (ᐊᓈᓇᒐ) ᑕᐅᑐᑦᑎᑦᑐᓂᖓ ᐅᑭᑎᕆᓪᓗᓂ ᐆᑦᑐᔅᓯᒪᔪᓂᒃ ᐊᕝᕙᖓᓂ ᑐᒃᑑᑉ ᐊᒥᖓᑕ. ᑕᐃᒪᓐᓇᐃᓘᕆᐊᖃᓕᕆᓪᓗᖓ ᐱᖃᑖᓂᒃ ᐊᕝᕙᖓᑕ ᑕᑯᓐᓈᑦᑎᑕᐅᖃᐅᓂᑦᑐᑦ. ᑐᖔᓂᖁᓚᐅᕋᒪ 10 ᐊᕐᕌᒍᓂᒃ ᐅᑭᐅᖃᑦᑐᖓ ᑕᐃᔅᓱᒪᓂ. ᑕᐃᓐᓇ ᑕᐃᒪ ᓯᕗᓪᓕᑉᐹᑦᑎᐊᖑᓚᐅᔅᓯᒪᔪᖅ ᐊᒪᐅᑎᓕᐋᓐᓂᒃ, ᐊᒻᒪᓗ ᐳᐃᒍᓚᐅᔅᓯᒪᓇᒍ ᑕᐃᓐᓇ, ᓯᕘᕋᓚᐅᔅᓯᒪᒐᒪ ᑕᒻᒪᓂᐋᑦᑐᕆᓪᓗᖓ; ᐅᑭᑦᑎᐋᔾᔮᓱᕆᓇᒍ ᐆᑦᑐᔅᓯᓂᖓ ᑕᐃᒫᑦᑎᐊᓪᓗᒍ. ᐅᑉᐱᕈᓱᑦᑐᖓ ᐃᑲᔪᑦᑕᐅᓚᐅᓐᓂᓐᓂᒃ ᐱᓕᕆᑎᓪᓗᖓ ᐱᓕᕆᒍᓯᒻᒥᒃ ᐃᓕᓐᓂᐊᑎᑕᐅᑎᓪᓗᖓ.
ᓄᓇᓕᖃᕕᒋᔭᕗᑦ ᓴᓇᔭᐅᓕᑦᑎᓪᓗᒍ, ᐅᑕᖅᑭᑐᐃᓐᓇᖃᑦᑕᓚᐅᕋᑦᑕ ᐃᑲᔪᓪᓗᑎᒍ ᐊᖓᔪᑦᑎᑉᐹᖅ ᖃᑕᙳᑎᕗᑦ ᐱᕙᒌᔭᔅᓯᑎᓪᓗᒍ ᐊᒻᒪᓗ ᒥᔅᓱᓕᒻᒥᓗᓂ ᐊᓐᓄᕌᓕᐅᓪᓗᓂ ᐊᓯᒥᓄᑦ ᐊᓐᓄᕌᕆᔭᐅᓂᐊᑦᑐᓂᒃ. ᐊᖓᔪᖓ, ᒨᓯᑉᐱᒃ, ᓇᓄᕐᓗᒃ, ᖃᕝᓗᓵᖅ ᐅᕙᖓᓗ, ᐃᑲᔪᖁᔭᐅᕙᓚᐅᕋᓐᓄᒃ ᐊᖓᔪᑦᑎᓐᓂᒃ. ᓈᓚᑦᑎᐊᖃᑦᑕᐃᓇᐸᓗᓚᐅᑦᑐᖓ. ᐃᑲᔪᓚᐅᔅᓯᒪᒻᒥᔪᖓ ᓴᓇᓪᓗᖓ ᓂᖓᐅᒪ ᑲᔪᕈᑉ ᑐᒃᑐᕋᔭᒃ ᐊᓕᔅᓯᖁᑖᖏᓐᓂᒃ (ᖁᓕᑦᑕᐅᔭᒃᓵᓐᓂᒃ). ᑕᐃᔅᓱᒪᓂ ᐅᑎᒻᒪᑕ ᑕᒻᒫᔅᓯᒪᕕᓕᐅᓂᒻᒥᓂᒃ, ᓂᖓᐅᒐ ᐅᖃᐅᔾᔨᓚᐅᔅᓯᒪᔪᖅ ᐅᕙᓐᓂᒃ ᒥᔅᓱᑦᑕᒥᓂᕋᒎᖅ ᑭᓗᐋᓚᐅᖏᑦᑐᖅ. ᐊᑕᑦᑎᐊᑦᑐᐃᓐᓇᐅᓪᓗᓂ. ᑕᐃᒪᓐᓇ ᐃᓕᓐᓂᐊᑦᑎᑕᐅᓚᐅᔅᓯᒪᔪᖓ ᒥᔅᓱᕆᐋᔅᓴᖅ.
ᐊᓗᖏᑦ ᑲᒥᑦᑕ ᐳᔾᔪᕋᔪᑉᐸᓚᐅᒻᒪᑕ. ᐃᓚᖓᓐᓂ ᐱᔅᓯᑦᑐᐋᓗᑎᓪᓗᒍ ᐃᓯᔅᓯᒪᐃᓇᕆᐊᖃᓚᐅᔅᓯᒪᒐᑦᑕ ᐃᒡᓗᕕᒐᑦᑎᓐᓂ, ᖃᐅᔨᔭᐅᓚᐅᒻᒪᑦ ᑲᒥᒐ ᐳᔾᔪᒡᓯᒪᓂᓐᓂᒻᒪᑦ ᐊᓗᐋᒍᑦ. ᐅᖃᐅᑎᔭᐅᓚᐅᔅᓯᒪᔪᖓ ᑲᒦᒃᑲᒃ ᓯᐋᕐᕆᔮᕈᑎᒋᓗᐊᖃᑦᑕᕋᒃᑭᒡᒍᖅ ᐊᓗᖏᒃ ᐳᔾᔪᑦᑑᒃ. ᑕᐃᒪᓐᓇᐅᓂᖓᓄᑦ, ᐅᖃᐅᑎᔭᐅᓕᓚᐅᔅᓯᒪᒻᒥᔪᖓ ᐊᑐᙱᖁᔭᐅᓪᓗᑎᒃ ᓇᒻᒥᓂᖅ ᑲᒦᒃᑲᒃ. ᐱᔭᕆᐊᑐᔪᒻᒪᕆᐅᓚᐅᖅᑐᖅ! ᖁᓕᐅᙱᓱᖓᑦᑐᓂᒃ ᐊᕐᕌᒍᖃᖅᑰᓚᐅᔅᓯᒪᔪᖓ ᐅᑭᐅᖃᑐᖓ ᑕᐃᔅᓱᒪᓂ ᐊᑐᙱᕋᒃᑭᒃ ᑲᒦᒃᑲᒃ. ᑕᒻᒪᖃᑦᑕᓚᐅᕋᒪ ᐅᑭᑎᑦᑎᓪᓗᒋᑦ ᐆᑦᑐᔅᓯᒪᔪᑦ ᐊᒻᒪᓗ ᑕᓯᓯᑦᑎᓪᓗᒋᒃ ᕿᐋᓯᕙᓪᓗᖓ. ᕿᐋᒐᓗᐊᕌᖓᒪ, ᐃᑲᔪᑦᑕᐅᖃᑦᑕᓚᐅᖏᑦᑐᖓ. ᐃᓕᓴᑎᑕᐅᓚᐅᔅᓯᒪᔪᖓ ᑕᐃᒪᓐᓇ ᒥᔅᓱᕆᐋᔅᓴᖅ. ᐱᕈᓚᐅᖏᑦᑐᖓ ᐃᑉᐱᒋᔭᐅᖏᓪᓗᖓ ᐊᒻᒪᓗ ᐱᑦᑎᐊᑦᑕᐅᖃᑦᑕᖏᓪᓗᖓ ᑕᐃᒪᓐᓇᐃᑕᐅᓱᕆᓚᐅᕋᓗᐋᑦᑎᓪᓗᖓ ᑕᐃᔅᓱᒪᓂᐅᑎᓪᓗᒍ. ᐃᒪᓐᓇᐅᖔᓚᐅᒻᒪᓪᓕ, ᐃᓕᓴᑎᑕᐅᓐᓂᕋᒪ ᑕᐃᒫᑦᑎᐊᑦᑕᐅᓪᓗᖓ ᒥᔅᓱᓂᒻᒥᒃ ᐅᕙᖓ ᓇᒻᒥᓂᖅ ᐱᕚᓪᓕᕈᓐᓇᔅᓯᖁᓪᓗᖓ. ᓇᓗᓇᕈᓐᓃᓚᐅᑦᑐᖅ ᐅᕙᓐᓄᑦ ᑕᐃᒫᑦᑎᐊᑦᑕᐅᓂᕋᒪ, ᐃᑲᔪᑎᐊᑦᑐᓂ ᐊᒻᒪᓗ ᐋᖅᑭᔅᓱᐃᓪᓗᓂ ᐊᑐᓐᓂᐋᑦᑕᓐᓂᒃ ᒥᖅᓱᖃᑦᑕᓕᕈᒪ, ᒫᓐᓇᓕ ᖁᕕᐊᒋᓕᑦᑕᒃᑲ ᐊᑐᖃᑕᓚᐅᔅᓯᒪᔭᒃᑲ.