Our Leaders

- Nikki Komaksiutiksak -

Nikki approved copy
735119162 nikki 2

Nikki Komaksiutiksak

ᐊᖓᔪᖄᒃ ᐊᒻᒪᓗ ᐊᖓᔪᖄᒃ ᐊᖓᔪᖃᐅᑎᓂᒃ ᐊᐅᓚᑦᑎᔨ

ᓂᑭ ᑯᒪᒃᓯᐅᑎᒃᓴᑦ ᓴᙱᔪᐊᓘᕗᖅ – ᑲᒪᓇᖅᑐᕐᔪᐊᖅ ᐃᓅᓪᓗᓂ ᐊᕐᓇᐅᓪᓗᓂ ᐃᒡᓗᓕᒑᕐᔪᒻᒥᙶᖅᑐᖅ, ᓄᓇᕗᒻᒥ, ᐊᑦᑐᐃᓂᕆᔭᖓ ᐅᖓᑖᓅᖓᕐᔪᐊᖅᑐᑦ ᓇᑭᙶᕐᓂᖓᓂ. ᐱᒋᐊᖅᑎᑦᓯᔨᐅᓪᓗᓂ ᐃᓚᒋᔭᐅᓪᓗᓂ ᐊᒻᒪᓗ ᐱᓕᕆᑦᓯᐊᖅᑐᖅ ᐊᐅᓚᑦᓯᔨᒻᒪᕆᒃ ᑖᑦᓱᒧᖓ ᑐᙵᓱᒋᑦ ᑎᒥᖁᑎᖏᑦ, ᑲᓇᑕᐅᑉ ᐱᖓᓐᓇᖓᓂ ᓯᕗᓪᓕᖅᐹᖅ ᐃᓄᓐᓄᑦ ᐃᑲᔫᑎᑦᓴᓄᑦ ᐅᐸᒐᖅ ᐅᐃᓂᐸᐃᒡ, ᒫᓇᑑᐸᒥᑦ, ᓂᑭ ᐊᖅᑯᓯᐅᖅᓯᒪᕗᖅ ᐃᓄᓐᓄᑦ ᑲᓲᒪᒍᒪᔪᓂᑦ ᐊᒻᒪᓗ ᐃᑲᔪᖅᑕᐅᒍᒪᔪᓂᑦ ᓄᓇᓕᐸᐅᔭᕐᓂᑦ. ᐅᐃᓂᐸᐃᒡ ᐊᖏᕐᕋᕆᓕᖅᑐᓂᐅᒃ, ᐃᓅᓂᖓ ᐱᓯᒪᐃᓐᓇᖅᑕᖓ ᐅᐱᒋᑦᑎᐊᖅᑐᓂᐅᒃ ᐊᒻᒪᓗ ᓴᙱᓂᒃᑯᑦ, ᐃᓕᖅᑯᓯᖓᑎᒍᑦ ᑭᓇᐅᓂᕐᒥᓂᒃ ᐱᓯᒪᑦᓯᓪᓗᓂ ᒪᑭᒪᑦᓯᐊᓯᓐᓈᑦ ᖃᓪᓗᓈᑦ ᓄᓇᖓᓂ ᑲᓇᑕᒥ.

ᑭᒡᒐᖅᑐᐃᔨᑦᑎᐊᕙᒃ ᓄᓇᓕᒻᒥᓄᑦ, ᓂᑭ ᐱᓕᕆᑦᓯᐊᖅᑐᖅ, ᐃᑉᐱᒋᔭᐅᑦᓯᐊᖅᑐᖅ ᐅᐃᓂᐸᐃᒡ ᐃᓄᖏᓐᓄᑦ. ᐊᑐᖃᑦᑕᖅᑐᖅ ᑐᑭᓯᐅᒪᑦᓯᐊᕐᓂᖓᓂ ᑕᒪᒃᑮᓐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᖃᓪᓗᓈᓂ ᐃᑲᔪᕐᓂᕐᒧᑦ ᐃᓅᖃᑎᒥᓂᒃ ᐊᑦᓱᕉᑕᐅᓲᓂᑦ ᓄᓇᓕᐸᐅᔭᕐᓂᒃ, ᐃᑉᐱᒍᓱᓐᓂᐊᕐᒪᑕ ᑕᑯᔭᐅᓂᕐᒥᓂ, ᐃᑲᔪᖅᑕᐅᓂᕐᒥᓂ, ᐊᒻᒪᓗ ᓴᙱᓂᖃᖅᑎᑕᐅᓂᕐᒥᓂ. ᐃᓕᖅᑯᓯᖓᓂ ᓴᖅᑭᔮᖅᑎᑦᓯᒍᒪᓂᖅ ᐃᑎᔫᕗᖅ – ᑲᑕᔾᔭᖅᑎᐅᔪᖅ, ᐃᓕᓐᓂᐊᖅᑎᑦᓯᔨᐅᔪᖅ ᐃᓄᐃᑦ ᐱᖅᑯᓯᑐᖃᖏᓐᓂᒃ ᐊᒻᒪᓗ ᐃᓕᖅᑯᓯᖓᓂ, ᐊᒻᒪᓗ ᐃᙱᖅᑎᐅᓪᓗᓂ. ᓴᓇᙳᐊᖅᑎᐅᓂᒃᑯᑦ ᐊᒻᒪᓗ ᖃᐅᔨᒪᑦᓯᐊᕐᓂᒃᑯᑦ, ᓂᑭ ᐊᑦᑐᖅᓯᓲᖅ ᑭᒃᑯᓕᒫᑦ ᐃᓅᓯᖏᓐᓂᒃ.

Making an Impact

ᐱᓕᕆᓂᑯᖏᑦ ᐃᓕᓴᕆᔭᐅᔪᒻᒪᕆᐅᓲᑦ, ᐃᓚᒋᓗᓂᐅᒃ ᐃᓕᓴᕆᔭᐅᑎᓪᓗᒍ 2023 ᐃᓄᒃ ᐊᕐᓇᖅ ᐊᕐᕌᒍᒥ ᑖᒃᑯᓄᖓ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ. ᓂᑭᐅᑉ ᐱᓕᕆᒍᒪᑦᓯᐊᕐᓂᖓ ᖁᕝᕙᑦᓴᐃᓂᕐᒥᑦ ᐃᓄᖁᑎᖏᓐᓂᒃ ᓄᓇᕐᔪᐊᓕᒫᒥᑦ ᓂᐅᕐᕈᕈᑎᒋᓯᒪᕚ, ᐅᓂᒃᑳᕐᓂᒃᑯᑦ, ᐃᙱᕐᓂᖏᒃᑯᑦ, ᐊᒻᒪᓗ ᐃᓕᓐᓂᐊᖅᑎᑦᓯᓂᕐᒥᑦ ᐊᓯᒻᒥᓂᒃ ᓴᙱᔪᒥᑦ ᐆᒪᑦᓯᐊᕆᑦᑐᒥᑦ ᐃᓄᐃᑦ ᐃᓕᖅᑯᓯᖓᓂ. ᑭᒡᒐᖅᑐᐃᓯᒪᕗᖅ ᒫᓇᑑᐸᒥᑦ ᐊᒻᒪᓗ ᐃᓄᐃᑦ ᓄᓇᓕᖓᓂ ᑲᑎᓐᓂᐅᓲᓂᑦ, ᓲᕐᓗ 2015 ᓄᓇᖃᖅᑳᖅᓯᒪᔪᑦ ᓂᔾᔭᐅᓯᔭᖅᑎᓄᑦ ᓵᓚᑦᓴᐅᓯᐊᓄᑦ ᐅᐃᓂᐸᐃᒡᒥᑦ, ᐊᒻᒪᓗ 28-ᓂᒃ ᐊᕐᕌᒍᓂᑦ ᓂᐱᓕᐅᕆᓯᒪᕗᖅ ᓂᔾᔭᐅᓯᓂᑦ ᐃᓚᖏᓐᓂᒃ ᑲᓇᑕᒥ ᐃᙱᖅᑎᒻᒪᕆᖏᓐᓂᒃ.

ᓂᑭᐅᑉ ᐊᑦᓱᕈᕐᓂᖏᑦ ᖁᙱᐊᖅᑕᐅᓂᕐᒧᑦ ᐅᖓᑖᓅᖓᕗᑦ. ᐃᓕᓴᐃᔨᐅᓪᓗᓂ ᓯᓚᑦᑐᖅᓴᕐᕕᔾᔪᐊᕐᒥᑦ ᒫᓂᑑᐸᒥ, ᑐᓴᖅᑎᑦᓯᓯᒪᔪᖅ ᖃᐅᔨᒪᔭᒥᓂᒃ ᐃᓄᐃᑦ ᐃᓕᖅᑯᓯᖓᓂ ᐊᒻᒪᓗ ᐃᓅᓯᖏᓐᓂᒃ ᐃᓕᓐᓂᐊᖅᑎᓂᑦ ᐊᒻᒪᓗ ᐃᓕᓴᐃᔨᓂᑦ, ᐳᐃᒍᖅᑕᐅᒍᓐᓇᙱᑦᑐᖅ ᑕᐃᒃᑯᓄᖓ ᐃᓕᓐᓂᐊᖅᑎᓯᒪᔭᒥᓂᒃ. ᐃᓕᓐᓂᐊᖅᑎᑦᓯᓯᒪᒻᒥᔪᖅ ᐊᒥᓱᓂᑦ ᐃᓕᓐᓂᐊᕐᕕᓐᓂᑦ ᒫᓇᑑᐸᒥᑦ, ᓂᐱᖓᓂ ᐊᑐᖅᓱᓂ ᐃᓕᓐᓂᐊᖅᑎᑦᓯᓂᕐᒥᑦ ᐃᓕᓐᓂᐊᖅᑎᓂᑦ ᐊᒻᒪᓗ ᐃᓕᓴᐃᔨᓂᑦ ᐊᑐᖅᑕᐅᓂᑯᓂᑦ ᐊᒻᒪᓗ ᐃᓕᖅᑯᓯᐅᑉ ᐱᒻᒪᕆᐅᓂᖓᓂ ᐃᓄᓐᓄᑦ.

735119206 img 8747

With Jose Francisco Cali Tzay the UN Human Rights Council Special Rapporteur on the rights of Indigenous Peoples from 2020 to December 2024

735119184 img 8744

Nikki’s Journey

ᓂᑭᐅᑉ ᐊᖅᑯᑎᖓ ᐊᑦᓱᕈᕐᓇᖅᑐᖅᓯᐅᖅᓯᒪᔪᖅ. ᐊᓈᓇᐅᓪᓗᓂ ᐊᒻᒪᓗ ᐊᓂᒍᐃᖃᑕᐅᓯᒪᓪᓗᓂ ᑭᖑᕚᕇᖑᔪᓄᑦ ᖁᐊᖅᓵᕐᓇᖅᑐᒃᑰᕐᓂᕐᒥᑦ, ᐊᑐᖅᑕᐅᓪᓗᐊᙱᑦᑐᓂᑦ ᐊᑐᖅᓯᒪᔪᖅ, ᐊᓯᐅᔨᓪᓗᓂᓗ ᓄᑲᕐᒥᓂ, ᐃᓄᐊᖅᑕᐅᓚᐅᖅᑐᖅ 17-ᓂᒃ ᐊᕐᕌᒍᖃᖅᓱᓂ ᐃᓄᓕᕆᔨᒃᑯᓐᓄᑦ ᐸᖅᑭᔭᐅᑎᓪᓗᒍ. ᑕᕝᕘᓇ ᐋᓐᓂᕐᓇᖅᑐᒃᑯᑦ, ᓂᑭ ᐱᓕᕆᒃᑲᓐᓂᕈᒪᓕᓚᐅᖅᑐᖅ ᐃᓄᐃᑦ ᐃᓕᖅᑯᓯᖓ, ᐊᑐᖅᓯᒪᔭᖏᑦ, ᐊᒻᒪᓗ ᐅᖃᐅᓯᖓ ᐃᖅᑲᐅᒪᔭᐅᓗᓂ, ᖁᕕᐊᓲᑕᐅᓗᓂ, ᐊᒻᒪᓗ ᐃᑉᐱᒋᔭᐅᑦᓯᐊᕐᓗᓂ ᑲᓇᑕᓕᒫᒧᑦ.

ᐅᓂᒃᑳᖓ ᐊᓂᒍᐃᑦᓯᐊᕈᓐᓇᖅᓯᓂᕐᒥᑦ, ᓴᙱᓂᕐᒥᑦ, ᐊᒻᒪᓗ ᓇᓪᓕᓐᓂᖃᕐᓂᕐᒧᑦ ᐃᓄᖁᑎᒥᓄᑦ. ᓂᑭ ᑯᒪᒃᓯᐅᑎᒃᓴᐅᑉ ᐱᓕᕆᓂᖓ ᒪᓕᒍᒥᓇᑦᓯᐊᖅᑐᖅ ᑭᒃᑯᓕᒫᓄᑦ – ᒪᒃᑯᑦᑐᑦ ᐊᒻᒪᓗ ᐃᓐᓇᐃᑦ – ᓴᙱᓂᐅᔪᒥᑦ ᐃᓕᖅᑯᓯᕐᒥᑦ ᐅᐱᒍᓱᓐᓂᕐᒥᑦ, ᓂᐱᖁᑎᒋᔭᐅᓂᕐᒥᑦ, ᐊᒻᒪᓗ ᐱᒻᒪᕆᐅᓂᖓᓂ ᓄᓇᓕᐅᖃᑎᒌᓐᓂᕐᒥᑦ. ᓂᐱᖓ, ᑐᑭᒧᐊᖅᑐᖅ ᐊᒻᒪᓗ ᓂᐱᖅᑯᖅᑐᔪᖅ, ᑲᔪᓯᓂᐊᖅᑐᖅ ᑐᓴᖅᑕᐅᓗᓂ ᐃᓄᐃᑦ ᑭᒃᑰᓂᖏᓐᓄᑦ ᐊᒻᒪᓗ ᓯᕗᓂᑦᓴᓕᐅᖅᑎᐊᕐᓗᓂ ᑭᖑᕚᕆᔭᐅᓛᖅᑐᓄᑦ.