Read in English | Lire en français
ᑲᓇᑕᒥ ᑭᓪᓕᓯᓂᐊᕐᑐᖃᓚᐅᕐᑎᓪᓗᒍ ᐃᓄᒃᓄᑦ
ᖃᓄᕐᑑᕈᑕᐅᖁᔭᐅᔪᑦ ᐃᓄᒃᓄᑦ ᑐᕌᖓᓪᓗᐊᑕᕐᑐᑦ
(ᐋᑐᕚᒥ) ᔫᓂ 3, 2021 – ᐅᓪᓗᒥ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐊᓚᒃᑲᐃᕗᑦ ᐆᒥᖓ ᑲᓇᑕᒥ ᐃᓄᒃᓄᑦ ᖃᓄᕐᑑᕈᑕᐅᖁᔭᐅᔪᑦ ᐸᕐᓇᐅᑏᑦ ᐱᑦᔪᑎᒋᓪᓗᒋᑦ ᑭᖕᖑᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᐃᓄᐃᑦ ᐊᕐᓇᐃᑦ ᓂᕕᐊᕐᓯᐊᑦ ᐊᒻᒪ ᐊᖑᑕᐅᔪᒪᔪᑦᓗ ᐊᕐᓇᐅᔪᒪᔪᑦᓗ ᐊᒻᒪ ᐊᓯᖏᑦ, ᐱᑦᔪᑎᖃᕐᓱᑎᒃ ᑕᐃᒃᑯᓄᖓ 46ᖑᔪᓄᑦ ᖃᓄᕐᑑᕈᑕᐅᖁᔭᐅᓯᒪᔪᓄᑦ ᑲᓇᑕᒥ ᑭᓪᓕᓯᓂᐊᕐᑐᖃᓚᐅᕐᑎᓪᓗᒍ ᑭᖕᖑᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ.
ᑲᓇᑕᒥ ᐃᓄᒃᓄᑦ ᖃᓄᕐᑑᕈᑕᐅᖁᔭᐅᔪᑦ ᐸᕐᓇᐅᑏᑦ ᓇᓗᓇᐃᕐᓯᕗᑦ ᖃᐅᔨᒪᔭᒃᑎᓐᓂᒃ ᓱᒻᒪᑦ ᐊᒥᓲᓗᐊᕐᑐᐊᓗᐃᑦ ᐊᓐᓂᕐᑎᒃᑕᐅᕙᒃᒪᖔᑕ ᐃᓄᐃᑦ ᐊᕐᓇᐃᑦ ᓂᕕᐊᕐᓯᐊᑦ ᐊᖑᑕᐅᔪᒪᔪᑦᓗ ᐊᕐᓇᐅᔪᒪᔪᑦᓗ ᐊᒻᒪ ᐊᓯᖏᑦ ᐊᒻᒪ ᑖᒃᑯᐊ ᕿᑐᖓᖏᑦ. ᐱᑦᔪᑎᐅᓱᑎᒃ ᐅᑯᐊ ᑭᒫᕕᑭᑦᓴᕐᓂᖅ ᐊᒻᒪ ᐊᑦᑕᓇᑦᑕᐃᓕᒪᕕᒃᓴᒥ ᓇᔪᒐᒃᓴᖃᖏᓐᓂᖅ ᐊᒻᒪ ᐃᒡᓗᑭᑦᓴᕐᓂᐊᓗᒃ ᐃᓄᐃᑦ ᓄᓇᖏᓐᓂ ᐊᒻᒪᓗᑦᑕᐅᖅ ᐱᑕᖃᖏᓗᐊᕐᓂᖏᑦ ᐊᓐᓂᐊᕐᑕᐃᓕᒪᓂᕐᒧᑦ ᐊᒻᒪ ᖃᓄᐃᖏᑦᓯᐊᓂᕐᒧᑦ ᐱᓕᕆᑦᔪᑎᓂᒃ ᐊᒻᒪ ᐃᑲᔫᓯᐅᔪᓐᓇᕐᑐᓂᒃ.
ᒐᕙᒪᐅᔪᑦ ᐊᒻᒪ ᐃᓄᐃᑦ ᓄᓇᓕᕆᓂᕐᒧᑦ ᑎᒥᐅᔪᑦ ᓯᕗᒧᐊᒃᑲᐃᒋᐊᖃᕋᓗᐊᖅᑯᑦ ᐊᑐᓕᕐᑎᑕᐅᓂᖏᓐᓂᒃ ᑲᓇᑕᒥ ᐃᓄᒃᓄᑦ ᖃᓄᕐᑑᕈᑕᐅᖁᔭᐅᔪᑦ ᐸᕐᓇᐅᑎᓂᒃ ᐊᑐᓕᕐᑎᒃᓯᓗᑎᒃ ᐱᔪᓐᓇᐅᑎᒋᔭᐅᔪᒐᓗᐊᑦ ᑭᓪᓕᒋᔭᐅᓗᑎᒃ. ᑕᒪᓐᓇ ᐊᑐᓕᕐᑎᒃᓯᓇᓱᐊᕐᓂᖅ ᑐᓐᖓᕕᖃᓪᓗᑎᒃ ᐃᓱᒪᒋᔭᐅᑦᓯᐊᕐᓗᑎᒃ ᐊᒻᒪ ᐃᑲᔪᕐᑐᕐᑕᐅᑦᓯᐊᓗᑎᒃ ᐱᔪᓐᓇᐅᑎᒋᔭᐅᓪᓚᕐᑖᕐᑐᑦ, ᐃᓅᓂᖏᑦ ᐱᑦᔪᑎᒋᓗᒋᑦ ᐊᒻᒪ ᐃᓱᒪᒋᓗᒋᑦ ᑲᒪᔨᐅᓪᓗᐊᑕᕐᓂᖏᑦ ᐃᓄᐃᑦ ᓄᓇᓕᕆᓂᕐᒧᑦ ᑎᒥᐅᔪᑦ, ᐊᒻᒪ ᐅᑦᔨᕆᔭᐅᑦᓯᐊᕐᓗᑎᒃ ᐃᓄᐃᑦ ᓄᓇᓕᕆᓂᕐᒧᑦ ᐊᖏᖃᑎᒌᔪᑏᑦ ᑕᒪᓐᓇ ᐃᑲᔪᕐᓯᓯᒫᓕᕈᑕᐅᖁᓪᓗᒍ ᐊᖏᖃᑦᒋᑦᔪᑕᐅᓯᒪᔪᑦ ᐱᓕᕆᓱᐊᕐᓂᕐᒧᑦ ᐃᓄᖕᓄᑦ ᐊᒻᒪ ᒐᕙᒪᐅᔪᓄᑦ.
ᖃᓄᕐᑑᕈᑕᐅᖁᔭᐅᔪᑦ ᐸᕐᓇᑕᐅᓯᒪᔪᓂᑦᑐᑦ 14ᖑᕗᑦ ᐱᑦᔪᑎᒋᑦᓱᒋ ᕿᕚᕕᓕᕆᓂᖅ ᐊᒻᒪ ᐃᓪᓗᓕᕆᓂᖅ, ᐊᒻᒪ ᐃᖅᑲᕐᑐᐃᕕᓕᕆᓂᖅ ᐊᒻᒪ ᐸᓖᓯᓕᕆᓂᖅ, ᐊᓐᓂᐊᖃᖏᑦᑐᓕᕆᓂᖅ ᐊᒻᒪ ᖃᐃᖏᑦᓯᐊᕐᓂᖅ ᐊᒻᒪᓗ ᑭᓇᐅᔭᕐᑎᒍᑦ ᐊᔪᕐᓴᕐᑕᐃᓕᒪᓂᖅ. ᖃᓄᕐᑑᕈᑕᐅᖁᔭᐅᔪᑦ ᐊᕕᒃᑐᕐᓯᒪᐅᕐᒥᔪᑦ ᖃᓄᕐᑑᕈᑕᐅᖁᔭᐅᓪᓗᑎᒃ ᐃᒻᒥᒃᑰᓕᖓᓗᑎᒃ ᒐᕙᒪᑐᖃᒃᑯᓐᓄᑦ, ᐊᕕᒃᑐᕐᓯᒪᐅᕐᑐᓄᑦ ᒐᕙᒪᐅᔪᓄᑦ ᐊᒻᒪ ᐃᓄᒃᓄᑦ ᖃᓄᕐᑑᕈᑕᐅᖁᔭᐅᔪᑦ.
ᑲᓇᑕᒥ ᐃᓄᒃᓄᑦ ᖃᓄᕐᑑᕈᑕᐅᖁᔭᐅᔪᑦ ᐸᕐᓇᐅᑕᐅᔪᑦ ᐊᖅᑭᑦᑕᐅᓯᒪᔪᑦ ᐅᑯᓄᖓ ᑲᓇᑕᒥ ᐃᓄᐃᑦ ᐱᓕᕆᔨᖏᓐᓄᑦ ᐱᔪᑎᖃᕐᓱᑎᒃ ᑭᖕᖑᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᐃᓄᐃᑦ ᐊᕐᓇᐃᑦ ᓂᕕᐊᕐᓯᐊᑦ ᐊᖑᑕᐅᔪᒪᔪᑦᓗ ᐊᕐᓇᐅᔪᒪᔪᑦᓗ ᐊᒻᒪ ᐊᓯᖏᑦ. ᑖᒃᑯᐊ ᖁᓕᐅᑦᓱᑎᒃ ᐱᓕᕆᔩᑦ ᐸᐅᒃᑑᑎᑦᑯᓐᓃᖔᕐᑐᒥᒃ ᐊᒻᒪ ᑕᐱᕇᒃᑯᓐᓃᖔᕐᑐᒥᒃ ᐃᒃᓯᕙᐅᑕᓖᑦ. ᑭᒐᕐᑐᐃᔨᖃᕐᓱᑎᒃ ᐃᓄᕕᐊᓗᐃᑦ ᑯᐊᐳᕇᓴᑯᖓᓐᓂᒃ, ᓄᓇᕗᑦ ᑐᓐᖓᕕᒃᑯᓐᓂᑦ, ᒪᑭᕕᒃ ᑯᐊᐳᕇᓴᑯᖓᓐᓂᒃ ᐊᒻᒪ ᓄᓇᑦᓯᐊᕗᑦ ᒐᕙᒪᒃᑯᖏᓐᓂᒃ. ᐱᓕᕆᔨᐅᖃᐅᒻᒥᔪᑦ ᑎᒥᐅᔪᓃᖔᕐᑐᓂᒃ ᓄᓇᓕᖕᓃᖔᕐᑐᓂᒃ ᑎᓴᒪᐅᔪᓂᒃ ᐅᑯᓇᖓᑦ ᐃᓚᒌᑦ ᐊᒻᒪ ᕿᒻᒪᑯᐃᑦ ᑎᒥᖓᑦ, ᑐᓐᖓᓱᒃᕕᖓᑦ ᐃᓄᐃᑦ, ᐊᓇᓇᐅᑲᑎᒋᑦ ᑐᒥᖏᑦ ᐊᒻᒪ ᓴᑐᕐᕖᑦ ᐃᓄᐃᑦ ᐊᕐᓇᐃᑦ ᑲᑐᑦᔨᖃᑎᒌᖏᑦ ᓄᓇᕕᒃᒥ.
ᑕᒪᓐᓇ ᐊᕐᓇᐅᓂᖏᓐᓄᑦ ᐊᓐᓂᑎᕐᑕᐅᕙᒃᓂᖏᑦ ᐃᓱᓕᒃᑎᓐᓂᐊᑐᐊᕈᑦᑎᒍ, ᐃᓄᐃᑦ ᐊᕐᓇᐃᑦ ᓯᕗᒧᐊᒃᑎᒃᓯᔨᐅᖃᑕᐅᒋᐊᓖᑦ ᐊᑐᓕᕐᑎᑕᐅᓂᖓᓄᑦ ᐊᒻᒪ ᑲᔪᓯᒃᑲᕐᑕᐅᓂᖓᓄᑦ ᑲᓇᑕᒥ ᖃᓄᕐᑑᕈᑕᐅᔪᒪᔪᑦ ᐸᕐᓇᑕᐅᔪᑦ. ᕇᐱᑲ ᑲᓪᓗᒃ ᐸᐅᒃᑑᑎᑯᑦ ᐊᖏᔪᖅᑳᖓᑦ ᐃᒫᒃ ᐅᖃᓚᐅᕐᑐᖅ ᑕᒪᓐᓇ ᐃᓱᒪᕐᓲᑕᐅᒋᐊᑐᒃᔭᖏᑦᑐᖅ ᑭᓯᐊᓂᓕ ᐊᑐᕐᑕᐅᒋᐊᖃᓪᓚᑦᑖᕐᑐᖅ ᑕᒪᓐᓇ ᒪᓕᒃᓱᒍᒋ ᓯᓚᕐᔪᐊᕐᒥᐅᑦ ᑲᑐᑦᔨᖃᑎᒌᑦᑕ ᓇᓗᓇᐃᕐᓯᓯᒪᓂᖓᑦ ᓄᓇᖃᖅᑳᕐᓯᒪᔪᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐱᑦᔪᑎᒋᓪᓗᒋᑦ ᑕᐃᒃᑯᐊ ᐊᑐᓕᕐᑎᑕᐅᖁᔭᐅᓯᒪᔪᑦ ᑎᑎᕋᕐᑕᐅᓯᒪᔪᓂᒃ ᑭᖑᓪᓕᕐᐹᕐᓯᐅᑎᖓᓐᓂᒃ ᐅᓂᒃᑳᓂ ᑲᓇᑕᒥ ᑭᓪᓕᓯᓂᐊᕐᑐᖃᓚᐅᕐᑎᓪᓗᒍ ᑭᖕᖑᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ.
ᑲᓇᑕᒥ ᐃᓄᒃᓄᑦ ᖃᓄᕐᑑᕈᑕᐅᖁᔭᐅᔪᑦ ᐸᕐᓇᐅᑕᐅᔪᑦ ᐊᖅᑭᑦᑕᐅᓯᒪᕗᖅ ᖃᓄᕐᑑᖃᑎᒋᑦᓚᕆᒃᑐᑎᒃ ᐃᓄᐃᑦ ᓇᓗᓇᕐᓯᓇᓱᐊᕐᓱᑎᒃ ᖃᓄᖅ ᐃᓄᐃᑦ ᐊᕐᓇᐃᑦ ᓂᕕᐊᕐᓯᐊᑦ ᐊᖑᑕᐅᔪᒪᔪᑦᓗ ᐊᕐᓇᐅᔪᒪᔪᑦᓗ ᐊᒻᒪ ᐊᓯᖏᑦ ᑖᒃᑯᐊ ᐊᑦᑕᓇᕐᑐᒦᖃᑦᑕᖁᓇᒋᑦ ᐃᓱᒫᓗᓇᕐᑐᒥᖁᓇᒋᑦᓗ ᐊᒻᒪ ᖃᓄᐃᖏᑦᓯᐊᖁᓪᓗᒋᑦᓗ. ᑕᐱᕇᒃᑯᑦ ᐊᖏᔪᖅᑳᖓᑦ ᓂᑕᓐ ᐆᕕᐊᑦ ᐅᖃᓚᐅᕐᑐᖅ ᑕᐱᕇᒃᑯᑦᒎᖅ ᐱᓇᓱᐊᖃᑎᖃᑦᓯᐊᕈᒪᔪᑦ ᐊᑐᓕᕐᑎᑕᐅᑦᓯᐊᕈᓐᓇᖁᓐᓗᒋᑦ ᖃᓄᕐᑑᕈᑕᐅᖁᔭᐅᓯᒪᔪᑦ ᐊᒻᒪ ᑎᓕᐅᕋᓗᐊᕐᐸᕗᑦ ᒐᕙᒪᑐᖃᒃᑯᑦ ᐊᒻᒪ ᐊᕕᒃᑐᕐᓯᒪᐅᕐᑐᑉ ᒐᕙᒪᖏᑦ ᓴᓂᖅᕙᐃᖁᓪᓗᒋᑦ ᑭᓇᐅᔭᕐᑑᑎᒃᓴᓂᒃ ᐊᑐᕐᑕᐅᒐᔭᕐᑐᓂᒃ ᐊᑐᓕᕐᑎᑕᐅᓂᖏᓐᓄᑦ.
ᐃᓄᐃᑦ ᐱᓕᕆᔩᑦ ᐃᓚᒋᔭᐅᓚᕐᑐᑦ ᐊᖅᑭᑦᑕᐅᑎᓪᓗᒋ ᖁᓖᑦ ᐱᓕᕆᔨᒃᓴᐃᑦ ᑖᒃᑯᐊ ᐊᑐᓂᑦ ᑲᓇᑕᒥ ᖃᓄᕐᑑᕈᑕᐅᖁᔭᐅᔪᓂᒃ ᐸᕐᓇᐅᑎᒃᓴᓂᒃ ᑲᒪᓚᐅᕐᓱᑎᒃ ᑕᒪᒃᑯᓂᖓ 231ᖑᔪᓂᒃ ᖃᓄᕐᑑᕋᑕᐅᖁᔭᐅᔪᓂᒃ ᓇᓗᓇᐃᕐᑕᐅᓚᐅᕐᑐᓂ ᑭᖑᓪᓕᕐᐸᕐᓯᐅᑎᖓᓐᓂ ᐅᓂᒃᑳᓂ ᑲᓇᑕᒥ ᑭᓪᓕᓯᓂᐊᕐᑐᖃᓚᐅᕐᑎᓪᓗᒍ.
ᐅᖃᓕᒫᕈᓐᓇᕐᑕᓯ ᑭᖑᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ, ᐅᓇ ᓇᕿᓪᓗᒍ: www.pauktuutit.ca/mmiwg-inuit-action-plan or http://www.itk.ca/mmiwg-inuit-action-plan.
-30-
ᐱᕙᓪᓕᐊᔪᓕᕆᔨᓄᑦ ᐊᐱᕆᕕᐅᔪᓐᓇᕐᑐᑦ ᐅᑯᐊ:
- ᓲᓴᓐ ᑭᖕ, ᐸᐅᒃᑑᑎᒃᑯᓐᓂ: 613.724.1518 / sking@pauktuutit.ca
- ᐸᑦᑐᕆᓴ ᑎᓱᔭ, ᑕᐱᕇᒃᑯᓐᓂ: 613.292.4482 / dsouza@itk.ca
__________________________________________________________________________
2SLGBTQQIA+ (ᖃᓪᓗᓈᑎᑐᑦ) ᑕᐃᒃᑯᐊ ᒪᕐᕉᓕᖓᔪᑦ, ᐊᕐᓇᐅᖃᑎᒥᓐᓂ ᐊᐃᑉᐸᖃᓱᑦ, ᐊᖑᑕᐅᖃᑎᒥᓐᓂ ᐊᐃᑉᐸᖃᓲᑦ, ᐊᖑᑕᐅᔪᒪᔪᑦ, ᐊᕐᓇᐅᔪᒪᔪᑦ, ᐊᖑᑕᐅᖃᑎᒥᓂᑦ ᐊᐃᑉᐸᖃᓲᑦ, ᑐᑭᓯᐅᒪᑦᓚᕆᖏᑦᑐᐃᑦᓗ ᓇᓪᓕᐊᓅᒪᖕᖓᒫᒥᖕ, ᑕᒪᒃᑭᓐᓂᒃ ᑎᒥᖏᑦ ᐊᖑᑕᐅᑦᔪᑎᓖᑦ ᐅᑦᕙᓗ ᐊᕐᓇᐅᔪᑎᓖᑦ ᐊᒻᒪ ᓄᓕᐊᕐᓂᕐᒥᑦ ᐃᓱᒪᒋᔭᖃᖏᑦᓯᐊᕐᑐᑦ.
ᐸᐅᒃᑑᑎᑦ ᑲᓇᑕᒥ ᑎᒥᐅᔪᖅ ᑭᒡᒐᕐᑐᐃᔪᑦ ᐃᓘᓐᓇᖏᓐᓂᒃ ᐃᓄᒃᓂᒃ ᐊᕐᓇᓂᒃ ᑲᓇᑕᒥ. ᐱᑦᔪᑎᒋᔭᖓᑦ ᐅᑦᔨᕆᔭᐅᓂᕐᓴᐅᓕᖁᓪᓗᒍ ᐃᓄᐃᑦ ᐊᕐᓇᐃᑦ ᑭᖕᖑᒪᔭᖏᑦ ᐊᒻᒪ ᐊᕐᓇᐃᑦ ᐃᓚᐅᓂᕐᓴᐅᓕᖁᓪᓗᒋᑦ ᓱᓕᕆᔪᖃᕐᑎᓪᓗᒍ ᓄᓇᓕᖏᓐᓂ, ᐊᕕᒃᑐᓯᒪᐅᕐᑐᓂᑦᓗ ᐊᒻᒪ ᑲᓇᑕᒥ ᑲᒪᔪᖃᕐᑎᓪᓗᒍ ᐃᓅᓯᓕᕆᓂᕐᒨᖓᔪᓂᒃ, ᐃᓕᖅᑯᓯᓕᕆᓂᕐᒨᖓᔪᓂᒃ ᐊᒻᒪ ᑭᓇᐅᔭᒃᑯᑦ ᒪᑭᑕᒐᓱᐊᕐᓂᕐᒧᑦ.
ᐃᓄᐃᑦ ᑕᐱᕇᑦ ᑲᓇᑕᒥ ᑖᒃᑯᐊ ᑲᓇᑕᒥ ᑭᒡᒐᕐᑐᐃᔪᑦ 65,000ᖑᔪᓂᒃ ᐃᓄᒃᓂᒃ ᑲᓇᑕᒥ, ᐃᓄᐃᑦ ᐊᒥᓲᓂᕐᓴᐃᑦ ᓄᓇᑐᖃᐅᕐᓱᑎᒃ ᐃᓄᐃᑦ ᓄᓇᖓᓐᓂ, ᓄᓇᓕᖕᒥᐅᖃᕐᓱᑎᒃ 51ᖑᔪᓂᒃ ᑖᑯᓇᓂ ᐃᓄᕕᐊᓗᐃᑦ ᓄᓇᖃᖅᑲᕕᖓᓐᓂ, ᓄᓇᕘᒥ, ᓄᓇᕕᒃᒥ ᐊᒻᒪ ᓄᓇᑦᓯᐊᕐᒥ.