ᐋᑐᕚ, ᐊᓐᑎᐅᕆᔪ ᒫᔾᔨ 17, 2023 – ᑐᐊᕕᕐᓇᖅᓯᒻᒪᑦ ᐃᓄᐃᑦ ᐃᕐᓂᓱᔅᓰᓂᕐᒥᑦ ᐱᑕᖃᕆᐊᖃᓕᕐᖓᑦ ᐃᓄᐃᑦ ᓄᓇᖓᓐᓂ. ᐸᐅᑦᑑᑎᒃᑯᑦ ᑲᑎᒪᔨᖏᑦ ᓱᓕ ᓇᓗᓇᐃᔭᐃᕙᒻᒪᑕ ᓯᕗᓪᓕᖅᐸᐅᔾᔭᐅᒋᐊᓕᓐᓂᒃ ᐃᓄᓐᓄᑦ ᐊᕐᓇᓄᑦ ᐊᖑᑎᓄᓪᓗ ᑕᐃᒪᓪᓗᐊᖅᑎᑕᐅᒋᐊᖃᕐᓂᖏᓐᓄᑦ ᐃᓄᐃᑦ. ᑕᒪᓐᓇ ᐱᒻᒪᕆᐅᒻᒪᑦ, ᑎᒍᒥᐊᖅᑎᐅᖃᑕᐅᔪᓂᓪᓗ ᓯᕗᓪᓕᖅᐹᑦᑎᐊᒥ ᑲᓇᑕᒥ ᐃᓄᓐᓂᑦ ᐃᕐᓂᓱᔅᓰᓂᕐᒧᑦ ᑲᑎᒪᑎᑦᑎᒍᒫᖅᑐᒍᑦ ᐱᕙᓪᓕᐊᒍᒪᓪᓗᑕ ᑲᓇᑕᒥ ᐃᓄᓐᓄᑦ ᐊᕐᓇᓄᑦ ᐃᕐᓂᓱᔅᓰᓂᕐᒧᑦ ᑐᓐᖓᕕᔅᓴᐅᒐᖅᑐᓂᒃ ᐊᑐᐊᕈᑕᐅᔪᓐᓇᖅᑐᓂᒃ ᐅᑎᖅᑎᖁᔭᐅᓕᕐᖓᑕ ᐋᖅᑭᒋᐊᕐᓗᒋᓪᓗ ᐃᓄᓐᓄᑦ ᐊᐅᓚᑕᐅᓗᑎᑦ ᐃᕐᓂᓱᔅᓰᕕᒻᓐᒥᑦ ᐃᓄᐃᑦ ᓄᓇᖓᓐᓂ.

ᑕᑎᖃᐃᓐᓇᖅᐸᓚᐅᕐᖓᑕ ᐊᑯᓂᕐᔪᐊᕌᓗᒃ ᑭᖑᕚᕇᕈᓘᔮᓗᓐᓂᒃ ᐃᕐᓂᓱᖅᓰᓂᕐᒥᑦ ᐱᖅᑯᓯᖏᓐᓂ ᐊᑐᖅᑐᑎᑦ ᐱᓯᒪᑦᑎᑦᑎᐊᕐᓂᒥᓪᓗ ᓇᔾᔨᔪᓕᕆᓂᕐᒥᑦ ᐃᑉᐱᒋᑦᑎᐊᖅᑐᒍ ᐱᖃᑦᑕᖅᓯᒪᔪᑦ. ᐃᕐᓂᖃᑦᑕᖅᑐᑎᑦ ᐃᓚᖃᖅᑐᑎᑦ ᐃᓚᒥᓐᓂ ᓄᓇᖃᖅᑲᑎᒥᓂᓪᓗ ᐊᐅᓚᑦᑎᓪᓗᑎᓪᓗ ᑕᒪᑐᒥᖓ, ᐱᖅᑯᓯᑐᖃᕐᒥᓂᑦ ᐊᑐᖅᑐᑎᑦ ᐃᕐᓂᓱᔅᓰᖃᑦᑕᖅᑐᑎᑦ. ᑕᒪᒃᑯᐊ ᐲᖅᑕᐅᓯᒪᑦᑎᐊᒻᒪᕆᒻᒪᑕ ᐃᓄᐃᑦ ᓄᓇᓕᖏᓐᓂ ᖃᓪᓗᓈᑦ ᐱᖅᑯᓯᖏᓐᓂ ᐊᑐᖔᖅᑐᑎᑦ ᐃᕐᓂᖃᑦᑕᖅᑐᑦ ᐃᓄᐃᑦ ᐃᓕᓴᕆᓐᖏᑦᑎᐊᒻᒪᕆᑦᑕᖏᓐᓂ ᐊᑐᖅᑐᑎᑦ.

“ᒫᓐᓇᓕ, ᐃᕐᓂᓱᔅᓰᕕᖃᑦᑎᐊᓐᖏᓐᓂᖓᓐᓄᑦ ᓇᔾᔨᔪᓕᕆᓂᕐᒥᓪᓘᓐᓃᑦ, ᐃᓄᐃᑦ ᐊᕐᓇᐃᑦ ᐊᐅᓪᓚᖃᑦᑕᕆᐊᖃᕐᖓᑕ ᓄᓇᖓᓐᓂ ᐃᕐᓂᔭᖅᑐᖅᑐᑎᑦ ᖃᖓᑕᓲᒃᑰᖅᑐᑎᑦ. ᑕᒪᓐᓇ ᐊᔅᓱᕈᓐᓇᑐᕐᔪᐊᖑᒻᒪᑦ −− ᐊᓪᓛᒃ ᐅᓗᕆᐊᓇᒻᒪᕆᑦᑐᖅ −− ᓇᔾᔨᔪᒧᑦ ᕿᒪᑦᑕᒥᓄᓪᓗ ᐃᓚᒌᑉᐸᓪᓕᐊᓕᕋᑖᖅᑐᓄᑦ,” ᐅᖃᖅᑐᓂ ᐊᖏᔪᖅᑳᖅ ᔨᐅᕆ ᓵᑉ.

ᐱᓕᕆᖃᑎᖃᕐᓂᐊᖅᑐᑎᑦ ᑲᓇᑕᒥ ᓄᓇᖃᖅᑳᖅᑐᒥᓂᑦ ᑲᑎᒪᔨᖏᓐᓂ ᐃᕐᓂᓱᔅᓰᓂᕐᒧᑦ (NACM), ᑲᓇᑕᒥ ᐃᓄᐃᑦ ᐃᕐᓂᓱᔅᓰᓂᕐᒧᑦ ᑲᑎᒪᓛᖅᑐᑦ ᖃᕋᓴᐅᔭᒃᑯᑦ ᒫᔾᔨᒥ 28, 29, ᐊᒻᒪᓗ 30 ᐅᖃᐅᓯᖃᕐᓗᑎᑦ:

  • ᒫᓐᓇ ᑭᓐᖒᒪᔭᐅᔪᑦ ᐊᔅᓱᕈᓐᓇᖅᑐᒃᑰᖃᑦᑕᖅᑐᓪᓗ ᐃᓄᐃᑦ ᐃᕐᓂᔭᖅᑐᖅᑐᑦ, ᐃᓅᕋᑖᑦ, ᐃᓚᖏᑦ ᓄᓇᓖᓪᓗ.
  • ᐱᓕᕆᐊᖏᑦ ᐃᓄᐃᑦ ᐃᕐᓂᓱᔅᓰᔩᑦ, ᐱᒻᒪᕆᐅᓂᖏᓪᓗ ᐊᑐᕈᓐᓇᕆᐊᖃᕐᓂᖏᓐᓂ ᐱᖅᑯᓯᕐᒥᓂᒃ ᐃᕐᓂᓱᔅᓯᐊᕆᔭᐅᑎᓪᓗᒋᑦ ᐋᓐᓂᐊᕕᒻᒥ ᐃᓅᓇᓱᐊᑦᑎᐊᕐᓂᒥᓪᓗ ᐃᓄᐃᑦ ᓄᓇᓕᖏᓪᓗ.
  • ᑐᐊᕕᕐᓇᓕᕐᓂᖓ ᐱᔪᓐᓇᐅᑎᖃᕐᓂᖏᓐᓂ ᒪᓕᓪᓗᑎᑦ ᐅᑎᖅᑎᑕᐅᓇᓱᐊᕐᓂᖓᓐᓂ ᓴᖅᑭᖅᑕᐅᑲᓐᓂᕐᓗᓂᓗ ᐃᓄᐃᑦ ᐃᕐᓂᓱᔅᓰᕕᒻᒥ ᐃᓄᐃᑦ ᓄᓇᖏᓐᓂ.

ᐊᑎᓕᐅᕈᓐᓇᖅᑐᑦ ᑲᓇᑕᒥ ᐃᓄᓐᓄᑦ ᐃᕐᓂᓱᔅᓰᓂᕐᒧᑦ ᑲᑎᒪᓂᐅᓛᖅᑐᒥᑦ ᖃᕋᓴᐅᔭᒃᑯᑦ ᓇᓂᔭᔅᓴᖅ ᐅᕙᓐᖓᑦ pauktuutit.ca ᐅᕝᕙᓘᓐᓃᑦ ᐃᕐᖐᕐᓇᖅᑕᐅᑎᒃᑯᑦ ᑎᑎᕋᕈᓐᓇᕐᒥᔪᑎᑦ ᐅᕗᖓ nimf@pauktuutit.ca.

-30-

ᐸᐅᑦᑑᑎᒃᑯᑦ ᐃᓄᐃᑦ ᐊᕐᓇᐃᑦ ᑲᓇᑕᒥ  ᑲᓇᑕᒥ ᑮᓇᐅᔭᓕᐅᕋᓱᐊᖅᑎᐅᓐᖏᑦᑐᑦ ᑭᒡᒐᖅᑐᐃᔪᑦ ᐃᓄᓕᒫᓂᒃ ᐊᕐᓇᓂᑦ ᑲᓇᑕᒥ. ᐅᔾᔨᕈᓱᑦᑎᑦᑎᑲᓐᓂᕋᓱᐊᖅᑐᑦ ᐱᔭᕆᐊᓕᖏᓐᓂ ᐃᓄᐃᑦ ᐊᕐᓇᐃᑦ ᐊᒻᒪᓗ ᐱᖃᑕᐅᑎᑦᑎᑲᓐᓂᕐᓗᑎᑦ ᓄᓇᓕᓐᓂᑦ, ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥ ᑲᓇᑕᒥᓗ ᐃᓱᒫᓘᑎᒋᔭᐅᔪᓂᒃ ᒪᑯᓂᖓ ᐃᓄᓕᕆᓂᕐᒧᑦ, ᐱᖅᑯᓯᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᐃᕐᖐᕐᓈᖅᑕᐅᑎᒃᑯᑦ ᑎᑎᕋᕐᓗᑎᑦ ᐅᕗᖓ: communications@pauktuutit.ca.