ᐃᖃᓗᐃᑦ, ᓄᓇᕗᑦ ᕖᕝᕗᐊᕆ 22, 2022. ᐸᐅᑦᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑐᔅᓯᕋᐅᑎᐅᓚᐅᖅᑐᓂᒃ ᑎᓴᒪᓂᒃ ᐃᓄᓐᓄᖓᔪᓂᒃ ᕿᒫᕕᓐᓂᑦ ᐊᖏᖅᓯᓚᐅᖅᑐᑦ ᒐᕙᒪᑐᖃᒃᑯᓐᓂ ᑮᓇᐅᔭᓂᒃ ᓄᓇᖃᖅᑳᖅᑐᒥᓂᕐᓄᑦ ᕿᒫᕕᐅᓂᐊᖅᑐᒥᒃ ᐊᖏᕐᕋᐅᑲᐃᓐᓇᕐᓂᐊᖅᑐᒥᓪᓗ. ᐱᖓᓱᓂᑦ ᕿᒫᕖᑦ, ᓴᓂᑭᓗᐊᕐᒥ, ᓄᓇᕗᒻᒥ; ᐋᑐᕙᒥ, ᐊᓐᑎᐅᕆᔪᒥ; ᐊᒻᒪᓗ ᐳᕕᕐᓂᖅᑐᖅ, ᓄᓇᕕᒻᒥ; ᐊᖏᕐᕋᐅᑲᐃᓐᓇᕐᓂᐊᖅᑐᒥᓪᓗ ᐳᕕᕐᓂᖅᑐᒥ, ᓄᓇᕕᒻᒥᑦ, ᑲᔪᓯᖁᔭᐅᓕᖅᑐᑦ.

“ᖁᕕᐊᓪᓚᕆᑦᑐᒍᑦ ᐸᐅᑦᑑᑎᒃᑯᑦ ᕿᒫᕕᒻᒥ ᐊᖏᕐᕋᑲᐃᓐᓇᓂᐅᖅᑐᒥᓪᓗ ᓴᖅᑮᒻᒪᑕ. ᑕᒪᓐᓇ ᐅᑭᐅᓄᑦ 37−ᓄᑦ ᓂᓪᓕᐊᔾᔪᑕᐅᖏᓐᓇᖅᑐᖅ ᐸᑦᑑᑎᒃᑯᓐᓄ ᐊᒻᒪᓗ ᐊᖏᓂᖅᐹᖑᓪᓗᓂ ᑲᔪᓯᓐᓂᕆᓯᒪᔭᖏᓐᓂ,” ᐊᖏᔪᖅᑳᖓ ᐅᖃᖅᑐᓂ ᔨᐅᕆ ᓵᑉ. “ᐊᖏᖅᓯᓚᐅᖅᑐᑦ ᑐᔅᓯᕋᐅᑎᓂᒃ ᓯᕗᒧᐊᑉᐸᓪᓕᐊᓂᐊᓕᖅᑐᑦ ᐊᑦᑕᓇᓐᖏᑦᑑᓗᑎᑦ ᐃᓄᓐᓄᑦ ᐊᕐᓇᓄᑦ ᓱᕈᓯᕐᓄᓪᓗ.”

ᓂᓪᓕᐊᖃᑦᑕᕐᓂᖏᓐᓄᑦ ᐸᐅᑦᑑᑎᒃᑯᑦ, ᒐᕙᒪᑐᖃᒃᑯᑦ ᑮᓇᐅᔭᓂᑦ ᓴᓂᕐᕙᐃᓚᐅᖅᑐᖅ ᐃᓄᓐᓅᖓᔪᓂᒃ ᕿᒪᕕᓐᓂᑦ ᐊᖏᕐᕋᐅᑲᐃᓐᓇᕐᓂᐊᖅᑐᓂᓪᓗ. ᔮᓐᓄᐊᕆᒥ 2021−ᒥ, ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᓂᑦ ᑐᓂᓯᓂᐊᕐᓂᕋᓚᐅᖅᑐᖅ ᓴᓇᔭᐅᓂᐊᕐᓂᖓᓐᓄᑦ ᐊᐅᓚᑕᐅᓂᐊᕐᓂᖏᓐᓄᓪᓗ ᐃᓄᓐᓅᖓᔪᑦ ᓄᑖᑦ ᕿᒫᕖᑦ ᐊᕐᓇᓄᑦ, ᐊᖑᑎᓄᑦ ᐊᕐᓇᓄᓪᓗ ᐊᔾᔨᐅᖏᑦᑐᓄᑦ ᕿᑐᕐᖓᖏᓐᓄᓪᓗ ᐃᓄᐃᑦ ᓄᓇᖓᓐᓂ ᐊᒻᒪᓗ ᓄᓇᓕᐸᐅᔭᓐᓃᑦᑐᓂᒃ.

ᑐᕌᒐᕆᒐᑦᑎᒍ 13−ᓂᒃ ᑐᐊᕕᕐᓇᖅᑐᓂᒃ ᕿᒫᕕᖃᖁᔨᓪᓗᑕ − ᑎᓴᒪᓂᒃ ᓄᓇᓕᐸᐅᔭᕐᓂᑦ, ᑎᓴᒪᐅᔪᖅᑐᓂᒃ ᐃᓄᐃᑦ ᓄᓇᖏᓐᓂ ᐊᒻᒪᓗ ᐱᓗᐊᖅᑐᒥᑦ ᐊᕐᓇᓄᑦ ᐊᖑᑎᓄᓪᓗ ᐊᔾᔨᐅᖏᑦᑐᓄᑦ ᐃᓄᓐᓄᑦ. 15−ᓂᒃ ᐊᖏᕐᕋᑲᐃᓇᐅᕐᓂᐊᖅᑐᓂᒃ − ᑎᓴᒪᐅᔪᖅᑐᑦ ᐃᓄᐃᑦ ᓄᓇᖓᓐᓃᓪᓗᑎᒃ ᐊᒻᒪᓗ 7 ᓄᓇᓕᐸᐅᔭᓐᓃᓪᓗᑎᑦ. 

ᓄᓇᖃᖅᑳᖅᑐᒥᓂᕐᓂᑦ ᕿᒪᕖᓐᓂᑦ ᐊᖏᕐᕋᑲᐃᓐᓇᐅᓂᐊᖅᑐᓂᓪᓗ ᐱᓕᕆᖃᑎᖃᖅᑐᑎᑦ ᑲᒪᒋᔭᐅᔪᑦ ᑲᓇᑕᒥ ᓇᒻᒥᓂᖃᖅᑐᓄᑦ ᐊᖏᕐᕋᓂᑦ ᐊᒻᒪᓗ ᐃᓪᓗᓕᕆᔨᕐᔪᐊᒃᑯᓐᓂ (CMHC) ᐊᒻᒪᓗ ᓄᓇᖃᖅᑳᖅᑐᒥᓂᕐᓂᑦ ᐱᔨᑦᑎᕋᖅᑎᓂᒃ ᑲᓇᑕᒥ (ISC), ᓴᓇᔭᐅᓂᐊᖅᑐᓄᑦ ᐊᐅᓚᑦᑎᓂᕐᒧᓪᓗ ᑮᓇᐅᔭᖃᖅᑎᑦᑎᓗᑎᑦ ᕿᒫᕕᓐᓂᒃ ᐊᖏᕐᕋᑲᐃᓐᓇᐅᓂᐊᖅᑐᓂᓪᓗ ᐃᑲᔪᖅᑕᐅᖁᓪᓗᒋᑦ ᓄᓇᖃᖅᑳᖅᑐᒥᓂᑦ ᕿᒫᒋᐊᖃᖅᑐᑦ ᐊᖑᒻᒥᑦ ᐊᕐᓇᓂᑦ ᓂᖓᖅᑕᐅᓂᖏᓐᓂ, ᐊᕐᓇᓄᓪᓗ, ᐊᖑᑎᓂᓪᓗ ᐊᕐᓇᓂᓪᓗ ᐊᔾᔨᐅᖏᑦᑐᓂᑦ ᕿᑐᕐᖓᖏᓐᓂᓪᓗ.

ᑮᓇᐅᔭᖃᖅᑎᑦᑎᓛᖅᑐᑦ ᓴᓇᔭᐅᓂᐊᕐᓂᖓᓐᓂ ᑲᓇᑕᒥ ᓇᒻᒥᓂᖃᖅᑐᓄᑦ ᐊᖏᕐᕋᓂᑦ ᐊᒻᒪᓗ ᐃᓪᓗᓕᕆᔨᕐᔪᐊᒃᑯᓐᓂ (CMHC). ᐊᑐᐃᓐᓇᖃᖅᑎᑦᑎᓛᖅᑐᑦ ᐃᓱᖃᕐᓗᑎᑦ $3.48−ᒥᓕᐊᓂᒃ ᐊᑐᓂ ᕿᒫᕕᓐᓂᑦ ᑲᓇᑕᒥ ᐊᕕᑦᑐᖅᓯᒪᔪᓂᒃ, ᐊᒻᒪᓗ ᐃᓱᖃᕐᒥᓗᑎᑦ $7.2−ᒥᓕᐊᓂᒃ ᕿᒫᕕᓐᓂᑦ ᐅᑭᐅᖅᑕᖅᑐᒥ ᐃᓄᐃᑦ ᓄᓇᖓᓐᓂ. ᓄᓇᖃᖅᑳᖅᑐᒥᓃᑦ ᐱᔨᑦᑎᕋᖅᑎᖏᑦ ᑲᓇᑕᒥ (ISC) ᐊᑐᐃᓐᓇᖃᖅᑎᑦᑎᖃᑦᑕᕐᓗᑎᑦ ᐊᕐᕌᒍᑕᒫᑦ $800,000−ᓂᒃ ᐊᐅᓚᑦᑎᔾᔪᑎᔅᓴᓂᒃ ᕿᒫᕕᓐᓂᒃ ᑲᓇᑕᒥ ᐊᕕᑦᑐᖅᓯᒪᔪᓂᒃ ᐊᒻᒪᓗ ᑕᒫᓂ ᐊᕐᕌᖑᑕᒫᑦ ᑐᓂᓯᖃᑦᑕᕐᓗᑎᑦ $1−ᒥᓕᐊᓂᒃ ᐊᐅᓚᑦᑎᔾᔪᑎᔅᓴᖏᓐᓄᑦ ᕿᒫᕕᓐᓄᑦ ᐅᑭᐅᖅᑕᖅᑐᒥ ᐊᒻᒪᓗ ᐃᓄᐃᑦ ᓄᓇᖓᓐᓂ. ᐊᐅᓚᑦᑎᔾᔪᑎᔅᓴᓄᑦ ᑐᓂᓯᒐᔭᕐᒥᔪᑦ ᐊᖏᕐᕋᕆᔭᐅᑲᐃᓐᓇᕐᓂᐊᖅᑐᓂᒃ $500,000−ᓂᒃ ᐃᓄᐃᑦ ᓄᓇᖓᓐᓂ ᐊᒻᒪᓗ ᓄᓇᓕᐸᐅᔭᕐᓄᑦ ᖃᓪᓗᓈᓂ.

-30-

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᔅᓴᖅ: ᑳᑎᓖᓐ ᐅᐃᑦᑕᐃᑯ (Catherine Whittaker), 343-804-0881, ᐅᕝᕙᓘᓐᓃᑦ communications@pauktuutit.ca.

ᐸᐅᑦᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑲᓇᑕᒥ ᑮᓇᐅᔭᓕᐅᖅᑎᐅᒐᓱᐊᓐᖏᑦᑐᑦ ᑭᒡᒐᖅᑐᐃᔪᑦ ᐃᓄᓕᒫᑦᑎᐊᕐᓂᑦ ᐊᕐᓇᓂᑦ ᑲᓇᑕᒥ. ᑐᕌᒐᖏᑦ ᑎᒍᒥᐊᕐᓗᑎᑦ ᐅᔾᔨᕈᓱᑦᑎᑦᑎᑲᓐᓂᕐᓗᑎᓪᓗ ᐱᔭᕆᐊᓕᖏᓐᓂ ᐃᓄᐃᑦ ᐊᕐᓇᓄᑦ, ᐱᖃᑕᐅᑎᑦᑎᖃᑦᑕᕐᓗᑎᓗ ᓄᓇᓕᓐᓂᑦ, ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ ᑲᓇᑕᒥᓗ ᐃᓱᒫᓘᑎᒋᔭᐅᔪᓂᒃ ᒪᑯᓄᖓ ᐊᑦᑐᐊᔪᓄᑦ ᐃᓄᓕᕆᓂᕐᒧᑦ, ᐱᖅᑯᓯᓕᕆᓂᕐᒧᑦ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ.