ᔫᓇᐃᓯᐅᑉ ᓴᓇᐅᒐᖓᑕ ᒥᔅᓵᓄᑦ
ᐅᐱᒍᓱᓪᓚᕆᑦᑐᖓ ᐊᒪᐅᓯᐅᕈᓐᓇᖅᑲᐅᒐᒪ ᐊᐅᐸᖅᑐᒥᑦ ᐊᑯᓕᒻᒥᑦ ᑕᐃᒃᑯᓄᖓ ᐃᓱᒪᒋᓪᓗᒋᑦ ᓇᓂᔭᐅᓯᒪᓐᖏᑦᑐᑦ. ᑖᓐᓇ ᐊᒪᐅᑎ ᓴᓇᒍᓯᕆᔭᕗᑦ ᐃᑉᐱᐊᕐᔪᒻᒥ ᐊᒻᒪᓗ ᐅᑭᐅᖅᑕᖅᑑᑉ ᑲᓇᓐᓇᖓᓂ, ᕿᑭᖅᑖᓗᒻᒥ, ᓄᓇᕗᒻᒥ. ᓴᑭᒋᓚᐅᖅᓯᒪᔭᕋ ᑑᒑᖅ ᐊᓈᓇᒐᓗ ᖄᐱᒃ ᐱᓕᕆᖃᑎᒋᓪᓗᒋᒃ, ᐃᓕᕝᕕᓯᒪᔮᒃᑲ ᖃᓄᖅ ᐱᔭᕆᐊᖃᕐᒪᖔᖅ ᐊᔾᔨᒌᓐᖏᑦᑐᓂᓪᓗ ᐆᑦᑑᓯᐅᕐᓂᕐᒥᑦ ᓯᕗᓪᓕᒥᓂᕐᓃᓐᖔᖅᓯᒪᔪᓂᒃ ᐃᓂᓕᐅᖅᑕᐅᓯᒪᔪᓂᒃ ᐆᑦᑑᑎᓂᒃ. ᐊᐅᐸᖅᑐᖅ ᐊᑯᓕᒃ ᐊᒪᐅᑎ ᐱᐅᔪᐊᓗᒃ ᐊᐅᐸᖅᑐᒥ ᓄᐃᓚᖃᖅᑐᓂ ᓇᓴᖓ ᐊᕐᓇᖅ ᐊᒪᖓᓗ ᐅᖅᑰᑯᓪᓗᒋᑦ.
ᐱᒻᒪᕆᐅᒋᒐᒃᑯ ᐃᓕᓴᕆᔪᒪᓪᓗᒋᑦ ᑕᐃᒃᑯᐊ ᔭᒐᔅᓯᒪᔪᑦ ᐊᕐᓇᐃᑦ ᐃᓄᐃᑦ ᓱᕈᓰᓪᓗ. ᐊᑯᓂᐅᓗᐊᖅᑐᐊᓗᓪᓗ ᑭᐅᔭᐅᖅᓯᖃᑦᑕᖅᑐᑎᑦ ᑕᐃᒃᑯᐊ ᔭᒐᐃᓯᒪᔪᑦ. ᐋᓐᓂᐊᓇᖅᑐᐊᓗᒃ ᓂᓐᖓᓇᖅᑐᓂᓗ ᐅᓪᓗᒥᒧᑦ ᑐᓴᖅᑕᐅᔪᓐᓇᕐᓇᑕᓗ.
ᔫᓇᐃᓯ ᑑᕐᖔᓘᑉ ᒥᔅᓵᓄᑦ, ᐃᑉᐱᐊᕐᔪᒃ, ᓄᓇᕗᑦ
ᓈᓚᓪᓗᒍ ᐅᓂᒃᑳᖓ
ᔫᓇᐃᓯ ᐊᑕᒍᑦᓯᐊ ᑑᕐᖔᓘᔪᖓ. ᐃᓅᓚᐅᖅᓯᒪᔪᖓ ᐱᕈᕐᓂᑰᓪᓗᖓᓗ ᐃᑉᐱᐊᕐᔪᒻᒥ. ᐅᐃᒐᓗ 7−ᓂᒃ ᕿᑐᕐᖓᑦᑎᐊᕚᓗᖃᖅᑐᒍᒃ: ᑎᓴᒪᑦ ᐊᕐᓇᑦ ᒪᕐᕉᒃ ᐊᖑᑏᒃ ᐊᑕᐅᓯᕐᓗ ᑎᒍᐊᕆᓪᓗᑎᒍ. ᐃᓕᓴᐃᔨᐅᓪᓕᖅᑐᖓ ᐅᑭᐅᓄᑦ 25−ᖑᓗᐊᖅᑐᓄᑦ ᐃᓅᔭᖅ ᐃᓕᓐᓂᐊᕐᕕᖓᓐᓂ ᐃᑉᐱᐊᕐᔪᒻᒥ.
ᖁᕕᐊᒋᓪᓚᕆᑦᑕᕋ ᐃᓕᓴᐃᔨᐅᒋᐊᔅᓴᖅ. ᒥᖅᓱᕆᐅᖅᓴᑎᑕᐅᓯᒪᒐᒪ ᐱᖅᑯᓯᑦᑎᓐᓂ ᒪᓕᑦᑐᑎᑦ ᐅᖅᑰᔪᓕᐅᖃᑦᑕᕐᓗᓂ ᐊᓐᓄᕌᕐᓂᑦ ᐊᒥᕐᓂᑦ ᒥᖅᑯᓕᓐᓂᓪᓗ ᐊᓯᕙᖅᑎᓄᑦ ᐅᐃᒐᓗ ᕉᐸᓐ ᑐᕐᖔᕐᒧᑦ. ᓴᓗᒻᒪᖅᓴᐃᓪᓗᓂ ᐱᐅᖅᓱᐊᖅᑐᒋᓪᓗ ᐊᒦᑦ ᒥᖅᓱᓂᐊᖅᑕᒃᑲ. ᐃᓚᖃᖅᑐᖓ ᐊᒥᓱᐊᓗᓐᓂᒃ ᐅᐃᓐᓂᓪᓗ. ᐱᓐᓂᖅᑐᓂᑦ ᐊᕐᓇᓂᑦ ᒥᖅᓱᓲᕐᓂᑦ ᐃᓕᓴᕆᔭᐅᓯᒪᓪᓗᑎᓪᓗ ᐱᖅᑯᓯᕐᒥᓂᒃ ᐆᑦᑑᑎᖃᖅᑐᓂᒃ ᐱᐅᔪᐊᓗᓐᓂᓪᓗ ᐊᓐᓄᕌᓕᐅᓲᖑᓪᓗᑎᑦ.
ᐊᓐᓄᕌᓕᐅᕆᐊᔅᓴᓪᓗ ᐱᐅᔪᐊᓗᓐᓂ ᖁᕕᐊᒋᔭᕋ. ᐃᓕᓚᐅᖅᓯᒪᔪᖓ ᓴᑭᒋᓚᐅᖅᓯᒪᔭᕐᓂᑦ ᑑᒑᖅ ᑑᕐᖔᓗᒻᒥᑦ ᐊᓈᓇᓐᓂᓪᓗ ᖄᐱᒃ ᐊᑕᒍᑦᑎᐊᕐᒥᑦ, ᐅᑭᐅᖃᓕᖅᑐᖅ 101−ᓂᒃ ᒫᓐᓇ. ᓄᑖᕐᓂᓪᓗ ᐃᓕᖃᑦᑕᖅᓯᒪᓪᓗᖓ ᐊᔾᔨᒌᓐᖏᑦᑐᓂᓪᓗ ᐆᑦᑑᑎᖃᖃᑦᑕᖅᑐᖓ ᐃᓄᓯᓕᒫᕐᓂᑦ. ᓯᓚᑐᓂᐊᓗᒻᒥᑦ, ᐃᓕᖅᑯᓯᖏᓐᓂᓪᓗ ᐆᑦᑑᑎᖏᓐᓂᓪᓗ ᖃᐃᑦᑎᔭᐅᓯᒪᓪᓗᖓ ᓯᕗᓕᑦᑎᓐᓂ, ᐱᒋᐊᖅᑐᖓ ᐊᒪᐅᕐᓂᑦ. ᐃᓕᓴᐃᔨᑦᑎᐊᕚᓗᖃᖅᓯᒪᒐᒪ ᐃᓅᓯᕐᓂᑦ ᐅᐱᒍᓱᑦᑎᐊᖅᑐᖓ.