ᐋᓐᓂᖅᑎᕆᑎᑦᑕᐃᓕᒪᓂᖅ
ᐱᓕᕆᐊᕆᔭᐅᒋᐊᓪᓗᓂ ᐱᓕᕆᔾᔪᑎᓕᐊᕆᓯᒪᔪᖅ ᐋᓐᓂᔅᓯᕆᓃᑦ ᐃᓄᐃᑦ ᐊᕐᓇᖏᓐᓂᒃ
ᐃᓄᐃᑦ ᐊᕐᓇᖏᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ ᐃᓄᐃᑦ ᐊᑐᖃᑦᑕᔅᓯᒪᒻᒪᑕ ᐃᓚᖏᓐᓂᒃ ᖁᕝᕙᓯᓐᓂᑉᐹᖑᔪᓂᒃ ᖃᓄᑎᒋᐅᓂᖏᓂ ᐋᓐᓂᔅᓯᑦᑕᐅᓂᓐᓂᒃ ᑲᓇᑕᒥ, ᓱᓖᓚᒃ ᐱᔨᔅᓯᕈᑏᑦ ᐊᓯᕈᔅᓯᒪᖏᓪᓚᑦ ᑭᒡᓕᓕᓯᒪᓪᓗᑎᒃ, ᐅᓄᑦᑐᑦ ᐊᑦᑕᓇᑦᑐᒦᙱᒍᑎᔅᓴᖏᓐᓂᒃ ᓇᓖᕋᕕᔅᓴᖃᕈᓐᓃᑦᑎᑕᐅᓪᓗᑎᒃ. ᑕᒪᓐᓇ ᐋᓐᓂᔅᓯᕆᓂᖅ ᐃᑎᔪᒥᒃ ᐊᒫᖃᒻᒪᑦ ᐱᓕᕆᔾᔪᑎᓕᐊᕆᓯᒪᔪᒥ, ᐃᓕᓴᕕᑦᑎᑑᖓᔪᓂᒃ, ᐊᒻᒪᓗ ᐋᖅᑭᔅᓱᔅᓯᒪᓂᖏᓐᓂᒃ ᖃᓄᐃᓕᖓᓂᕆᔭᐅᔪᓂᒃ. ᐅᓇᐅᓕᑦᑎᓪᓗᒍ 2025, ᒪᕐᕈᐃᓐᓈᒃ ᐅᑯᓇᙵᑦ 231−ᓂᒃ ᐱᓕᕆᐊᕆᔭᐅᒋᐊᔅᓯᒪᒻᒪᑕ ᐱᖁᑦᑎᒍᑦᑎᐊᓐᓂᒻᒧᑦ ᐅᑯᓇᖓᑦ ᑲᓇᑕᒥ ᑐᑭᓯᒍᒪᔾᔪᑎᓂᒃ ᐅᑯᓄᖓ ᐊᓯᐅᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ ᑕᒪᒻᒥᒃ ᐊᑐᓕᑦᑎᑕᐅᔪᐃᓐᓇᐅᓯᒪᒻᒪᑕ, ᐃᒪᓐᓇᐅᓕᑎᑕᐅᓪᓗᑎᒃ ᐃᓄᐃᑦ ᓂᐱᖏᑦ ᐊᖏᔪᒥᒃ ᐃᓕᓴᕆᔭᐅᒍᓐᓃᑦᑎᑕᐅᓯᒪᓪᓗᑎᒃ. ᐸᐅᒃᑑᑎᒃᑯᑦ ᑲᔪᓯᒻᒪᑕ ᐊᔭᐅᔅᓰᓐᓇᑦᑐᑎᒃ ᐃᓘᓐᓇᓕᒫᖓᓂᒃ ᐊᑐᓕᑦᑎᑕᐅᖁᔨᓪᓗᑎᒃ ᐃᓘᓐᓇᑎᒃ ᐱᓕᕆᐊᕆᔭᐅᒋᐊᖁᓪᓗᒋᑦ ᐱᖁᔭᑦᑎᒎᑦᑎᐊᓐᓂᑦ ᐊᒻᒪᓗ ᐊᔪᖏᓐᓂᔅᓴᐅᓕᑦᑎᑕᐅᓪᓗᑎᒃ ᐃᓄᓐᓄᑦ−ᓯᕗᓕᑦᑕᐅᔪᑦ ᐊᑲᐅᙱᓕᐅᕈᑎᖃᕈᓐᓃᑦᑎᑦᑎᒍᑎᑦ ᖃᐅᔨᓇᓱᐊᓐᓂᒃᑯᑦ, ᐃᑲᔪᔅᓱᐃᓂᒃᑯᑦ, ᐊᒻᒪᓗ ᐃᓕᓴᓂᒃᑯᑦ ᐃᒪᓐᓇᐅᓚᕆᖁᓪᓗᒋᑦ ᐊᑦᑕᓐᓇᖏᓪᓗᑎᒃ, ᐱᖁᔭᑦᑎᒎᑦᑎᐊᓪᓗᑎᒃ, ᐊᒻᒪᓗ ᓵᑕᔅᓴᐅᒍᓐᓇᓪᓗᑎᒃ.
ᓯᕗᓪᓕᐅᑎᒋᐊᖃᑦᑎᑦᑎᕕᒋᔭᕗᑦ
ᐊᓯᐅᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓯᐊᓪᓗ (MMIWG): ᖃᐅᔨᓇᓱᐊᓂᖅ ᐊᒻᒪᓗ ᖃᐅᔨᒪᔾᔪᑎᓴᑦ
ᑲᓇᑕᒥ ᑐᑭᓯᑎᑕᐅᒍᒪᓂᖏᑦ ᐅᑯᓂᖓ ᐊᓯᐅᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᖏᑦᑐᑦ ᖃᐅᔨᔭᐅᒻᒪᑕ ᓈᒻᒪᖏᑦᑑᓂᖏᓐᓂᒃ ᖃᐅᔨᒪᔾᔪᑎᓴᐃᑦ ᐋᓐᓂᔅᓯᑕᐅᖃᑦᑕᓐᓂᖏᓐᓂᒃ ᐃᓄᐃᑦ, ᐊᓪᓚᒪᔪᐃᑦ, ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒋᔭᐅᖏᓐᓂᖏᑦ ᐃᒻᒥᓂᔅᓱᑦᑐᑦ ᐊᑐᒻᒪᑕ, ᐊᑐᕋᑎᒃ ᐃᓘᓐᓇᓕᒫᖓᓂᒃ ᑎᑭᐅᒪᔭᖏᓐᓂᒃ ᑖᔅᓱᒪ ᐊᔅᓱᕈᓐᓇᓗᐊᓕᓐᓂᖓᑕ ᖃᐅᔨᒪᓇᖏᓐᓂᖓᓂᒃ. ᐱᑕᖃᑦᑎᓐᓇᒋᑦ ᓇᓚᓇᐃᔅᓯᑦᑎᐊᔅᓯᒪᔪᑦ ᑐᓴᐅᒪᔾᔪᑎᔅᓴᐃᑦ, ᓱᓕᔪᓂᒃ ᖃᓄᑎᒋᐅᓂᖏᓐᓂᒃ ᐋᓐᓂᔅᓯᕆᖃᑦᑕᓐᓃᑦ ᐃᔨᑦᑕᐅᓯᒪᒻᒪᑕ, ᐱᒡᒐᓇᕈᓐᓃᑦᑎᑦᑎᒍᑎᒋᔭᐅᓪᓗᓂ ᒐᕙᒪᒃᑯᑦ ᑭᖑᕙᕆᐊᔅᓯᒍᓐᓇᔅᓯᑎᑕᐅᓪᓗᑎᒃ ᑐᑭᖃᑦᑎᐊᑦᑐᓂᒃ ᐱᓕᕆᒋᐊᕈᑎᔅᓴᓂᒃ. ᐸᐅᒃᑑᑎᒃᑯᑦ, ᐱᓕᕆᖃᑎᖃᓪᓗᑎᒃ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᖅᑲᓇᐃᔭᕕᖁᑎᖏᓐᓂᒃ, ᐱᓕᕆᒻᒪᑕ ᖃᐅᔨᓇᓱᐊᓐᓂᒻᒥᒃ ᓴᖅᑭᑎᑕᐅᖁᓪᓗᒋᑦ ᐱᓕᕆᔾᔪᑎᓕᐊᕆᔭᐅᓯᒪᔪᑦ, ᐃᓕᓴᕕᑦᑎᑑᖓᔪᑦ, ᐊᒻᒪᓗ ᐋᖅᑭᔅᓱᔅᓯᒪᓂᖏᑦ ᑕᐃᒪᓐᓇᐃᓕᑎᑦᑎᔪᑦ ᑖᔅᓱᒥᖓ ᐋᓐᓂᔅᓯᕆᓂᒻᒥᒃ, ᐃᒪᓐᓇᐅᓚᕆᖁᓪᓗᒋᑦ ᐃᓄᐃᑦ ᐊᕐᓇᖏᑕ ᐊᑐᓪᓚᕇᑦᑕᖏᑦ ᐃᓕᓴᕆᔭᐅᖁᓪᓗᒋᑦ ᐊᒻᒪᓗ ᐱᓕᕆᐊᕆᔭᐅᒋᐊᖁᓪᓗᒋᑦ.
ᐱᖁᔭᑦᑎᒎᑦᑎᐊᓂᖅ: ᐱᓕᕆᐊᖃᓐᓂᖅ ᐅᖓᑎᓗᐊᖓᓄᑦ−ᐊᓄᓪᓚᔅᓰᕕᒻᒦᑎᑕᐅᔪᓂᒃ ᐊᒻᒪᓗ ᐃᓄᐃᑦ ᐱᖁᔭᑦᑎᒎᑦᑎᐊᓂᖏᓐᓂᒃ ᐆᒻᒪᕈᕆᐊᑦᑎᑦᑎᓂᖅ
ᐃᓄᐃᑦ ᐊᕐᓇᖏᑦ ᐊᑐᒻᒪᑕ ᖁᕝᕙᓯᑦᑐᐊᓗᓐᓂᒃ ᐅᓄᓐᓂᖃᓪᓗᑎᒃ ᐊᓄᓪᓚᔅᓯᐊᖑᓂᖏᑦ ᐱᑎᑕᐅᒍᓐᓇᕋᑎᓪᓗ ᐊᑦᑕᓐᓇᖏᓐᓂᒻᒥᒃ ᐊᒻᒪᓗ ᐃᑲᔪᑦᑕᐅᒍᑎᒥᒃ. ᑕᒫᓂᒥᐅᑕᕈᔅᓯᒪᔪᓄᑦ ᐱᖁᕙᑦᑎᒎᑦᑎᐊᓂᒻᒥᒃ ᐱᓕᕆᔾᔪᑎ ᐱᕋᔭᓐᓂᕈᑦᑎᑦᑎᒻᒪᑦ ᐃᓄᓐᓂᒃ ᐊᒻᒪᓗ ᐱᔭᐅᑎᑦᑎᒍᓐᓇᕋᓂ ᑐᑭᖃᑦᑎᐊᑦᑐᒃᑯᑦ ᓴᐳᒻᒥᔅᓯᓂᒻᒥᒃ ᐋᓐᓂᔅᓯᑕᐅᓂᒻᒥᒃ. ᐸᐅᒃᑑᑎᒃᑯᑦ ᐃᑲᔪᔅᓱᐃᒻᒪᑕ ᐱᖁᔭᑦᑎᒎᑦᑎᐊᑦᑐᓂᒃ ᐋᖅᑭᒋᐊᕈᑎᓂᒃ ᑕᐃᒃᑯᓂᖓ ᐱᓕᕆᐊᖃᑦᑐᓂᒃ ᐱᓕᕆᔾᔪᑎᓕᐊᕆᓯᒪᔪᓂᒃ ᐅᕕᓂᖃᑏᓐᓇᑦᑐᓂᒃ ᐊᒻᒪᓗ ᓇᓪᓕᐊᖑᓂᖏᓐᓂᒃ−ᑐᙵᕕᖃᑐᓂᒃ ᐋᓐᓂᔅᓯᕆᓂᒻᒥ, ᐊᒻᒪᓗ ᐆᒻᒪᕈᕆᐊᑦᑎᑦᑎᓪᓗᓂ ᐃᓄᓐᓄᑦ−ᓯᕗᓕᑦᑕᐅᔪᒥᒃ ᐱᖁᔭᑦᑎᒎᑦᑎᐊᓐᓂᒻᒧᑦ ᐱᓕᕆᔾᔪᑎᓂᒃ ᐱᓕᕆᐊᖃᑦᑐᓂᒃ ᒪᒥᓴᓐᓂᒻᒥᒃ ᐊᒻᒪᓗ ᓄᓇᓕᐅᑉ ᐊᑦᑕᓇᖏᑦᑐᒦᑎᑕᐅᓂᖓᓂᒃ. ᐱᒋᐊᖃᕋᑦᑕ ᐊᔅᓲᓂᔅᓴᖅ ᑐᑭᓯᓇᑦᑎᐊᓂᔅᓴᐅᔪᓂᒃ ᐊᒻᒪᓗ ᓵᑕᔅᓴᐅᓂᒻᒥᒃ ᐊᑐᑦᑕᐅᓚᕆᖁᓪᓗᒍ ᐱᖁᔭᑦᑎᒎᑦᑎᐊᓐᓂᒻᒧᑦ ᐱᓕᕆᔾᔪᑎ ᐱᔨᔅᓯᖁᓪᓗᒍ ᐃᓄᐃᑦ ᐊᕐᓇᖏᓐᓂᒃ, ᐋᓐᓂᔅᓯᑦᑕᐅᙱᖔᓪᓗᑎᒃ.
ᐸᓖᓯᒃᑯᑦ ᐃᖅᑲᓇᐃᔭᑦᑎᐊᖏᓐᓂᖏᑦ: ᐱᓕᕆᐊᕆᔭᐅᒋᐊᓪᓗᑎᒃ ᐊᔅᓱᓗᐊᕌᓗᒃ ᐊᔪᐃᓐᓈᖃᓐᓃᑦ ᐊᒻᒪᓗ ᐃᖅᑲᓇᐃᔭᑦᑎᐊᖏᓐᓃᑦ
ᐸᓖᓯᖃᑦᑎᑕᐅᓂᖏᑦ ᐃᓄᐃᑦ ᓄᓇᖓᑦ ᑎᑎᑦᑕᐅᓯᒪᒻᒪᑦ ᓯᐊᒻᒪᔅᓯᒪᔪᐊᓗᓂᖓᓂᒃ ᐃᖅᑲᓇᐃᔭᑦᑎᐊᖏᓐᓂᖏᓐᓂᒃ ᐊᔾᔨᒌᙱᑎᑦᑎᖏᓐᓂᖏᓂᒃ, ᐊᒻᒪᓗ ᐱᑦᑎᐊᑦᑕᐅᖃᑦᑕᓐᓇᑎᒃ. ᐊᐅᓚᑦᑎᔨᑦ ᐊᑐᒐᔪᒻᒪᑕ ᐊᔅᓱᓗᐊᕌᓗᒃ ᐊᔪᐃᓐᓈᖃᓐᓂᒻᒥᒃ, ᐲᑦᑕᐅᕙᑦᑐᑎᒃ ᐅᓂᒃᑳᔅᓯᒪᔪᑦ ᐋᓐᓂᔅᓯᕆᓂᒻᒥᒃ, ᐊᒻᒪᓗ ᓴᐳᒻᒥᔅᓯᒍᓐᓇᕋᑎᒃ ᐃᓄᐃᑦ ᐊᕐᓇᖏᓐᓂᒃ, ᓂᕕᐊᔅᓯᐊᓂᒃ, ᐊᒻᒪᓗ ᓇᓪᓕᐊᖑᓂᖏᑕ−ᐊᔾᔨᒌᔭᐅᑎᑕᐅᖏᓐᓂᒃ ᐃᓄᖃᑎᒋᑦ. ᐸᐅᒃᑑᑎᒃᑯᑦ ᐸᓯᒐᔅᓴᐅᑎᑦᑎᒻᒪᑕ ᐸᓖᓯᒃᑯᓐᓂᒃ ᓵᑕᔅᓴᖁᓪᓗᒋᑦ ᐊᔪᐃᓐᓇᕈᑎᒋᔭᐅᓪᓗᓂ ᐱᓕᕆᒍᑎᓕᐊᕆᓯᒪᔪᑦ ᐊᓯᕈᑦᑕᐅᖁᓪᓗᒋᑦ, ᐃᒻᒥᓂᔅᓴᑐᑦ ᖃᐅᔾᔩᑦᑐᕆᔭᐅᓂᖏᓐᓂᒃ, ᐊᒻᒪᓗ ᐃᒻᒥᓂᔅᓱᓕᑦᑎᑦᑎᓂᖅ ᐱᖁᔭᒥᒃ ᒪᓕᑦᑕᐅᑎᑦᑎᓂᒻᒧᑦ. ᐸᓖᓯᒃᑯᑦ ᐃᖅᑲᓇᐃᔮᖃᒻᒪᑕ ᓴᐳᒻᒥᔅᓯᒋᐊᖃᑦᑐᑎᒃ ᐃᓄᐃᑦ ᓄᓇᓕᖏᓐᓂᒃ. ᓄᖅᑲᑦᑎᑦᑎᓂᖅ ᐸᓖᓯᒃᑯᑦ ᐋᓐᓂᔅᓯᕆᓂᖏᓐᓂᒃ ᐊᒻᒪᓗ ᓯᕗᓪᓕᐅᑎᒋᐊᖃᓕᑦᑎᓪᓗᒍ ᐃᓄᓐᓄᑦ−ᓯᕗᓕᑦᑕᐅᓗᑎᒃ ᐊᑦᑕᓐᓇᑦᑎᑦᑎᑕᐃᓕᒪᓂᑦ ᐊᓯᕈᖁᓇᒍ ᐊᑑᑎᖃᓐᓂᑉᐹᖅ ᓯᕗᓪᓕᐅᑎᔭᐅᒋᐊᖃᓐᓂᖓ.
ᐃᓕᓐᓂᐊᓂᖅ ᐊᒻᒪᓗ ᖃᐅᔨᒪᓂᖅ ᐱᒋᐊᑉᐹᓪᓗᒍᑎᑦ: ᑲᑎᒪᓯᓐᓈᓐᓃᑦ
ᐸᐅᒃᑑᑎᒃᑯᑦ ᐋᖅᑭᔅᓯᓯᒪᒻᒪᑕ ᑲᑎᒪᓯᓐᓈᕈᑎᓂᒃ ᖃᐅᔨᒪᔭᐅᓂᔅᓴᐅᓕᖁᓪᓗᒋᑦ ᐊᒻᒪᓗ ᐱᓕᕆᐊᕆᔭᐅᒋᐊᖃᑦᑕᖁᓪᓗᒋᑦ ᐋᓐᓂᔅᓯᑦᑕᐅᑎᓪᓗᒋᑦ ᐃᓄᐃᑦ ᐊᕐᓇᖏᑦ. ᓴᐃᒪᓂᖅ ᐱᖁᔭᑦᑎᒎᑦᑎᐊᓂᖅ ᐊᒻᒪᓗ ᖃᓂᒋᓛᖏᓐᓄᑦ ᐱᖃᑎᖏᓐᓄᑦ ᐋᓐᓂᔅᓯᑕᐅᓃᑦ ᑲᑎᒪᓯᓐᓈᓐᓂᖅ ᐱᔭᐅᑎᑦᑎᒻᒪᑦ ᐱᖁᔭᑦᑎᒎᑦᑎᐊᓐᓂᒻᒥᒃ ᐃᖅᑲᓇᐃᔭᑦᑎᓪᓚᕆᓐᓂᒃ ᖃᐅᔨᒪᓂᖃᑦᑐᓂᒃ ᐱᔭᐅᒋᐊᓕᓐᓂᒃ ᐃᑲᔪᑦᑕᐅᓂᔅᓴᐅᖁᓪᓗᒋᑦ ᐃᓄᐃᑦ ᐊᓂᒍᐃᓯᒪᔪᑦ. ᐱᓕᕆᖃᑎᖃᓐᓂᖅ ᒪᒃᑯᑦᑐᓂᒃ ᐊᖑᑎᓂᒃ ᐊᒻᒪᓗ ᓄᑲᑉᐱᐊᓂᒃ (EYMB) ᑲᑎᒪᓯᓐᓈᓐᓂᑦ ᐱᓕᕆᐊᖃᓪᓗᐊᑕᑦᑐᑦ ᐱᓂᓪᓗᑦᑕᐅᑎᑦᑎᑕᐃᓕᒪᓂᒻᒥᒃ ᓇᓪᓕᐊᖑᓂᖏᓐᓂᒃ−ᐊᔾᔨᒋᔭᐅᖏᑦᑐᓂᒃ ᐋᓐᓂᔅᓯᕆᓂᒻᒥᒃ ᐃᖅᑲᓇᐃᔭᖃᑎᒋᓪᓗᒋᑦ ᒪᒃᑯᑦᑐᑦ ᐊᖑᑏᑦ ᐊᒻᒪᓗ ᓄᑲᑉᐱᐊᑦ ᐃᓚᒌᑦᑎᐊᖁᓪᓗᒋᑦ ᐊᒻᒪᓗ ᓵᑕᔅᓴᐅᒍᓐᓇᓐᓂᒻᒥᒃ. ᑕᐃᒪᓕ ᐱᒍᒪᒍᕕᑦ ᑕᒪᒃᑯᓂᖓ ᑲᑎᒪᓯᓐᓈᕈᑎᖃᑎᑦᑎᒍᑎᖃᕈᒪᒍᕕᑦ ᓄᓇᓕᔅᓯᓐᓂ, ᐅᖃᕝᕕᖃᓚᐅᕆᔅᓯ ᐅᕙᑦᑎᓐᓂᒃ ᐅᓪᓗᒥ.
MMIWG2S+ ᑎᑎᖃᑦ ᓈᓴᖅᓯᒪᔪᓪᓗ ᐱᓕᕆᐊᖑᔪᑦ
ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᐊᕐᓇᐃᑦ ᒥᓯᕝ ᐅᑎᒻᐱᓯᒍᐊᑦ, ᐋᓐᑎᐅᕆᐅ ᐊᓪᓚᐃᑦ ᐊᕐᓇᐃᑦ ᑲᑐᔾᔨᖃᑎᒌᑦ, ᐊᒻᒪᓗ 2 ᐊᖑᑎᓄᑦ ᐊᕐᓇᓄᑦ ᑕᒪᐃᓐᓅᖓᔪᖅ ᐱᖁᔨᕗᖔᕈᑎᖓᑦ ᐃᑲᔪᖅᑎᒌᒡᓗᑎᒃ ᓴᕿᑦᑎᓪᓗᑎᒃ ᓄᓇᖅᑲᖅᑳᖅᓯᒪᔪᓂᑦ-ᐊᐅᓚᑕᐅᔪᖅ ᑲᓇᑕᒥ ᓈᓴᖅᓯᒪᔪᓂᒃ ᑎᑎᖃᓂᒡᓗ ᓄᐊᑦᑎᕕᖓ ᐊᓯᐅᖃᔪᓂᒃ, ᐃᓄᐊᖅᑕᐅᓯᒪᔪᓂᒃ ᐊᓪᓚᓂᒃ, ᐃᓄᖕᓂᑦ ᐊᒻᒪᓗ ᐊᓪᓚᐃᖓᔪᓂᒃ ᐊᕐᓇᓂᒃ, ᓂᕕᐊᖅᓵᓂᒃ, ᐊᖑᑎᕐᔭᖓᔪᑦ ᐊᒻᒪᓗ ᐊᖑᑕᐅᔭᕆᐊᖃᖅᑐᕆᔪᑦ ᐊᕐᓇᐅᔭᕆᐊᖃᖅᑐᕆᔪᑦ.
ᐊᐅᐸᑦᑐᖅ ᐊᒪᐅᑎ ᐱᓕᕆᐊᒃᓴᖅ
ᐊᐅᐸᑦᑐᖅ ᐊᒪᐅᑎ ᐱᓕᕆᐊᒃᓴᖅ ᐱᓕᕆᐊᖃᒻᒪᑦ ᐃᓅᓯᓐᓂᒃ ᐊᒻᒪᓗ ᑭᙳᖑᑎᒐᔅᓴᓂᒃ ᐊᓯᐅᔨᔭᐃᓯᒪᔪᓄᑦ ᐊᒻᒪᓗ ᐃᓄᐊᑦᑕᐅᓯᒪᔪᓄᑦ ᐃᓄᐃᑦ ᐊᕐᓇᖏᓐᓂᒃ, ᓂᕕᐊᔅᓯᐊᓂᒃ, ᐊᒻᒪᓗ ᓇᓪᓕᐊᖑᓂᖏᑦ−ᐊᔾᔨᒌᔭᐅᒋᔭᐅᖏᑦᑐᓂᒃ ᐃᓄᐃᑦ ᖃᐅᔨᒪᔭᐅᓕᑦᑎᑦᑎᓪᓗᑎᑦ ᐱᓕᕆᐊᕆᔭᐅᖏᓐᓇᓂᖏᓐᓂᒃ ᐋᓐᓂᔅᓯᕆᓂᐅᑉ.
ᐊᒪᐅᑎ, ᐱᖅᑯᓯᒃᑯᑦ ᐃᓄᐃᑦ ᐊᕐᓇᐃᑦ ᐊᒪᐅᑎᖓ ᓴᓇᓯᒪᔪᖅ ᐊᒪᔅᓯᕕᖃᓪᓗᓂ ᐊᒫᓕᐅᑎᓗᒋᑦ ᓄᑕᕋᐃᑦ, ᐊᔾᔨᒌᓱᖑᖏᒻᒪᑕ ᓴᓇᓯᒪᓂᖏᑦ ᐊᕕᑦᑐᔅᓯᒪᓂᑦᑎᒍ ᑭᓯᐊᓂ ᐊᓯᕈᔅᓯᒪᖏᑦᑐᑦ ᑕᒻᒪᐅᑎᒋᒐᔅᓴᐅᓇᑎᒃ ᓇᓗᓇᐃᑯᑕᖏ ᐃᓄᐃᑦ ᐊᕐᓇᖏᓐᓅᖓᓂᖏᓐᓄᑦ. ᑖᓐᓇ ᐱᓕᕆᐊᒃᓴᖅ ᑕᐅᑦᑐᖃᒻᒪᑦ ᑕᓪᓕᒪᓂᒃ ᐊᒡᒐᒻᒥᓄᑦ ᓴᓇᔭᐅᓯᒪᓂᖏᓐᓂᒃ ᐊᒪᐅᑎᐅᑉ – ᑎᓴᒪᓂ ᓴᓇᔭᐅᒋᐊᙵᔅᓯᒪᔪᓂ ᐃᓕᓴᓐᓇᑦᑐᓂ ᓴᓇᓯᒪᓂᖓ ᐊᒻᒪᓗ ᐅᐱᒍᓱᒍᑎᒋᔭᐅᓪᓗᓂ ᐃᓐᓇᒪᕆᓐᓂᒃ ᐊᒻᒪᓗ ᐱᖅᑯᓯᒃᑯᑦ ᖃᐅᔨᒪᔪᓄᑦ – ᐊᑐᓂ ᓴᓇᔭᐅᓯᒪᓪᓗᑎᒃ ᐃᓄᒻᒧᑦ ᒥᔅᓱᑦᑎᒧᑦ ᑖᔅᓱᒪ ᐊᕕᑦᑐᔅᓯᒪᓂᒻᒦᕝᕕᒋᔭᖓᓂ, ᓴᖅᑭᔮᑦᑎᑦᑎᓪᓗᓂ ᓴᙱᔫᓂᖓᓂᒃ ᐊᒻᒪᓗ ᐃᓕᖅᑯᓯᒃᑯᑦ ᐱᒻᒪᕆᐅᓂᖓᓂᒃ ᐃᓄᐃᑦ ᐊᕐᓇᖏᑕ ᐊᒻᒪᓗ ᓄᓇᓕᖏᑖ.
