ᑎᓐᒫᒃ ᐊᒻᒪᓗ ᑲᓛᑦᖡᑦ ᓄᓈᑦ ᒐᕙᒪᒃᑯᖏᑦ ᒪᒥᐊᑦᑐᑦ ᐃᓄᖕᓄᑦ ᐊᕐᓇᓄᑦ ᐋᓐᓂᐊᕕᖕᓂ ᐱᑦᑎᐊᖅᑕᐅᓯᒪᓐᖏᑦᑐᓄᑦ

ᐋᑐᕚ, ᐋᓐᑎᐅᕆᐅ – ᓯᑎᐱᕆ 26, 2025 — ᑕᒪᑐᒪᓂ ᐱᓇᓱᐊᕈᓯᒥᒃ, ᐃᓄᐃᑦ ᐊᕐᓇᐃᑦ ᑲᓛᑦᖡᑦ ᓄᓈᓐᓂ ᒪᒥᐊᕝᕕᐅᕗᑦ ᑎᓐᒫᒃ ᐊᒻᒪᓗ ᑲᓛᑦᖡᑦ ᓄᓈᑦ ᒐᕙᒪᒃᑯᖏᓐᓄᑦ ᐊᔭᐅᖅᑕᐅᓯᒪᓚᐅᕐᓂᖏᓐᓄᑦ ᕿᑐᕐᖓᖅᑖᕈᓐᓇᐃᒍᑎᓕᖅᑕᐅᓯᒪᓪᓗᑎᒃ ᐊᕐᓇᐃᑦ ᐊᒻᒪᓗ ᓂᕕᐊᖅᓵᑦ 1960ᓂ ᑎᑭᓪᓗᒍ 1990ᓂ.

ᐅᓇ ᒪᒥᐊᓐᓂᖅ, ᐱᓕᕆᐊᖑᓚᐅᖅᑐᖅ ᓅᒃ, ᑲᓛᑦᖡᑦ ᓄᓈᓐᓂ ᓯᑎᐱᕆ 24, 2025,  ᓴᖅᑭᖅᑐᖅ ᐅᓂᒃᑳᖅ ᓴᖅᑭᑕᐅᖅᑲᒻᒥᐅᑎᓪᓗᒍᑦ ᑕᒪᑐᒪᓂ ᖁᓛᓂ ᑕᕿᒥ ᐅᖓᑖᓂ 400 ᐃᓄᐃᑦ ᐊᕐᓇᐃᑦ ᓇᓗᓇᐃᑦᑎᐊᖅᓯᒪᓪᓗᑎᑦ ᐋᓐᓂᐊᕕᖕᓂᑦ ᐱᑦᑎᐊᖅᑕᐅᓯᒪᓐᖏᓂᕐᒥᒃ, ᐱᒋᐊᖅᑎᑦᑎᓯᒪᑎᓪᓗᒋᓪᓗᒃ ᑲᓛᑦᖡᑦ ᓄᓈᑦᑕ ᐃᓄᐃᑦ ᐊᕐᓇᐃᑦ ᐃᖅᑲᖅᑐᖅᑕᐅᑎᑦᑎᓂᕐᒥᒃ ᒐᕙᒪᐅᔪᓂᒃ 2024-ᒥ.

ᓘᒃᑖᑦ ᐃᓕᓯᖃᑦᑕᖅᓯᒪᔪᑦ ᐃᓄᖕᓄᑦ ᐊᕐᓇᓄᑦ ᐊᒻᒪᓗ ᓂᕕᐊᖅᓵᓄᑦ, ᐃᓚᖏᑦ 12-ᓂᒃ ᐅᑭᐅᓕᓐᓂᒃ, ᑕᒪᒃᑯᓂᖓ ᕿᑐᕐᖓᖅᑖᖅᑕᐃᓕᒍᑎᓂᒃ ᖃᐅᔨᓐᖏᑎᓪᓗᒋᑦ ᐅᕝᕙᓘᓐᓃᑦ ᐊᖏᒍᓐᓇᑎᑕᐅᓯᒪᓇᑎᒃ, ᒐᕙᒪᒃᑯᑦ-ᐊᖏᖅᓯᒪᔭᖏᑦ ᐃᓄᒋᐊᒃᓯᓗᐊᖅᑕᐃᓕᑎᑦᑎᓂᕐᒥᑦ ᐃᓄᖕᓂᒃ ᑕᐃᔅᓱᒪᓂ ᑲᓛᖡᑦ ᓄᓈᑦ ᑎᓐᒫᒃᑯᓄᑦ ᑲᒪᒋᔭᐅᕙᑦᑎᓗᒍᑦ.

“ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᓇᖏᖃᑎᒋᕙᑦ ᑲᓛᑦᖡᑦ ᓄᓈᓐᓂ ᐃᓄᐃᑦ ᐊᕐᓇᐃᑦ ᐊᒻᒪᓗ ᑐᓂᕙᑦ ᓴᖕᖏᓂᕐᒥᒃ ᐊᒻᒪᓗ ᒪᒥᓴᐅᑎᒃᓴᓂᒃ ᒪᒥᐊᕝᕕᐅᓯᒪᓂᖏᓐᓂᒃ ᐊᒻᒪᓗ ᐊᓂᒍᐃᒐᓱᐊᓂᐊᓕᖅᑎᓪᓗᒋᑦ ᐊᒥᓱᒃᑯᑦ ᐊᕐᕌᒍᓄᑦ ᐊᓐᓂᐊᕕᖕᓂ ᓱᒃᑯᓴᖅᑕᐅᖃᑦᑕᖅᑐᕕᓂᐅᑎᓪᓗᒋᑦ ᐊᒻᒪᓗ ᐃᓅᓐᖏᑦᑐᑎᑐᑦ ᑲᒪᒋᔭᐅᓯᒪᑎᓪᓗᒋᑦ,” ᐅᖃᖅᑐᖅ ᓂᑭ ᑯᒪᒃᓯᐅᑎᒃᓴᖅ, ᐊᖓᔪᖅᑳᖅ ᐊᒻᒪᓗ ᑐᑭᒧᐊᒃᑎᑦᑎᔨᒻᒪᕆᒃ ᐸᐅᒃᑑᑎᒃᑯᓄᑦ.

“ᐃᓄᐃᑦ ᐊᕐᓇᐃᑦ ᐊᒻᒪᓗ ᖃᓄᐃᑦᑑᓂᕐᒥᓂᒃ ᐃᓱᒪᖅᓲᑎᔪᑦ ᐃᓄᐃᑦ ᐱᔪᓐᓇᐅᑎᖃᕐᒪᑕ ᑐᓴᖅᑎᑕᐅᔭᕆᐊᖃᖅᖢᑎᒃ ᐊᖏᖅᓯᒪᔭᕆᐊᖃᖅᖢᑎᒃ ᐊᒻᒪᓗ ᓇᖕᒥᓂ ᐱᔪᓐᓇᐅᑎᖃᕐᒪᑕ ᐃᓱᒪᓕᐅᕆᔪᓐᓇᖅᖢᑎᒃ ᐃᓅᓯᕐᒥᖕᓂᒃ, ᑎᒥᒥᖕᓂᒃ, ᖃᖓ ᐊᑐᕆᐊᒃᓴᖅ ᓯᖓᐃᑦᑕᐃᓕᔾᔪᑎᒃᓴᓂᒃ, ᐊᒻᒪᓗ ᖃᖓᒃᑯᑦ ᓯᖓᐃᔪᓐᓇᕐᓂᕐᒥᒃ. ᐃᓄᐃᑦ ᐃᓅᓯᕐᒧᑦ ᐱᔪᓐᓇᐅᑎᖏᑦ ᓴᐳᒻᒥᔭᐅᔭᕆᐊᓕᑦ, ᐃᑲᔪᖅᑕᐅᑦᑎᐊᖏᓐᓇᖃᑦᑕᕐᓗᑎᒃ, ᐊᒻᒪᓗ ᓴᐳᑎᔭᐅᓯᒪᓗᑎᒃ.”

ᐸᐅᒃᑑᑎᑦ ᐃᓕᓴᖅᓯᔪᑦ ᑲᔪᓯᔪᒃᑯᑦ ᕿᓚᒃᑕᐅᔪᖃᕙᖕᒪᑦ ᐊᒻᒪᓗ ᓯᖓᐃᔪᓐᓇᐃᓕᑎᑕᐅᔪᖃᕙᖕᒪᑦ ᓄᓇᖅᑲᖅᑳᖅᓯᒪᔪᑦ ᐊᕐᓇᓂᑦ ᑲᓇᑕᒥ. ᑲᔪᓯᓂᐊᖅᑐᒍᑦ ᐱᒻᒪᕆᐅᑎᑕᐅᖁᔾᓗᒋᑦ ᐱᔪᓐᓇᐅᑎᖏᑦ ᐊᒻᒪᓗ ᓯᕗᓪᓕᐅᑎᔭᐅᖁᔭᖏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᒻᒪᓗ ᑐᓴᖅᑕᐅᒐᓱᐊᖏᓐᓇᓗᑕ ᐋᓐᓂᐊᕕᖕᒥ ᐱᓇᓱᐊᖅᑎᓄᑦ ᐊᒻᒪᓗ ᒐᕙᒪᒃᑯᓄᑦ ᐊᑐᓕᖅᑎᑦᑎᖁᓪᓗᒋᑦ ᓴᖕᖏᓂᖅᓴᓂᒃ ᓇᑉᐸᕆᐊᓕᖕᓂᒃ ᑕᐃᒪᓗ ᐃᓄᐃᑦ ᐊᒻᒪᓗ ᓄᓇᖅᑲᖅᑳᖅᓯᒪᔪᑦ ᐊᕐᓇᐃᑦ ᐃᓱᒪᓕᐅᕆᔪᓐᓇᑦᑎᐊᕐᓂᐊᕐᒪᑕ ᐱᔪᒪᔭᒥᖕᓂᒃ ᓇᖕᒥᓂ ᐃᓅᓯᕐᒥᖕᓄᑦ ᐊᒻᒪᓗ ᖃᓄᐃᖏᑦᑎᐊᕈᑎᒃᓴᒥᖕᓄᑦ. ᓂᕆᐅᒃᐳᒍᑦ ᐅᓇ ᐊᖏᖅᑕᐅᖁᓪᓗᒍ ᑐᒃᓯᕋᖅᑕᐅᔪᑦ ᐋᕿᒋᐊᕆᐊᓕᑦ ᑲᓇᑕ ᐱᕋᔭᒃᓯᒪᔪᓄᑦ ᒪᓕᒐᖅ ᑕᐃᒪᓗ ᐱᕋᔭᖕᓂᖑᖅᑎᑕᐅᓗᓂ ᐊᒻᒪᓗ ᐊᔭᐅᖅᑕᐅᖃᑦᑕᖁᓇᒋᑦ ᕿᑐᕐᖓᖅᑖᕈᓐᓇᐃᓕᑎᑕᐅᓗᑎᒃ ᖃᐅᔨᑎᓐᓇᑎᒃ ᑲᓇᑕᒥ.

ᑐᑭᓯᑎᑕᐅᒃᑲᓐᓂᕈᓐᓇᖅᑐᑎᑦ ᒪᒥᐊᔾᔪᑕᐅᔪᓂᒃ ᐃᓄᖕᓄᑦ ᐊᕐᓇᓄᑦ ᑲᓛᑦᖡᑦ ᓄᓈᓐᓂ, ᐅᓇ ᒪᑐᕐᓗᒍ Markering af undskyldning i spiralsagen og drøftelser om en forsoningsfond – Statsministeriet

ᐅᖃᓕᒫᕈᓐᓇᖅᑐᑎᑦ ᖃᐅᔨᓴᕐᓂᐅᑉ ᑎᑎᖅᑲᑯᑎᖓᓂ ᓯᖓᐃᓕᒃᑕᐃᓕᑎᑕᐅᓂᕐᒥᒃ ᑲᓛᑦᖡᑦ ᓄᓈᓐᓂ, ᐅᓇ ᒪᑐᐃᕐᓗᒍ:

Modtagelse og offentliggørelse af den uvildige udredning af spiralsagen | Indenrigs- og Sundhedsministeriet

Spiralilersuisimaneq pillugu arlaannaannulluunniit attuumassuteqanngitsumik misissuinermik tigusineq tamanullu saqqummiussineq

-30-

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑮᓇᐅᔭᓕᐅᕋᓱᐊᖅᑎᐅᓇᑎᒃ ᐊᐅᓚᑦᓯᔩᑦ ᑭᒡᒐᖅᑐᐃᔪᑦ ᑕᒪᐃᓐᓂᒃ ᐃᓄᖕᓂᒃ ᐊᕐᓇᓂᒃ ᑲᓇᑕᒥ. ᐱᓕᕆᐊᒃᓴᕆᔭᕗᑦ ᖃᐅᔨᒪᑎᑦᑎᓗᑕ ᐱᔪᒪᔭᖏᓐᓂᒃ ᐃᓄᐃᑦ ᐊᕐᓇᐃᑦ ᐊᒻᒪᓗ ᑲᔪᖏᖅᓴᔭᕗᑦ ᐃᓚᐅᖁᓪᓗᒋᑦ ᓄᓇᓕᖕᓂ, ᐊᕕᒃᑐᖅᓯᒪᔪᓂ ᐊᒻᒪᓗ ᑲᓇᑕᒥ ᐃᓱᒫᓘᑎᖏᑦ ᐱᔾᔪᑎᒋᓪᓗᒋᑦ ᐃᓅᓯᕐᒧᑦ, ᐱᐅᓯᑐᖃᕐᒧᑦ, ᐊᒻᒪᓗ ᒪᑭᒪᓇᓱᐊᕈᑎᓄᑦ.  

ᑐᑭᓯᑎᑕᐅᒃᑲᓐᓂᕈᓐᓇᖅᑐᑎᑦ, ᐊᑏ ᐅᓇ ᑎᑎᕋᕐᕕᒋᓗᒍ: communications@pauktuutit.ca.