ᐃᑉᐱᒍᓱᑦᓯᐊᕐᓂᕐᒥᑦ ᐱᖅᑯᓯᕐᒥᑦ, ᓴᐳᔾᔨᓂᕐᒥᑦ ᓯᕗᓂᑦᓴᑎᓐᓂᒃ

ᐃᓄᐃᑦ ᑕᐱᕆᓴᑦ ᑲᓇᑕᒥ (ITC) ᐊᕐᕌᒍᑕᒪᑦ ᑕᒪᐃᑎᒍᑦ ᑲᑎᒪᓂᖃᖅᑎᓪᓗᒋᑦ, ᑲᑎᒪᔩᑦ ᐊᖏᖃᑎᒌᓚᐅᖅᑐᑦ ᓴᖅᑮᓂᕐᒥᑦ ᑲᓇᑕᒥ ᐃᓄᓐᓂᒃ ᐊᕐᓇᓂᑦ ᑲᑐᔾᔨᖃᑎᒌᒥᑦ (IWA).

ᑲᑎᙵᔪᑦ ᐃᓚᒋᔭᐅᓪᓗᑎᒃ ᔩᓚ ᐊᓕᖅᑲᑐᖅᑐᖅ ᒫᔅ-ᑕᐃᕕᔅ, ᒥᐊᓕ ᓯᓚᑦ, ᒥᐊᓕ ᓴᐃᒪᓐ, ᓕᐊ ᑕᐃᔭᓐᑯᐊᑦ, ᒥᓂ ᕗᕇᑦᒪᓐ, ᐄᑕ ᑲᓇᔪᒃ, ᐊᓂ ᐸᓪᓗᖅ, ᐱᐊᑎ ᐳᕉᔅᑐ, ᐊᒻᒪ ᒦᑲ ᕿᓚᕝᕙᖅ ᐃᓂᓪᓚᑦᓴᐃᓕᓚᐅᖅᓯᒪᔪᖅ ᓄᑖᕐᒧᑦ ᑲᑐᔾᔨᖃᑎᒌᒧᑦ.

ᐸᐅᒃᑑᑎᑦ ᑲᑐᔾᔨᖃᑎᒌᖑᓕᓚᐅᖅᑐᑦ ᐊᒻᒪ ᑮᓇᐅᔭᖅᑖᖅᑎᑕᐅᓪᓗᑎᒃ. ᓯᕗᓪᓕᖅᐹᖅ ᐊᓪᓚᕝᕕᒃ ᓴᖅᑭᑕᐅᓚᐅᖅᑐᖅ ᒪᓕᒐᓕᐅᕐᕕᔾᔪᐊᖅ ᖃᓂᒋᔭᖓᓂ, ᐊᒻᒪ ᔩᓚ ᐊᓕᖅᑲᑐᖅᑐᖅ ᒫᔅ-ᑕᐃᕕᔅ ᓯᕗᓪᓕᖅᐹᒥᑦ ᐊᖏᔪᖅᑳᕆᔭᐅᓕᓚᐅᖅᑐᖅ.

ᐸᐅᒃᑑᑎᒃᑯᑦ ᐊᖏᖅᑕᐅᓚᐅᖅᑐᑦ ᓂᕈᐊᕈᓐᓇᖅᓱᑎᒃ ᑲᑎᒪᔨᐅᖃᑕᐅᓂᕐᒥᑦ ATII-ᑯᓐᓂ, ᓂᐱᖁᑎᒋᔭᐅᔪᓂᕐᒥᑦ ᐃᓄᓐᓂᒃ ᐊᕐᓇᓂᑦ ᐊᐅᓚᑦᓯᓂᕐᒧᑦ ᐊᔪᕈᓐᓃᖅᓴᓂᕐᒧᑦ. ᐋᓐᓂᐊᖃᖅᑕᐃᓕᒪᓂᕐᒧᑦ ᑲᒪᔨᐅᓂᕐᒧᑦ ᐃᓂᖓ ᓅᑕᐅᓚᐅᖅᑐᖅ ᐃᓄᐃᑦ ᑕᐱᕆᓴᒃᑯᑦ ᑲᓇᑕᒥᒃᑯᓐᓂ, ᑐᕌᒐᖃᖅᓱᑎᒃ ᑕᒪᒃᑯᓂᖓᒐᓚᒃ ᓲᕐᓗ ᐊᓯᐱ, ᓱᕐᕋᕐᓇᖅᑐᓂᑦ ᐊᑐᓂᕐᓗᓂᕐᒥᑦ, ᐊᒻᒪ ᓇᔾᔨᔪᓄᑦ ᐃᕐᓂᓯᒪᓕᖅᑐᓂᓪᓗ ᑲᒪᑦᓯᐊᕐᓂᕐᒥᑦ.

ᐸᐅᒃᑑᑎᑦ ᐊᒻᒪ ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᑯᐊᐳᕇᓴᓐ ᓴᖅᑮᔪᓐᓇᖅᓯᓚᐅᖅᑐᑦ ᐃᑲᔪᕐᑎ, ᐃᑲᕐᕋᓕᒫᒧᑦ ᑕᓚᕖᓴᒃᑰᕈᑎ ᐃᕐᓂᓱᑦᓰᔨᐅᓂᕐᒥᑦ ᐊᒻᒪ ᐃᕐᓂᓱᓐᓂᕐᒥᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐸᐅᒃᑑᑎᒃᑯᑦ ᓂᕈᐊᕈᓐᓇᖅᓯᓚᐅᖅᑐᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᑲᑎᒪᔨᖏᓐᓂᒃ.

ᓄᓇᓕᓐᓂᒃ ᑲᑎᒪᓂᐅᔪᑦ ᑐᕌᒐᖃᓚᐅᖅᑐᑦ ᓄᑕᖅᑲᓂᑦ ᐸᖅᑭᓂᕐᒥᑦ.

ᐃᔨᕋᕐᑐᐊᖃᕈᓐᓃᕐᓂᖅ: ᐃᔨᕋᖅᑐᖅᑕᐅᓂᖓ ᐅᖃᐅᓯᑦᑕᐃᓕᒪᓂᖓᓗᓂ ᓄᑕᖅᑲᑦ ᖁᓄᔪᓐᓂᐊᖅᑕᐅᓂᖏᓐᓂᒃ ᐃᓄᐃᑦ ᓄᓇᓕᖏᓐᓂᒃ ᓴᖅᑭᑕᐅᓚᐅᖅᑐᖅ.

ᐸᐅᒃᑑᑎᑦ ᐊᖏᔪᖅᑳᖓᑦ ᒫᑕ ᕙᓕᐅᕆᑎ ᑎᒃᑯᐊᖅᑕᐅᓚᐅᖅᑐᖅ ᑲᓇᑕᒥ ᑲᑎᒪᔨᓂᑦ ᐋᓐᓂᖅᓯᕆᓂᕐᒥᑦ ᐊᕐᓇᓂᑦ.

ᐸᐅᒃᑑᑎᑦ ᓯᕗᓪᓕᖅᐹᒥᑦ ᐊᕐᕌᒍᑕᒫᖅᓯᐅᑎᒥᑦ ᑲᑎᒪᑎᑦᓯᔪᑦ ᒪᒃᑯᑦᑐᒥᑦ ᑭᒡᒐᖅᑐᐃᔨᑕᖃᖅᓱᓂ ᐊᒻᒪ ᐃᓄᐃᑦ ᐊᓐᓄᕌᕈᓯᖏᓐᓂᒃ ᖁᙱᐊᖅᑕᐅᔪᖃᖅᓱᓂ. ᑲᑐᔾᔨᖃᑎᒌᑦ ᐱᖃᑕᐅᓚᐅᖅᑐᑦ ᓇᒻᒥᓂᖅ ᒐᕙᒪᖃᕐᓂᕐᒧᑦ ᐊᒻᒪ ᐊᖅᑯᑎᒧᑦ ᓄᓇᕗᒻᒧᑦ.

ᓯᕗᓪᓕᖅᐹᒥᑦ ᐸᐅᒃᑑᑎᒃᑯᑦ ᓇᔾᔨᐊᕆᔭᐅᔪᑦ ᐃᒥᕈᑕᐅᖃᑦᑕᕐᓂᑰᔪᑦ ᐊᑲᐃᓪᓗᐊᕈᑎ (FASD) ᐃᑲᔫᑎᑦᓴᑦ ᓴᖅᑭᑕᐅᓚᐅᖅᑐᑦ: ᓇᔾᔨᐊᑦ ᐃᒥᐊᓗᒻᒧᑦ ᐊᑦᑐᖅᑕᐅᓯᒪᓂᖏᑦ: ᐃᑲᔫᑎᑦᓴᖅ ᐃᓄᐃᑦ ᓄᓇᓕᖏᓐᓄᑦ.

ᐃᓛᒃᑰᖓᔪᒥᑦ ᑎᑎᕋᖅᓯᒪᔪᑦ ᐸᐅᒃᑑᑎᒃᑯᑦ ᓱᕙᒎᖅ ᐱᕙᓪᓕᐊᔪᑦ ᑎᑎᖅᑲᖅ ᓴᖅᑭᑕᐅᓚᐅᖅᑐᖅ ᐱᔾᔪᑎᖃᖅᓱᓂ ᐋᓐᓂᖅᓱᖅᑕᐅᖃᑦᑕᕐᓂᖏᓐᓂᒃ ᐃᓕᓐᓂᐊᖅᑎᐅᖃᑦᑕᓚᐅᖅᑐᑦ ᔫᓯᐱ ᐴᓂᐊ ᐃᓕᓐᓂᐊᕐᕕᖓᓂ ᐊᒻᒪ ᑐᑭᑎᐅᓪ ᕼᐋᓪᒥᑦ ᐃᒡᓗᓕᒑᕐᔪᕐᒥᑦ. ᐊᑐᐃᓐᓇᐅᓚᐅᖅᑐᖅ ᐱᕙᓪᓕᐊᔪᓂᑦ ᑲᑎᒪᓂᐅᔪᒥᑦ ᐱᓯᑉ ᕈᓕᐅᒧᑦ ᐃᒡᓗᓕᒻᒥᑦ ᒪᒥᐊᓐᓂᖃᖅᑎᓪᓗᒍ. ᖄᒃᑲᓐᓂᐊᒍᑦ 5,500-ᓂᒃ ᑎᑎᕋᖅᓯᒪᔪᓂᑦ ᐃᓕᔭᐅᓚᐅᖅᓯᒪᔪᑦ ᒫᑦᓯ 1, 1996-ᒥᑦ, ᓄᓇᑦᓯᐊᕐᒥᑦ ᐱᕙᓪᓕᐊᔪᓂᑦ ᐊᑭᖃᙱᑦᑐᓐᓂᑦ.

ᐊᖅᑯᑎ ᐃᒻᒥᓂ ᐱᓕᕆᒍᓐᓇᖅᓯᓂᕐᒥᑦ ᐱᓕᕆᐊᑦᓴᖅ ᐊᑐᐃᓐᓇᐅᑎᑦᓯᓚᐅᖅᑐᖅ ᐃᓄᓐᓂᒃ ᐊᕐᓇᓂᑦ ᐱᓕᒻᒪᑦᓴᐃᓂᕐᒥᑦ ᐊᔪᕈᓐᓃᖅᓴᑎᑕᐅᓂᕐᒥᑦ ᐊᓐᓄᕋᔾᔨᐅᕐᓂᕐᒥᑦ ᐊᒻᒪ ᓂᐅᕐᕈᑎᖃᕋᓱᐊᕐᓂᕐᒥᑦ.

ᐃᓄᓐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᐊᒐᓕᐅᕐᓂᕐᒧᑦ ᑲᑎᒪᓂᖃᓚᐅᖅᑐᑦ ᐋᑐᕚᒥᑦ.

ᐸᐅᒃᑑᑎᒃᑯᑦ ᑎᒥᐅᑉ ᐊᓐᓇᐅᒪᔾᔪᑎᖃᕈᓐᓃᕐᓂᖓᓄᑦ/ᐊᓴᐱᒧᑦ ᐱᓕᕆᐊᑦᓴᖓᓄᑦ ᐃᖅᑲᓇᐃᔭᖅᑎᐅᔪᑦ ᐱᓕᕆᓚᐅᖅᑐᑦ ᓴᖅᑮᓂᕐᒥᑦ ᑲᓇᑕᒥ ᑎᒥᐅᑉ ᐊᓐᓇᐅᒪᔾᔪᑎᖃᕈᓐᓃᕐᓂᖓᓄᑦ/ᐊᓯᐱᒧᑦ ᐱᓕᕆᖃᑎᒌᑦ (CIHAN).

ᐸᐅᒃᑑᑎᒃᑯᑦ ᐱᓕᕆᖃᑎᖃᓚᐅᖅᑐᑦ ᑎᒍᔭᐅᒪᕕᓐᓂ ᐱᔨᑦᓯᕋᐅᑏᑦ ᑲᓇᑕᒥ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᖃᐅᔨᓴᕐᓂᕐᒥᑦ ᑎᒍᔭᐅᓯᒪᔪᓂᑦ ᐊᒻᒪ ᓄᓇᓕᒻᒥ ᐅᑎᖅᐸᓪᓕᐊᔪᓄᑦ ᐱᔭᐅᔭᕆᐊᓕᓐᓂᒃ ᐃᓄᓐᓄᑦ ᐱᕋᔭᑦᓯᒪᔪᓄᑦ.

ᐃᓄᐃᑦ ᐊᕐᓇᐃᑦ ᖃᐅᑉᐸᒧᑦ ᑐᕌᒐᖃᓚᐅᖅᑐᑦ ᐃᑲᔪᕐᓂᕐᒥᑦ ᐊᒥᓲᓂᖅᓴᓂᑦ ᐃᓄᓐᓂᒃ ᐊᕐᓇᓂᑦ ᓇᒻᒥᓂᖅ ᐃᖅᑲᓇᐃᔭᓕᕐᓂᕐᒧᑦ ᐊᒻᒪ ᑮᓇᐅᔾᔭᓴᓐᓂᖅᓴᐅᓕᕐᓗᑎᒃ ᐃᒻᒥᓂ.

ᐸᐅᒃᑑᑎᑦ ᐊᓯᔾᔩᓚᐅᖅᑐᑦ ᐊᑎᖓᓂ ᑖᑦᓱᒧᖓ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.

ᐸᐅᒃᑑᑎᒃᑯᑦ ᑭᒡᒐᖅᑐᐃᔨᖃᓐᓂᖅᓴᐅᓕᓚᐅᖅᑐᑦ ᐃᓄᓐᓂᒃ ᒪᒃᑯᑦᑐᓂᑦ ᐊᒻᒪ ᖃᓪᓗᓈᓂᕐᒥᐅᑕᕐᓂᒃ ᐃᓄᓐᓂᒃ ᑲᑎᒪᔨᖏᓐᓂᒃ.

ᐸᐅᒃᑑᑎᒃᑯᑦ ᐱᓕᕆᓚᐅᖅᑐᑦ ᐱᓕᕆᐊᑦᓴᒥᑦ ᑕᐃᒎᓯᖃᖅᑐᒥᑦ ᒪᒃᑯᒃᑐᑦ ᐊᒻᒪ ᓄᓇᓕᒻᒥ ᖃᓄᐃᓕᐅᕆᐊᕐᓂᕐᒥᑦ ᐳᕕᕐᓂᑐ, ᓄᓇᕕᒻᒥ, ᐊᒻᒪ ᐊᒃᖤᕕᒃ, ᓄᓇᑦᓯᐊᕐᒥ.

ᐊᓂᒍᖅᑕᐅᓚᐅᖅᑐᖅ ᒪᕐᕉᓐᓂᒃ ᐅᖃᐅᓯᓕᒃ (ᖃᓪᓗᓈᑎᑐᑦ/ᐃᓄᒃᑎᑐᑦ) ᐅᖃᓕᒫᒍᖅ ᑕᐃᒎᓯᓕᒃ Our Ancestors Never Smoked (ᓯᕗᓪᓕᕕᓂᖅᐳᑦ ᓱᐴᖅᑐᖃᑦᑕᓚᐅᙱᑦᑐᑦ).

ᐸᐅᒃᑑᑎᒃᑯᑦ ᓴᖅᑮᓚᐅᕐᒥᔪᑦ ᑲᓇᑕᒥ ᐸᕐᓇᐅᑎᐅᔪᖅ ᐊᑐᕐᓂᕐᓗᒃᑕᐃᓕᒪᑎᑦᑎᓂᕐᒥᒃ ᐃᓄᐃᑦ ᓄᓇᓕᖓᓐᓂ.

ᐸᐅᒃᑑᑎᒃᑯᑦ ᓴᖅᑮᓚᐅᖅᓯᒪᔪᑦ Born on the Land with Helping Hands: The Inuit Women’s Guide to a Healthy Pregnancy (ᓄᓇᒥᑦ ᐃᓅᓂᑯ ᐊᒡᒐᒃᑲᓗ ᐃᑲᔪᕈᓐᓇᖅᑐᑦ: ᐃᓄᐃᑦ ᐊᕐᓇᐃᑦ ᐃᑲᔫᑎᑦᓴᖓ ᓇᔾᔨᑦᓯᐊᓂᕐᒧᑦ), ᐱᓕᕆᓂᒃᑯᑦ ᐱᖅᑯᓯᑐᖃᒃᑯᑦ ᐃᕐᓂᓱᑦᓰᓂᕐᒥᑦ ᖃᐅᔨᒪᔭᐅᔪᓂᑦ ᖃᓪᓗᓛᑦ ᐋᓐᓂᐊᓯᐅᕐᓂᖏᓐᓄᑦ.

ᑮᓇᐅᔭᖃᖅᑎᑕᐅᓪᓗᑎᒃ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔩᑦ ᑐᑦᑕᕐᕕᖓᓂ ᑲᓇᑕᒥ, ᐸᐅᒃᑑᑎᒃᑯᑦ ᓴᖅᑮᓚᐅᖅᑐᑦ ᐊᒥᓱᓂᑦ ᑎᒥᐅᑉ ᐊᓐᓇᐅᒪᔾᔪᑎᖏᓐᓄᑦ/ᐊᓯᐱᒧᑦ ᐃᑲᔫᑎᑦᓴᓂᑦ, ᐃᓚᒋᓪᓗᓂᐅᒃ Louisa’s Story (ᓗᐃᓴᐅᑉ ᐅᓂᒃᑳᖓ), ᕿᓪᓕᖅᑐᖅ ᐅᔾᔨᕈᓱᓕᖅᑎᑦᓯᓂᕐᒥᑦ ᑎᒥᐅᑉ ᐊᓐᓇᐅᒪᔾᔪᑎᖏᓐᓂᒃ.

ᐸᐅᒃᑑᑎᒃᑯᑦ ᐱᔭᕇᖅᓯᓚᐅᕐᒥᔪᑦ ᐊᒥᒐᕆᔭᐅᔪᓂᑦ ᖃᐅᔨᓴᕐᓂᕐᒥᑦ ᐱᔨᑦᓯᕈᑎᓂᑦ ᐃᓄᓐᓄᑦ ᓱᕈᓯᕐᓄᑦ ᑕᐅᑐᑦᓯᒪᔪᓂᑦ ᐅᕝᕙᓘᓐᓃᑦ ᑕᑯᖃᑦᑕᖅᑐᓂᑦ ᐋᓐᓂᖅᓯᕆᓂᕐᒥᑦ, ᑮᓇᐅᔭᖃᖅᑎᑕᐅᔪᖅ ᒪᓕᒐᓕᕆᔨᒃᑯᓐᓂ ᑲᓇᑕᒥ.

ᐃᑲᔪᖅᓱᖅᑕᐅᓪᓗᑎᒃ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᑲᓇᑕᒥ, ᐸᐅᒃᑑᑎᒃᑯᑦ ᐊᑐᓕᖅᑎᑦᓯᓚᐅᖅᑐᑦ ᑭᐊᑭᐊ ᐸᓂᐊ, ᓄᓇᒥ ᐃᑲᔪᖅᓱᖅᑕᐅᓂᒃᑯᑦ ᐱᓕᕆᐊᖑᔪᖅ ᐃᓄᓐᓄᑦ ᐊᕐᓇᓄᑦ.

ᐸᐅᒃᑑᑎᒃᑯᑦ ᐱᔭᕇᖅᓯᓚᐅᖅᑐᑦ ᖃᓄᖅ ᐊᔾᔨᒌᙱᑉᐱᑕ? ᓇᓗᓇᐃᖅᓯᓂᕐᒥᑦ ᐃᓄᐃᑦ ᐊᕐᓇᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓯᕗᓪᓕᐅᑎᒋᐊᓕᓐᓂᒃ.

ᐸᐅᒃᑑᑎᒃᑯᑦ ᓅᓕᓚᐅᖅᑐᑦ ᐊᖏᓂᖅᓴᓄᑦ ᐊᓪᓚᕝᕕᓄᑦ ᐃᖅᑲᓇᐃᔭᖅᑏᑦ ᐊᒥᓲᓕᕐᓂᖏᓐᓄᑦ.

ᐸᐅᒃᑑᑎᒃᑯᑦ ᓴᖅᑮᓚᐅᖅᑐᑦ ᐃᔨᖅᓯᒪᔪᖅ ᑮᓇᖅ, ᓴᙱᔪᐊᓗᒃ ᐅᓂᒃᑳᓕᐊᖅ ᕿᓪᓕᖅᑐᓄᑦ ᐊᒻᒪ ᐃᑲᔫᑎᑦᓴᑦ ᐅᖃᓕᒫᒐᑦ ᑐᓂᐅᖅᑲᖅᑕᐅᓚᐅᖅᑐᑦ ᓄᓇᓕᓐᓂ ᐱᔨᑦᓯᕈᑎᓄᑦ, ᐃᓕᓐᓂᐊᕐᕕᓐᓄᑦ, ᐊᒻᒪ ᑐᑦᑕᕐᕕᓐᓄᑦ ᐅᖃᖃᑎᒌᓐᓂᕐᒧᑦ.

ᐸᐅᒃᑑᑎᑦ ᐱᓕᕆᔪᑦ ᐊᒻᒪ ᐊᑦᑕᕐᓇᖅᑐᒦᑎᑦᓯᖏᓐᓂᕐᒥᑦ ᐃᓄᓐᓂᑦ ᓱᕈᓯᕐᓂᑦ ᐊᒻᒪ ᒪᒃᑯᑦᑐᓂᑦ ᐱᓕᕆᐊᑦᓴᖓ ᐱᖃᑕᐅᑎᑦᓯᓚᐅᖅᑐᖅ ᐃᓄᓐᓂᒃ ᒪᒃᑯᑦᑐᓂᑦ ᑎᓴᒪᓂᑦ ᓄᓇᓕᐅᔪᓂᑦ.

ᐸᐅᒃᑑᑎᒃᑯᑦ ᖁᕕᐊᓲᑎᖃᓚᐅᖅᑐᑦ 30-ᓂᒃ ᐊᕐᕌᒍᓂᑦ ᑲᑎᓐᓂᖃᖅᓱᑎᒃ ᐋᑐᕚᒥᑦ ᓴᓇᐅᒐᖃᕐᕕᖓᓂ ᐊᒻᒪ ᐃᓯᖅᓱᑎᒃ ᐃᓚᖓᓂ II ᑖᑦᓱᒥᖓ “ᖁᕕᐊᓱᐳᖓ ᑲᑉᐱᐊᓇᖏᑐᒦᑲᒪ” ᐱᓕᕆᐊᒥᑦ ᐅᔾᔨᕈᓱᓕᖅᑎᑦᓯᓂᕐᒥᑦ ᖃᕋᓴᐅᔭᒃᑯᑦ ᐊᑦᑕᕐᓇᖅᑕᐃᓕᒪᓂᕐᒥᑦ ᓱᕈᓯᕐᓄᑦ

ᐸᐅᒃᑑᑎᒃᑯᑦ ᐱᓕᕆᐊᖓᑦ ᑳᓐᓱᒧᑦ ᐱᐅᔪᒻᒪᕆᒻᒥᑦ ᖃᐅᔨᔭᐅᓯᒪᔪᖅ ᐃᓄᐃᑦ ᓄᓇᖓᓂ ᐅᖓᑖᓂᓗ.

ᑖᓐᓇ ᐱᓕᕆᖃᑎᖃᓐᓂᖅ ᐊᖑᑎᓂᒃ ᐊᒻᒪᓗ ᓄᑲᑉᐱᐊᓂᒃ ᒥᑭᓂᖅᓴᐅᓕᖅᑎᑦᑎᓂᒻᒥᒃ ᐋᓐᓂᖅᓯᕆᓂᕐᒥᒃ ᐊᕐᓇᓂᒃ ᐊᒻᒪᓗ ᓂᕕᐊᖅᓯᐅᓂᒃ ᐱᓕᕆᐊᑦᓴᖅ ᐱᓕᕆᓚᐅᖅᑐᖅ ᐊᕐᓇᐅᓂᕐᒧᑦ ᐊᖑᑕᐅᓂᕐᒧᑦ ᑐᙵᕕᖃᖅᓱᑎᒃ ᖃᐅᔨᓴᕐᓂᕐᒥᑦ ᐋᓐᓂᖅᓯᕆᓂᒥᑦ ᐃᓄᐃᑦ ᑕᐅᑐᑦᑕᒥᒍᑦ, ᓇᓗᓇᐃᖅᓯᓪᓗᑎᒃ ᐊᒥᒐᕆᔭᐅᔪᓂᑦ ᐱᓕᕆᐊᑦᓴᓂᑦ ᐊᒻᒪ ᐱᔨᑦᓯᕈᑎᓂᑦ ᐃᓄᐃᑦ ᓄᓇᖓᓂ.

ᑭᖑᓪᓕᕐᒥᑦ ᑕᕐᕆᔮᑦᓴᖅ, ᓂᕆᐊᕐᓂᖃᖅᑐᖅ ᐊᒻᒪ ᒪᒥᓴᕐᓂᖅ, ᑲᔪᖏᖅᓴᐃᕗᖅ ᒪᒃᑯᒃᑐᓂᑦ ᐃᑲᔪᖅᑕᐅᒐᓱᐊᕐᓗᑎᒃ, ᐅᖃᐅᓯᖃᕐᓂᕐᒥᑦ ᑭᓇᑐᐃᓐᓇᕐᒥᑦ ᐊᑐᐃᓐᓇᖅᑕᖃᐃᓐᓇᖅᑐᖅ ᓈᓚᒍᒪᔪᒥᑦ. ᐊᔪᓯᓂᖃᑦᓯᐊᕐᓂᖓ ᓵᑦᑐᖅ ᓯᑯ ᑕᕐᕆᔮᑦᓴᖅ ᖄᖏᐅᑎᓚᐅᖅᑐᖅ ᓂᕆᐅᒋᔭᐅᔪᓂᑦ.

ᐱᐅᓯᒋᐊᖅᑕᐅᓗᓂ ᑮᓇᐅᔭᖅᑖᕆᔭᐅᓪᓗᐊᑕᓲᑦ ᐃᑲᔪᖅᓱᖅᑐᓂᑦ ᐊᑐᐊᒐᕐᓂᒃ, ᖃᐅᔨᓴᕐᓂᕐᒥᑦ, ᐊᒻᒪ ᑐᓴᐅᒪᔪᓕᕆᓂᕐᒥᑦ.

ᐱᖃᑕᐅᑎᑦᓯᓂᕐᒥᑦ ᐊᖑᑎᓂᑦ ᓄᑲᑉᐱᐊᓂᓪᓗ ᐋᓐᓂᖅᓯᕆᑦᑕᐃᓕᒪᓂᕐᒧᑦ ᐱᓕᕆᐊᑦᓴᖅ ᑲᔪᓯᓚᐅᖅᑐᖅ, ᐊᒻᒪ ᕿᒫᕕᖃᕆᐊᖃᕐᓂᕐᒧᑦ ᖃᐅᔨᓴᕐᓂᖃᓚᐅᖅᑐᑦ ᐃᓄᐃᑦ ᓄᓇᖓᓂ ᐱᔭᕇᖅᑕᐅᓚᐅᖅᑐᖅ.

ᑐᕌᒐᖃᖅᑐᖅ ᐊᔾᔨᒌᑎᑦᓯᓂᕐᒥᑦ ᐊᒻᒪ ᓴᙱᓂᖃᕐᓂᕐᒥᑦ, ᐋᓐᓂᐊᖃᙱᓐᓂᖅ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᖅ, ᓴᙱᓂᖅᑖᖅᑎᑦᓯᓂᕐᒥᑦ ᐃᓄᓐᓂᒃ ᐃᓚᒌᖑᔪᓂᒃ, ᐊᒻᒪ ᑐᓴᖅᑕᐅᑎᑦᓯᓂᕐᒥᑦ ᐃᓄᐃᑦ ᐊᕐᓇᐃᑦ ᓂᐱᖏᓐᓂᒃ ᓄᓇᕐᔪᐊᕐᒥᑦ ᐊᑲᐅᙱᓕᐅᕈᑎᓂᑦ.

ᐃᖃᓗᓐᓂᑦ, ᐸᐅᒃᑑᑎᒃᑯᑦ ᑲᑐᔾᔨᖃᑎᖃᓚᐅᖅᑐᑦ ᖃᒡᒋᐊᕘᑦᑯᓐᓂ ᐃᑲᔪᖅᓱᕐᓂᕐᒧᑦ ᐃᓄᓐᓂᒃ ᐃᓚᒌᓂᑦ ᐊᑦᑐᖅᑕᐅᓯᒪᔪᓂᑦ ᐃᓕᓐᓂᐊᖅᑎᐅᕙᒪᐅᖅᑐᓄᑦ, ᑭᖑᕚᕇᖑᔪᓂᑦ ᐊᑦᑐᐃᓂᐅᔪᓂᑦ ᐃᒃᓯᕋᕐᔪᐊᖅ ᐳᓛᕆᐊᖅᓯᒪᑎᓪᓗᒍ.

ᐸᐅᒃᑑᑎᒃᑯᑦ ᐱᓕᕆᖃᑎᖃᓚᐅᖅᑐᑦ ᒧᐊᕆ ᐊᒻᒪ ᒐᕙᒪᒃᑯᑦ ᓯᕗᓕᖅᑎᖏᓐᓂᒃ ᐊᑎᐅᕈᐊ-ᓂᐅ ᔩᓚᓐᒥ ᐅᖃᖃᑎᖃᕐᓂᕐᒥᑦ ᐱᕙᓪᓕᐊᔪᓕᕆᓂᕐᒥᒃ, ᓇᒻᒥᓂᖅ-ᐱᔪᒪᓂᖃᕐᓂᕐᒥᒃ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᐋᓐᓂᐊᖃᕐᓇᙱᑦᑐᓕᕆᓂᖅ ᐊᒻᒪ ᐃᓕᓐᓂᐊᕐᓂᓕᕆᓂᕐᒥᑦ.

ᐸᐅᒃᑑᑎᒃᑯᑦ ᐊᓯᔾᔨᓚᐅᖅᑐᑦ ᖁᙱᐊᖅᑎᐅᓂᕐᒥᑦ ᐱᖃᑕᐅᖏᓐᓇᓕᖅᓱᑎᒃ ᑕᐃᑲᓂ ᐃᓄᐃᑦ−ᒐᕙᒪᑐᖃᒃᑯᑦ ᑲᑐᔾᔨᖃᑎᒌᓂᕐᒧᑦ ᑲᑎᒪᔨᕋᓛᖏᓐᓂᒃ, ᓯᕗᒻᒧᑦᓯᐊᖅᓱᑎᒃ ᑲᑐᔾᔨᖃᑎᒌᓂᕐᒥᑦ.