ᐃᖃᓗᐃᑦ, ᓄᓇᕗᑦ ᕕᕝᕗᐊᕆ 28, 2023. ᐸᐅᒃᑑᑎᑦ ᐃᓄᐃᑦ ᐊᕐᖕᓇᐃᑦ ᑲᑐᔾᔨᖃᑎᒌᖏᑦ ᑲᓇᑕᒥ ᖁᕕᐊᑉᐳᑦ ᑐᓴᖅᑎᑦᓯᒋᐊᑦᓴᖅ ᐊᓪᓚᕕᖃᕐᓂᐊᓕᕐᖓᑕ ᐃᖃᓗᓐᓂ ᒪᑐᐃᖓᓕᕐᑐᓂᓗ. ᓯᕗᓪᓕᖅᐹᖑᓪᓗᓂ ᐊᓪᓚᕕᑖᖅᑐᒍᑦ ᐃᓄᐃᑦ ᓄᓇᖓᓂ. ᐊᒡᒍᑐᖅᓯᒪᔪᓂ ᐊᓪᓚᕕᖃᕐᓂᒃᑯᑦ ᑲᓱᖅᓯᒪᓂᕐᓴᐅᔪᓐᓇᕐᓯᓂᐊᓕᕐᑐᒍᑦ ᐃᓄᓐᓄᑦ ᐊᕐᖕᓇᓄᑦ, ᓱᕈᓯᕐᓄᑦ, ᐊᔾᔨᒌᖏᑦᑐᓂᑦ ᐃᓕᖅᑯᓯᖃᐅᖅᑐᓂᑦ ᐃᓄᓐᓄᑦ, ᐃᓚᖏᓐᓂᓪᓗ. ᐊᓪᓚᕕᑖᕗᑦ ᐆᑦᑐᕋᕐᓯᓐᓈᑦ ᒪᑐᐃᕈᒪᓚᐅᕋᑦᑎᒍ ᐊᒡᒍᑐᖅᓯᒪᔪᓂ ᐃᓄᐃᑦ ᓄᓇᖓᓂ ᒪᑐᐃᖅᓯᕙᓪᓕᐊᒍᒪᒧᑦ ᐊᓯᖏᓂ ᐊᒻᒪ ᐸᐅᒃᑑᑎᒃᑯᑦ, ᑲᓇᑕᒥ ᐃᓄᓐᓂᑦ ᐊᕐᖕᓇᓂᑦ ᑭᒡᒐᕐᑐᐃᔨᐅᓪᓗᑎᑦ, ᑐᑭᓯᐅᒪᓂᕐᓴᐅᔪᓐᓇᕐᓯᓂᐊᕐᖓᑕ ᑭᓐᖒᒪᔭᐅᖃᑦᑕᕐᑐᓂᑦ ᓯᕗᓪᓕᐅᔾᔭᐅᖁᔭᐅᔪᓂᓪᓗ ᐃᓄᓐᓄᑦ ᐊᕐᖕᓇᓄᑦ ᐃᓄᐃᑦ ᓄᓇᖓᓂ ᐊᒻᒪ ᓴᓐᖏᓂᕐᓴᒥᑦ ᓂᐱᖃᕐᕕᖃᕆᐊᓪᓚᑦᓯᓗᑎᑦ.
ᐊᓪᓚᕝᕕᒃ ᒪᑐᐃᖅᑕᐅᓚᐅᕐᑐᖅ ᒫᓐᓇᕋᑖᖅ ᐸᐅᒃᑑᑎᒃᑯᑦ ᐊᖏᔪᖅᑳᖓᑦ ᔨᐅᕆ ᓵᑉ ᐊᒻᒪ ᐊᖏᔪᖅᑳᖑᓚᐅᕐᓯᒪᔪᖅ ᐅᓖᐱᑲ ᑲᓪᓗ ᕿᓚᑦᓯᒪᔪᒥᑦ ᐊᓪᓕᕉᔭᕐᓯᓪᓗᑎᖕ ᖁᕕᐊᓲᑎᖃᓚᐅᕐᑐᑦ ᐊᖅᓴᓐᓂᐅᑉ ᑐᔪᕐᒥᕕᖓᓂ ᐊᒻᒪ ᑲᑎᒪᕕᔾᔪᐊᕐᕕᒻᒥᓂ ᐃᖃᓗᓐᓂ ᕕᕝᕗᐊᕆ 20ᖑᑎᓪᓗᒍ.
“ᐊᖏᓪᓕᕙᓪᓕᐊᓂᑦᑎᓂ ᐱᕈᕐᐸᓪᓕᐊᓂᑦᑎᓂᓗ, ᖃᓂᓪᓕᕙᓪᓕᐊᒍᒪᒐᑦᑕ ᓄᓇᓖᑦ ᑲᓱᖃᑎᒌᔾᔫᒥᔪᒪᓪᓗᒋᑦ, ᐊᑲᐅᔪᒧᑦ ᐊᓯᔾᔩᕙᓪᓕᐊᔪᒪᒧᑦ ᐃᓄᓐᓄᑦ ᐊᕐᖕᓇᓄᑦ ᐊᒻᒪ ᐃᓄᐃᑦ ᐊᔾᔨᒌᖏᑦᑐᓂᑦ ᐃᓕᖅᑯᓯᓖᑦ. ᑕᑯᓐᓇᓐᖑᐊᕐᓯᒪᔪᒍᑦ ᑲᑐᔾᔨᖃᑎᒋᕙᑦᑕᑎᓐᓂᑦ ᓴᓐᖓᑦᑎᕆᔪᒪᒧᑦ ᐊᒻᒪ ᐊᔪᕈᓐᓃᕐᓴᖅᑕᐅᕙᓪᓕᐊᖁᓪᓗᒋᑦ ᐃᓄᐃᑦ ᐊᕐᖕᓇᐃᑦ ᓇᖕᒥᓂᖃᐅᕐᑐᑦ ᑲᓇᑕᒥ,” ᐅᖃᖅᑐᓂ ᐊᖏᔪᖅᑳᖅ ᔨᐅᕆ ᓵᑉ.
ᐊᓪᓚᕝᕕᑖᖅᑲᐅᖓ ᐆᒪᔪᕐᓂᐊᕐᑎᒃᑯᑦ ᑲᑐᔾᔨᖃᑎᒌᖏᑕ (ᐊᒪᕈᒃᑯᑦ) ᐃᓪᓗᖓᓃᑦᑐᖅ, ᐊᓪᓚᕝᕕᒃ ᐃᔾᔪᐊᕈᒥᓇᕐᓂᐊᕐᑐᖅ ᐊᓯᖏᓐᓄᑦ ᐊᒡᒍᖅᓯᒪᔪᓂ ᑲᓇᑕᒥ. ᐱᓐᖑᕐᑎᑦᓯᓂᖅ ᐊᒡᒍᑐᖅᓯᒪᔪᓂ ᐅᐸᒐᑦᓴᒥᑦ, ᑐᕋᐃᓐᓇᕐᕕᖃᕐᑐᓂ ᐊᓪᓚᕝᕕᑦᑎᓐᓄᑦ ᐋᑐᕚᒧᑦ, ᐃᑲᔪᕐᓂᖃᓚᖓᒻᒪᑦ ᐃᓚᒌᑦᓯᐊᓂᕐᓴᐅᔪᓐᓇᕐᓯᓗᑕ ᐃᓄᐃᑦ ᓄᓇᖓᓂ ᐊᒻᒪ ᐃᓄᐃᑦ ᓄᓇᖏᓐᓂ (ᖃᓪᓗᓈᓂ ᓄᓇᓕᕐᔪᐊᓃᑦᑐᑦ).
ᐊᒡᒍᑐᖅᓯᒪᔪᓂ ᐊᓪᓚᕝᕕᖃᕐᓂᖅ ᐃᓄᓐᓄᑦ ᐊᕐᖕᓇᓄᑦ ᑲᑎᕝᕕᐅᔪᓐᓇᕐᓗᓂ ᐅᖃᕈᓐᓇᕐᕕᖃᕐᓗᑎᓪᓗ ᐊᔾᔨᐅᖏᑦᑐᓂᑦ ᓯᕗᓪᓕᐅᔾᔭᐅᖁᔭᖏᓐᓂᓪᓗ ᓂᓪᓕᐅᑎᖃᕈᓐᓇᕐᓯᓗᑎᑦ ᐃᓄᓐᓄᑦ ᐊᕐᖕᓇᓄᑦ ᑕᑎᒋᔭᐅᕙᑦᑐᓄᑦ ᓯᐊᑦᓯᒪᔪᓂ ᐊᒻᒪ ᐸᕐᓇᐅᑎᖏᓐᓄᑦ.
-30-
ᐸᐅᒃᑑᑎᑦ ᐃᓄᐃᑦ ᐊᕐᖕᓇᐃᑦ ᑲᓇᑕᒥ ᑮᓇᐅᔭᓕᐅᕋᓱᑐᐃᓐᓇᕋᑎᖕ ᑭᒡᒐᕐᑐᐃᔩᑦ ᐃᓄᓐᓂᑦ ᐊᕐᖕᓇᓂᑦ ᑲᓇᑕᒥ. ᑎᓕᔭᐅᓯᒪᔪᑦ ᐅᔾᔨᕈᓱᓕᖅᑎᑦᓯᕙᓪᓕᐊᖁᓪᓗᒋᑦ ᐃᓄᐃᑦ ᑭᓐᖒᒪᔭᖏᓐᓂᑦ, ᐊᒻᒪ ᐃᓚᒋᔭᐅᑎᑦᓯᓯᐊᕐᓂᖕᒥᑦ ᓄᓇᖅᑲᑎᖏᓐᓄᑦ, ᐊᒡᒍᑐᖅᓯᒪᔪᓄᑦ ᑲᓇᑕᒥᓗ ᐃᓱᒫᓗᒋᔭᐅᕙᑦᑐᓂᑦ ᐃᓄᓕᕆᓂᖕᒧᑦ, ᐃᓕᖅᑯᓯᓕᕆᓂᖕᒧᑦ ᐊᒻᒪ ᒪᑭᓇᓱᐊᕐᓂᖕᒥᑦ ᐱᕙᓪᓕᐊᓂᒃᑯᑦ.
ᑐᑭᓯᒋᐊᒃᑲᓂᕈᒪᒍᕕᑦ ᖃᐅᔨᒋᐊᕈᓐᓇᕐᑐᑦ: ᑳᑐᕆᓐ ᐅᐃᑎᑯ communications@pauktuutit.ca