ᓂᖅᑐᖅᑕᐅᓂᖓ ᕉᔅᒥᐊᓕ ᑰᐳᕐ: ᐃᖅᑲᐅᒪᓇᕐᓂᐊᕐᑐᖅ ᓯᕗᓕᕐᑎᐅᓂᖓᓄᑦ ᓂᐱᒋᔭᐅᓂᖓᓄᓪᓗ ᑕᑎᒋᔭᐅᓂᒃᑯᑦ
ᐸᐅᒃᑑᑎᒃᑯᑦ ᖁᔭᓕᒍᒪᓪᓚᕆᑉᐳᑦ ᕉᔅᒥᐊᓕ ᑰᐳᕐᒥᖕ ᐃᑲᔪᕐᓯᒪᕐᔪᐊᕐᓂᖓᓄᑦ ᐊᒻᒪ ᐊᖏᖅᓯᒪᓂᕐᒥᒍᑦ ᐃᖅᑲᓇᐃᔭᐃᓐᓇᕐᓂᖓᓄᑦ ᓄᖅᑲᐸᓪᓕᐊᓕᕐᑎᓪᓗᒍ ᑕᕝᕙᓂ ᑕᖅᑭᑎᓐᓂ.
ᐱᒋᐊᓕᓵᕐᑎᓪᓗᒍ ᐊᕐᕌᒍᕗᑦ, ᐸᐅᒃᑑᑎᒃᑯᑦ ᑐᓴᕐᑎᑦᓯᓚᐅᕐᖓᑕ ᐊᐅᓚᑦᑎᔨᒻᒪᕆᕗᑦ, ᕉᔅᒥᐊᓕ ᑰᐳᕐ, ᐃᖅᑲᓇᐃᔭᑦᓲᔭᓚᐅᕐᑐᓂ ᓂᐱᒋᔭᐅᓂᒃᑯᑦ ᐃᓄᓐᓄᑦ, ᐊᕐᕌᒍᑦ ᑎᓴᒪᐅᔪᕐᖏᕋᕐᑐᑦ ᐊᑕᐅᓯᕐᓗ ᐅᕙᑦᑎᓐᓄᑦ ᐃᓚᒋᔭᐅᓪᓗᓂ, ᓄᖅᑲᕐᓂᐊᓕᕐᖓᑦ ᒫᔾᔨ 28, 2025ᖑᓕᖅᐸᑦ.
ᐸᐅᒃᑑᑎᒃᑯᓐᓄᑦ ᓯᕗᓪᓕᖅᐹᖑᓪᓗᓂ ᐃᓅᓪᓗᓂ ᐊᐅᓚᑦᑎᔨᒻᒪᕆᓐᖑᕐᓯᒪᔪᖅ, ᕉᔅᒥᐊᓕᐅᒻ ᑕᑯᓐᓇᓐᖑᐊᕐᓯᒪᔭᖓ ᑐᓐᖓᕕᖃᓪᓚᕆᑦᓯᒪᒻᒪᑦ ᐃᑎᔪᐊᓗᖕᒥᑦ ᐃᑉᐱᒋᓯᒪᔭᒥᒍᑦ ᐊᑐᖅᓯᒪᒥᓂᖕ ᐃᓅᓪᓗᓂ ᓄᓇᖅᑲᑎᒥᓂᓪᓗ ᑐᓐᖓᕕᖃᕐᑐᓂ. ᐊᐅᓚᔾᔭᐃᒋᐊᖁᔨᓕᓚᐅᕐᓯᒪᒻᒪᑕ ᐊᓈᓇᑦᓯᐊᕆᔭᐅᔪᑦ ᐃᒻᒪᑐᖃᖅ ᐸᐅᒃᑑᑎᓕᐅᖁᔨᑎᓪᓗᒋᑦ ᐊᑦᓱᐊᓗᖕ ᕉᒥᐊᓕᐅᑉ ᑐᓐᖓᓱᑦᑎᓚᐅᕐᓯᒪᒻᒪᒍ ᑲᑎᒪᔩᑦ ᐱᖁᔨᕗᖔᕈᑎᖏᑎᒍᑦ, ᐃᖅᑲᐅᒪᔭᐅᔪᒫᕐᑐᒥᑦ ᐊᑐᖅᑕᐅᓯᒪᓐᖏᑦᑐᒥᑦ ᕿᒪᐃᓪᓗᓂ ᕿᒫᕕᑦᓴᓕᐅᕐᓂᒃᑯᑦ ᐊᒻᒪ ᓇᔪᖅᑕᐅᑲᐃᓐᓇᑐᑦᓴᓂᑦ ᐃᓪᓗᑖᕋᓱᓐᓂᖏᓐᓂ ᐃᓄᐃᑦ ᓄᓇᖓᓂ ᐊᒻᒪ ᓄᓇᓕᕐᔪᐊᓂ ᖃᓪᓗᓈᓂ. ᐸᐅᒃᑑᑎᑦ ᐱᒻᒪᕆᐊᓗᖕᒥᑦ ᐱᖃᑕᐅᓚᐅᕐᓯᒪᒻᒪᑕ ᓯᕗᓕᕐᑎᐅᓂᒃᑯᑦ, ᓂᐱᒋᔭᐅᓂᒃᑯᑦ ᑲᑐᔾᔨᖃᑎᑦᑎᓐᓄᑦ ᐊᒻᒪ ᐅᖃᐅᔾᔪᐃᔩᑦ ᑲᑎᒪᔨᓛᖏᑦ ᐃᑲᔪᕐᑎᐅᖁᓪᓗᒋᑦ ᐊᕐᖕᓇᓄᑦ ᓂᖓᖅᑕᐅᖃᑦᑕᕐᑐᓄᑦ.
ᕉᔅᒥᐊᓕ ᓯᕗᓕᕐᑎᒋᓪᓗᑎᒍ, ᐸᐅᒃᑑᑎᒃᑯᓂ ᐋᖅᑭᑦᓱᐃᓚᐅᕐᑐᖅ ᐃᓚᖏᑦ ᐱᒻᒪᕆᐅᓂᕐᐹᖑᓂᐊᕐᑐᑦ ᑲᓱᖅᑎᑦᓯᓂᒃᑯᑦ ᓄᓇᓕᓐᓂᑦ ᐊᖅᑯᑕᐅᓪᓗᑎᑦ ᐃᑲᔫᑎᑦᓴᕗᑦ ᐊᑐᓕᕐᑎᑕᐅᓂᖏᑎᒍᑦ. ᑕᐃᒪᐃᓐᓂᖓᓄᑦ ᐸᐅᒃᑑᑎᒃᑯᑦ ᐊᑐᖅᓯᒪᔭᖏᑦ ᐊᒡᒍᕐᓯᒪᔪᓂ ᑕᐃᒫᖕ ᑲᑐᔾᔨᖃᑎᒌᖏᑦ ᐊᓯᔾᔨᕐᐸᓪᓕᐊᓯᒪᔪᓪᓚᕆᐅᔪᑦ ᐱᓐᖑᕐᑎᑦᓯᓂᒃᑯᑦ ᐊᑐᐊᒐᕐᓂᑦ ᐊᒻᒪ ᓂᐱᒋᔭᐅᓂᖕᒥᑦ ᑕᑎᒋᔭᐅᓂᒃᑯᑦ. ᑕᒪᓐᓇ ᐱᕈᕐᐸᓪᓕᐊᓯᒪᓂᖓ ᓴᖅᑭᓚᕿᓯᒪᔪᖅ ᐸᐅᒃᑑᑎᒃᑯᑦ ᓯᕗᓪᓕᖅᐹᒥ ᐅᐸᓗᖓᐃᔭᐃᑎᓪᓗᒋᑦ ᐸᕐᓇᐅᑎᑦᓴᓂᑦ ᓯᕗᓕᖅᐹᑦᓯᐊᖑᓪᓗᑎᑦ ᐊᐅᓚᑦᑎᔨᐅᓪᓗᓂ ᑲᔪᓯᑎᓚᐅᕐᓯᒪᔭᖏᑦ. ᐊᑖᓂ ᐸᕐᓇᐅᑎᐅᑉ ᐃᓗᐊᓂ, ᐸᐅᒃᑑᑎᒃᑯᑦ ᐋᖅᑭᑦᓱᐃᕙᓪᓕᐊᓕᕐᑐᑎᑦ ᐱᒋᐊᓕᓵᕐᓂᑰᓪᓗᑎᑦ ᓂᐱᖅᑯᖅᑐᒋᐊᕐᑎᑦᓯᓂᖕᒥᑦ ᐊᒻᒪ ᓴᓐᖓᑦᑎᕆᓂᖕᒥᑦ ᐃᓄᐃᑦ ᓂᐱᖏᓐᓂᑦ, ᑐᖅᑲᑕᕐᕕᓪᓚᕆᒃ ᒫᓐᓇ ᐸᕐᓇᐅᑎᑦᑎᓐᓄᑦ ᓯᕗᓕᕐᑎᐅᓂᖓᑕ ᐊᕐᕌᒍᖓ ᑭᖑᓪᓕᕐᐹᕆᓕᕋᓗᐊᕐᑐᓂᐅᖕ ᐸᐅᕐᑑᑎᒃᑯᓐᓂ.
ᕉᔅᒥᐊᓕᐅᑉ ᑕᑯᓐᓇᓐᖑᐊᕐᓯᒪᔭᖓᒍᑦ ᐊᔪᕈᕐᓃᖅᓴᐃᓂᒃᑯᑦ ᐃᖅᑲᓇᐃᔭᕐᑎᕗᓪᓗ ᓈᕙᓪᓕᐊᓂᒃᑯᑦ ᐊᑑᑎᖃᓪᓚᕆᑦᓯᒪᔪᖅ ᐱᔭᑦᓴᕗᑦ ᑲᔪᓯᖁᓪᓗᒋᑦ ᐊᒻᒪ ᐃᓚᒋᔭᐅᓂᕐᓴᐅᓕᖁᓪᓗᒋᑦ ᐃᓄᐃᑦ ᓯᕗᓕᕐᑏᑦ, ᓈᓴᐅᑎᑎᒍᑐᐃᓐᓇᐅᖏᑦᑐᖅ, ᑭᓯᐊᓂᑦᑕᐅᖅ ᓯᕗᓕᕐᑏᑦ ᐅᓄᕐᓯᕙᓪᓕᐊᖁᓪᓗᒋᑦ ᐃᓄᐃᑦ ᐸᐅᒃᑑᑎᒃᑯᑦ ᐊᐅᓚᑕᖏᓐᓂ ᑕᐃᒪᐃᖃᑦᑕᕋᑦᑕ ᑲᑎᒪᔨᑦᑎᓐᓄᑦ. ᑲᔪᖏᕐᓱᐃᓯᒪᓂᖓ ᐊᑯᓂᐊᓗᖕ ᐃᖅᑲᐅᒪᓇᕐᓂᐊᕐᑐᖅ ᖁᕐᕙᕐᑎᕈᑕᐅᕙᓪᓗᓂᓗ ᐃᓄᓐᓄᑦ ᐊᕐᓇᓄᑦ, ᓂᕕᐊᖅᓯᐊᓄᑦ, ᐊᒻᒪ ᐊᕐᓇᐅᔭᓄᑦ ᐊᖑᑕᐅᔭᓄᓪᓗ ᐃᓄᓐᓄᑦ ᓂᐱᖃᕈᑕᐅᓂᒃᑯᑦ, ᑲᑐᔾᔨᖃᑎᒌᓐᓂᒃᑯᑦ ᐊᒻᒪ ᖃᐅᔨᒪᔭᑦᑎᓐᓂᑦ ᐊᐅᓚᔾᔭᐃᒋᐊᕐᓂᒃᑯᑦ.
ᖁᔭᓕᓪᓚᕆᑦᑐᐊᓘᔪᒍᑦ ᕉᔅᒥᐊᓕᒥᖕ ᐃᖅᑲᓇᐃᔭᕈᓐᓇᕐᓂᖓᓄᑦ ᐸᐅᒃᑑᑎᒃᑯᓐᓄᑦ ᐊᒻᒪ ᖁᕕᐊᒋᓗᒍ ᐊᓪᓗᕆᐊᕐᕕᖓᓄᑦ ᐃᓅᓯᕐᒥᓂ ᐃᑲᔪᕈᒪᑐᐃᓐᓇᕐᑕᕗᑦ. ᓇᓗᓇᓐᖏᑦᑐᖅ ᑕᑯᓛᕐᑕᑦᓴᕆᒻᒥᔭᕗᑦ ᓇᐅᒃᑯᑐᐃᓐᓇᖅ ᓂᐱᒋᔭᐅᓂᖓ, ᐃᓚᖏᓐᓄᑦ ᓴᓇᒐᔪᓐᓂᖓᓗ, ᓂᐱᒋᔭᐅᓂᕐᓗ ᑐᓐᖓᕕᒋᓪᓚᕆᑦᓯᒪᒻᒪᒋᑦ ᐃᓅᓪᓗᓂ ᐊᕐᓇᐅᓪᓗᓂ.
ᑐᓐᖓᓱᑦᑎᑦᓯᓂᖅ ᓂᑭ ᑯᒪᒃᓯᐅᑎᑦᓴᒥᑦ, ᐊᖏᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ: ᓄᑖᒥᖕ ᐱᒋᐊᓕᕐᒥᔪᒍᑦ ᐃᓄᒻᒥᖕ ᓯᕗᓕᕐᑎᖃᕐᓂᖕᒥᑦ
ᖁᕕᐊᑉᐳᒍᑦ ᑐᓴᕐᑎᑦᓯᔭᕆᐊᑦᓴᖅ ᕿᓂᓚᐅᕋᑦᑕ ᐊᖏᔪᖅᑳᖑᓂᐊᕐᑐᒥᑦ ᐊᐅᓚᑦᑎᔨᒻᒪᕆᐅᓂᐊᕐᑐᒥᓪᓗ. ᓂᑭ ᑯᒪᒃᓯᐅᑎᑦᓴᖅ ᓴᓐᖏᔪᐋᓗᖕ ᑲᑉᐱᐊᑦᑕᐃᓂᖓᓄᑦ — ᐃᓄᒃ ᐊᕐᓇᖅ ᑕᐸᐃᕐᓇᖅᑐᖅ ᐃᒡᓗᓕᒑᕐᔪᖕᒥᐅᖅ, ᓄᓇᕗᑦ. ᓂᑭ ᐃᑲᔪᕐᑐᐃᓯᒪᓪᓚᕆᑦᑐᖅ ᐸᐅᒃᑑᑎᒃᑯᑦ ᐱᓇᓱᐊᕐᑕᖏᓐᓂᑦ ᐊᒻᒪ ᖁᕕᐊᓱᑦᑎᐊᖅᑐᖅ ᐃᓂᒋᓂᐊᓕᕐᑕᒥᓂᖕ ᐸᐅᒃᑑᑎᒃᑯᓐᓂ.
ᓂᑭ ᐅᐱᒍᓱᑦᑎᐊᕐᑐᖅ ᐃᓅᓂᕐᒥᓂᖕ ᓯᕗᓕᖏᓐᓃᓐᖔᕐᑐᓂᑦ ᓴᓐᖏᔾᔪᑎᒋᓪᓗᓂᒋᓪᓗ, ᑭᓇᐅᓂᕐᒥᓂᖕ ᐃᓕᖅᑯᓯᒥᓂᖕ ᐊᓯᐅᔨᑦᑕᐃᓕᕐᑎᐊᕐᑐᓂ ᐊᒻᒪ ᑕᑎᒋᔭᐅᓂᒃᑯᑦ ᐃᓄᓐᓄᑦ ᓂᐱᒋᔭᐅᖏᓐᓇᕐᑐᖅ. ᐃᑎᔪᐊᓗᖕᒥᑦ ᑐᑭᓯᐅᒪᒧᑦ ᐃᓄᓐᓂᑦ ᑲᓇᑕᒥᐅᓂᑦ ᑐᓐᖓᕕᒌᓐᓇᕐᑕᖓ ᐃᖅᑲᓇᐃᔮᕆᖃᑦᑕᕐᑕᒥᓂ ᐃᓄᓐᓂᑦ ᐃᑲᔪᖅᑎᐅᓪᓗᓂ ᐃᓅᓯᖏᓐᓂ ᐊᖅᑯᓯᐅᕆᓂᒃᑯᑦ ᐊᑦᓱᕈᕐᓇᕐᑐᒃᑰᖅᑎᓪᓗᒋᑦ, ᑕᑯᑦᓴᐅᑎᑦᓰᓐᓇᕋᓱᑦᑐᓂ, ᐃᑲᔪᕐᑐᐃᓪᓗᓂ, ᓴᓐᖓᕐᑎᕆᕙᑦᑐᓂᓗ. ᐃᑉᐱᓐᓂᐊᓪᓚᕆᑦᑐᖅ ᐃᓅᓂᕐᒥᓂᖕ ᐃᑎᔪᐊᓗᖕᒥᖕ − ᑲᑕᔾᔭᕐᑎᐅᓪᓗᓂ, ᐃᓕᓴᐃᔨᐅᓪᓗᓂ ᐃᓄᐃᑦ ᓯᕗᓕᖏᓐᓃᕐᖔᕐᑐᓂᑦ ᐃᓕᖅᑯᓯᖓᓂᓪᓗ, ᐊᒻᒪ ᖃᒪᓐᖔᓗᖕ ᐃᓐᖏᓲᖅ ᐃᑉᐱᓇᓪᓚᕆᑦᑐᒥᑦ. ᐃᓐᖏᕐᓂᒃᑯᑦ ᓯᓚᑐᓂᒃᑯᓪᓗ, ᓂᑭ ᐃᓅᓯᕐᓂᑦ ᐃᑉᐱᓐᓂᕐᑎᑦᓰᓐᓇᕐᑐᖅ ᑭᓇᑐᐃᓐᓇᑦᓯᐊᒥᑦ ᐊᒻᒪ ᓄᓇᖓᑕ ᐅᖓᑖᓄᐊᓗᖕ ᐃᑉᐱᓐᓂᕐᑕᐅᓯᒪᓕᕇᕐᑐᖅ.
ᐸᐅᒃᑑᑎᒃᑯᑦ ᑐᑭᓯᐅᒪᓕᕇᓚᐅᕐᑐᑦ ᓂᑭᐅᑉ ᐊᔪᓐᖏᓂᖓᓂᑦ ᐊᑎᖅᑕᐅᒻᒪᑦ ᐃᓄᒃ ᐊᕐᓇᖅ ᐊᕐᕌᒍᖓᓂ 2023 ᐃᓕᑕᕆᔭᐅᓂᒃᑯᑦ, ᐊᒻᒪ ᑲᐃᕙᓪᓚᒌᒻᒪᕆᑦᑐᖅ ᐃᓚᒋᔭᐅᓕᕐᑐᓂ ᓯᕗᓕᕐᑎᑎᓐᓄᑦ. ᓂᑭᐅᑉ ᐅᓂᒃᑳᖓ ᖃᓄᖅᑑᒃᑲᐅᓪᓗᓂ, ᓴᓐᖏᔫᓪᓗᓂ ᐊᒻᒪ ᓇᓪᓕᓂᐊᓗᐊ ᐃᓅᖃᑎᒥᓄᑦ ᓄᖅᑲᔪᐃᑦᑑᓪᓗᓂ. ᒫᓐᓇᒧᑦ ᐃᖅᑲᓇᐃᔮᕆᓯᒪᔭᖏᑦ ᐊᓯᒥᓄᑦ ᑲᔪᖏᖅᑐᐃᔾᔪᑕᐅᔪᑦ ᖃᐅᒻᒪᖅᑭᔮᕐᑐᑎᑐᑦ − ᐃᓅᓱᑦᑐᓄᑦ ᐃᓐᓇᑐᖃᕐᓄᓪᓗ − ᓴᖅᑭᔮᕐᑎᑦᓯᓪᓗᓂ ᐃᓕᖅᑯᓯᕐᒥᓂᖕ ᐅᐱᒋᓪᓗᒍ, ᑕᑎᒋᔭᐅᓂᒃᑯᑦ ᓂᐱᐅᓪᓗᓂ, ᐊᒻᒪ ᐱᒻᒪᕆᐅᑎᑦᓯᓂᖓ ᓄᓇᖅᑲᑎᒌᑦᓯᐊᓂᖕᒥᑦ. ᓂᐱᖓ, ᑐᓴᖅᓴᖅ ᐃᓗᓯᖓᑕᓗ ᑐᑭᖓ, ᑕᐃᒪᓐᖓᑦ ᓂᐱᖅᑯᖅᑐᓯᕙᓪᓕᐊᑐᐃᓐᓇᓂᐊᕐᑐᑦ ᐃᓄᐃᑦ ᑭᓇᐅᓂᖏᓐᓂᑦ ᐊᒻᒪ ᓯᕗᓂᒃᓴᖓ ᑭᖑᕚᑦᑕ ᖃᐅᒻᒪᖅᑭᔮᕐᑐᓪᓚᕆᑯᓗᖕᒧᑦ ᑐᕌᕈᑎᑦᓴᖏᓐᓂᑦ.
ᓂᑭ ᐊᑐᖅᓯᒪᔭᖏᑦ ᑭᖑᓂᖔᑦᑎᓂ ᐃᓂᓪᓚᐃᓯᒪᒻᒪᑕ ᐃᓂᑦᓴᖓᓄᑦ ᐸᐅᒃᑑᑎᒃᑯᓐᓂ ᐃᓂᓪᓚᑦᓯᐊᑐᐃᓐᓇᕐᑐᓂ. ᐱᒋᐊᕐᑎᑦᓯᓂᑰᖃᑕᐅᓪᓗᓂ ᐊᒻᒪ ᐆᒻᒪᑦᑎᐊᕆᑦᑐᓂ ᐊᐅᓚᑦᑎᔨᒻᒪᕆᐅᓂᑰᓪᓗᓂ ᑐᓐᖓᕕᒃᑯᑦ ᑎᒥᖓᓄᑦ, ᑲᓇᑕᐅᑉ ᐅᐊᓚᓂᖓᓂ ᓯᕗᓪᓕᖅᐹᖑᓪᓗᓂ ᐃᓄᓐᓄᑦ ᑐᖅᑲᑕᕐᕕᓕᐅᓚᐅᕐᓯᒪᔪᑦ ᕕᓂᐃᒡᒥ, ᒫᓂᑑᕙᒥ, ᓂᑭ ᐊᖅᑯᓯᐅᖅᓯᒪᔪᖅ ᐃᓄᓐᓄᑦ ᐃᓅᖃᑎᒥᓂᖕ ᑲᑎᑦᓯᒐᓱᐊᕐᑐᓄᑦ ᐃᑲᔪᕐᑕᐅᔪᒪᔪᓂᓪᓗ ᓄᓇᓕᕐᔪᐊᓂ ᖃᓪᓗᓈᓂ. ᐊᔾᔨᐅᖏᑦᑐᒥᖕ ᓯᕗᓕᕐᑎᐅᓂᖕᒥᓄᑦ ᓇᑦᓴᖅᑐᖅ ᐊᒻᒪ ᐃᓕᖅᑯᓯᕐᒥᓂᖕ ᖃᐅᔨᒪᑦᓯᐊᕐᑐᓂ ᐃᖅᑲᓇᐃᔮᕆᓚᐅᕐᑕᒥᒍᑦ, ᐃᓐᖏᕐᑎᐅᓪᓗᓂ, ᐃᓕᓴᐃᔨᐅᓪᓗᓂ ᒫᓂᑑᕙ ᓯᓚᑦᑐᖅᓴᕐᕕᔾᔪᐊᖓᓂ, ᐅᕝᕙᓘᓐᓃᑦ ᑭᒡᒐᕐᑐᐃᔨᐅᓪᓗᓂ ᓄᓇᒥᓂᖕ ᐊᒡᒍᕐᓯᒪᔪᓂ ᓄᓇᒥᓐᓂᓗ ᓯᓚᕐᔪᐊᕐᒥᐅᖃᑎᒌᓄᑦ − ᓇᓗᓇᓐᖏᑦᑐᖅ ᐃᖅᑲᐅᒪᔭᐅᕙᑦᑐᖅ ᐃᓕᓴᕐᑕᒥᓂᖕᒥᓄᑦ ᖃᓄᑐᐃᓐᓇᖅ.
ᓂᑭᐅᑉ ᐊᖅᑯᓯᐅᖅᓯᒪᔭᖓ ᐆᑦᑑᑎᑦᓯᐊᕙᐅᕗᖅ ᖃᓄᑎᒋ ᐃᓄᐃᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪ ᐊᕐᓇᐅᔭᑦ ᐊᖑᑕᐅᔭᓪᓗ ᐃᓄᐃᑦ ᐱᒋᐊᑐᐊᕈᑎᖕ ᐊᔪᓐᖏᓐᓂᖏᓐᓂᑦ. ᐃᓂᓪᓚᑦᓯᒪᑦᓯᐊᕐᑐᖅ ᐸᐅᒃᑑᑎᒃᑯᑦ ᐊᓪᓗᕆᐊᖁᔭᖏᑦ ᒪᑭᑉᐸᓪᓕᐊᔪᓐᓇᕐᓂᖏᓐᓄᑦ ᖁᕐᕙᕐᑎᕆᒃᑲᓂᕐᓗᓂ ᓂᐱᒥᒍᑦ ᐸᕐᓇᓯᒪᔭᖏᑎᒍᑦ ᑕᑯᓐᓇᓐᖑᐊᕐᓯᒪᔭᖏᑦ ᐸᐅᒃᑑᑎᒃᑯᑦ ᑲᔪᓯᑎᓐᓂᕐᑕᖏᑦ ᒪᑭᑉᐹᓪᓕᕈᑕᐅᓗᑎᑦ ᓂᐱᒥᒍᑦ ᐸᕐᓇᓯᒪᔭᖏᑦ ᐸᐅᒃᑑᑎᒃᑯᑦ ᖃᓄᐃᓐᖏᓪᓗᑎᑦ ᒪᑭᑕᔪᓐᓇᕐᓂᐊᕐᖓᑕ ᐃᓄᐃᑦ ᐊᕐᓇᐃᑦ ᓇᓕᒧᒌᓂᖕ ᐊᓯᖏᑎᑐᑦ ᐊᑐᐃᓐᓇᖃᕐᑎᑕᐅᓗᑎᑦ ᐋᓐᓂᐊᕐᑐᓕᕆᓂᖕᒥᑦ, ᐃᓄᓕᕆᓂᖕᒥᑦ ᐊᒻᒪ ᑮᓇᐅᔭᑎᒍᑦ ᒪᑭᑉᐸᓪᓕᐊᔾᔪᑎᑦᓴᓂᑦ, ᒪᓕᒐᓕᕆᓂᒃᑯᓪᓗ ᐃᖅᑲᕐᑐᐃᕕᑎᒎᕐᐸᑦᑐᓂᑦ, ᑐᓐᖓᕕᖃᕐᑐᐃᓐᓇᐅᓪᓗᑎᑦ ᐃᓄᐃᑦ ᐃᓕᖅᑯᓯᖓᑕ ᐅᑉᐱᕆᔭᖏᓐᓂᑦ ᑕᕝᕙᑦᓴᐃᓐᓇᖅ ᐃᑲᔪᖅᓯᓐᓈᑦ ᒪᑭᒪᑦᓯᐊᖁᓪᓗᒋᑦ ᓄᓇᖅᑲᑎᒌᑦ. ᐊᕐᕌᒍᓂᑦ ᖁᓕᓂᑦ ᐅᖓᑖᓄᑦ ᐊᒻᒪ ᖁᑦᓯᓂᕐᓴᓂ ᐊᖏᔪᖅᑳᖑᖃᑦᑕᓕᓂᐅᓪᓗᓂ, ᓂᑭ ᐸᐅᒃᑑᑎᒃᑯᑦ ᓂᕈᐊᕐᑕᖓᑦ ᓯᕗᓕᕐᑎᐅᖁᓪᓗᒍ ᐊᒻᒪ ᑭᒡᒐᕐᑐᐃᔪᓐᓇᕐᓂᖓᑕ ᑲᑐᔾᔨᑎᒌᓂᑦ ᐃᑲᔪᖅᐸᑦᑐᓂᑦ ᐃᓄᓐᓂᑦ ᐊᕐᓇᓂᑦ, ᓂᕕᐊᖅᓯᐊᓂᑦ ᐊᒻᒪ ᐊᖑᑕᐅᔭᓂᑦ ᐊᕐᓇᐅᔭᓂᓪᓗ ᐃᓄᓐᓂᑦ.
“ᓂᑭ ᐃᓚᓕᐅᑎᑦᓯᐊᕐᑐᐊᐱᑐᐃᓐᓇᖅ ᐃᓄᑦᓯᐊᕚᓗᖕᓄᑦ ᐊᕐᓇᓄᑦ ᓯᕗᓕᕐᑎᐅᖃᑦᑕᕐᓯᒪᔪᓄᑦ ᐸᐅᒃᑑᑎᒃᑯᓐᓄᑦ ᐊᓯᔾᔩᕙᓪᓕᐊᖃᑕᐅᓯᒪᔪᓄᑦ,” ᐅᖃᓚᐅᕐᑐᖅ ᐸᐅᒃᑑᑎᒃᑯᑦ ᐃᑦᓯᕙᐅᑕᖓᑦ, ᓈᓐᓯ ᐃᑦᑐᖅ. ᐃᓇᖐᓂᐊᕐᑐᖅ ᐊᓯᔾᔨᕐᐸᓪᓕᐊᓂᖕᒧᑦ ᐊᖅᑯᓯᐅᕆᓗᓂ ᓴᓐᖓᖅᑎᕈᑕᐅᓂᐊᕐᑐᓂᑦ ᐃᓄᓐᓄᑦ ᐊᕐᓇᓄᑦ, ᓂᕕᐊᖅᓯᐊᓄᑦ ᐊᒻᒪ ᐊᕐᓇᐅᔭᓄᑦ ᐊᖑᑕᐅᔭᓄᓪᓗ ᐃᓄᓐᓄᑦ ᓯᕗᓕᕐᑎᐅᓂᖕᒧᑦ ᐱᕙᓪᓕᐊᑎᑦᓯᓂᒃᑯᑦ ᐊᒻᒪ ᐃᒻᒥᓂᖕ ᒪᑭᑦᑐᓐᓇᖁᓪᓗᒋᑦ ᐃᓱᒪᖅᓱᕐᓗᑎᑦ.
ᖃᐅᔨᒪᑦᓯᐊᕐᓂᖓ ᖃᓄᖅᑑᖅᓯᒪᓂᒃᑯᑦ ᐸᕐᓇᐅᑎᓕᐅᕐᓂᖕᒥᑦ, ᒐᕙᒪᓕᕆᓂᖅ, ᓄᓇᓕᓐᓂᑦ ᐱᕙᓪᓕᐊᑎᑦᓯᓂᖕᒥᑦ, ᐊᒻᒪ ᑮᓇᐅᔭᓂᑦ ᐸᐸᑦᓯᔨᐅᓂᖕᒥᑦ, ᐊᒻᒪ ᐃᑲᔪᖅᑎᐅᖃᑎᒌᓐᓂᒃᑯᑦ ᓄᓇᖃᖅᑳᖅᓯᒪᔪᓂᑦ ᓄᓇᓕᓐᓂᑦ, ᒐᕙᒪᓂᑦ, ᑲᑐᔾᔨᖃᑎᑦᑎᓐᓂᑦ ᐱᒋᐊᕐᑎᑦᓯᖃᑎᒋᕙᓪᓗᒋᑦ ᓴᓐᖓᕐᑎᕈᑎᑦᓴᓂᑦ ᓄᓇᓕᓐᓄᑦ, ᓴᓐᖓᑎᑲᐃᓐᓇᕈᑎᑦᓴᓂᑦ, ᐊᒻᒪ ᐃᓄᐃᑦ ᐆᒻᒪᑦᑎᐊᕆᓪᓗᑎᑦ ᖃᐅᒪᔪᒥᑦ ᓯᕗᓂᑦᓴᖃᖁᓪᓗᒋᑦ, ᑕᕝᕙᑦᓴᐅᑎᒋ ᐸᐅᒃᑑᑎᒃᑯᑦ ᐅᑉᐱᕆᔭᖏᑕ ᑐᓐᖓᕕᖓᑦ ᑲᔪᓯᖁᓪᓗᒍ.
ᐃᓂᑖᖅᑲᐅᖓᓂ, ᓂᑭ ᑕᐅᑦᑐᒋᔭᐅᕗᖅ ᓂᐱᒋᔭᐅᓪᓗᓂᓗ ᐸᐅᒃᑑᑎᒃᑯᓐᓄᑦ, ᑲᔪᓯᑎᑦᓯᓪᓗᓂ ᐊᑐᐊᒐᕐᓂᑦ ᑕᑎᒋᔭᐅᓂᒃᑯᓪᓗ ᓂᐱᒋᔭᐅᓂᖕᒧᑦ ᐊᖅᑯᓯᐅᕆᑎᓪᓗᑕ, ᑲᑐᔾᔨᖃᑎᑦᓴᓂᑦ ᒪᑭᑎᑦᓯᖃᑦᑕᕐᓗᓂ ᐊᒻᒪ ᓯᕗᒧᑦ ᓴᓐᖏᓂᑦᑎᓐᓂᑦ ᓴᓐᖏᓂᒃᑲᓂᕐᓄᑦ ᑲᔪᓯᑎᑦᓯᔨᐅᖁᓪᓗᒍ ᐸᐅᒃᑑᑎᒃᑯᑦ ᑕᑯᓐᓇᓐᖑᐊᕐᓯᒪᔭᖏᓐᓂᑦ ᓯᓚᑖᓂ ᐊᒻᒪ ᐃᓄᐃᑦ ᐊᒥᓱᕈᕐᐸᓪᓕᐊᖁᓪᓗᒋᑦ ᐊᔪᕈᕐᓃᓴᕐᑕᐅᓗᑎᓗ ᑲᑐᔾᔨᖃᑎᒌᑦᑎᓐᓂ.
ᑐᓐᖓᓱᑦᑎᑕᐅᓗᓂ ᔫᓯᐱ ᐱᓕᑉᔅ, ᐊᖏᔪᖅᑳᑉ ᑐᖏᓕᐊ ᐊᐅᓚᑦᑎᓂᖕᒧᑦ: ᐊᖅᑯᓯᐅᕆᔨᑦᓯᐊᕙᒃ ᐊᐅᓚᑦᑎᓂᖕᒧᑦ
ᐊᐅᓚᑦᑎᔨᒻᒪᕆᒃ ᑲᔪᓯᑦᑎᐊᓂᐊᕐᐸᑦ ᓴᓐᖏᔪᒥᑦ ᐊᐅᓚᑦᑎᔨᖃᕆᐊᖃᕐᑐᒍᑦ, ᐊᑑᑎᖃᕈᓐᓇᖁᓪᓗᒋᓪᓗ ᐸᐅᒃᑑᑎᒃᑯᓐᓂ ᐃᖅᑲᓇᐃᔭᕐᑏᑦ. ᐸᐅᒃᑑᑎᒃᑯᑦ ᐃᖅᑲᓇᐃᔭᕐᑎᖃᕐᖓᑕ ᖃᑦᓰᓐᓇᐅᒐᓗᐊᕐᑐᑎᑦ ᓴᓐᖏᔫᓂᒃᑯᑦ ᑕᐱᕇᑦᓯᐊᕐᑐᓂᑦ, ᐃᓚᓕᐅᑎᓂᖓᒍᑦ ᔫᓯᐱ ᐱᓕᑉᔅ ᐊᐅᓚᑦᑎᔨᐅᓂᐊᓕᕐᑎᓪᓗᒍ ᐊᖏᔪᖅᑳᑉ ᑐᖏᓕᕆᓗᓂᐅᖕ ᐊᐅᓚᑦᑎᔨᓄᑦ ᐃᓗᐃᑦᑐᕈᒃᑲᓂᓂᐊᕐᑐᒍᑦ. ᔫᓯᐱ ᐃᓚᓕᐅᑎᔪᖅ ᐸᐅᒃᑑᑎᒃᑯᓐᓄᑦ ᐊᕐᕌᒍᓂᑦ ᖁᓕᓂᑦ ᑕᓪᓕᒪᓂᓪᓗ ᐃᖅᑲᓇᐃᔭᖃᑦᑕᓕᓂᐅᓪᓗᓂ ᓯᕗᓕᕐᑎᐅᓂᖕᒥᑦ ᐊᒻᒪ ᑲᔪᖏᕐᓴᐃᔨᐅᓪᓗᓂ ᑕᐱᕇᓂᒃᑯᑦ ᑲᑐᔾᔨᖃᑎᒌᓂᖕᒥᑦ, ᒐᕙᒪᓂ, ᐊᒻᒪ ᑮᓇᐅᔭᓕᐅᕋᓱᑐᐃᓐᓇᖏᑦᑐᑦ ᑲᑐᔾᔨᖃᑎᒌᖏᓐᓂ. ᐊᔪᐃᓐᓇᕐᑐᓂ ᐊᔪᕆᕐᓯᐅᔾᔨᒃᑲᐅᓂᖓ ᐅᖃᐅᔾᔪᐃᒋᐊᕐᓂᒃᑯᑦ ᓴᓐᖓᑦᑎᕆᓂᒃᑯᓪᓗ ᐊᑦᓱᐊᓗᖕ ᑐᓐᖓᓱᑦᑎᑕᐅᓂᐊᕐᑐᖅ ᐸᐅᒃᑑᑎᒃᑯᑦ ᐊᓪᓚᕝᕕᖓᓄᑦ.
ᐊᖏᔪᖅᑳᑉ ᑐᖏᓕᕆᓪᓗᓂᐅᖕ ᐊᐅᓚᑦᑎᓂᖕᒧᑦ, ᔫᓯᐱ ᐊᖏᔪᖅᑳᖃᖅᑐᖅ ᐊᐅᓚᑦᑎᔨᒻᒪᕆᒻᒥᑦ, ᐊᒻᒪ ᑐᓐᖓᕕᖃᕐᑐᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᓯᕗᓕᕐᑎᐅᓂᐊᕐᑐᖅ ᐸᐅᒃᑑᑎᒃᑯᑦ ᐃᖅᑲᓇᐃᔭᕐᑎᖏᑦ ᐊᓯᔾᔩᕙᓪᓕᐊᓂᖕᒧᑦ ᒪᑭᑉᐸᓪᓕᐊᑎᑦᓯᓇᓱᐊᕐᑎᓪᓗᒋᑦ ᐸᕐᓇᐅᑎᑎᒍᑦ. ᐸᐅᒃᑑᑎᒃᑯᓂ ᓯᕗᓕᕐᑎᐅᖃᑕᐅᔪᑦᓴᑯᒥᖕ ᐊᐅᓚᑦᓯᓂᖕᒧᑦ ᐱᓐᖑᕐᑎᑦᓯᓚᐅᕐᑐᑦ ᐊᕐᕌᒎᒃ ᒪᕐᕉᒃ ᐊᓂᒍᕐᓯᒪᓕᕐᑑᖕ ᐱᒻᒪᕆᐅᓂᖓᓄᑦ ᐃᓚᓕᐅᑎᒋᐊᖃᕐᓂᖓ ᓯᕗᓕᕐᑎᑎᓄᑦ. ᐊᕐᕌᒎᓐᓂ ᒪᕐᕉᓐᓂ ᐊᓂᒍᕐᑑᓐᓂ, ᐃᖅᑲᓇᐃᔭᕐᑎᕗᑦ ᑐᕌᒐᖃᕐᓯᒪᔪᑦ ᐊᑐᖅᑕᐅᒐᔪᑦᑐᑦ ᐃᓂᓪᓚᖅᑳᖁᓪᓗᒋᑦ ᐱᐊᓚᑦᓯᐊᓂᕐᓴᐅᖁᓪᓗᑕ ᓯᕗᓂᑦᑎᓐᓄᑦ.
ᔫᓯᐱ ᓯᕗᒧᐊᕐᑎᑦᓯᓂᐊᕐᑐᖅ ᐊᔪᐃᓐᓈᕆᔭᒥᓂᑦᑕᐅᖅ ᐊᐳᕈᑕᐅᕙᑦᑐᑦ ᑭᓲᒻᒪᖔᑕ ᑐᑭᓯᓇᓱᐊᕐᓗᒋᑦ ᐊᒻᒪ ᑕᐱᕇᑦᓯᐊᓕᖁᓪᓗᒋᑦ ᐊᒻᒪ ᖃᐅᔨᒪᓂᐊᓗᐊ ᐃᓅᖃᑎᖏᑕ ᓴᓐᖏᓂᖏᓐᓂᑦ ᑐᓐᖓᕕᒋᓗᒋᑦ ᐃᖅᑲᓇᐃᔭᕐᕕᒻᒥ ᐊᑲᐅᔪᒥ ᐃᖅᑲᓇᐃᔭᕐᕕᑦᑖᖁᓪᓗᒋᑦ ᐃᖅᑲᓇᐃᔭᕐᑎᕗᑦ ᑲᔪᓯᑦᓯᐊᕈᓐᓇᕐᓂᐊᕐᖓᑕ. ᔫᓯᐱ ᑐᓐᖓᕕᐅᓂᐊᕐᑐᖅ ᐸᐅᒃᑑᑎᒃᑯᑦ ᐸᕐᓇᐅᑎᖏᑦ ᓇᐅᒃᑯᓕᒫᖅ ᑲᔪᓯᑎᑕᐅᔪᓐᓇᖁᓪᓗᒋᑦ ᐊᔪᕈᕐᓃᖅᓴᕈᑎᑦᓴᖏᑦ ᐃᓄᐃᑦ ᐃᓄᒻᒪᕆᐅᓐᖏᑦᑐᓪᓗ ᐃᖅᑲᓇᐃᔭᕐᑏᑦ, ᑲᔪᓯᑎᑦᓯᔪᓐᓇᖁᓪᓗᑕ ᐃᓕᖅᑯᓯᖅᑎᒍᑦ ᐊᑲᐅᔪᒥᖕ ᐃᓂᑖᖁᓪᓗᑕ.
ᐊᓪᓗᕆᐊᕈᑎᑦᓴᖓᑦ ᐸᐅᒃᑑᑎᒃᑯᑦ ᐸᕐᓇᐅᑎᖏᓐᓂ ᐊᓯᔾᔩᕙᓪᓕᐊᓂᖕᒧᑦ ᑲᔪᓯᔪᓐᓇᕐᖓᑕ ᑭᓯᐊᓂ ᐃᖅᑲᓇᐃᔭᖅᑏᑦ ᖃᐅᔨᒪᑐᐊᕈᑎᖕ ᖃᐅᑕᒫᑦ ᑭᓱᒥᖕ ᐊᔪᖏᑕᒥᓂᖕ ᑲᔪᓯᑎᑦᓯᔪᓐᓇᕐᒪᖔᑕ. “ᐃᖅᑲᓇᐃᔭᖃᑎᕗᑦ ᐅᑉᐱᕈᓱᑦᑎᐊᕐᑐᑎᑦ ᐃᖅᑲᓇᐃᔮᖃᕐᐸᒻᒪᑕ ᐃᖅᑲᓇᐃᔮᒥᓂ. ᐃᖅᑲᓇᐃᔮᕋᓕ, ᖃᐅᑕᒫᑦ ᖃᐅᑕᒫᑦ, ᓯᕗᓕᕐᑎᑎᓐᓂᑦ ᐅᑉᐱᕈᓱᒋᐊᖃᕐᖓᑕ ᐃᑲᔪᕐᓱᐃᓂᒃᑯᑦ ᐃᑉᐱᓐᓂᐊᓪᓚᕆᓪᓗᒍ ᓴᓐᖓᕐᑎᕐᓗᒋᓪᓗ ᐃᑲᔪᕐᐸᑦᑐᒋᑦ ᐱᔪᓐᓇᕐᓂᓕᒫᖓᑕ ᐅᖓᑖᓄᐊᓗᖕ ᐃᑲᔪᕋᓱᐊᖁᓪᓗᒋᑦ ᐱᔪᓐᓇᕋᐃᑉᐸᑕ. ᑕᐃᒪᐃᑦᑕᕋᐃᒐᑦᑕ, ᑭᓱᑐᐃᓐᓇᑦᓯᐊᑦ ᐊᔪᕐᓇᓐᖏᑦᑐᑦ.” ᔫᓯᐱ ᐅᖃᓚᐅᕐᑐᖅ.
ᐃᖅᑲᒋᔭᐅᓪᓗᓂ ᓯᕗᓕᕐᑎᑦᓯᐊᕙᒃ ᐊᑲᐃᓪᓕᐅᕈᑎᓂᑦ ᐋᖅᑭᑦᓱᐃᑲᐅᓪᓗᓂ, ᔫᓯᐱ ᐃᓚᓕᐅᑎᑦᓯᐊᕐᑐᖅ ᐸᐅᒃᑑᑎᒃᑯᓐᓄᑦ ᖃᐅᔨᒪᓂᖃᕐᑐᓂ ᐃᖅᑲᓇᐃᔭᖃᑎᖃᕐᓂᖕᒥᑦ ᓄᓇᖃᖅᑳᖅᓯᒪᔪᓂᑦ ᓄᓇᓕᓐᓂᑦ, ᑲᑐᔾᔨᖃᑎᒌᓂᑦ, ᑎᒥᐅᔪᓂᑦ, ᓯᕗᓕᕐᑎᐅᖃᑕᐅᓂᒃᑯᑦ ᒐᕙᒪᓕᕆᓂᖕᒥ, ᐊᐅᓚᑦᑎᓂᖕᒥ, ᓇᖕᒥᓂᓖᑦ/ᑮᓇᐅᔭᑎᒍᑦ ᒪᑭᒪᓇᓱᐊᕈᑎᖏᓐᓂᑦ ᐱᕙᓪᓕᐊᔪᓕᕆᓂᒃᑯᑦ, ᐃᓕᓐᓂᐊᕐᓂᓕᕆᓂᒃᑯᑦ ᐊᒻᒪ ᐱᔭᕐᓂᖏᑦᑐᓂᑦ ᖃᐅᔨᒪᔨᑕᐅᓂᒃᑯᑦ. ᐃᑲᔪᕐᐸᑦᑐᓂ ᑲᓇᑕᒥ ᑯᐊᐳᓖᓴᓂᑦ ᑲᑐᔾᔨᖃᑎᒌᓂᓪᓗ ᑐᓐᖓᕕᖃᕐᑐᓂᑦ ᓴᐃᒻᒪᖃᑎᒌᓐᓂᖕᒥᑦ ᐊᒻᒪ ᓱᓕᔪᒥᖕ ᑭᓪᓕᓯᓂᐊᕐᑏᑦ ᑲᔪᓯᑎᑕᐅᖁᓚᐅᕐᑕᖏᓐᓂᑦ ᕿᓚᒥᒧᑦ ᐊᑯᓂᐅᓂᐊᕐᑐᒧᓪᓗ ᐱᔭᑦᓴᖏᓐᓂᑦ ᑕᕝᕙᑦᓴᐃᓐᓇᖅ ᐊᑐᖅᓯᒪᔭᒥᒍᑦ ᖃᐅᔨᓯᒪᔭᖏᑦ ᓄᓇᖃᖅᑳᖅᓯᒪᓪᓗᓂ ᐃᖅᑲᓇᐃᔭᕐᑎᐅᓪᓗᓂᓗ, ᖃᐅᔨᒪᔭᐅᔪᑦ ᐊᓯᒥᓄᑦ ᐃᓕᓴᐃᔾᔪᑕᐅᕙᓪᓗᑎᑦ, ᐃᓚᓕᐅᑎᓗᒋᑦ ᐱᐅᓯᑐᖃᒃᑯᑦ ᖃᐅᔨᒪᓃᑦ. ᐃᓚᓕᐅᑎᔪᖅ ᐸᐅᒃᑑᑎᒃᑯᓐᓄᑦ ᖁᑦᓯᓂᕐᐹᖑᖃᑕᐅᔪᒥᑦ ᓯᓚᑦᑐᖅᓴᕐᕕᔾᔪᐊᒥ ᐱᔭᕇᕐᓯᒪᓪᓗᓂ ᒫᔅᑕ ᐃᓕᓐᓂᐊᕐᓂᓕᕆᓂᖕᒥ ᐊᒻᒪ ᐸᐃᑉᐹᖁᑎᖃᕐᑐᓂ ᐅᐸᓗᖓᐃᔭᐃᓂᒃᑯᑦ ᓯᕗᓕᕐᑎᐅᓂᖕᒥᑦ ᐊᒻᒪ ᓄᑖᓐᖑᕐᐸᓪᓕᐊᔪᓄᑦ ᖃᓄᖅᑑᕆᐅᕐᓴᓂᖕᒧᑦ Schulich School ExecEd, ᓯᓚᑦᑐᖅᓴᕐᕕᔾᔪᐊᖓᓂ.
ᐊᕐᕌᒍᑦᑎᓂ ᐊᓯᔾᔨᕐᐸᓪᓕᐊᓯᒪᓪᓚᕆᑦᑐᒍᑦ, ᐅᒡᒍᓇᕋᓗᐊᕐᑐᓂ ᐃᓱᓖᓂᐊᕐᓂᖓ ᕉᔅᒥᐊᓕ ᓄᖅᑲᕐᓂᖓᓄᑦ, ᐸᐅᒃᑑᑎᒃᑯᑎᒍᑦ ᖁᔭᓕᓇᕐᑐᖅ ᔫᓯᐱ ᓂᑭᓗ ᓇᓗᓇᓐᖏᑦᑐᖅ ᐱᒻᒪᕆᐊᓗᓐᓂᑦ ᑲᔪᓯᑎᑦᓯᓂᐊᕐᑑᖕ ᐃᑲᔫᑎᒋᓇᓱᐊᕐᑕᑎᓐᓂᑦ.