ᑕᒪᓐᓇ ᓅᑕᐅᑳᓪᓚᓐᓂᖏᑦ ᐱᒋᐊᙵᕐᓂᐅᓚᐅᖅᑐᖅ ᐊᔅᓱᕈᕐᓇᖅᑐᒥᑦ ᓱᖏᐅᑎᒐᓱᐊᕐᓂᕐᒥᑦ ᓗᐃᒧᑦ ᐊᒻᒪᓗ ᐃᓚᒋᔭᒥᓄᑦ. ᐊᔅᓱᕈᕐᔪᐊᓕᓚᐅᖅᓯᒪᔪᑦ ᓄᑖᖑᔪᒥᑦ ᐃᓅᓯᕆᓕᖅᑕᒥᓂ. “ᐃᓪᓗᑖᖅᑎᑕᐅᓚᐅᖅᓯᒪᔪᒍᑦ ᓴᓇᓯᒪᕙᒌᖅᑐᓂᑦ, ᑭᓯᐊᓂ ᐃᑭᐊᖅᑎᓕᖅᓱᖅᓯᒪᑦᑎᐊᓚᐅᙱᑦᑐᑦ, ᐊᒻᒪᓗ ᓱᕕᖅᑐᐊᓘᓪᓗᑎ. ᐸᓖᓯᒃᑯᑦ ᑐᖁᕋᐃᓚᐅᖅᓯᒪᔪᑦ ᕿᒧᔅᓯᐅᑎᑦᑎᓐᓂᒃ, ᐃᖏᕐᕋᔾᔪᑎᖃᕈᓐᓃᖅᑐᑕᓗ ᐊᖑᓇᓱᓐᓂᕐᒧᑦ. ᑮᓇᐅᔭᖅ ᑐᑭᓯᐅᒪᓚᐅᙱᑕᕗᑦ ᐅᕝᕙᓘᓐᓃᑦ ᖃᓄᖅ ᓂᐅᕕᕆᐊᖃᕐᒪᖔᑦ ᓂᕿᔅᓴᒥᑦ,” ᐅᓂᒃᑳᖅᑐᖅ. ᑕᒪᓐᓇ ᐅᓚᕕᓴᖅᑕᐅᓂᖏᑦ ᐱᖅᑯᓯᖓᑎᒍᑦ ᐊᔅᓱᕈᕐᓇᓚᐅᖅᑐᖅ, ᑭᓯᐊᓂ ᑕᐃᑲᓂᐅᓚᐅᖅᓯᒪᔪᖅ ᐅᔾᔨᕈᓱᓕᓚᐅᖅᓯᒪᔪᖅ ᓄᓇᓕᐅᑉ ᓴᙱᓐᓂᕆᔭᖓᓂ. ᐊᑖᑕᖓ, ᐊᖑᓇᓱᑦᑎᒻᒪᕆᒃ, ᐃᑲᔪᓚᐅᖅᓯᒪᔪᖅ ᓯᕗᓪᓕᖅᐹᒥᑦ ᕼᐋᒻᒪᓚᒃᑯᑦ ᑲᑎᒪᔨᑖᕐᖓᐅᑎᑎᓪᓗᒋᑦ, ᓯᕗᓪᓕᖅᐹᖑᓪᓗᓂ ᒪᐃᔭᒋᔭᐅᓕᓚᐅᖅᓯᒪᔪᖅ. “ᑕᐃᒫᖃᐃ ᐃᓄᓐᓄᑦ ᑐᕌᖓᓂᖅᓴᐅᓚᐅᖅᓯᒪᔪᖅ ᑕᐃᔅᓱᒪᓂ ᓇᒻᒥᓂᖅ ᐊᖅᑯᑎᔅᓴᑦᑎᓐᓂᒃ ᓴᓇᕙᓪᓕᐊᓚᐅᖅᓯᒪᒐᑦᑕ, ᓇᒻᒥᓂᖅ ᐃᓱᒪᓕᐅᖅᐸᑦᑐᑕ, ᐊᒻᒪᓗ ᐊᐅᓚᑦᑎᓪᓗᑕ ᖃᓄᐃᓕᐅᖅᑕᑦᑎᓐᓂᒃ. ᐃᓚᐅᖃᑦᑕᔪᔪᒍᑦ ᑭᓱᓕᒫᑦᑎᐊᓂᑦ. ᒫᓐᓇᐅᔪᖅ, ᓲᕐᓗ ᒐᕙᒪᓕᕆᔪᐊᓗᑐᐃᓐᓇᐃᑦ−ᓯᓚᑖᓂᙶᖅᑐᑦ ᐃᓱᒪᒋᔭᖏᓐᓂᒃ. ᐊᔾᔨᒋᙱᑦᑎᐊᓕᖅᑕᖓ.”

ᐊᔅᓱᕈᖃᑦᑕᓚᐅᖅᓯᒪᒐᓗᐊᖅᑎᓪᓗᒋᑦ, ᓗᐃ ᐃᓕᓐᓂᐊᕋᓱᓕᓚᐅᖅᓯᒪᔪᖅ. ᐃᓕᓐᓂᐊᕐᓂᖅ ᐱᒋᐊᓚᐅᖅᓯᒪᔪᖅ 8ᓂᒃ ᐊᕐᕌᒍᖃᖅᑎᓪᓗᒍ ᐸᓐᓂᖅᑑᒥ, ᑭᓯᐊᓂ ᐃᓕᓐᓂᐊᕐᕕᐊᓗᒻᒧᑦ, ᐃᖃᓗᓐᓂ ᐃᓕᓐᓂᐊᕆᐊᖃᓚᐅᖅᓯᒪᔪᖅ. “ᐊᔅᓱᕈᓐᓇᖃᑦᑕᓚᐅᖅᓯᒪᔪᖅ ᐃᓚᒋᔭᒃᑲ ᑕᑯᔪᓐᓇᕐᓇᒋᑦ ᐊᕐᕌᒍᓄᑦ ᐱᖓᓱᓄᑦ, ᑭᓯᐊᓂ ᑐᕌᒐᖃᓚᐅᖅᓯᒪᔪᖓ ᐃᑲᔪᕈᒪᓪᓗᒋᑦ ᐅᑎᖅᓯᒪᓕᕈᒪ,” ᓇᓗᓇᐃᔭᐃᔪᖅ. “ᐃᓚᒋᔭᒃᑲ ᒥᑭᔪᒥᑦ ᐃᓪᓗᒥᐅᖃᑎᒌᖑᓚᐅᖅᓯᒪᔪᑦ 12ᓂᒃ ᐃᓄᖃᖅᑐᑎᒃ−ᑕᓪᓕᒪᑦ ᐊᖑᑏᑦ, ᑕᓪᓕᒪᑦ ᐊᕐᓇᐃᑦ, ᐊᓈᓇᒃᑯᒃᑲᓗ. ᐃᓄᒋᐊᓚᐅᖅᓯᒪᔪᑦ, ᑭᓯᐊᓂ ᖃᓄᐃᓚᐅᖅᓯᒪᙱᑦᑐᖅ,” ᐃᖅᑲᐅᒪᕗᖅ.

ᒪᒥᓴᕈᒪᓪᓗᓂ ᓱᕈᓯᐅᓂᕐᒥᓂ ᐊᔅᓱᕈᓐᓇᖅᑐᒃᑰᕐᓂᕆᓚᐅᖅᑕᖓᓄᑦ, ᓗᐃ ᓴᙱᓂᖅᑖᓚᐅᖅᓯᒪᔪᖅ ᐅᑉᐱᕐᓂᒃᑯᑦ. “ᐊᔅᓱᕈᓐᓇᖅᑐᒃᑰᕐᓂᕋ ᓱᕈᓯᐅᓂᕆᔭᓐᓂᒃ ᓴᓇᓚᐅᖅᓯᒪᒻᒪᑦ−ᐃᒻᒥᓂ ᐊᓐᓇᐅᒪᑦᑎᑐᐃᓐᓇᓚᐅᕋᒪ, ᐃᓅᖃᑕᐅᓇᖓ. ᑭᓯᐊᓂ ᐃᖅᑲᐅᒪᐃᓐᓇᓚᐅᖅᑕᒃᑲ ᓂᖏᐅᕐᒪᑦ ᐅᖃᐅᓯᖏᑦ. ᐅᕙᓐᓂ ᐅᖃᐅᔾᔪᐃᖃᑦᑕᔪᒻᒪᑦ, “ᐱᐅᖏᑦᑐᒥᑦ ᐊᑐᕐᓂᕈᕕᑦ, ᐊᓂᒍᖅᓯᒪᔪᑦ ᐊᔅᓱᕉᑎᒋᙱᓪᓗᒋᑦ. ᒪᑭᑕᑐᐃᓐᓇᕆᑦ!’ ᐅᖃᐅᓯᖏᑦ ᐅᕙᓐᓃᖏᓐᓇᖅᑐᑦ,” ᐃᖅᑲᐅᒪᕗᖅ. “ᒪᑭᑕᓂᖅ ᐊᐅᓚᑦᑎᒋᐊᖃᕐᒪᑦ ᐊᒥᓱᓂᑦ: ᐃᑉᐱᒋᔭᕐᓂᒃ, ᐆᒪᑎᓐᓂ, ᑎᒥᓐᓂ, ᐊᒻᒪᓗ ᑕᕐᓂᓐᓂ.” ᑕᒪᓐᓇ ᐅᑉᐱᕐᓂᖓ ᐊᔪᕆᖅᓯᐅᔨᙳᕈᑎᒋᓚᐅᖅᓯᒪᔭᖓ, ᐊᒻᒪᓗ 1989ᒥ, ᓯᕗᓪᓕᖅᐹᖑᓚᐅᖅᓯᒪᔪᖅ ᐊᕐᓇᐅᓪᓗᓂ ᐃᓅᓪᓗᓂ ᐊᔪᕆᖅᓯᐅᔨᙳᖅᑐᓂ.

ᐊᖅᑯᑎ ᐊᔪᕐᓇᓚᐅᖅᓯᒪᔪᖅ, ᑭᓯᐊᓂ ᐊᔪᕆᖅᓯᐅᔨᐅᖁᔭᐅᓂᖓ ᓴᙱᓂᖅᓴᐅᓚᐅᖅᑐᖅ. “ᐃᓱᒪᐃᓐᓇᓚᐅᖅᑐᖓ, ᐊᕐᓇᐅᔪᖓ; ᓄᓇᕐᔪᐊᖅ ᐊᖑᑎᓯᐅᑕᐅᔪᖅ. ᐊᖏᖅᑕᐅᓯᒪᔾᔮᙱᑦᑐᖓ.’ ᑭᓯᐊᓂ ᐊᔪᕆᖅᓯᐅᔨᐅᖁᔭᐅᓂᖓ ᓴᙱᓗᐊᓚᐅᖅᑐᖅ ᓈᓚᒋᐊᖃᖅᑐᓂᒃ,” ᐅᖃᖅᑐᖅ. ᓗᐃ ᐃᓕᓐᓂᐊᓚᐅᖅᓯᒪᔪᖅ ᐊᕐᕌᒍᓂᑦ ᑎᓴᒪᓂᒃ ᑖᒃᑯᓇᓂ ᐅᑭᐅᖅᑕᖅᑐᒥ ᑐᔅᓯᐊᕐᕕᓕᕆᔨᒃᑯᑦ “ᐅᕙᖓᑐᐊᖅ ᐊᑕᐅᓯᕐᒧᑦ ᐊᕐᕌᒍᒧᑦ ᐆᑦᑐᕋᖅᑎᑕᐅᓚᐅᖅᓯᒪᔪᖓ−ᐊᖑᑏᓪᓕ ᑕᐃᒪᐃᑎᑕᐅᓚᐅᖅᓯᒪᙱᑦᑐᑦ. ᐊᑭᓕᖅᓱᖅᑕᐅᓂᕋ ᐊᕝᕙᓪᓗᐊᖓᓂᐅᓚᐅᖅᓯᒪᔪᖅ ᐊᖑᑏᑦ ᐊᑭᓕᖅᑕᐅᕙᑦᑕᖏᓐᓂᒃ,” ᐃᖅᑲᐅᒪᕗᖅ. ᑭᓯᐊᓂ, ᑲᔪᓰᓐᓇᕈᒪᓚᐅᖅᑐᖅ. “ᐅᕙᓐᓂᒃ ᐅᖃᐅᔾᔪᐃᓚᐅᖅᓯᒪᔪᖓ, ‘ᑕᒪᓐᓇ ᓱᕙᓕᑭᐊᖑᔪᖅ. ᐊᔪᕐᓇᓐᓂᐊᖅᑲᑦ, ᐆᑦᑐᖃᑕᐅᓚᐅᖅᑐᖓ.” ᐱᓕᕆᒍᒪᓂᖓ ᑐᕌᖓᓕᓚᐅᖅᓯᒪᔪᖅ ᐊᔪᐃᓐᓇᕆᐊᕐᓗᓂ ᑐᔅᓯᐊᕐᕕᓕᕆᔨᒃᑯᓐᓂᒃ ᐊᒻᒪᓗ ᐊᔪᐃᓐᓇᕆᐊᕐᓗᓂᓗ ᐊᐃᖕᓕᑲᓐᑯᑦ ᑐᔅᓯᐊᕐᕕᖓᓄᑦ ᐃᓐᒐᓕᓐᒥ. “ᐅᖃᐅᑎᓚᐅᖅᓯᒪᔭᒃᑲ, ‘ᑯᐃᓐᒋᔭᓯᒃ ᐊᕐᓇᐅᔪᖅ. ᑐᑭᓯᒐᔭᖅᑐᖅ.’ ᑕᒪᓐᓇ ᑭᖑᓪᓕᖅᐹᒥᑦ ᐅᖃᐅᓯᕆᓚᐅᖅᑕᕋ, ᑭᓯᐊᓂ ᐃᑲᔫᑎᖃᔪᔪᖅ. ᓇᓕᒧᑦᑐᒥᑦ ᐃᓕᓴᕆᔭᐅᓕᓚᐅᖅᓯᒪᔪᖓ,” ᐅᖃᖅᑐᖅ ᐅᐱᒍᓱᑦᑎᐊᖅᑐᓂ.

ᓇᒻᒥᓂ ᐃᓅᓯᕐᒥᓂ, ᓗᐃ ᖁᕕᐊᒋᔭᓕᒃ ᐊᒻᒪᓗ ᓴᐃᒪᓂᖃᖅᑐᖅ ᓄᓇᒥ ᐊᒻᒪᓗ ᓯᓚᒥ. “ᐊᔅᓱᕈᓐᓇᖅᑐᒃᑰᖅᑎᓪᓗᖓ, ᓄᓇᓕᐊᖃᑦᑕᖅᑐᖓ. ᒥᖅᓱᖃᑦᑕᖅᑐᖓ, ᖃᖅᑲᓄᑦ ᒪᔪᕋᖃᑦᑕᖅᑐᖓ, ᓱᕈᓰᑦ ᑎᓱᕋᖃᑎᒋᓲᒃᑲ, ᐊᒻᒪᓗ ᕿᒻᒥᒃᑲ ᐱᖃᑎᒋᓲᒃᑲ,” ᐅᖃᖅᑐᖅ. ᕿᒻᒥᖏᑦ, ᐱᕈᖅᓴᓚᐅᖅᑕᖏᑦ ᐊᔅᓱᕈᓐᓇᖅᑐᖅᓯᐅᓚᐅᖅᑎᓪᓗᒍ ᐊᓯᐅᔨᓂᕐᒥᑦ ᕿᒧᔅᓯᐅᑎᖏᓐᓂᒃ, ᐊᑲᐅᔪᒦᑎᑦᑎᓲᑦ ᐊᒻᒪᓗ ᒪᒥᓴᕈᑎᒋᓯᒪᔭᖏᑦ ᐃᓅᓯᕐᒥᓂ.

ᑕᑯᒋᐊᕐᓂᕐᒥᑦ ᐊᖅᑯᑎᒋᓯᒪᔭᒥᓂᒃ, ᓗᐃ ᓇᓗᓇᐃᖅᓯᔪᖅ ᑎᑭᐅᒪᑦᑎᐊᖅᓯᒪᔭᖓ ᑐᙵᓯᒪᐃᓐᓇᖅᑐᖅ ᐊᔅᓱᕈᓐᓇᖅᑐᖅᓯᐅᕐᓂᑰᒐᓗᐊᖅᑐᓂ ᐃᓱᒪᖅᓱᑎᑕᐅᒐᑎ ᓅᑕᐅᓯᒪᓂᖏᓐᓂᒃ ᐊᒻᒪᓗ ᐃᓕᖅᑯᓯᕆᔭᒥᓂᒃ ᐅᓚᕕᓴᖅᑕᐅᓂᖏᓐᓂᒃ. “ᐱᕈᖅᓴᖅᑕᐅᔪᒐᑦᑕ ᐊᒻᒪᓗ ᐃᓅᒋᐊᖃᓚᐅᕋᑦᑕ ᐊᓯᑦᑎᓐᓄᑦ ᐃᓱᒪᓕᐅᕈᔾᔭᐅᓪᓗᑕ−ᐃᓅᓯᕐᒥᑦ ᓇᓗᒋᔭᑦᑎᓐᓂᒃ, ᓴᖅᑭᕝᕕᐅᓪᓗᑕ ᐅᕙᖓ ᐅᖃᕈᓐᓇᖅᑕᖓᓂ ‘ᓯᐊᓛᕆᔭᐅᓪᓗᑕ ᐃᓱᒪᒃᑯᑦ,’” ᓇᓗᓇᐃᖅᓯᔪᖅ. ᑭᓯᐊᓂ, ᒪᓖᓐᓇᖅᓯᒪᔪᖅ ᐊᖅᑯᑎᒋᔭᒥᓂ. “ᐊᖏᓂᖅᓴᒥᑦ ᐅᓂᒃᑳᖅᑕᖃᖅᑐᖅ ᑖᔅᓱᒧᖓ. ᐅᕙᓐᓄᓕ, ᐅᑉᐱᕐᓂᖅ ᐃᑲᔫᑎᒋᓯᒪᒐᒃᑯ. ᑭᓇᑐᐃᓐᓇᖅ ᐅᑉᐱᕈᓱᙱᒃᑲᓗᐊᖅᑲ ᒎᑎᒥ, ᐅᑉᐱᕈᓱᓐᓂᕐᒥᑦ ᐃᓕᓐᓂᒃ ᐊᒻᒪᓗ ᑭᓱᒥᑦ ᐊᖏᓂᖅᓴᒥᑦ ᓴᐃᒪᓇᖅᑐᖅ, ᓴᙱᓂᖅᑖᕐᓇᖅᑐᖅ, ᐊᒻᒪᓗ ᑕᑯᑦᑎᐊᕐᓇᖅᑐᖅ ᐃᓅᓯᕐᒥᑦ. ᐅᑉᐱᕐᓂᓕᕆᓂᐅᖏᑦᑐᖅ; ᐅᑉᐱᕐᓂᖃᕐᓂᕐᒥᑦ ᐊᒻᒪᓗ ᑭᓱᒧᑦ ᐊᐅᓚᔾᔭᑦᑕᐅᓲᖑᒻᒪᖔᑦ ᐃᓗᓐᓂ. ᑖᓐᓇ ᐅᓂᒃᑳᕋ.”

ᓗᐃ ᒪᐃᒃ ᓇᒻᒥᓂᖅ ᐃᓅᓯᕐᒥᓂ ᐊᑐᖅᓯᒪᔭᖏᑦ ᑐᕌᕈᑎᒋᓯᒪᔭᖏᑦ ᐱᓕᕆᐊᕆᔭᖏᓐᓂᒃ ᐸᐅᒃᑑᑎᒃᑯᓐᓂ, ᐃᑲᔪᖃᑦᑕᖅᑐᖅ ᐊᒻᒪᓗ ᓴᙱᓂᖅᑖᖅᑎᑦᑎᕙᑦᑐᓂ ᐃᓅᖃᑎᒥᓂ.