ᑐᓴᒐᒃᓴᙳᖅᑎᑕᐅᑲᐅᑎᒋᓂᐊᕐᓗᓂ
ᐋᑐᕚ, ᐊᕗᓐᓂᕕᒃ (ᕕᕗᐊᕆ) 10, 2022: ᑭᑐᓗᒃᑖᓄᑦ ᓄᓇᕐᔪᐊᕐᒥᑦ ᐃᓕᑕᖅᓯᓂᕐᒧᑦ ᖁᕕᐊᓲᑎᖃᖅᑎᓪᓗᒋᑦ ᐅᑉᓗᒥ, ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥᑦ ᐱᓚᐅᖅᑕᖓᑦ “ᐊᕐᓇᐃᑦ, ᓴᐃᒪᓂᖃᕐᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐃᓅᖃᑎᒌᓄᑦ ᓯᕗᓕᐅᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᒥᑦ” ᑲᓇᑕᒥᑦ ᒐᕙᒪᒃᑯᓐᓂᑦ ᐱᓕᕆᐊᕆᓯᒪᔭᖏᓐᓄᑦ ᐊᒻᒪᓗ ᐱᐊᓂᒃᓯᒪᔭᖏᓐᓄᑦ ᒥᐊᓂᖅᓯᓂᕐᒧᑦ ᐊᒻᒪᓗ ᐃᑲᔪᖅᑐᐃᓂᕐᒧᑦ ᐃᓄᐃᑦ ᐱᔪᖕᓇᐅᑎᖏᓐᓂᒃ ᐃᓄᐃᑦ ᐊᕐᓇᓄᑦ.
ᐃᓕᑕᖅᓯᔾᔪᑎ ᑐᓂᔭᐅᓚᐅᖅᑕᖓ ᐅᐱᓐᓇᖅᑐᖅ ᒫᒃ ᒥᓗ (Marc Miller), ᒥᓂᔅᑕ ᑲᓇᑕ — ᓄᓇᖃᖅᖄᖅᑐᓂ ᐱᓕᕆᖃᑎᒌᒃᑐᓕᕆᔨᒃᑯᓐᓂᑦ, ᐊᖓᔪᖅᖄᖅ ᕆᐱᑲ ᑲᓪᓗᖕᒧᑦ ᖃᕆᑕᐅᔭᒃᑰᖅᖢᑎᒃ ᖁᕕᐊᓲᑎᖃᖅᑎᓪᓗᒍ ᑲᓇᑕᒥᑦ ᓄᓇᕐᔪᐊᕐᒥᑦ ᑲᒪᔨᒃᑯᑦ ᑲᒪᒋᔭᖓᓐᓂᑦ.
ᑐᓂᔭᐅᑎᓪᓗᒍ ᐃᓕᑕᕆᔭᐅᔾᔪᑎ ᐸᐅᒃᑑᑎᒃᑯᓐᓄᑦ ᒥᓂᔅᑕ ᒥᓚ ᐅᖃᓚᐅᖅᑐᖅ, “ᖁᕕᐊᒋᕙᑉᑎᒋᑦ, ᐊᖓᔪᖅᖄᖅ ᑲᓪᓗᒃ ᐊᒻᒪᓗ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, “ᐊᕐᓇᐃᑦ, ᓴᐃᒪᓂᖃᕐᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐃᓅᖃᑎᒌᓄᑦ ᓯᕗᓕᐅᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᒥᑦ”. ᑭᒡᒐᖅᑐᐃᓂᑉᓯᒍᑦ ᐃᓄᐃᑦ ᐱᔪᖕᓇᐅᑎᖏᓐᓄᑦ, ᖃᓄᐃᓕᐅᕐᓂᕆᔭᓯ ᖃᐅᔨᒪᓂᐅᑉᓗᑎᒃ ᐆᒃᑑᑕᐅᔪᑦ ᑕᒪᓗᒃᑖᖅ ᐃᓄᐃᑦ ᐊᕐᓇᓄᑦ ᐊᒻᒪᓗ ᓂᕕᐊᖅᓯᐊᓄᑦ ᐃᑲᔪᕈᒪᓂᖃᖅᑐᓄᑦ. ᓇᓗᓇᐃᖅᑐᒍᑦ ᐱᒻᒪᕆᐅᔪᖅ ᐱᓕᕆᐊᕆᔭᐃᑦ, ᐊᒻᒪᓗ ᐱᓂᐊᕐᓂᕆᔭᐃᑦ ᐃᑲᔪᕐᓂᐊᕐᓗᒋᑦ ᐃᓚᐅᑎᑕᐅᓂᖏᑦ ᐊᒻᒪᓗ ᐃᓄᐃᑦ ᐊᕐᓇᖏᑦ ᐊᔾᔨᒌᒃᑐᒃᑯᑦ ᐃᓚᐅᑎᑕᐅᓂᖏᑦ ᑲᓇᑕᒥᑦ – ᓴᖅᕿᑦᑎᓂᐊᕐᓗᓂ ᑐᑭᖃᖅᑐᒥᒃ ᐊᓯᐊᙳᖅᓯᓂᕐᒥᒃ, ᑕᒪᓗᒃᑖᖅ ᑭᖑᒑᕆᔭᐅᔪᓄᑦ.”
ᐱᑉᓗᓂᐅᒃ ᐃᓕᑕᕆᔭᐅᔾᔪᑎ ᐊᖓᔪᖅᖄᖅ ᑲᓪᓗᒃ ᐅᖃᓚᐅᖅᑐᖅ ᐱᕙᓪᓕᐊᓂᐅᔪᖅ ᒥᒃᖠᒋᐊᖅᑎᑦᑎᓂᕐᒧᑦ ᑐᓗᖅᑕᕈᑕᐅᔪᓂᒃ ᐃᓚᐅᖃᑕᐅᑎᑦᑎᓂᕐᒥᒃ ᐃᓱᓕᐅᕆᓂᕐᓄᑦ ᐃᓄᐃᑦ ᐊᕐᓇᓂᒃ ᓱᑲᐃᑦᑑᔪᖅ ᓱᓕ ᐊᒻᒪᓗ ᐱᕙᓪᓕᐊᕋᑕᐅᔭᖅᑐᖅ.
“ᐃᓚᐅᖃᑕᐅᖁᔭᐅᓯᒪᓕᖅᑎᓪᓗᑕ ᐃᓱᒪᓕᐅᕆᖃᑕᐅᓂᕐᒥᑦ, ᐃᓄᐃᑦ ᐊᕐᓇᖏᑦ ᐃᒃᓯᕙᐅᑕᖃᖅᑎᑕᐅᖃᑦᑕᙱᑦᑐᑦ ᓱᓕ
— ᐊᒻᒪᓗ ᓂᕈᐊᖃᑕᐅᓂᕐᒥᑦ — ᑲᑎᒪᔪᓂᑦ,” ᐅᖃᖅᑐᖅ ᑲᓪᓗᒃ. “ᑕᒪᓐᓇ ᓱᓕᔪᖅ ᓄᓇᓕᖕᒥᑦ, ᖃᓂᑦᑐᒥᑦ ᐃᓂᐅᔪᒥᑦ ᐊᒻᒪᓗ ᑲᓇᑕᒥᑦ, ᐃᓂᖃᖅᑎᑦᑎᓂᖅ ᐊᒻᒪᓗ ᐊᔪᙱᓐᓂᕆᔭᖏᑦ ᐃᓄᐃᑦ ᐊᕐᓇᐃᑦ ᓯᕗᓕᐅᖅᑎᐅᓂᖏᑦ ᐱᓕᕆᐊᖃᕐᓂᐊᕐᓗᑎᒃ ᐱᒻᒪᕆᐅᔪᓂᒃ ᐊᒃᓱᕈᕐᓇᐅᑎᓂᒃ ᓄᖑᑎᖅᑕᐅᒐᔪᒃᖢᑎᒃ ᐅᕝᕙᓘᓐᓃᑦ ᐊᒃᑐᖅᑕᐅᙱᖦᖢᑎᒃ,” ᐅᖃᖅᑐᖅ.
ᐊᖓᔪᖅᖄᖅ ᑲᓪᓗᒃ ᐅᖃᓚᐅᕐᒥᔪᖅ ᐊᑐᓕᖅᑎᑕᐅᓂᖓ ᑲᑎᓯᒪᔪᑦ ᓄᓇᖅᖃᑎᒌᑦ ᐅᖃᕐᓂᕋᐅᑎᖓᑦ ᐱᔪᖕᓇᐅᑎᖏᓐᓄᑦ ᓄᓇᖃᖅᖄᖅᑐᑦ ᐃᓄᐃᑦ ᐊᒻᒪᓗ ᐊᓯᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᔪᑦ ᓄᓇᖃᖅᖄᖅᑐᑦ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ (MMIWG) ᑲᓇᑕᒥᑦ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎ, ᑕᒪᕐᒥᒃ ᐱᓐᓂᑰᓂᖏᓐᓄᑦ ᐱᕕᖃᖅᑎᑦᑎᓂᐅᔪᑦ ᐃᓄᐃᑦ ᐊᕐᓇᖏᑦ ᐊᒻᒪᓗ ᐊᖑᑕᐅᔪᓄᑦ ᐊᕐᓇᐅᔪᓄᑦ ᐊᔾᔨᒌᙱᓐᓂᖃᖅᑐᑦ ᖁᕕᐊᓲᑎᖃᕐᓂᐊᕐᓗᑎᒃ ᐊᔾᔨᒌᓂᒃ ᖃᓄᐃᖏᓐᓂᖃᖅᑐᒥᒃ ᐃᓅᓯᕐᒧᑦ ᐊᑐᖅᑕᐅᔪᓂᒃ ᐊᒻᒪᓗ ᖃᓄᐃᖓᓂᐅᔪᓂᒃ ᐊᓯᖏᑎᑐᑦ ᑲᓇᑕᒥᐅᑐᑦ.
ᐊᖓᔪᖅᖄᖅ ᑲᓪᓗᒃ ᐅᖃᓚᐅᕐᒥᔪᖅ ᐊᔾᔨᒌᒃᑐᑰᕐᓂᐊᕐᓗᓂ UNDRIP ᒪᓕᒐᖏᓐᓄᑦ ᐊᒻᒪᓗ ᐃᒪᓐᓈᖅᑑᑕᐅᔪᑦ MMIWG ᑲᓇᑕᒥᑦ ᖃᐅᔨᓴᐃᓂᕐᒧᑦ ᐅᓂᑉᑳᒥᑦ, ᓂᕆᐅᒃᑐᖅ ᒐᕙᒪᑐᖃᒃᑯᑦ ᐊᓯᖏᓪᓗ ᐃᓚᒋᔭᐅᔪᑦ ᐃᓄᐃᑦ ᐊᕐᓇᖏᑦ ᐊᔾᔨᒌᒃᑐᒃᑯᑦ ᐃᓚᐅᖃᑕᐅᑎᑕᐅᓂᐊᕐᒪᑕ ᐊᐅᓛᖅᑎᑕᐅᓂᖓᓂᒃ UNDRIP ᐊᒻᒪᓗ ᐊᑐᓕᖅᑎᑕᐅᓂᖓᓄᑦ MMIWG ᑲᓇᑕᒥᑦ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎ.
ᐊᕐᓇᐃᑦ, ᓴᐃᒪᓂᖃᕐᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐃᓕᑕᕆᔭᐅᔾᔪᑎᓄᑦ ᑐᕌᖓᔪᖅ ᓴᖅᕿᑕᐅᓚᐅᖅᑐᖅ ᑲᓇᑕᒥᑦ ᓄᓇᕐᔪᐊᕐᒥᑦ ᑲᒪᔨᒃᑯᓐᓄᑦ ᐃᑲᔪᖅᖢᒋᑦ ᑲᑎᓯᒪᔪᑦ ᓄᓇᖅᖃᑎᒌᑦ ᒥᐊᓂᖅᓯᓂᕐᒧᑦ ᑲᑎᒪᔨᓄᑦ ᐋᖅᕿᒃᓯᓂᖅ #1325 ᐊᕐᓇᓄᑦ, ᓴᐃᒪᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ. ᑖᒻᓇ ᐋᖅᕿᒃᓯᓂᖅ ᓇᓗᓇᐃᖅᓯᔪᖅ ᐱᒻᒪᕆᐅᓂᖓᑕ ᐱᓕᕆᐊᖏᑦ ᐊᕐᓇᐃᑦ ᐱᑕᖃᖅᑕᐃᓕᑎᑦᑎᓂᕐᒧᑦ ᐊᒻᒪᓗ ᐋᖅᕿᒃᓯᓂᕐᒧᑦ ᐊᖏᖃᑎᒌᒍᑕᐅᖏᓐᓂᕐᓂᒃ ᐊᒻᒪᓗ ᑕᒪᐃᓐᓅᖓᔪᒃᑯᑦ ᓴᐃᒪᓂᓕᐅᕆᓂᕐᒧᑦ. ᐃᓚᒋᔭᐅᑉᓗᓂ, ᐋᖅᕿᒃᓯᓂᖅ ᐱᔾᔪᑎᖃᖅᑐᖅ ᐱᒻᒪᕆᐅᓂᖓᑕ ᐊᕐᓇᐃᑦ ᐊᔾᔨᒌᒃᑐᒃᑯᑦ ᐃᓚᐅᑎᑕᐅᓂᖏᑦ ᐊᒻᒪᓗ ᐃᓗᐃᑦᑑᖓᔪᒃᑯᑦ ᐃᓚᐅᓂᖃᕐᓗᑎᒃ ᐱᓕᕆᐊᖑᔪᓗᒃᑖᓂᒃ ᑲᒪᒋᔭᐅᓂᖓᓄᑦ ᓴᐃᒪᓂᖅ ᐊᒻᒪᓗ ᒥᐊᓂᖅᓯᓂ.
ᐸᐅᒃᑑᑎᑦ ᑲᓇᑕᒥᑦ ᐱᓕᕆᖃᑎᒌᖑᔪᖅ ᑭᒡᒐᖅᑐᐃᑉᓗᑎᒃ ᑲᓇᑕᒥ ᐃᓄᐃᑦ ᐊᕐᓇᓗᒃᑖᓂᒃ. ᐱᓕᕆᐊᕆᔪᒪᔭᖓᑦ ᐅᔾᔨᕆᔭᐅᓂᖅᓴᐅᑎᓪᓗᒋᑦ ᐱᔭᐅᔭᕆᐊᓖᑦ ᐃᓄᐃᑦ ᐊᕐᓇᓄᑦ, ᐊᒻᒪᓗ ᐃᑲᔪᖅᑐᕐᓗᒋᑦ ᐃᓚᐅᖃᑕᐅᓂᖏᑦ ᓄᓇᓕᖕᒥᑦ, ᖃᓂᑦᑐᒥᑦ ᐃᓂᐅᔪᒥᑦ ᐊᒻᒪᓗ ᑲᓇᑕᒥᑦ ᐃᓱᒫᓘᑕᐅᔪᓂᒃ ᐱᔾᔪᑎᖃᖅᑐᓂᒃ ᐃᓅᖃᑎᒌᓄᑦ, ᐱᖅᖁᓯᕆᔭᐅᔪᒧᑦ ᐊᒻᒪᓗ ᐱᕈᖅᐸᓪᓕᐊᓂᕐᒥᒃ ᐱᕙᓪᓕᐊᓂᕐᒧᑦ.
-30-
ᑐᓴᒐᒃᓴᓂᒃ ᖃᐅᔨᒋᐊᕈᒪᔪᓄᑦ:
ᐊᒫᓐᑕ ᑎᓯᐅᕐ (Amanda Deseure), ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ: 613.806.3336 / communications@pauktuutit.ca