ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᖏᔪᖅᑳᖓᑦ ᕇᐱᑲ ᑯᓪᓗ ᐅᓪᓗᒥ ᐅᖃᐅᓯᖃᖅᑲᐅᔪᖅ ᓄᓇᕘᒥ ᐸᐃᕆᑦᓯᓕᕆᓂᕐᒧᑦ ᐊᖏᖃᑎᒌᑦᔪᑎ ᐱᑦᔪᑎᒌᓪᓗᒍ.
ᐸᐅᒃᑑᑎᒃᑯᑦ ᖁᕕᐊᓱᒃᑐᑦ ᐊᑎᓕᐅᕐᑕᐅᖅᑲᐅᒻᒪᑦ ᐸᐃᕆᑦᓯᓕᓂᕐᒧᑦ ᐊᖏᔪᖃᒌᑦᔪᑎᐅᔪᖅ ᑲᓇᑕᐅᑉ ᐊᒻᒪ ᓄᓇᕘᑉ ᒐᕙᒪᒃᑯᖏᓐᓄᑦ. ᖁᕕᐊᓇᕐᒪᑦ $66.1 ᒥᓕᔭᖏᓐᓂᑦᑐᑦ ᒐᕙᒪᑐᖃᒃᑯᓐᓃᖔᕐᑐᑦ ᑭᓇᐅᔭᐃᑦ ᑖᒃᑯᐊ ᐊᑦᕙᖏᑦᑕ ᐊᑦᕙᖏᑦ ᐊᑑᑎᖃᓐᓂᐊᕐᒪᑕ ᐊᑭᑦᑐᕆᐊᕈᑕᐅᓗᑎᒃ ᑭᓇᐅᔭᒃᓴᐅᑎᖏᓐᓄᑦ ᐸᐃᕆᑦᓯᔨᐅᔪᑦ ᑐᕌᖓᔪᑦ ᐃᓕᓐᓂᐊᕆᐊᓕᕋᑕᕐᑐᓕᕆᔨᓄᑦ ᐊᒻᒪ ᐸᐃᕆᑦᓯᔨᓄᑦ, ᑕᒪᒃᑯᐊ ᐃᖅᑲᓇᐃᔭᕐᑏᑦ ᐊᒥᓱᓂᕐᓴᕐᔪᐊᑦ ᐊᕐᓇᐅᒻᒪᑕ, ᑕᒪᓐᓇ ᑐᓴᕈᒥᓇᕐᑐᑦ ᐅᐱᓐᓇᕋᓂ ᐱᔭᕆᐊᑐᖃᑦᑕᕐᓂᖓᓄᑦ ᐃᖅᑲᓇᐃᔭᕐᑎᑖᕋᓱᐊᕐᓂᕐᒥᑦ ᐊᒻᒪ ᓄᖅᑲᕐᑕᐃᓕᒪᑎᒃᓯᓂᕐᒥᑦ ᐃᖅᑲᓇᐃᔭᕐᑎᓂᒃ.
ᐸᐅᒃᑑᑎᒃᑯᑦ ᖁᕕᐊᓲᑎᖃᒻᒥᔪᑦ ᐱᓇᓱᐊᕐᑕᐅᓂᐊᓕᕐᒪᑦ ᐸᕆᑦᓯᖃᑦᑕᓕᕆᓂᖅ ᑕᒪᒃᑮᒃ ᐅᖃᐅᓰᒃ ᐅᑐᕐᓗᒋᒃ ᖃᓪᓗᓈᑎᑐᑦ ᐊᒻᒪ ᐃᓄᒃᑐᑦ, ᑕᒪᓐᓇ ᐊᖏᖃᑎᒋᑦᔪᑎᒥᑦᑐᖅ. ᑐᑭᓯᐅᒪᔭᐅᑦᓯᐊᕐᒪᑦ ᖃᓄᐃᖏᑦᔪᑕᐅᑦᓯᐊᕈᓐᓇᓂᕐᓴᐅᒻᒪᑦ ᓱᕈᓰᑦ ᐃᓕᓐᓂᐊᕆᐊᓕᕋᑖᕐᑎᓪᓗᒋᑦ ᐊᒻᒪ ᐱᕈᕐᐸᓪᓕᐊᑎᓪᓗᒋᑦ ᐱᒻᒪᕆᐅᓂᖓᓂᒃ ᐃᓕᓐᓂᐊᕐᑎᑕᐅᖃᑦᑕᕆᐊᖃᓐᓂᖏᓐᓂᒃ ᐃᓄᒃᑐᑦ ᐅᖃᐅᓯᑐᖃᖏᓐᓂᒃ ᐊᒻᒪ ᐃᓕᖅᑯᓯᑐᖃᖏᓐᓂᒃ. ᓄᓇᕘᒥᐅᑦ ᐊᒻᒪ ᓄᓇᓕᖏᑦ ᐱᕚᓕᕐᑎᑕᐅᓂᐊᕐᒪᑕ ᐅᖃᐅᓯᑐᖃᖏᑦ ᐊᒻᒪ ᐃᓕᖅᑯᓯᑐᖃᖏᑦ ᐱᒻᒪᕆᐅᑎᑕᐅᑉᐸᑦ ᐊᐅᓚᑦᓯᑦᔪᑕᐅᑎᓪᓗᒍ ᐸᐃᕆᑦᓯᔨᓄᑦ.
ᑭᓯᐊᓂᓕᑦᑕᐅᖅ ᐸᐅᒃᑑᑎᒃᑯᑦ ᐊᑲᕐᓴᖏᑦᑐᑦ ᐊᖏᖃᑎᒌᔪᑎᑖᖅᑲᐅᒥ ᓇᓗᓇᐃᕐᓯᔪᖃᖕᖏᒻᒪᑦ ᑭᓇᐅᔭᓂᒃ ᐊᑑᑎᖃᕋᔭᖑᐊᕐᑐᓂᒃ ᓱᓇᒃᑯᑎᓄᑦ ᓱᕐᓗ ᐸᐃᕆᕕᒃᓴᓄᑦ ᐊᒻᒪ ᓴᓇᔭᐅᒋᐊᑲᓐᓂᕈᑎᒃᓴᓄᑦ ᐸᐃᕆᑦᓯᕕᐅᔪᓄᑦ ᐃᓱᒪᒋᑦᓱᒍ ᐅᑭᐅᕐᑕᕐᑐᒥ ᐊᑭᑐᓂᕐᓴᐹᓗᒻᒪᑦ ᓴᓇᑦᔪᑎᒃᓴᓄᑦ ᐊᒻᒪ ᐊᑯᓂᐅᓂᕐᓴᑦ ᓴᓇᔭᐅᒋᐊᖃᓲᖑᒻᒪᑕ ᐱᓗᐊᕐᑐᒥ ᓄᓇᕘᒥ ᐸᐃᕆᑦᓯᕕᓪᓚᑦᑖᓄᑦ. ᐃᓄᐃᑦ ᓄᓇᖓᓐᓂ ᐱᔭᕆᐊᑐᓂᕐᓴᐅᓂᖓ ᒪᑭᑦᓯᒐᓱᐊᕐᓂᕐᒥᒃ ᐸᐃᕆᑦᓯᕕᓴᓂᒃ ᑲᒪᒋᔭᐅᑦᓯᐊᓂᕐᓴᐅᒋᐊᖃᕋᓗᐊᕐᒪᑦ ᐸᕐᓇᑕᐅᑦᓯᐊᓂᕐᓴᐅᓗᓂ ᐊᒻᒪ ᑮᓇᐅᔭᖃᕐᑎᑕᐅᑦᓯᐊᓗᓂᓗ. ᑕᒪᑐᒧᖓ ᑭᓇᐅᔭᖃᕐᑎᒃᓯᒋᐊᖃᓐᓂᖅ ᐱᒻᒪᕆᐅᒐᓗᐊᕐᒪᑦ ᖃᓄᐃᖏᑦᓯᐊᖁᓪᓗᒍ ᐸᐃᕆᑦᓯᓕᕆᕕᓂᖅ ᑕᒪᓐᓇ ᐱᒻᒪᕆᐅᒻᒪᑦ ᓱᕈᓯᖁᓗᒃᓄᑦ ᐅᑭᐅᕐᑕᕐᑐᒥ ᐅᖓᓯᒃᑐᒥᐅᓄᑦ ᓄᓇᓕᖕᒥᐅᓄᑦ.
ᐊᑲᕆᖏᒻᒥᔭᕗᑦ ᐃᓱᒪᒋᔭᐅᔪᑦ ᐊᓚᒃᑲᕐᑕᐅᔪᒪᔪᑦ ᑭᓪᓕᒋᓗᒍ 2026ᒥ ᐊᓚᒃᑲᐃᔪᒻᒪᒻᒪᑕ 238ᓂᒃ ᐃᓂᐅᒐᔭᕐᑐᓂᒃ ᐸᐃᕆᔭᐅᔪᓄᑦ ᑕᒪᓐᓇ ᐃᓄᕐᓯᓗᐊᕐᒪᑦ ᐱᑦᔪᑎᒋᓪᓗᒍ ᑲᓇᑕᒥ ᐊᒥᓲᓂᕐᐹᐅᖏᓐᓇᕐᒪᑕ ᐃᕐᓂᐊᖑᖃᑦᑕᕐᑐᑦ ᓄᓇᕘᒥ. ᓄᓇᕘᒥ ᐃᓐᓂᐊᖑᖃᑦᑕᕐᒃᑐᑦ ᐊᒥᓲᓂᕐᓴᐅᖏᓐᓇᕐᒪᑕ ᓱᕐᓗ ᓄᓇᕘᑉ ᓯᓚᑖᓂ ᐃᕐᓂᐊᖑᔪᖃᕐᐸᑦ ᓄᓇᕘᒥᓕ ᒪᕐᕉᒃᓂᒃ ᐃᕐᓂᐊᖑᔪᖃᒻᒪᑦ ᐊᒥᓲᓂᕐᓴᐅᖏᓐᓇᕐᒪᑕ ᐃᕐᓂᐊᖑᔪᑦ ᓄᓇᕘᒥ. ᓄᓇᕘᒥ ᐃᕐᓂᐊᖑᕙᒃᑐᑦ ᑲᑦᓯᐅᓂᖏᑦ ᒪᓕᒃᑕᐅᒋᐊᓖᑦ ᐊᒥᓱᕈᕆᐊᕐᑕᐅᒋᐊᖃᓕᕋᐃᑉᐸᑕ ᐃᓂᒃᓴᒫᑦ ᐸᐃᕆᕕᒃᓂ, ᐃᓱᒪᒋᑦᓱᒋᑦ ᐊᕐᓇᐃᑦ ᐅᑭᐅᕐᑕᕐᑐᒥ ᐃᖅᑲᓇᐃᔭᕐᑎᐅᖃᑕᐅᓂᖏᓐᓄᑦ ᐊᒻᒪ ᐅᑭᐅᕐᑕᕐᑐᒥ ᐊᒥᓱᕈᕐᐸᓪᓕᐊᖏᓐᓇᕐᒪᑕ ᐊᑯᓃᕐᑐᒥ ᐃᖅᑲᓇᐃᔭᕐᑎᒋᔭᐅᒋᐊᖃᕐᑐᑦ ᐊᒻᒪ ᐃᓱᒪᒋᑦᓱᒍ ᓯᕗᓂᒃᓴᑎᓐᓂ ᐱᕙᓪᓕᐊᓯᐊᖁᓪᓗᒋᑦ ᓄᓇᓕᐅᔪᑦ.
— ᕇᐱᑲ ᑲᓪᓗ
– 30 –
ᐸᐅᒃᑑᑎᑦ ᑲᓇᑕᒥ ᑎᒥᐅᔪᖅ ᑭᒐᕐᑐᐃᔪᑦ ᐃᓗᓇᖏᓐᓂᒃ ᐃᓄᒃᓂᒃ ᐊᕐᓇᓂᒃ ᑲᓇᑕᒥ. ᐱᔪᑎᖃᕐᑐᑦ ᐅᑦᔨᕆᔭᐅᑦᓯᐊᓂᕐᓴᐅᖁᓪᓗᒋᑦ ᑭᖕᖑᒪᔭᖏᑦ ᐃᓄᐃᑦ ᐊᕐᓇᐃᑦ ᐊᒻᒪ ᐃᓚᐅᑎᑕᐅᑦᓯᐊᖁᓪᓗᒋᑦ ᐊᐅᓚᑕᐅᓂᖏᓐᓄᑦ ᓄᓇᖏᑦᑕ ᐊᕕᒃᑐᕐᓯᒪᐅᕐᑐᓂᑦᓗ ᐊᒻᒪ ᑲᓇᑕᓕᒫᒥ ᒪᒃᑯᐊ ᐱᑦᔪᑎᒋᓪᓗᒋᑦ ᑐᕌᖓᔪᑦ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᑦ ᐊᒻᒪ ᑭᓇᐅᔭᒃᑯᑦ ᐱᕙᓪᓕᐊᓂᕐᒧᑦ.
ᐱᕙᓪᓕᐊᔪᓕᕆᔩᑦ ᐊᐱᕆᔪᓐᓇᕐᑐᑦ ᐆᒧᖓ:
Amanda Deseure, 613.806.3336 or communications@pauktuutit.ca