ᐊᔪᔅᓴᓗᐊᓐᓂᐅᑉ ᒥᑭᓪᓕᑎᑕᐅᒋᐊᓂᖓ
ᐱᓕᕆᒍᓐᓇᔅᓯᑎᑦᑎᓂᑦ ᐃᓄᐃᑦ ᐊᕐᓇᖏᓐᓂᒃ ᐊᒻᒪᓗ ᓱᕈᓯᖏᓐᓂᒃ
ᐊᔪᔅᓴᓐᓂᖅ ᐊᔅᓱᕈᓐᓇᔅᓯᓲᖑᒻᒪᑦ ᐱᓕᕆᐊᕆᒐᓱᒋᐊᖃᑦᑐᓂ ᐃᓄᐃᑦ ᓄᓇᓕᖏᓐᓄᑦ, ᓈᒻᒪᖏᓗᐊᑦᑐᓂ ᐊᑦᑐᐃᓂᖓ ᐃᓄᐃᑦ ᐊᕐᓇᖏᓐᓂᒃ ᐊᒻᒪᓗ ᓇᓪᓕᐊᖑᓂᖏᓐᓂᒃ−ᐊᔾᔨᒌᔭᐅᖏᑦᑐᓂᒃ ᐃᓄᓐᓂᒃ. ᐃᑲᔪᔅᓱᐃᓂᕗᑦ ᐱᓕᕆᐊᖃᓪᓗᐊᑕᒻᒪᑦ ᓂᕆᔭᒃᓴᖃᑦᑎᐊᖃᑦᑕᕆᐊᖃᑐᓂᒃ ᐊᒻᒪᓗ ᒥᑭᓂᔅᓴᐅᓕᑦᑎᑦᑎᓪᓗᓂ ᐃᓅᓇᓱᐊᕈᑎᒋᐅᔪᐅᔪ ᐊᑭᖏᓐᓂᒃ ᐋᖅᑭᑦᑕᐅᒐᓱᐊᖁᓪᓗᒍ ᒪᑭᒪᒐᓱᐊᕈᑎᒥᒃ ᐱᖃᓯᐅᔾᔨᖏᓐᓂᖅ ᐊᒻᒪᓗ ᐊᑐᑦᑕᐅᓂᔅᓴᑎᓪᓗᒍ ᐋᖅᑭᐅᒪᑎᒐᔅᓴᐅᓂᖏᑦ ᐃᓅᓇᓱᐊᕈᑎᒋᔭᐅᔪᑦ. 8 ᐅᑯᓇᙶᑦᑐᑦ 10−ᓂᒃ ᐃᓄᓐᓂᒃ ᐃᓄᐃᑦ ᓄᓇᖓᒥᐅᑕᐃᑦ ᓂᕆᔭᒃᓴᖃᖏᓗᐊᖃᑦᑕᑦᑐᑦ ᐊᔾᔨᐅᓂᔅᓯᐅᓪᓗᒋᑦ ᐊᑕᐅᓯᖅ ᖁᓕᓂᒃ ᐃᓅᖃᑎᒋᔭᐅᖏᑦᑐᑦ ᑲᓇᑕᒥᐅᑕᐃᑦ, ᐱᑕᖃᕆᐊᖃᓪᓚᕆᒻᒪᑕ ᐋᓐᓂᐊᖃᖏᓐᓂᒻᒧᑦ ᐊᒻᒪᓗ ᖃᓄᐃᖏᑦᑎᐊᓐᓂᖏᓐᓄᑦ ᓄᓇᓕᖁᑎᑕ. ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐱᓕᕆᒍᒪᑦᑎᐊᒻᒪᑕ ᖃᐅᔨᓇᓱᐊᕈᒪᓪᓗᑎᒃ ᐱᒋᐊᑦᑎᑦᑎᒍᑎᓂᒃ ᓲᕐᓗ ᒪᑯᓂᖓ ᑮᓐᓇᐅᔾᔭᔅᓵᓂᕆᔭᐅᓪᓗᐊᑕᓱᓂᒃ ᐊᒻᒪᓗ ᐊᖏᓂᔅᓴᐅᓕᑦᑎᓪᓗᒋᑦ ᓯᕗᓕᑦᑎᐅᓂᒻᒥᒃ ᐱᓕᕆᒋᐊᕕᔅᓴᐅᓕᖏᑦ ᐃᓄᐃᑦ ᐊᕐᓇᖏᓐᓄᑦ ᐱᒍᓐᓇᓂᑦᑖᑦᑎᑕᐅᖁᓪᓗᒋᑦ ᒪᑭᒪᓇᓱᐊᓂᒃᑯᑦ ᐊᒻᒪᓗ ᐃᓅᖃᑎᖃᓐᓂᒃᑯᑦ.
ᓯᕗᓪᓕᐅᑎᒋᐊᖃᑦᑎᑦᑎᕕᒋᔭᕗᑦ
ᓂᕆᔭᒃᓴᖃᑦᑎᐊᖃᑦᑕᕆᐊᖃᓐᓂᑦ ᐊᒻᒪᓗ ᓂᕆᔭᒃᓴᖃᑦᑎᐊᖏᓐᓂᑦ
ᓂᕆᔭᒃᓴᖃᑦᑎᐊᖏᓐᓂᖅ ᐱᒻᒪᕆᐊᓗᒻᒪᑦ ᐊᒻᒪᓗ ᑲᔪᓰᓐᓇᑦᑐᓂ ᐱᓕᕆᐊᕆᔭᐅᒐᓱᒋᐊᖃᓐᓂᖓ ᐃᓄᐃᑦ ᓄᓇᖓᓂ. 2017 ᓄᓇᖃᖅᑳᖅᓯᒪᔪᑦ ᐃᓄᖏᓐᓂᒃ ᐊᐱᔅᓱᓂᖅ ᓴᖅᑭᑎᑦᑎᓚᐅᒻᒪᑦ ᑕᒪᒃᑯᐊ 76%−ᖏᑦ ᐃᓄᐃᑦ ᐅᑭᐅᓕᑦ 15−ᓂᒃ ᐊᒻᒪᓗ ᐅᖓᑖᓂ ᐊᑐᖃᑦᑕᔅᓯᒪᒻᒪᑕ ᓂᕿᔅᓴᖃᓐᓂᐅᑉ ᖁᓚᓐᓇᓂᖓᓂᒃ, ᐊᔅᓱᐊᓗᑦᑐᑦ ᐊᔾᔨᒌᓐᓇᑎᒃ ᐊᕕᑦᑐᔅᓯᒪᓂᐅᔪᓂ ᐊᑐᑦᑕᐅᓪᓗᐊᑕᓲᓂᒃ ᐊᑕᐅᓯᖅ ᑎᓴᒪᐅᔪᑦᑐᓂ ᐃᒡᓗᒥᐅᖃᑎᒌᓂ. ᑕᒪᒃᑯᐊ ᖃᓄᐃᓕᖓᓂᐅᔪᑦ ᓴᖅᑭᑎᑦᑎᒻᒪᑕ ᐃᓱᒪᓕᐅᕈᑎᖃᓐᓃᑦ ᓯᕗᓪᓕᐅᑎᒋᐊᖃᑦᑎᑦᑎᔪᑦ ᐊᖓᔪᖃᐅᑎᑦ ᐱᒍᒪᓂᖏᓐᓂᒃ ᐱᔭᐅᙱᖔᑦᑐᑎᒃ ᐃᓄᐃᑦ ᐃᓕᖅᑯᓯᖏᑦ ᐊᒻᒪᓗ ᖃᓄᐃᖏᑦᑎᐊᓐᓂᖏᑦ. ᑕᒪᒃᑯᐊ ᐃᓱᒪᓕᐅᕈᑎᑦ ᐱᓯᒪᒻᒪᑕ ᑕᑎᖃᓐᓂᖏᓐᓂᒃ ᖃᓪᓗᓇᑦ ᓄᓇᖓᓐᓂᒃ ᓂᕿᓂᒃ ᐱᔭᐅᕙᑦᑐᓂᒃ ᐊᒻᒪᓗ ᐱᔭᐅᑎᑦᑎᓪᓗᑎᒃ ᑲᓱᔅᓯᒪᓂᖏᓐᓄᑦ ᐱᖅᑯᓯᒃᑯᑦ ᓂᕿᖃᕈᑎᓂᒃ. ᑕᒪᒃᑯᑎᒎᓇ ᓂᕆᔭᒃᓴᖃᑦᑎᐊᖃᑦᑕᕆᐊᖃᓐᓂᒃᑯᑦ, ᐃᓄᐃᑦ ᐃᓚᒌᑦ ᐊᑐᓕᒃᑲᓐᓂᕈᓐᓇᒻᒪᑕ ᑭᒡᒐᑦᑐᐃᔨᖏᓐᓂᒃ. ᐸᐅᒃᑑᑎᒃᑯᑦ ᐱᒐᓱᐊᒻᒪᑕ ᐊᓯᕈᑦᑕᐅᑎᑦᑎᒐᓱᐊᓪᓗᑎᒃ ᐊᑐᐊᒐᒻᒥᒃ ᐅᖃᖃᑎᒌᒍᑎᖃᓪᓗᑎᒃ ᓂᕆᔭᔅᓴᖃᑦᑎᐊᓐᓂᒻᒥᒃ ᐅᖃᐅᓯᖃᓪᓗᐊᑕᓪᓗᑎᒃ ᐊᑑᑎᖃᑦᑎᐊᑦᑐᓂᒃ ᐱᔭᐅᖔᕈᓐᓇᑦᑐᓂᒃ ᓂᕿᓄᑦ ᐃᑲᔪᑦᑕᐅᖑᑎᓂᒃ ᐱᔭᐅᑎᑕᐅᕙᓪᓗᑎᒃ ᐊᒻᒪᓗ ᑮᓇᐅᔭᖃᑦᑎᑕᓗᑎᒃ.
ᒪᑭᒪᒐᓱᐊᕈᑎᒥᒃ ᐱᖃᓯᐅᔾᔨᖏᓐᓂᖅ ᐊᒻᒪᓗ ᐃᖅᑲᓇᐃᔭᓐᓂᒻᒥᒃ ᐱᒋᐊᕕᓴᐅᓃᑦ
ᒪᑭᒪᒐᓱᐊᕈᑎᒥᒃ ᐱᖃᓯᐅᔾᔨᖏᓐᓂᖅ ᐊᔅᓱᐊᓗᒃ ᐊᑦᑐᐃᒻᒪᑕ ᐃᓄᐃᑦ ᐊᕐᓇᖏᓐᓂᒃ ᑭᒡᓕᓕᑎᑕᐅᓯᒪᓂᖏᓐᓄᑦ ᐱᔭᐅᒍᓐᓇᓂᖏᓐᓂᒃ ᐃᖅᑲᓇᐃᔭᑦ ᐊᒻᒪᓗ ᓯᕗᓕᑦᑎᐅᓂᒻᒥᑦ ᐃᖅᑲᓇᐃᔮᑦ. ᑕᒪᓐᓇᐅᒐᓗᐊᑦᑎᓪᓗᒍ ᐃᓄᒋᐊᓐᓂᑉᐹᖑᖃᑕᐅᒐᓗᐊᓪᓗᓂ ᐃᓄᐃᑦ ᓄᓇᖓᓂ, ᐃᓄᐃᑦ ᑭᒡᒐᑦᑐᑦᑕᐅᙱᓗᐊᒻᒪᑕ ᐃᓱᒪᓕᐅᑎᐅᓂᒻᒥ ᐃᖅᑲᓇᐃᔭᓂ ᐊᐅᓚᔾᔭᐃᔪᓂᒃ ᒪᑭᒪᒐᓱᐊᕈᑎᒥᒃ ᓂᕈᐊᕈᓐᓇᓐᓂᐅᔪᓂᒃ ᐊᑦᑐᐃᒻᒪᑕ ᐃᓅᓯᖏᓐᓂᒃ ᐊᒻᒪᓗ ᓄᓇᓕᖏᓐᓂᒃ. ᐊᑯᓐᓈᕿᔪᑦ ᑮᓐᓇᐅᔭᔅᓵᕆᔭᐅᔪᑦ ᐃᓄᓐᓄᑦ ᐊᕕᑦᑐᔅᓯᒪᓂᒻᒥ ᐃᒪᓐᓇᑎᒋᐅᓚᐅᒻᒪᑕ $23,485 2015−ᒥ, ᐊᔾᔨᐅᓂᔅᓯᐅᓪᓗᒋᑦ ᑎᑭᐅᒪᓂᖏᓐᓄᑦ $92,011 ᑕᐃᒃᑯᓄᖓ ᓄᓇᖃᖅᑳᖅᓯᒪᖏᑦᑐᓄᑦ ᐃᓄᖃᑎᒋᓄᑦ. ᐸᐅᒃᑑᑎᒃᑯᑦ ᐋᖅᑭᖃᑎᒌᑦᑎᑦᑎᒐᓱᐊᕈᑎᖃᒻᒪᑕ ᐃᓅᖃᑎᒌᓄᑦ ᐊᒻᒪᓗ ᒪᑭᒪᒐᓱᐊᕈᑎᒥᒃ ᐱᔪᓐᓇᐅᑎᖏᓐᓂᒃ ᐃᓄᐃᑦ ᐊᕐᓇᖏᓐᓄᑦ, ᓂᕕᐊᔅᓯᐊᓄᑦ, ᐊᒻᒪᓗ ᓇᓪᓕᐊᖑᓂᖏᓐᓄᑦ−ᐊᔾᔨᒌᔭᐅᖏᑦᑐᓄᑦ ᐃᒻᒥᓂᔅᓱᑦᑐᓄᑦ.
ᑕᐃᒪᓐᓇᐅᓂᐅᓴᑐᐃᓐᓇᑦᑎᑕᐅᔪᑦ ᑮᓐᓇᐅᔭᔅᓵᕆᔭᐅᓗᐊᑕᓱᑦ
ᑕᐃᒪᓐᓇᐅᓂᐅᓴᑐᐃᓐᓇᑦᑎᑕᐅᔪᑦ ᑮᓐᓇᐅᔭᔅᓵᕆᔭᐅᓪᓗᐊᑕᓱᑦ ᐱᑕᖃᕆᐊᖃᓪᓚᕆᒻᒪᑕ ᐅᖃᐅᔾᔨᒍᑎᒋᔭᐅᔪᑦ ᐱᖁᔭᑦᑎᒎᑦᑎᐊᖁᔭᐅᓪᓗᑎᒃ ᐅᑯᓇᙵᑦ ᐊᓯᐅᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ ᑲᓇᑕᒥ ᑐᑭᓯᒍᒪᔾᔪᑎᓂ ᐊᒻᒪᓗ ᐊᑐᑦᑕᐅᒃᑲᓐᓂᓕᑦᑎᑕᐅᓗᑎᒃ ᑲᓇᑕᒥ ᐃᓄᐃᑦ ᐱᓕᕆᒋᐊᓂᖏᓐᓄᑦ ᐸᕐᓇᒍᑎᖓ ᐅᑯᓇᓂ ᐊᓯᐅᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓯᐊᓪᓗ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ. ᑕᐃᒪᐃᒃᑲᓗᐊᑦᑎᓪᓗᒍ, ᐱᑕᖃᔅᓯᒪᒻᒪᑦ ᑭᒡᓕᓕᓯᒪᓂᖏᓐᓄᑦ ᖃᐅᔨᓇᓱᐊᓐᓂᑦ ᐱᓕᕆᐊᕆᒐᔅᓴᐅᒻᒪᖔᑦ ᐃᓄᖏᓐᓄᑦ ᐃᓘᓐᓇᓕᒫᖓᓄᑦ ᐃᓄᐃᑦ ᓄᓇᖓᓄᑦ. ᐸᐅᒃᑑᑎᒃᑯᑦ ᐱᓕᕆᒐᓱᐊᒻᒪᑕ ᓄᓇᙳᐊᓕᐅᕈᓱᐊᓪᓗᑎᒃ ᒫᓐᓇᐅᔪᖅ ᐃᓅᒍᑎᖃᕋᓱᐊᓐᓂᐅᑉ ᐊᑭᖏᓐᓂᒃ ᐃᓄᐃᑦ ᐊᕐᓇᖏᓐᓄᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᓄᑦ ᐃᒻᒥᓂᔅᓴᑦᑐᓄᑦ, ᐋᖅᑭᔅᓯᓗᑎᒃ ᐱᓕᕆᓗᑎᒃ ᑕᒪᒃᑮᔪᓂᒃ ᑮᓐᓇᐅᔾᔭᔅᓴᓂᕆᔭᐅᓪᓗᐊᑕᓲᓂᒃ, ᐊᒻᒪᓗ ᐱᓕᕆᓗᑎᒃ ᐃᓅᖃᑎᒌᓄᑦ ᐃᑲᔪᑦᑕᐅᒍᑎᓄᑦ ᐊᑭᒋᔭᐅᔪᓂᒃ ᐊᒻᒪᓗ ᐱᓕᕆᐊᕆᒍᓐᓇᒻᒪᖔᑦ ᖃᐅᔨᒐᓱᐊᑦᑕᐅᑦᑎᐊᓗᓂ. ᑎᑭᐅᑎᒐᓱᐊᕋᑦᑕ ᖃᐅᔨᒐᓱᐊᕈᒪᓪᓗᒋᑦ ᐊᑐᑦᑕᐅᒍᓐᓇᑐᐃᓐᓇᕆᐊᖃᓐᓂᖏᑦ ᖃᓄᐃᖏᑦᑎᐊᓂᖅ−ᐊᔪᖏᓐᓂᔅᓴᐅᓕᑦᑎᑦᑎᒍᑎᒋᓗᒍ ᐊᒻᒪᓗ ᐊᑭᓖᓗᐊᖃᑦᑕᖁᓪᓗᒋᑦ ᐃᑲᔪᑦᑕᐅᒍᑎᓄᑦ ᐃᓘᓐᓇᓕᒫᖏᓐᓂ ᓇᒻᒥᓂᖁᑎᒋᔭᐅᔪᓂ, ᐋᖅᑭᖃᑎᖃᑦᑎᑦᑎᒐᓱᐊᓪᓗᑕ ᑮᓐᓇᐅᔭᔅᓵᕆᔭᐅᓪᓗᐊᑕᓲᓂ ᑕᒪᒃᑭᖏᓐᓂᒃ ᐃᓅᖃᑎᒌᓄᑦ ᐱᔪᓐᓇᐅᑎᒋᔭᐅᔪᓂ ᐊᒻᒪᓗ ᒪᑭᒪᒐᓱᐊᕈᑎᖃᓐᓂᒻᒧᑦ ᑐᑭᓯᓇᔅᓯᑎᑦᑎᑎᐊᕈᑎᓂᒃ.
ᐃᓄᐃᑦ ᐊᕐᓇᖏᑦ ᓇᒻᒥᓂᖁᑎᓖᑦ ᐱᓕᕆᒋᐊᕈᑎᔅᓴᐃᑦ
ᐃᒪᓐᓇᐅᑎᓪᓗᒋᑦ ᐃᓄᐃᑦ ᐊᕐᓇᖏᑦ ᓇᒻᒥᓂᖁᑎᓖᑦ ᐱᓕᕆᖃᑎᒌᑦᑐᑦ (IWBN) ᐊᑯᓂᐅᖏᑦᑐᒥᒃ ᐱᓕᕆᓯᒪᓕᒻᒪᑕ, ᐸᐅᒃᑑᑎᒃᑯᑦ ᐊᓯᕈᔅᓯᒪᖏᒻᒪᑕ ᐱᓕᕆᒍᒪᓂᖏᑦ ᐃᑲᔪᕈᒪᓪᓗᒋᑦ ᐃᓄᐃᑦ ᐊᕐᓇᖏᑦ ᓇᒻᒥᓂᖁᑎᓖᑦ. ᑕᒪᒃᑯᐊ ᐱᓕᕆᒋᐊᕈᑎᔅᓴᐃᑦ ᐱᒐᔅᓴᐅᑎᑦᑎᒻᒪᑕ ᐱᒍᒥᓇᑦᑐᐊᓗᓐᓂᒃ ᐊᔪᕆᔅᓯᐅᔾᔨᓯᒪᔪᓂᒃ ᓇᒻᒥᓂᖁᑎᑦ ᐸᕐᓇᑦᑕᐅᓂᖏᓐᓂᒃ, ᐊᑐᐃᓐᓇᐃᑎᑦᑎᕕᓐᓂᒃ, ᐊᒻᒪᓗ ᐊᓯᕈᑦᑎᙱᒐᔅᓴᐅᓂᖏᓐᓂᒃ ᐱᕈᓐᓂᐅᔪᓂ. ᐃᒪᓐᓇᐅᒐᓗᐊᕈᔅᓯᓘᓐᓂᒃ ᐱᒋᐊᑉᐸᓪᓕᐊᓕᓪᓗᓯ ᐊᖏᓪᓕᕙᓪᓕᐊᑎᓕᓪᓗᒍ ᓇᒻᒥᓂᖁᑏᑦ, ᑕᒪᒃᑯᐊ ᐱᓕᕆᒋᐊᕋᑎᔅᓴᐃᑦ ᐊᑐᐃᓐᓇᐅᒻᒪᑕ ᐃᑲᔪᕈᑎᒋᔭᐅᒐᓱᐊᓂᖏᑦ. ᐃᓄᐃᑦ ᐊᕐᓇᖏᑦ ᐃᓘᓐᓇᓕᒫᖏᓐᓂ ᓴᓇᕕᖁᑎᓂ ᐊᒻᒪᓗ ᐱᓕᕆᒍᓐᓇᑦᑎᐊᓂᖃᓐᓃᑦ ᐊᔪᙱᓕᕇᓐᓂᖏᓐᓂ ᐱᒍᓐᓇᑦᑎᑕᐅᒋᐊᖃᒻᒪᑕ ᐱᒋᐊᕕᔅᓴᖃᑦᑎᑕᐅᓗᑎᒃ ᑕᐃᒃᑯᓂᖓ ᐃᑲᔪᔅᓱᐃᔪᓂᒃ ᑲᔪᓯᑦᑎᐊᓐᓂᕆᔭᖏᓐᓂᒃ, ᐊᒻᒪᓗ ᐅᐱᒍᓱᑦᑐᐊᓗᔪᒍᑦ ᐃᑲᔪᖃᑕᐅᒋᐊᔅᓴᖅ ᐱᓕᕆᒐᓱᐊᓐᓂᕆᔭᖏᓐᓂ.
ᐊᑐᐊᒐᑦ ᐱᓕᕆᒋᐊᕈᑎᔅᓴᐃᑦ
No related publications found