ᐊᖏᔪᖅᑳᖅ ᑯᓪᓗ ᒪᓐᓇᒃᑕᐅᑎᒋᒃᑯᑦ ᑲᑎᖃᑎᕈᒪᕗᖅ ᒐᕙᒪᑐᖃᒃᑯᑦ ᑭᓇᒃᑯᓕᒫᓂᒃ ᐊᑦᑕᓇᒃᑐᒦᖁᓇᒋᑦ ᒥᓂᔅᑕᖓᓐᓂᒃ − ᒐᕙᒪᑐᖄᑦᑯᑦᒎᖅ ᑲᔪᓯᐅᒪᐃᓐᓇᑎᒃᓯᐊᖃᕋᓗᐊᕐᒪᑕ ᐃᓄᐃᑦ ᐊᕐᓇᖏᑦ ᐱᔪᓐᓇᐅᑎᖃᕐᑎᑕᐅᖏᓐᓇᕆᐊᖃᕋᓗᐊᕐᒪᑕ ᓇᓪᓕᐊᑐᐃᓐᓇᖅ ᐊᑦᑕᓇᕐᑐᒥᖏᑦᓯᐊᖁᓪᓗᖏᑦ
ᐋᑐᒑ, ᔫᓂ 10, 2020 – ᐅᓪᓗᒥ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᓂᓪᓕᐅᑎᖃᕐᐳᑦ ᓯᕕᓯᒃᑯᑦ ᐅᓂᒃᑲᐅᓯᕆᓯᒪᔭᖏᓐᓂᒃ ᑐᓴᕈᒪᓂᖏᓐᑐᓂᒃ ᐸᓖᓯᒃᑯᑦ ᖃᓄᐃᓐᓂᕆᓯᒪᔭᖏᓐᓂᒃ ᓄᓇᕘᒥ ᓄᓇᓕᖕᓂ.ᐱᔪᑦᑎᖃᕐᓱᑎᒃ ᓄᓇᕘᒥ ᒪᓕᒐᓕᕆᓂᕐᒧᑦ ᑲᑎᒻᒪᔨᖏᑦᓄᑦ ᑎᑎᕋᖅᑲᖏᓐᓂ ᐸᓖᓯᑯᓐᓂᑦ ᓈᒻᒪᓴᕐᑐᖃᕐᑎᓐᓇᒍ ᖃᐅᔨᓴᕐᑎᖏᓐᓄᑦ ᑎᑎᕋᕐᑕᒥᓃᑦ, ᖃᐅᔨᔪᖃᓚᐅᕐᒪᑦ ᑕᐸᐃᕐᓇᕐᑐᓂᒃ 30 ᐅᖓᑖᓃᑦᑐᓂᒃ ᐸᓖᓯᑯᓐᓂᑦ ᐸᓯᑦᓯᓯᒪᔪᓂᒃ ᐱᑦᓯᐊᖏᑦᑐᒥᓂᐅᓂᕋᕐᑕᐅᑎᓪᓗᒋ, ᐊᓐᓂᕐᑎᕆᔪᒥᓂᐅᓂᕋᕐᑕᐅᑎᓪᓗᒋ ᐊᒻᒪ ᓱᒃᑯᔨᐊᖃᓐᓂᕋᑕᒥᓂᐅᑎᓪᓗᒋ ᐃᓄᒃᓂᒃ ᐱᓗᐊᕐᑐᒥ ᐊᕐᓇᓂᒃ. ᕇᐱᑲ ᑯᓪᓗ ᐅᖃᓚᐅᕐᑐᖅ ᐃᓅᒃᓱᖓ ᐊᕐᓇᐅᓪᓗᖓᓗ ᐊᒻᒪ ᐸᐅᒃᑑᑎᑦᑯᓐᓄᑦ ᐊᖏᔫᖅᑳᕆᔭᐅᓪᓗᖓᓗ ᐊᑲᕐᕆᔪᓐᓂᕐᓯᒪᔪᒻᒪᕆᐊᓘᕗᐊᖓ ᐊᒻᒪ ᖁᕕᐊᓱᖏᑦᑐᒻᒪᕆᐊᓗᓕᕐᓱᖓᓗ ᐱᑦᔪᑎᒋᑦᓱᒋ ᓯᕖᓰᒃᑯᑦ ᐅᓂᒃᑲᐅᓯᓕᐊᕆᓯᒪᔭᖏᓐᓂᒃ ᐸᓖᓯᓕᕆᓂᕐᒧᑦ ᓄᓇᕘᒥ. ᐸᓖᓯᒃᑯᑦ ᖃᓄᐃᓘᕐᓂᕆᓯᒪᔭᖏᑦ ᐱᕋᔭᒃᓂᐅᒻᒪᑕ ᐊᒻᒪ ᑭᓇᑐᐃᓐᓇᒧᑦ ᐱᔪᓐᓇᐅᑎᒋᔭᐅᔪᓂᒃ ᒪᓕᒐᕐᓂᒃ ᒪᓕᖑᓐᓂᕐᓯᒪᓪᓗᑎᒃ. ᑎᓕᐅᕆᓕᕐᐳᖓ ᒐᕙᒪᑐᖃᒃᑯᑦ ᑭᓇᒃᑯᓕᒫᓂᒃ ᐊᑦᑕᓇᒃᑐᒦᖁᓇᒋᑦ ᒥᓂᔅᑕᖓᓐᓂᒃ ᕕᐅ ᐱᓕᐅᒥᒃ ᕿᓚᒻᒥᐅᔪᒃᑯᑦ ᑲᑎᖃᑎᒋᔪᒪᑦᓱᒍ ᓇᓗᓇᕐᓯᖃᑎᒋᔪᒪᓪᓗᒍ ᒐᕙᒪᑐᖃᑦᑯᑦ ᖃᓄᖅ ᑲᒪᓂᐊᕐᒪᖔᑕ ᐳᕿᕐᑎᓕᒃᑯᑦ ᐅᕕᓂᖃᑎᒋᖏᑕᒥᓂᒃ ᐅᒋᐊᖑᖃᑦᑕᕐᓂᖏᓐᓂᒃ ᐸᓖᓯᐅᑎᓪᓗᒋᑦ ᓄᓇᕘᒥ.
ᓯᕖᓰᒃᑯᑦ ᐅᖃᐅᓯᖃᓚᐅᖅᑯᑦ ᖃᐅᔨᓴᕐᓂᕆᓚᐅᕐᑕᒥᓐᓂᒃ ᑭᖑᓂᐊᐱᐊᒍ ᐳᕋᐃᒻᒥᓂᔅᑕ ᑐᕉᑕᒧᑦ ᐸᐅᒃᑑᑎᑦᑯᑦ ᐊᐱᕆᓚᐅᕐᑎᓪᓗᒋᑦ ᑭᓇᐅᔭᖃᕐᑎᒃᓯᖁᔨᓪᓗᑎᒃ ᓄᑖᓂᒃ ᕿᒫᕕᓕᐅᕐᔪᑎᒃᓴᓂᒃ ᐃᓄᐃᑦ ᓄᓇᖓᓐᓂᒃ ᐊᒻᒪ ᐋᑐᒑᒥ ᐃᓄᖕᓄᑦ ᐊᕐᓇᓄᑦ ᐊᒻᒪ ᓱᕈᓰᕐᓄᑦ ᕿᒫᕙᒃᑎᓪᓗᒋᑦ ᐊᓐᓂᑎᕐᑕᐅᕙᒃᓂᕐᒥᑦ.
ᔭᓇᕈᐊᒥᓂᑦ ᐱᒋᐊᕐᓱᑎᒃ ᐸᐅᒃᑑᑎᑦᑯᑦ ᐱᓇᓱᐊᖅᑲᑎᖃᑦᓯᐊᓕᓚᐅᕋᓗᐊᕐᒪᑕ ᐳᕿᕐᑎᓕᒃᑯᑦ ᐊᖏᔪᖅᑳᖓᓐᓂᒃ ᐳᕆᓐᑕ ᓘᑭᒥᑦ ᐱᓇᓱᐊᖃᑦᒋᔪᒪᑦᓱᒋᑦ ᑲᔪᓯᒃᑲᐃᓂᕐᒥᑦ ᐸᐅᒃᑑᑎᑦᑯᑦ ᐊᑐᓕᕐᑕᐅᖁᔭᖏᓐᓂᒃ ᐱᓕᕆᓚᐅᕐᑎᓪᓗᒋᑦ, ᐱᓕᕆᐊᒥᒍᑦ ᖃᐅᔨᓚᐅᕐᒪᑕ ᐸᓖᓯᒃᑯᑦ ᐅᕕᓂᖃᑎᒋᖏᑕᒥᒍ ᐅᒋᐊᖑᖃᑦᑕᕐᓂᖏᓐᓂᒃ ᑕᒪᑐᒧᖓ ᐳᕿᕐᑎᓕᒃᑯᑦ ᑭᐅᑦᔪᕆᓚᐅᕐᑕᖏᓐᓂᒃ ᑎᑎᕋᕐᓯᒪᔪᒧᑦ ᐊᓐᓇᐃᑦ ᐊᓐᓂᕐᑎᕐᓂᑕᐅᕙᓐᓂᖏᒃᓄᑦ ᐃᓄᐃᑦ ᓄᓇᖓᓐᓂ. ᐸᐅᒃᑑᑎᑦᑯᑦ ᐳᕿᕐᑎᓕᒃᑯᓐᓂᒃ ᐊᐱᕆᓯᒪᕗᑦ ᓴᖅᑭᖃᑎᒋᔪᒪᑦᓱᒋᑦ ᐊᖏᖃᑎᒋᑦᔪᑎᒥᒃ ᑐᑭᓯᐅᒪᖃᑎᒋᓐᓂᕐᒥᑦ ᑕᒪᓐᓇ ᐃᓱᒫᓗᑎᒻᒪᕆᐅᔪᖅ ᑲᒪᒋᔭᐅᑦᑕᐅᑎᒋᒋᐊᖃᓐᓂᖓᓄᑦᓗ.
ᕆᐱᑲ ᑯᓪᓗ ᐅᖃᓚᐅᕐᑐᖅ ᐳᕿᕐᑎᓕᒃᑯᑦ ᐋᔨᖃᑎᒋᓕᓚᐅᕋᑦᑎᒍ ᐱᑦᔪᑎᒋᓪᓗᒋᑦ ᐃᓄᐃᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᐱᑦᓯᐊᕐᑕᐅᖃᑕᖏᓐᓂᖏᑦ ᑕᒪᓐᓇ ᓄᓇᕘᓕᒫᒥ ᑲᔪᓯᐅᒪᐃᓐᓇᕐᑐᐊᓗᒃᒪᑦ. ᑕᐃᒃᑯᐊ ᐊᓐᓂᑎᕐᑕᐅᕙᒃᑐᑦ ᐅᖃᐅᑎᕙᒃᑲ ᐊᑐᕐᓯᒪᔮᓗᓯ ᐃᓱᒪᐃᓪᓕᕈᑎᐊᓗᒋᓯᒪᒐᒃᑯ. ᐸᐅᒃᑑᑎᑦᑯᑦ ᐃᓕᒃᓯᓐᓂᒃ ᐃᑉᐱᒍᓱᒃᐳᑦ ᐊᒻᒪ ᑲᔪᓯᐅᒪᐃᓐᓇᕐᓂᐊᓱᑎᒡᓗ ᓇᓗᓇᐃᕐᓯᖃᑦᑕᓂᕐᒥᓐᓂᒃ ᑲᒪᑦᔪᓯᐅᒋᐊᖃᕐᑐᓂᒃ ᐊᒻᒪ ᑭᓇᐅᔭᖃᕐᑎᑕᐅᒋᐊᖃᓐᓂᖏᓐᓄᑦ ᑲᒪᑦᔪᑎᒃᓴᓂᒃ ᐅᕕᓂᖃᑎᒋᖏᑕᒥᓐᓂᒃ ᐅᒋᐊᖑᖃᑦᑕᑐᓂᒃ ᐊᒻᒪ ᐸᓖᓯᒃᑯᑦ ᐊᓐᓂᕐᑐᐃᕙᓐᓂᖏᓐᓂᒃ ᐃᓄᐃᑦ ᓄᓇᖏᓐᓂ.
ᒫᓐᓇᑯᑦ ᐸᐅᒃᑑᑎᑦᑯᑦ ᐋᔨᖃᑎᖃᖅᑯᑦ ᒐᕙᒪᑐᖃᒃᑯᑦ ᓄᓇᖃᖅᑳᕐᓯᒪᔪᓄᑦ ᐱᓇᓱᐊᖃᑦᒋᓐᓂᕐᒧᑦ ᐊᒻᒪ ᐅᑭᐅᕐᑕᕐᑐᓕᕆᔨᒃᑯᓂᓐᓂᒃ ᐋᖅᑭᔪᒪᓪᓗᑎᒃ ᐃᓄᖕᓄᑦ ᑐᕌᖓᔪᓂᒃ ᑲᓇᑕᓕᒫᒥ ᐊᑐᕐᑕᐅᒐᔭᕐᑐᓂᒃ ᐱᑦᔪᑎᒋᓪᓗᒋᑦ ᐊᑐᓕᕐᑕᐅᖁᔭᐅᓯᒪᔪᑦ ᑎᑎᕋᕐᓯᒪᔪᑦ ᐅᓂᒃᑲᓕᐊᕆᔭᐅᓯᒪᑎᒡᓗᒋᑦ ᑭᓪᓕᓯᓂᐊᕐᑐᖃᓚᐅᕐᑎᓪᓗᒍ ᔭᒐᐃᔭᐅᓯᒪᔪᑦ ᐊᒻᒪ ᑐᖁᑕᐅᓯᒪᔪᑦ ᐊᕐᓇᐃᑦ ᐱᑦᔪᑎᒋᓪᓗᒋᑦ. ᑲᒪᓪᓗᐊᑕᕐᑐᑦ ᐱᓇᓱᐊᖃᑎᒋᑦᓱᒋᑦ ᖃᓄᕐᑑᕈᖃᑎᒋᓪᓗᒋᑦ ᑕᒪᓐᓇ ᐊᓐᓂᑎᕐᑕᐅᕙᓐᓂᖏᑦ ᐃᓄᐃᑦ ᐊᕐᓇᐃᑦ ᐊᒻᒪ ᓱᕈᓰᑦ.
ᕆᐱᑲ ᑯᓪᓗ ᐅᖃᓚᐅᕐᑐᖅ “ᓇᓗᓇᖏᑦᓯᐊᕋᓗᐊᕐᒪᑦ ᐊᑯᓂᐋᓗᒃ ᑲᒪᒋᔭᐅᒋᐊᖃᕐᓯᒪᔪᑑᖄᓗᓕᕋᓗᐊᕐᒪᑦ ᐊᕿᕚᓕᕈᑎᒃᓴᓂᑦ ᐃᓄᐃᑦ ᐊᕐᓇᐃᑦ ᐱᕕᖃᕐᑎᑕᐅᖁᓪᓗᒋ ᐊᑲᐅᖏᓕᐅᕈᑎᖃᕐᑎᓪᓗᒋᑦ. ᓰᕖᓯᒃᑯᑦ ᖃᐅᔨᓚᐅᕐᑎᓪᓗᒋᑦ ᐊᒻᒪ ᐃᓄᖕᓄᑦ ᖃᓄᐃᑦᔪᑎᐅᕋᑖᓚᐅᕐᑐᑦ ᐱᑦᔪᑎᒋᓪᓗᒋᑦ ᓄᓇᕘᒥ ᐸᓖᓯᒃᑯᓕᕆᓂᖅ ᒫᓐᓇᒃᑯᑦ ᓯᕗᓪᓕᐅᑦᔭᐅᓗᓂ ᑲᒪᒋᔭᐅᑦᑕᐅᑎᒋᒋᐊᖃᕋᓗᐊᕐᒪᑦ.”
ᕆᐱᑲ ᑯᓪᓗ ᐅᖃᓚᐅᕐᑐᖅ “ᐸᐅᒃᑑᑎᑦᑯᑦ ᖁᔭᓕᑦᔪᑎᖃᕐᐳᑦ ᓄᓇᕘᒥ ᒪᓕᒐᓕᕆᓂᕐᒧᑦ ᒥᓂᔅᑕᖓᑦ ᔩᓂ ᐃᕼᐊᓗᐊᒃ ᓇᓗᓇᐃᕐᓯᕋᑖᓚᐅᕐᒪᑦ ᓄᓇᕗᑉ ᒐᕙᒪᒃᑯᖏᑦ ᐸᓖᓯᓕᕆᓂᕐᒧᑦ ᖃᐅᔨᓴᕐᑎᒃᓯᓂᐊᕐᒪᑕ, ᐃᓱᒫᓗᓇᕐᑐᖃᓚᐅᕐᑎᓪᓗᒍ ᐳᕿᕐᑎᓕᒃᑯᓐᓂᒃ, ᐃᓄᒃ ᐊᖑᑎ ᐅᕐᕈᑎᑕᐅᓚᐅᕐᑎᓪᓗᒍ ᐃᖏᕐᕋᔫᑉ ᓄᓇᓯᐅᑎᐅᑉ ᒪᑐᖓᓄᑦ ᐸᓖᓯᒃᑯᑦ ᓄᓇᓯᐅᑎᖓᑦᑕ.”
ᐅᓂᒃᑳᓕᐊᖑᓯᒪᔪᑉ ᖃᓄᕐᑑᕐᑕᐅᒋᐊᖃᓐᓂᖏᑦᑕ ᐃᓄᐃᑦ ᐊᕐᓇᐃᑦ ᐊᓐᓂᑎᕐᑕᐅᒐᔪᓐᓂᖏᓐᓄᑦ: ᕿᒥᕐᕈᔭᐅᓚᐅᕐᑎᓪᓗᒋᑦ ᐸᓖᓯᒃᑯᑦ ᐊᑐᐊᒐᖏᑦ ᐊᒻᒪ ᖃᓄᐃᑦᔪᓯᕆᕙᒃᑕᖏᑦ ᐃᓄᐃᑦ ᓄᓇᖓᑦᓂ. ᐸᐅᒃᑑᑎᑦᑯᑦ ᐸᓖᓯᓕᕆᓂᕐᒥᑦ ᐊᓯᕈᕐᕚᓕᖁᔨᓕᓚᐅᕐᒪᑕ ᐅᑭᐅᕐᑕᐅᑐᒥ ᐱᑦᔪᑎᒋᓪᓕᒍ ᖃᓄᕐᑐᕐᑕᐅᒋᐊᖃᓐᓂᖏᑦ ᐊᓐᓂᑎᕐᑕᐅᒐᔪᓐᓂᐊᓗᖏᓐᓄᑦ ᐃᓄᐃᑦ ᐊᕐᓇᐃᑦ. ᐱᑦᔪᑎᒋᓗᐊᕐᓱᒍᓕ ᐅᓂᒃᑳᓕᐊᖑᓯᒪᔪᓂ ᑎᑎᕋᕐᓯᒪᔪᑦ 15ᖑᒻᒪᑕ ᐊᑐᓕᕐᑕᐅᖁᔭᐅᔪᒐᓗᐊᑦ ᐸᓖᓰᑦ ᓄᓇᓕᖕᓂ ᐋᓪᓚᐅᑐᐃᓐᓇᖁᓇᒋᑦ ᓄᓇᓕᖕᒥᐅᓄᑦᓕ ᐃᓚᐅᑎᑕᐅᑦᓯᐊᓂᕐᓴᐅᓕᖁᓪᓗᒋᑦ.
ᐊᑐᓕᕐᑕᐅᖁᔭᐅᓯᒪᔪᑦ ᓇᓗᓇᐃᕐᓯᓯᒪᖕᒪᑕ ᐸᓖᓰᑦ ᐃᓕᖅᑯᓯᑐᖃᓐᓂᒃ ᐅᑦᔨᓱᕐᓂᓴᐅᓕᖁᓪᓗᒋᑦ, ᑲᑎᒪᔨᕋᓛᕐᑕᖃᓪᓗᓂᓗ ᐅᖃᐅᑦᔩᒋᐊᕐᑎᓂᒃ, ᖁᐊᑦᓵᕐᑎᑕᐅᓂᒃᑯᑦ ᐱᓂᕐᓗᒃᑕᐅᓯᒪᔪᓂᒃ ᖃᐅᔨᒪᕚᓪᓕᖁᓪᓗᒋᑦᓗ, ᐊᕐᓇᐃᑦ ᐊᓐᓂᕐᑎᒃᑕᐅᕙᓐᓂᖏᓐᓄᑦ ᖃᐅᔨᒪᕚᓪᓕᖁᓪᓗᒋᑦᓗ ᐊᒻᒪ ᐊᕐᓇᐅᓂᖏᓐᓂᒃ ᐅᑦᔨᕐᓱᓂᕐᒥᑦ ᒪᓕᒐᖃᕐᓗᑎᒃ. ᐅᓂᒃᑳᓕᐊᖑᓯᒪᔪᓂ ᓇᓗᓇᐃᕐᑕᐅᓯᒪᖕᒥᔪᖅ ᐊᕐᓇᐃᑦ ᐊᓐᓂᑎᕐᑕᐅᓂᑯᐃᑦ ᐸᓖᓯᒃᑯᓐᓄᑦ ᐊᐱᕐᓱᕐᑕᐅᑎᓪᓗᒋᑦ ᐸᓪᓕᓯᑕᖃᕆᐊᖃᓐᓂᖓᓂᒃ ᐊᕐᓇᒥᒃ ᐊᒻᒪᓗ ᑭᓇᒃᑯᓕᒫᓂᒃ ᓇᓕᒧᒃᑎᒃᓯᓂᒃᑯᑦ ᑐᖓᕕᒋᓗᒍ ᐃᓄᐃᑦ ᖃᐅᔨᒪᔭᖏᑦ.
ᖃᐅᔨᓴᕐᓂᖅ ᑭᓇᐅᔭᖃᕐᑎᑕᐅᓚᐅᕐᑐᖅ ᐊᑐᐊᒐᓕᐅᕐᑎᖏᑦᑕ ᒐᕙᒪᑐᖃᒃᑯᑦ ᑭᓇᒃᑯᓕᒫᓂᒃ ᐊᑦᑕᓇᑦᑕᐃᓕᒪᑎᑕᐅᒋᐊᖃᓐᓂᖏᓐᓄᑦ ᑲᓇᑕᒥ, ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᓱᓇᒃᑯᑎᖃᕐᑎᒃᓯᓂᒃᑯᑦ ᐃᑲᔪᕐᓂᖃᓚᐅᕐᒥᔪᑦ ᐊᒻᒪᓗ ᓯᓚᑦᑐᓴᕐᕕᒃᔪᐊ ᒫᓂᑦᑑᕙᒥ. ᐅᓂᒃᑳᓕᐊᖑᓯᒪᔪᖅ ᐱᔭᒃᓴᐅᒻᒥᔪᖅ ᖃᕆᔭᐅᔭᒃᑯᑦ ᐅᕘᓇ: https://bit.ly/37gYdPf.
-30-
ᐱᕙᓪᓕᐊᔪᓕᕆᔩᑦ ᐊᐱᖅᑯᑎᓴᖃᕈᑦᓯ ᐅᑯᐊ ᐅᖃᕐᕕᔪᓐᓇᕐᑕᓯ:
ᖃᓪᓗᓈᓂ ᐊᒻᒪ ᑲᓇᑕᓕᒫᒧᖓᔪᓄᑦ ᐱᕙᓪᓕᐊᔪᓕᕆᔨᖏᑦ ᐅᖃᕐᕕᒋᔪᓐᓇᕐᑕᓯ:
ᓲᓇᓐ ᑭᖕ
613-724-1518 ;
007susanking@gmail.com
ᑲᑐᕆᓐ ᕗᐊᑎᓐ ᓕᕙᐃᕗᕆ,
613-979-8683 ;
CFL@impactcanada.com
ᐅᑭᐅᕐᑕᐅᕐᑐᒥᐅᓄᑦ ᐱᕙᓪᓕᐊᔪᓕᕆᔨᖏᓐᓄᑦ ᐅᖃᕐᕕᒋᔪᓐᓇᕐᑕᓯ:
ᐋᓐᑐᐊᓇᑦ ᕗᕆᓐᑕᒧᐊ,
613-316-8943;
abrindamour@pauktuutit.ca