ᓴᐃᕋ ᓴᒥᓴᒃ

ᐃᓚᒋᔭᐅᒍᒪᒐᒪ ᑖᔅᓱᒧᖓ ᐱᓕᕆᐊᒃᓴᒧᑦ ᐱᔾᔪᑎᒋᓪᓗᒍ ᐱᒻᒪᕆᐋᓗᒪᑦ ᐅᕙᓐᓄᑦ ᐃᖅᑲᐅᒪᒋᐊᖏᑕ ᐊᕐᓇᐃᑦ ᐊᒻᒪᓗ ᓂᕕᐋᔅᓯᐊᑦ ᐊᓯᐅᔨᔭᐅᓯᒪᔪᑦ ᐅᕝᕙᓘᓐᓃᑦ ᐃᓄᐋᑦᑕᐅᓯᒪᔪᑦ ᐱᔾᔪᑎᒋᓪᓗᒍ ᐊᓈᓇᒋᔭᐅᒻᒪᑕ, ᐊᔭᑯᓗᒋᔭᐅᓪᓗᑎᒃ, ᖃᑕᙳᑎᒋᔭᐅᓪᓗᑎᒃ ᐊᒻᒪᓗ ᐱᖃᓐᓇᕆᔭᐅᓪᓗᑎᒃ. ᐊᕐᓇᐅᓂᑦᑎᓐᓄᑦ, ᐸᖅᑭᖃᑦᑕᐅᑎᓲᖑᒐᑦᑕ, ᐃᑉᐱᒍᓱᑦᑐᖓᓗ ᑕᐃᒪᓐᓇᐃᓘᑐᔮᓐᓂᓐᓂᒃ ᐃᓚᒋᔭᐅᓂᓐᓄᑦ ᑖᔅᓱᒧᖓ ᐱᓕᕆᐊᒃᓴᒧᑦ.

ᓴᓇᓚᐅᕋᒪ ᐱᒡᒐᓇᖏᑦᑐᑯᓗᒻᒥᒃ ᐱᖅᑯᓯᒃᑯᑦ ᐊᐅᐸᒃᑐᒥᒃ ᓄᓇᕕᒃ ᐃᓄᒃᔪᐊᕐᒥ ᐊᒪᐅᑎᒋᔭᐅᓲᒥᒃ. ᐊᑯᓕᐅᑉ ᓴᓇᓯᒪᓂᖓ ᓴᓇᔭᐅᓚᐅᒻᒪᑦ ᐊᔅᓱᐋᓗᒃ ᐃᓱᒪᓪᓗᐊᒃᑳᓗᓐᓄᑦ ᐃᓄᐃᑦ ᐊᕐᓇᖏᓐᓄᑦ ᕿᒥᕐᕈᔭᐅᓪᓗᓂ ᑐᒃᑑᑉ ᖃᓂᖓᑕ ᖁᓛ, ᐊᑯᖓ, ᐊᒻᒪᓗ ᓴᓇᓯᒪᓂᖓ ᑕᐅᑦᑐᖃᓪᓗᓂ ᐊᑯᑎᑐᑦ.

ᓴᐃᕋ ᓴᒥᓴᒃᖑᕗᖓ, ᐊᒻᒪᓗ ᐃᓄᒡᔪᐊᖅ ᓄᓇᕕᒃᒥᐅᑕᓪᓗᖓ. 29−ᓂᒃ ᐅᑭᐅᖃᖅᑯᖓ ᑎᓴᒪᓂᒃ ᐸᓂᑦᑎᐋᕆᒃᑐᖓ. ᒥᔅᓱᖃᑦᑕᓕᑦᑐᖓ ᒥᔅᓵᓂ 15 ᐊᕐᕌᒍᓂ. ᐃᓕᓚᐅᔅᓯᒪᔪᖓ ᒥᔅᓱᕆᐋᔅᓴᖅ ᐊᓈᓇᔅᓯᐋᓐᓂᒃ, ᐊᓈᓇᒋᓂᕋᖃᑦᑕᓚᐅᑦᑕᓐᓂᒃ ᑎᒍᐋᑦᑖᕆᓚᐅᓂᒻᒪᖓ ᐃᓄᕋᑖᑦᑎᓪᓗᖓ. ᐱᖓᓱᓂᒃ ᐊᕐᓇᓂᒃ ᖃᑕᙳᑎᖃᒃᑐᖓ ᐊᒻᒪᓗ ᐊᑕᐅᓯᒻᒥᒃ ᐊᓂᖃᑦᑐᖓ. ᒥᔅᓱᖃᑦᑕᕆᐋᓕᓚᐅᔅᓯᒪᔪᖓ ᒍᕋᐃᑦ 4−ᒥᒃ ᐃᓕᓐᓂᐊᔅᓱᖓ, ᑭᓯᐊᓂ ᒥᔅᓱᖃᑦᑕᓚᕆᒋᐋᓯᓚᐅᔅᓯᒪᕗᖓ ᐃᓅᓱᑦᑑᓕᕋᑖᑦᓱᖓ ᐊᕐᕋᒍᖃᑦᓱᖓ. ᒥᔅᓱᑦᑎᐅᒍᒪᓚᐅᔅᓯᒪᒐᒪ ᑕᐅᑐᖃᑦᑕᑦᑐᒍ ᐊᓈᓇᑦᓯᐊᕋ/ᐊᓈᓇᒐ. ᐃᓄᐃᑦ ᐱᖅᑯᓯᖏᑎᒍ ᐊᓐᓄᕌᖏᑦ ᐱᐅᔪᐋᓗᒻᒪᑕ, ᓴᓇᒍᒪᔮᓗᑐᐃᓐᓇᕆᒐᒃᑭᑦ ᓴᓇᖃᑦᑕᒃᑲᓐᓂᕈᒪᑐᐃᓐᓇᑦᑐᒋᓪᓗ. ᐱᐅᒋᔮᓗᒐ ᐅᑭᐊᔅᓵᒃᑯᑦ ᓇᓪᓕᕉᑎᓂᖅ ᐱᔾᔪᑎᒋᓪᓗᒍ ᐱᕕᖃᓕᓐᓇᐅᓂᕆᒻᒪᒐ ᐊᕐᕌᒍᒥ ᑕᑯᖃᑦᑕᓕᑦᑐᑎᑦ ᐱᐅᔪᑎᐋᓗᓐᓂᒃ ᓄᑖᓂᒃ ᐱᖅᑯᓯᒃᑯᑦ ᐊᓐᓄᕌᓂᒃ ᑕᐃᒃᑯᓇᙵᑦ ᐊᓈᓇᑦᓯᐊᒃᑯᓐᓂᒃ, ᐊᓈᓇᒃᑯᓐᓂᒃ, ᐊᕐᓇᓂᒃ ᖃᑕᖑᑎᓂᒃ ᐊᒻᒪᓗ ᓂᕕᐊᔅᓯᐊᓂᒃ ᓴᓇᔭᐅᖃᑦᑕᑦᑐᒥᓂᓐᓂᒃ ᐊᒻᒪᓗ ᓄᑖᖑᓪᓗᑎᒃ ᐊᓐᓄᕌᓕᐊᖑᓯᒪᓂᖏᑦ.

ᐱᕈᑉᐸᓪᓕᐋᓪᓗᖓ, ᐱᒍᒪᓂᖃᑦᑎᐊᓚᐅᔅᓯᒪᒐᒪ ᐱᒪᓴᐃᓂᒻᒥᒃ ᐱᖅᑯᓯᒃᑯᑦ ᐊᒥᖁᑎᓂᒃ, ᐃᓕᓚᐅᔅᓯᒪᔭᓐᓂᒃ ᐊᓈᓇᑦᓯᐊᓂᒃ, ᐊᓈᓇᒪ ᐊᓈᓇᖓᓂᒃ: ᐋᓇ ᓴᒥᓴᒃ. ᐃᓕᓐᓂᐊᑦᑎᓚᐅᔅᓯᒪᒻᒪᖓ ᒥᔅᓱᓐᓂᒻᒥᒃ, ᐊᓯᖏᓐᓄᓪᓗᑦᑕᐅᖅ ᐃᓄᓐᓄᑦ ᓄᓇᖃᑎᓐᓄᑦ ᐱᖃᓐᓇᕆᔭᓐᓄᑦ ᐊᒻᒪᓗ ᐊᔭᑯᓗᓐᓄᑦ, ᐃᓘᓐᓇᓕᒫᖓᓄᑦ ᓄᓇᖃᑎᓐᓄᑦ. ᐅᐋᑦᑎᐋᕈᐋᓗᒃ ᐃᓄᓕᒫᑦ ᐃᓕᓐᓂᐊᑦᑎᖃᑦᑕᐅᑎᖃᑦᑕᓚᐅᔅᓯᒪᒻᒪᑕ ᐃᒻᒥᓐᓄᑦ ᒥᔅᓱᕆᐋᔅᓴᖅ. ᐅᓪᓗᒥᓕ ᐅᓄᓗᐋᕈᓐᓃᒻᒪᑕ ᐃᓄᐃᑦ ᐃᓕᓴᐃᒍᒪᔪᑦ ᐊᓯᒥᓐᓂᒃ ᖃᓄᖅ ᒥᔅᓱᕆᐋᔅᓴᖅ. ᓇᑯᔅᓴᑦᑐᖓ ᒪᒃᑯᑦᑑᑎᓪᓗᖓ ᓄᓇᓕᒥᐅᑕᓕᒫᑦ ᖃᐅᔨᔭᐅᑎᑦᑎᖃᑦᑕᓚᐅᒻᒪᑕ ᖃᐅᔨᒪᓂᒻᒥᓐᓂᒃ ᐅᕙᓐᓄᑦ.

ᑕᐃᔅᓱᒪᓂ ᒥᔅᓱᕆᐅᓕᑦᑎᓪᓗᖓ, ᐅᓄᑦᑐᐋᓗᐃᑦ ᐃᓄᐃᑦ ᐊᑐᑦᑕᐅᑎᑦᑎᖃᑦᑕᓚᐅᒻᒪᑕ ᐆᑦᑑᑎᒥᓐᓂᒃ, ᑭᓯᐊᓂ ᐅᓪᓗᒥᐅᓕᑦᑐᖅ ᐅᓄᓗᐋᕈᓐᓃᒻᒪᑕ ᐃᓄᐃᑦ ᐊᑐᑦᑕᐅᑎᑦᑎᒍᒪᔪᑦ ᐆᑦᑑᑎᒻᒥᓐᓂᒃ. ᑕᐃᒪᐃᒻᒪᑦ, ᓴᓇᖃᑦᑕᕆᐋᓕᓚᐅᑉᐳᖓ ᓇᒻᒥᓂᖅ ᐆᑦᑑᑎᓐᓂᒃ ᐊᒻᒪᓗ ᖃᐅᔨᓪᓗᖓ ᖃᓄᖅ ᐱᐅᓛᖑᓗᒋᑦ ᓴᓇᖃᑦᑕᕋᔅᓴᐅᒻᒪᖔᑕ ᑕᑯᒥᓇᖁᓪᓗᒋᑦ. ᐅᓪᓗᒥ, ᓇᒻᒥᓂᖅ ᐆᑦᑑᑎᓕᐅᖃᑦᑕᕈᓐᓇᔅᓯᔪᖓ ᑭᓱᑐᐃᓐᓇᓐᓂᒃ ᓴᓇᒍᒪᔭᓐᓂᒃ. ᓴᓇᖃᑦᑕᑦᑐᖓ ᐊᒥᓱᐋᓗᓐᓂᒃ ᖁᓕᑦᑕᐅᔭᓐᓂᒃ, ᐊᒪᑎᓂᒃ, ᖃᓪᓕᑉᐸᓂᒃ, ᐊᖑᓇᓱᐋᕈᑎᓂᒃ, ᓇᑦᑎᕋᔭᓐᓂᒃ ᑲᒥᑐᐃᓐᓇᓐᓂᒃ, ᓇᓄᕌᓐᓂᒃ ᖃᓪᓕᑉᐹᓐᓂᒃ, ᐳᐋᓗᓂᒃ ᐊᒻᒪᓗ ᑭᑦᑐᕆᐋᑦᑕᐅᒌᒃᑯᑎᓂᒃ ᔭᐃᑲᓐᓂᒃ. ᐃᓚᒋᔭᐅᓚᐅᒻᒥᔪᖓ ᒥᔅᓱᑦᑎᐅᖃᑕᐅᓪᓗᖓ ᑲᓇᑕ ᓂᕐᓕᒃ ᐱᓕᕆᐊᒃᓴ ᐊᑎᒋ 2.0.

ᖁᕕᐋᒋᓪᓚᕆᑦᑕᕋ ᒥᔅᓱᕆᐋᔅᓴᖅ ᐱᓗᐊᙳᐊᑦᑐᒥᒃ ᓴᓐᓇᑎᓕᑐᐋᕈᒃᑭᑦ ᕿᑐᙵᒃᑳ. ᐃᓕᓐᓂᐋᑎᒐᓱᐃᓐᓇᓲᒃᑲ ᕿᑐᙵᒃᑲ ᖃᓄᑐᐃᓐᓇᖅ ᐱᒍᓐᓇᓂᖏᓐᓂᒃ ᐃᓱᒪᓕᐅᕈᑎᒋᓯᒪᓕᑐᐋᕈᕕᐅᒃ. ᒥᔅᓵᓂᒐᓚᒃ 10 ᐊᕐᕌᒍᓂ, ᐃᖅᑲᓇᐃᔭᔅᓯᒪᓕᕋᒪ ᓄᓇᑦᑎᓐᓂ ᐸᐃᕆᕕᒻᒥ ᐊᒻᒪᓗ ᐃᓗᓐᓂᐊᑯᓐᓂ ᐃᓕᓴᐃᓗᖓ ᐃᓕᓐᓂᐋᕈᑎᓕᓐᓂᒃ ᐊᑕᐅᓯᒻᒥᒃ ᐊᒻᒪᓗ ᒪᕐᕉᓐᓂᒃ ᐃᓄᑦᑎᑐᑦ ᐃᓕᓴᕕᓐᓂ.

ᒫᓐᓇᕋᑖᖑᓚᐅᑦᑐᖅ ᐅᑐᐱᕆ 2021−ᒥ, ᐱᒋᐋᓚᐅᕋᒪ ᓇᒻᒥᓂᖅ ᓇᒻᒥᓂᖁᑎᓐᓂᒃ ᑕᐃᔭᐅᓲᒥᒃ ᓴᐃᕋ ᓴᒥᓴᒃ ᓴᓇᓯᒪᓂᓕᐅᓐᓂᒻᒥᒃ. ᐱᒋᐋᓚᐅᕋᒪ ᓇᒻᒥᓂᖅ ᓇᒻᒥᓂᖁᑎᓐᓂᒃ ᖃᐅᔨᑎᒍᒪᓪᓗᒋᑦ ᐸᓂᒃᑲ ᐊᔪᓐᓇᖏᓐᓂᖓᓂᒃ ᐱᓕᕆᒍᓐᓇᓐᓂᒻᒥᒃ ᖁᕕᐊᒋᔭᓐᓂᒃ ᐊᒻᒪᓗ ᐃᓕᓴᑎᓪᓗᒋᑦ ᖃᓄᖅ ᒥᔅᓱᕆᐋᔅᓴᖅ. ᐊᖓᔪᑦᑎᑉᐹᖁᑎᖓ ᐸᓂᒐ ᐃᓕᑉᐸᓪᓕᐋᓕᕇᑦᑐᖅ ᐅᕙᓐᓂᒃ. ᐃᓕᓐᓂᐋᓚᐅᔅᓯᒪᒐᒪ ᐱᒐᔅᓴᐅᑎᑕᐅᔪᒥᒃ ᑲᑎᕕᒃ ᐃᓕᓴᕐᓂᓕᕆᓂᒻᒥᒃ ᑕᐃᔭᐅᓲᒥᒃ “ᐱᒋᐊᑎᑦᑎᓂᖅ ᐃᕝᕕᑦ ᓇᒻᒥᓂᖁᑎᖓᓂᒃ.” ᐊᒥᓱᐋᓗᓐᓂᒃ ᐃᓕᑦᑎᓚᐅᑦᑐᖓ ᑕᐃᑲᓂ ᐃᓕᓐᓂᐊᓂᐅᔪᒥᒃ, ᑭᓯᐊᓂ ᐊᔅᓲᓂᔅᓴᖅ ᐃᓕᓐᓂᐊᒃᑲᓐᓂᕈᒪᔪᖓ, ᐊᒻᒪᓗ ᐊᐃᑉᐹᓂ ᐱᓕᕆᒋᐊᓂᕆᒍᒪᔭᒐ ᐱᖓᓱᓂᒃ−ᐊᕐᕌᒍᓂᒃ ᐊᓐᓄᕌᑦᑎᐊᕙᓐᓂᒃ ᓴᓇᓯᒪᓂᓕᐅᑦᑎᐅᓂᒻᒧᑦ ᐃᓕᓐᓂᐊᖁᑎᒥᒃ. ᑕᐃᒪᐃᒃᑲᓗᐊᑦᑎᓪᓗᒍ, ᐱᒐᔅᓴᐅᑎᑕᐅᖏᒻᒪᑦ ᐅᕙᖓ ᓄᓇᓕᖓᓂ. ᑕᐃᒪᐃᒻᒪᑦ ᓱᓕ ᐱᒋᐊᓚᐅᔅᓯᒪᙱᓚᕋ. ᐊᐅᓪᓚᕈᓐᓇᖏᓐᓇᒪ ᓱᓕ ᓄᓇᓕᓐᓂᒃ.