ᓈᓐᓯᐅᑉ ᓴᓇᐅᒐᖓᑕ ᒥᔅᓵᓄᑦ

ᐊᐅᐸᖅᑐᖅ ᐊᒪᐅᑎ ᑭᒡᒐᖅᑐᐃᔪᖅ ᐃᓚᖏᓐᓂ ᓴᐃᓕᑎᑦᑎᒍᑎᒃᑲᓐᓂᐅᓪᓗᑎᑦ ᕿᔅᓵᑦᑐᓄᑦ ᑭᒃᑯᓕᒫᓄᑦ ᐊᔅᓱᕉᑕᐅᕙᑦᑐᓄᑦ. ᓇᓪᓕᒋᓪᓗᒋᑦ ᑕᐃᒃᑯᐊ ᐃᓚᐃᖅᑐᒥᓃᑦ ᓇᓪᓕᒋᔭᒥᓂᒃ. ᐊᐅᐸᖅᑐᖅ ᐊᒪᐅᑎ ᑲᓇᑕᒥ ᐃᖅᑲᐅᒪᑦᑎᔪᖅ ᐃᓕᓴᖅᓯᓪᓗᓂᓗ ᑕᐃᒃᑯᓂᖓ ᓇᓪᓕᒋᔭᒥᓂᒃ ᐃᓚᐃᖅᑐᒥᓂᕐᓂᑦ, ᑭᓯᐊᓂᓕ ᓯᓚᕐᔪᐊᒧᑦᑕᐅ ᑕᒪᓐᓇ ᐱᖃᓯᐅᑎᒋᐊᖃᕐᒥᔫᒐᓗᐊᖅ. ᐊᒻᒪᓗᒃᑲᓐᓂᖅ, ᑖᓐᓇ ᐊᒪᐅᑎ ᐊᓐᓄᕌᑎᐊᕆᓯᒪᒻᒪᒍ ᐊᕐᓇᐅᑉ ᐊᑐᖅᐸᑦᑕᖏᓐᓂ.

ᐆᑦᑑᑎ ᐊᑐᓚᐅᖅᑕᕋ ᐊᑐᖃᑦᑕᑎᓐᓂ ᓄᓇᖅᐸᓯᕐᒥᐅᑕᕐᓂᑦ ᐃᓄᓐᓂᑦ ᑕᐃᒪᓐᖓᓂᑐᖄᓗᒃ. ᓯᕗᓪᓕᖅᐹᖑᓪᓗᓂ ᑕᐃᒪᐃᑦᑑᓯᒪᔪᑦ ᐆᑦᑑᑎᖓᓪᓗ ᑕᑯᒋᐅᖅᑐᒍ ᐱᕈᖅᓴᓯᒪᒍᑎᒋᓪᓗᒍᓗ. ᐊᓯᖏᓐᓂ ᐊᕐᓇᐃᑦ ᐊᒪᐅᑎᖏᓐᓂ ᖃᓄᐃᓕᖓᓂᖏᓐᓂ ᖃᐅᔨᒪᓚᐅᓐᖏᑦᑐᒍᑦ, ᓄᓇᖅᐸᓯᒻᒥᐅᑕᐅᓪᓗᑕ, ᑕᑯᒐᔭᓐᖏᑦᑐᒍ ᖃᐅᔨᒪᒐᔭᕐᓇᑕᓗ ᓯᔾᔭᒥᐅᑕᐃᑦ ᐊᓯᖏᓐᓂᓪᓗ ᓄᓇᓕᒻᒥᐅᑕᕐᓂᑦ ᐊᒪᐅᓯᐅᕈᓯᖏᓐᓂ. ᓂᔾᔮᓖᑦ, ᐆᑦᑑᑎᖃᖅᑐᑦ ᑕᐃᒪᐃᑦᑐᒥᑦ ᓵᖓᓐᓂ ᑐᓄᐊᓂᓗ ᓇᓴᖓᓂᓗ ᐊᒫᕐᕕᖓᓂ.

ᓯᓚᕐᔪᐊᓕᒫᒥ, ᐊᑐᓂ ᓄᓇᓕᓐᓂᑦ, ᐃᓚᐃᖅᓯᒪᔪᐃᓐᓇᐅᒐᑦᑕ ᓇᓪᓕᒋᔭᑦᑎᓐᓂ. ᐅᕙᑦᑎᓐᓄᑦ ᐅᑎᖅᓯᒪᓐᖏᑦᑐᓂᑦ. ᐃᓐᓇᕐᓄᑦ ᐅᖃᐅᔾᔭᐅᓯᒪᒐᑦᑕ ᐃᓱᒫᓗᓗᐊᖁᔭᐅᓇᑕ, ᓴᓐᖏᔫᓇᓱᐊᕐᓗᑕ, ᒪᑭᑦᑕᐅᑎᒋᓇᓱᐊᖃᑦᑕᕐᓗᑕ ᐃᓅᓯᑦᑎᓐᓂ ᐊᔅᓱᕈᓗᐊᖁᔭᐅᓇᑕ ᓇᒻᒥᓂᖅ ᐃᓱᒪᑐᑦᑎᐊᕋᓱᐊᕐᓗᑕ ᐃᓅᓇᓱᐊᑦᑎᐊᖁᔭᐅᓪᓗᑕᓗ. ᐊᐅᐸᖅᑐᖅ ᐊᒪᐅᑎ ᑕᑯᔅᓴᐅᑎᑦᑎᔪᖅ ᐊᐅᑦᑎᓐᓂ ᐃᓅᓯᕐᒥᑦ ᑐᓂᓯᓯᒪᒻᒪᑦ, ᐃᓅᓇᓱᐊᑦᑎᐊᑲᓐᓂᕋᓱᐊᕐᓂᕐᒥᑦ ᐊᒻᒪᓗ ᓴᓐᖏᓇᓱᐊᕐᓂᕐᒥᑦ ᐃᓅᓯᑦᑎᓐᓂ.

ᓈᓐᓯ ᐳᑭᓈᖅ ᐊᐅᐸᓗᒃᑑᑉ ᒥᔅᓵᓄᑦ, ᖃᒪᓂ’ᑐᐊᖅ, ᓄᓇᕗᑦ

ᐃᓅᓚᐅᖅᓯᒪᔪᖓ ᐊᐃᐳᓗ 28, 1948 ᑕᐃᔭᒥ ᐋᕈᐊᓐᓄᐊᖅ. ᖃᓂᒋᔭᖓᓂ ᐅᖅᓱᖅᑑᖅ ᐊᑯᓐᓂᖓᓂᓗ ᐊᒻᒪᓗ ᑰᑉᐸᓯᕐᒥᑦ. ᐃᓪᓗᓕᒻᒥ (ᓄᓇᑦᑎᓐᓂ), ᑐᑦᑐᓂᑦ ᐊᓐᓄᕌᖃᖅᑐᑕ ᓴᓗᒻᒪᑦᑕᐅᑦᑎᐊᕆᐊᖃᖅᑐᓂᒃ ᕿᑐᒻᒪᓴᑦᑕᐅᑦᑎᐊᕆᐊᖃᖅᑐᓂᓪᓗ. ᐊᑎᒋᓕᐅᕈᒪᓚᐅᖅᓯᒪᒐᒪ ᑕᐃᒪᐃᑦᑐᒥᑦ ᑐᓱᖃᑦᑕᓚᐅᖅᓯᒪᒐᒪ ᐊᓯᓐᓂ ᐊᓐᓄᕌᖏᓐᓂ. ᖃᑦᑎᐅᒻᒪᖔᕐᒪᓗ ᐃᖅᑲᐅᒪᓐᖏᑦᑐᖓ, ᓇᒻᒥᓂᕉᖅ ᐊᒥᓕᕆᖃᑦᑕᕆᐊᖃᕋᔭᖅᑐᖓ (ᓴᓗᒻᒪᕐᓗᒍ, ᒪᒦᔭᕐᓗᒍᓗ ᐃᓚᖓ ᕿᑐᒻᒪᓴᕐᓗᒍᓗ) ᐱᖃᕐᓂᐊᕈᒪ. ᑐᑦᑐ ᒥᖅᑯᖓ ᐅᕕᓂᓐᓄᑦ ᐊᑦᑐᐊᓪᓗᓂ ᓯᓂᑉᐸᔪᔪᖓ. ᐅᓪᓛᒃᑯᑦ, ᐲᕆᐊᖃᖅᑐᒍ, ᓂᓪᓕᓇᕐᓂᖅᓴᐅᓪᓗᓂ ᒥᖅᑯᖃᖅᑎᓐᓇᒍ ᐅᕕᓂᓐᓄᑦ. ᐅᖃᐅᔾᔭᐅᓪᓗᖓ ᒥᖅᑯᐃᔭᕆᐊᖃᖅᑕᕋᒎᖅ (ᐃᓗᐊ ᑐᑦᑑᑉ, ᐃᒥᕐᒥᑦ ᐊᑐᕐᓗᖓ ᕿᑐᒻᒪᔅᓴᖅᐸᓪᓕᐊᓗᒍᓪᓗ. ᑕᐃᒪᓕ, ᐆᓇᖅ (ᐊᓈᓇᒐ) ᐊᔪᕆᖅᓱᐃᔾᔨᓪᓗᓂ ᐆᑦᑐᖅᑐᓂ ᐊᕝᕙᖓᓐᓂ ᐊᒥᖓᓂ ᑐᑦᑑᑉ. ᐊᕝᕙᖓᓗ ᑲᒪᒋᔭᕆᐊᖃᖅᑐᒍ ᐅᕙᖓ. ᐅᑭᐅᖃᖅᑐᖓᖃᐃ ᖁᓕᓂᑦ ᑕᐃᔅᓱᒪᓂ. ᓯᕗᓪᓕᖅᐹᑦᑎᐊᒥ ᐊᑎᒋᓕᐅᕈᑎᒋᓚᐅᖅᓯᒪᔭᕋ, ᐳᐃᒍᑦᑕᓂᖅᑲᕋ, ᑲᑉᐱᐊᓱᓚᐅᖅᓯᒪᒐᒪ ᑕᒻᒪᕐᓂᐊᖅᑐᒋᓪᓗᖓ; ᐆᑦᑐᑦᑎᐊᕐᓂᐊᖅᑐᒋᓐᓇᖓ. ᐃᑲᔪᖅᑕᐅᓚᐅᖅᓯᒪᔪᖓ ᐃᓕᓐᓂᐊᖅᑎᑕᐅᓯᓐᓈᖅᑐᖓ.

ᑐᐱᖅᑐᐸᓪᓕᐊᓪᓗᑕ, ᐅᑕᖅᑭᕙᔪᔪᒍᑦ ᐃᑲᔪᖅᐸᔪᒐᑦᑎᒍ ᐃᓐᓇᐅᔪᖅ ᐊᖏᔪᒐ ᑲᒪᓂᐊᖅᑎᓪᓗᒍ ᒥᖅᓱᓂᐊᖅᑎᓪᓗᒍᓗ ᐊᓐᓄᕌᓕᐅᕐᓗᓂ ᐊᓯᖏᓐᓄᑦ. ᐊᖏᔪᒐ, ᔫᓯᐱᒃ, ᓇᓄᕐᓗᒃ, ᖃᓪᓗᓈᖅ ᐅᕙᖓᓗ, ᐅᖃᐅᔾᔭᐅᓪᓗᑕ ᐃᑲᔪᕆᐊᖁᔭᐅᓪᓗᑕ ᐊᖏᔪᓐᓂᑦ. ᓈᓚᒐᔪᑉᐸᔪᔪᒍᑦ. ᓂᖓᐅᒐ ᑲᔪᕐᔪᒃ ᐃᑲᔪᓚᐅᖅᓯᒪᔪᖓ ᐊᓕᖅᓯᓕᐅᖅᑕᐅᑎᓪᓗᒍ ᑐᑦᑐᕋᔮᓐᓂᒃ. ᑐᐱᓚᐅᖅᑎᓪᓗᒋᑦ, ᓂᖓᐅᒐ ᒥᖅᓱᖅᑕᒥᓂᕋᒎᖅ ᑭᓗᐊᖅᑎᓂᓐᖏᒻᒪᑦ. ᐊᑕᑦᑎᐊᖅᑐᒥᓂᖅ. ᑕᐃᒫᒃ ᒥᖅᓱᕆᐅᖅᓴᑎᑕᐅᓚᐅᖅᓯᒪᔪᖓ.

ᐃᓛᓐᓂᒃᑯᑦ, ᐊᓗᖏᒃ ᑲᒦᒃ ᐱᑐᖃᕈᖅᐸᔪᒻᒪᑕ. ᐱᖅᓯᑎᓪᓗᒍ ᐃᓪᓗᕕᒐᕐᒦᑦᑐᑕ, ᐅᔾᔨᕆᓚᐅᖅᓯᒪᔮᒃᑲ ᑲᒦᒃᑲ ᐃᓯᒐᖏᒃ ᐱᑐᖃᕈᓘᓕᖅᑑᒃ. ᐅᖃᐅᔾᔭᐅᓪᓗᓂ ᑎᓱᕋᐅᑎᒋᓗᐊᖃᑦᑕᕋᒃᑭᒡᒎ ᑲᒦᒃᑲ ᐊᑐᓕᓂᐊᓘᓕᖅᑑᒃ ᐊᓗᖏᒃ. ᑕᐃᒪᐃᒻᒪᑦ, ᐊᓚᖏᖅᓴᖁᔭᐅᓚᐅᖅᓯᒪᔪᖓ ᑕᒪᒃᑮᓐᓂᒃ. ᐱᔭᕆᐊᑐᔪᐊᓘᓚᐅᖅᓯᒪᔪᖅ! ᐅᑭᐅᖃᖅᑐᖓᖃᐃ 9−ᓂᒃ ᐊᓚᖏᖅᓴᓚᐅᖅᓯᒪᔮᒃᑲ ᑲᒦᒃᑲ. ᐃᓛᓐᓂᒃᑯᑦ ᑕᒻᒪᐸᑦᑐᖓ ᐆᑦᑐᖅᑐᒋᒃ ᒥᖅᓱᖅᑐᒋᓪᓗ ᕿᐊᑦᑕᓕᖅᑯᖓ. ᕿᐊᒐᓗᐊᖅᑐᖓ ᐃᑲᔪᖅᑕᐅᕙᓚᐅᖅᓯᒪᓐᖏᑦᑐᖓ. ᒥᖅᓱᕆᐅᖅᓴᑎᑕᐅᓪᓗᖓ ᑕᐃᒫᒃ. ᐱᕈᖅᓴᓚᐅᓐᖏᑦᑐᖓᓕ ᐃᑉᐱᒋᔭᐅᓐᖏᑦᑐᕈᓗᑦᑎᑐᑦ ᐱᑦᑎᐊᖅᑕᐅᖏᑦᑐᑎᑐᓪᓘᓐᓃᑦ ᑕᐃᒪᐃᑦᑐᒋᔭᐅᓚᐅᖅᓯᒪᒐᓗᐊᖅᑐᖓ. ᑭᓯᐊᓂᓕ, ᐃᓕᓐᓂᐊᖅᑎᑕᐅᑦᑎᐊᓚᐅᖅᓯᒪᔪᖓ ᒥᖅᓱᕆᐅᖅᓴᓂᕐᒥᑦ ᐃᑲᔫᑎᐅᓂᐊᖅᑐᒥᑦ ᐅᕙᓐᓄᑦ. ᓇᓗᓇᕈᓐᓃᓚᐅᖅᓯᒪᔪᖅ ᑕᐃᒫᑦᑎᐊᖅ, ᐃᑲᔪᕐᓂᓕᒃ ᐅᕙᓐᓄᑦ ᐊᖅᑯᓯᐅᑦᑕᐅᑦᑎᐊᖅᑐᖓ ᒥᖅᓱᕆᐅᕐᓂᕐᒥᑦ, ᖁᕕᐊᑉᐳᖓ ᐅᓪᓗᒥᒧᑦ.