ᐋᓐᓂᐊᖃᖏᓐᓂᖅ
ᐋᓐᓂᐊᓱᑦᑕᐅᕕᑦ ᐃᓄᐃᑦ ᐊᕐᓇᖏᓐᓄᑦ:
ᐱᓕᕆᒋᐊᓐᓂᖅ ᐱᓕᕆᔾᔪᑎᓕᐊᕆᓯᒪᔪᓂᒃ ᐱᓕᕆᐊᖃᕋᓱᒋᐊᕆᐊᖃᓐᓂᑦ
ᐃᓄᐃᑦ ᐊᕐᓇᖏᑦ ᓵᙵᔅᓯᒪᑕ ᐱᒻᒪᕆᐊᓗᓂᒃ ᐱᓕᕆᐊᕆᔭᐅᒐᓱᒋᐊᓕᓐᓂᒃ ᐃᓗᐊᓂ ᑲᓇᑕᐅᑉ ᐋᓐᓂᐊᓲᑦᑕᐅᕕᓐᓂ ᐱᓕᕆᔾᔪᑎᒧᑦ, ᑕᒪᒃᑯᐊᓗ ᐱᐅᙱᑎᑕᐅᓪᓗᑎᒃ ᐱᓕᕆᔾᔪᑎᓕᐊᕆᓯᒪᔪᒧᑦ ᐱᖁᔭᑎᒎᖏᑦᑐᓄᑦ ᐊᒻᒪᓗ ᐊᔾᔨᒋᔭᐅᑎᑕᐅᖏᓐᓂᒻᒧᑦ. ᐅᑯᓄᖓ 2017 ᑎᑭᓪᓗᒍ 2020−ᒧᑦ, ᐅᖓᑖᓂᑦᑐᑦ ᐊᕝᕙᖏᑕ (56.5%) ᐃᓄᐃᑦ ᐅᖃᔅᓯᒪᒻᒪᑕ ᑲᒪᒋᔭᐅᒍᑎᖃᖃᑦᑕᖏᓐᓂᕋᑦᑐᑎᒃ ᐊᑐᑦᑕᐅᓪᓗᐊᑕᓲᓂᒃ ᐋᓐᓂᐊᓱᑦᑕᐅᒍᑎᓂᒃ ᐱᔭᐅᑎᑦᑎᕙᑦᑐᓄᑦ. ᑖᓐᓇ ᐱᑕᖃᙱᓐᓂᖓ ᐱᔭᐅᒍᓐᓇᓂᖏᓐᓂᒃ ᐊᑐᑦᑕᐅᓪᓗᐊᑕᓲᓂᒃ ᐋᓐᓂᐊᓱᑦᑕᐅᓂᒻᒧᑦ ᐋᖅᑭᔅᓱᔅᓯᒪᓂᒻᒧᑦ ᐊᑐᕆᐊᖃᓕᑦᑎᓲᖑᒪᑕ ᐅᓄᑦᑐᓂᒃ ᐃᓄᐃᑦ ᐊᕐᓇᖏᓐᓂᒃ, ᓂᕕᐊᔅᓯᐊᓂᒃ, ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒌᔭᐅᖏᑦᑐᓂᒃ ᐃᒻᒥᓂᔅᓱᑦᑐᓂᒃ ᐊᐅᓪᓚᕆᐊᖃᓕᑦᑎᑕᐅᓪᓗᑎᒃ ᓄᓇᓕᖏᓐᓂᒃ ᐱᒋᐊᑦᑐᓪᓗᑎᒃ ᐊᑐᑦᑕᐅᓪᓗᐊᑕᓲᓂᒃ ᐋᓐᓂᐊᓱᑦᑕᐅᒍᑎᓂᒃ. ᐅᓄᑦᑐᑦ ᑎᑭᐅᑎᓲᖑᒻᒪᑕ ᐅᕕᓂᖃᑏᓐᓈᑦᑐᓄᑦ, ᐋᓐᓂᔅᓯᑦᑕᐅᓂᒻᒧᑦ, ᐊᒻᒪᓗ ᑕᐅᕗᖓᒃᑲᓐᓂᖅ ᐊᔾᔨᐅᙱᑎᑕᐅᖏᓐᓂᒻᒧᑦ ᐋᓐᓂᐊᓱᑕᐅᒍᒪᑎᓪᓗᒋᑦ ᐅᖓᓯᒋᔭᖏᓐᓃᑦᑐᒧᑦ ᐊᖏᕐᕈᖏᑕ. ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐃᑲᔪᔅᓱᐃᒻᒪᑕ ᑕᐃᒫᓪᓗᐊᖃᑎᒌᑦᑎᑦᑎᓂᒻᒥᒃ ᐋᓐᓂᐊᓱᑦᑕᐅᓂᒻᒧᑦ ᐱᔨᔅᓯᕈᑎᓄᑦ ᑕᐃᒃᑯᐊᓗ ᐃᑉᐱᒍᓱᑦᑎᐊᕆᐊᖃᑦᑐᑎᒃ ᐊᒻᒪᓗ ᐊᑐᓪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪᓗ ᐱᓕᕆᒍᓯᖏᓐᓂᒃ.
ᓯᕗᓪᓕᐅᑎᒋᐊᖃᑦᑎᑦᑎᕕᒋᔭᕗᑦ
ᐊᑭᕋᑦᑐᓐᓂᖅ−ᓄᓇᖃᖅᑳᖅᓯᒪᔪᓂᒃ ᐅᕕᓂᖃᑏᓐᓇᑦᑐᑦ ᐋᓐᓂᐊᓱᑦᑕᐅᓂᒻᒥ
ᐸᐅᒃᑑᑎᒃᑯᑦ ᐱᓕᕆᒍᒪᒻᒪᑕ ᐱᓕᕆᐊᖃᕈᒪᓪᓗᑎᒃ ᐊᑭᕋᑦᑐᓐᓂᒻᒥᒃ−ᓄᓇᖃᖅᑳᖅᓯᒪᔪᓂᒃ ᐅᕕᓂᖃᑏᓐᓇᑦᑐᓂᒃ ᐃᓗᐊᓂ ᐃᓅᓕᓴᐅᑎᓕᕆᒍᑎᐅᑉ. ᑖᓐᓇ ᐱᖃᓯᐅᔾᔨᒻᒪᑦ ᐋᖅᑭᔅᓯᒐᓱᐊᓐᓂᒻᒥᒃ ᐱᖁᔭᑦᑎᒎᖏᓐᓂᒻᒥᒃ ᓲᕐᓗ ᒪᑯᓂᖓ ᓯᕘᕋᓵᕆᓂᖅ ᓇᔾᔨᒍᓐᓇᐃᓕᑎᑦᑎᓂᒻᒥᒃ ᐊᒻᒪᓗ ᐃᓅᓕᓴᐅᑎᑎᒍ ᐋᓐᓂᔅᓯᕆᓂᒻᒥᒃ. ᐊᔪᐃᓐᓈᖃᓐᓂᖅ ᐃᓄᐃᑦ ᐊᕐᓇᖏᓐᓂᒃ ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒌᔭᐅᖏᑦᑐᓂᒃ ᐃᒻᒥᓂᔅᓴᑦᑐᓂᒃ ᐊᐅᓪᓚᖁᓪᓗᒋᑦ ᓄᓇᓕᖏᓐᓂᒃ ᐊᑐᑦᑕᐅᓪᓗᐊᑕᓲᓄᑦ ᐋᓐᓂᐊᓱᑦᑕᐅᓂᒻᒥ ᑕᒫᓂᒥᐅᑕᕈᓐᓂᑯᓄᑦ ᐱᓕᕆᒍᓯᐅᒻᒪᑦ ᐊᒫᖃᓪᓗᓂ ᐅᕕᓂᖃᑏᓐᓇᑦᑐᓂᒃ ᐊᑐᑦᑕᐅᓕᑦᑎᑦᑎᓪᓗᓂ ᐋᓐᓂᔅᓯᕆᓂᒻᒥᒃ ᓲᓪᓗ ᓯᕘᕋᓵᕆᓪᓗᑎᒃ ᓇᔾᔨᒍᓐᓇᐃᓕᑎᑦᑎᑕᐅᒍᓐᓇᓂᖓᓂᒃ. ᐃᓕᓐᓂᐊᑦᑎᑦᑎᒋᐊᖃᕋᑦᑕ ᑲᓇᑕᒥᐅᑕᓐᓂᒃ ᐊᒻᒪᓗ ᒐᕙᒪᒃᑯᓐᓂᒃ ᑕᒪᒃᑯᓂᖓ ᐱᓕᕆᖔᓕᖃᑦᑕᓐᓂᖏᓐᓂᒃ ᐊᐅᓚᑦᑎᖔᕈᒪᓂᒻᒥᓄᑦ, ᐋᓐᓂᔅᓯᕆᓂᖅ, ᐊᒻᒪᓗ ᐋᓐᓂᐊᖃᖏᓐᓂᒻᒥᒃ. ᐱᒍᓐᓇᑦᑎᑕᐅᖏᓐᓂᖅ ᐊᑐᑦᑕᐅᓪᓗᐊᑕᓲᓂᒃ ᐱᔨᔅᓯᕈᑎᓂᒃ ᐋᓐᓂᔅᓯᕆᒻᒪᑦ ᐃᓄᐃᑦ ᐊᕐᓇᖏᓐᓂᒃ, ᓂᕕᐊᔅᓯᐊᖏᓐᓂᒃ, ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒌᔭᐅᖏᑦᑐᓂᒃ ᐃᒻᒥᓂᔅᓱᑦᑐᓂᒃ.
ᐊᔾᔨᒋᔭᐅᑎᑕᐅᓂᖅ ᐱᒍᓐᓇᓐᓂᒻᒥᒃ ᐃᓕᖅᑯᓯᒃᑯᑦ ᐊᑦᑕᓴᖏᑦᑐᓂᒃ ᐱᔨᔅᓯᕈᑎᓂᒃ
ᐱᒍᓐᓇᓐᓂᖅ ᐊᔾᔨᒋᔭᐅᑎᑕᐅᒍᓐᓇᓂᒻᒥᒃ, ᐃᓕᖅᑯᓯᒃᑯᑦ ᐊᑦᑕᓐᓇᖏᑦᑐᒥᒃ ᐋᓐᓂᐊᓱᑦᑕᐅᒍᑎᓂᒃ ᐊᔪᖏᓐᓂᑉᐹ. ᐱᓕᕆᒍᒪᒐᑦᑕ ᐃᑲᔪᔅᓱᐃᒍᒪᓪᓗᑕ ᐱᐅᓂᔅᓴᐅᓕᑦᑎᑕᐅᓂᖏᓐᓂᒃ ᐳᒍᓐᓇᓂᐅᑉ ᐃᓕᖅᑯᓯᒥ ᑐᓴᐅᒪᑎᑕᐅᓗ ᐋᓐᓂᐊᓯᐅᕆᒍᑎᓂᒃ ᐊᒻᒪᓗ ᐱᓕᕆᐊᖃᓐᓂᒻᒥᒃ ᐊᖏᑦᑕᐅᖏᓐᓂᖅ ᐋᓐᓂᐊᓱᑦᑕᐅᒍᑎᒋᔭᐅᓪᓗᐊᑕᓲᓂᒃ ᐃᓘᓐᓇᖓᓂ ᐃᓄᐃᑦ ᓄᓇᖓᓂ. ᐃᓄᐃᑦ ᓂᐱᖏᑦ ᐃᓚᓕᐅᑎᓯᒪᒻᒪᑕ ᐋᓐᓂᐊᓱᕆᓂᒻᒧᑦ ᐊᑐᐊᒐᓂᒃ ᐅᖃᖃᑎᒌᒍᑎᖃᓂᓐᓄᑦ. ᐱᓕᕆᐊᖃᓪᓗᐊᑕᓐᓂᒻᒥᒃ ᐃᓄᓐᓂᒃ−ᓯᕗᓕᑦᑕᐅᔪᓂᒃ ᐋᓐᓂᐊᓱᕆᓂᒻᒥᒃ ᐱᒋᐊᑦᑎᑦᑎᓂᐅᔪᓂᒃ, ᐱᓕᕆᒍᒪᑦᑎᐊᕋᑦᑕ ᓴᖅᑭᑦᑎᑦᑎᒍᒪᓪᓗᑕ ᐱᓕᕆᔾᔪᑎᒥᒃ ᑕᐃᒃᑯᓂᖓ ᐃᑉᐱᒍᓱᑦᑎᐊᑦᑐᓂᒃ ᐊᒻᒪᓗ ᐃᑲᔪᑦᑐᓂᒃ ᐋᓐᓂᐊᓱᕆᓂᒻᒥᒃ ᐱᔭᐅᒋᐊᓕᓐᓂᒃ ᓄᓇᓕᑦᑎᓐᓄᑦ.
ᐆᒻᒪᕈᕆᐊᑦᑎᓪᓗᒋᑦ ᐃᓄᐃᑦ ᐃᕐᓂᓱᔅᓰᒍᓯᖏᑦ
ᐆᒻᒪᕈᕆᐊᑦᑎᓪᓗᒋᑦ ᐃᓄᐃᑦ ᐃᕐᓂᓱᔅᓰᒍᓯᖏᑦ ᐱᕕᖃᑦᑎᑦᑎᒻᒪᑕ ᐃᓄᐃᑦ ᐊᕐᓇᖏᓐᓂᒃ ᐃᕐᓂᖃᑦᑕᕋᔭᓐᓂᖏᓐᓂᒃ ᓄᓇᓕᖏᓐᓃᓪᓗᑎᒃ, ᖃᓂᔅᓴᓗᑎᒃ ᐃᓚᒥᓐᓂᒃ, ᐃᓕᖅᑯᓯᖏᓐᓂᒃ, ᐊᒻᒪᓗ ᓄᓇᒥᒃ. ᐊᑐᓕᑦᑎᑦᑎᑲᓐᓂᕈᒪᒐᑦᑕ ᐱᖅᑯᓯᒃᑯᑦ ᐃᕐᓂᓱᔅᓰᓂᐅᑉ ᐱᓕᕆᒍᓯᖏᓐᓂᒃ ᐃᓚᓕᐅᑎᓗᑎᒍ ᐅᓪᓗᒥᐅᓕᑦᑐᖅ ᐃᕐᓂᓱᔅᓰᓂᒻᒧᑦ ᐱᓕᕆᒍᑏᑦ. ᐲᕆᐊᖃᕋᑦᑎᒍ ᑕᒫᓂᒥᐅᑕᕈᔅᓯᒪᔪᓄᑦ ᒪᓕᑦᑕᐅᒋᐊᓕᑦ ᐊᐳᑦᑕᕈᑏᑦ ᑕᐃᒃᑯᐊ ᐊᑐᑦᑕᐅᑎᑦᑎᒍᓐᓇᖏᑦᑐᑦ ᐃᓄᐃᑦ ᐃᕐᓂᓱᔅᓰᒍᓯᖏᓐᓂᒃ ᐱᓕᕆᖃᑦᑕᓐᓂᖏᓐᓂᒃ ᐊᒻᒪᓗ ᐱᕙᓪᓕᐊᑎᑕᐅᓗᑎᒃ ᐃᓄᓐᓅᖓᔪᑦ ᐃᓕᓴᑎᑦᑎᒍᓰᑦ ᐊᒻᒪᓗ ᐊᔪᕈᓐᓃᔅᓴᑎᑦᑎᒍᓰᑦ ᐃᓕᓴᑦᑎᑦᑎᒍᑎᖏᑦ. ᐱᒻᒪᕆᐊᓗᒻᒪᑦ ᐊᑐᓕᑦᑎᒃᑲᓐᓂᕈᑦᑎᒍ ᐊᐅᓚᑦᑎᓂᖃᕈᓐᓇᔅᓯᓂᖏᑦ ᐃᓚᒌᑦ, ᐱᕕᖃᓕᑦᑎᑕᐅᓗᑎᒃ ᐃᓄᐃᑦ ᐊᕐᓇᖏᑦ ᓂᕈᖃᕈᓐᓇᓐᓂᒻᒥᒃ ᐃᓕᖅᑯᓯᒃᑯᑦ ᐋᖅᑭᑦᑎᐊᔅᓯᒪᔪᑦ ᐸᖅᑭᔅᓯᓃᑦ ᐊᒻᒪᓗ ᐊᑐᑦᑕᐅᖏᓪᓗᓂ ᖁᐊᔅᓲᔅᓯᒪᓂᖅ ᐊᕕᑎᑕᐅᓯᒪᓂᒻᒥᒃ ᐊᒻᒪᓗ ᐅᐸᑦᑕᐅᑦᑕᐃᓕᑎᑕᐅᓂᒻᒥᒃ ᐃᓕᓴᓐᓇᖏᑦᑐᒥ ᐋᓐᓂᐊᓱᑦᑕᐅᕕᒻᒥ.
ᐱᒍᓐᓇᓐᓂᖅ ᐃᓐᓂᓱᔅᓰᓂᒻᒧᑦ ᐱᔨᔅᓯᕈᑎᓂᒃ ᕿᑐᙱᐅᓐᓂᒻᒧᑦ ᐋᓐᓂᐊᖃᑦᑕᐃᓕᒪᓂᒻᒧᑦ ᐱᔪᓐᓇᐅᑎᐅᒻᒪᑦ
ᐅᑎᓐᓂᖓ ᐋᖅᑭᐅᒪᑏᓐᓇᒐᔅᓴᐅᑉ ᐊᒻᒪᓗ ᐱᖅᑯᓯᖏᑕ ᐃᓄᐃᑦ ᐱᓕᕆᒍᓯᖏᑦ ᐊᒻᒪᓗ ᐃᓕᓐᓂᐊᓐᓂᒧᑦ ᐃᓕᓴᒍᑎᑦ ᐃᓚᒋᔭᐅᒻᒪᑕ ᐸᐅᒃᑑᑎᒃᑯᑦ ᓯᕗᓪᓕᐅᑎᒍᒪᓂᑉᐸᖏᓐᓄᑦ.
