ᐊᖓᔪᖄᖓᑦ ᑲᓪᓗᑦ ᐃᑲᔪᖅᑐᐃᖕᒪᑦ ᒪᒃᑯᑦᑐᓐᓂᒃ ᓄᕙᒡᔪᐊᕐᓇᖅ−19 ᑲᐱᔭᐅᖁᔨᑉᓗᓐᓂ ᑲᐱᔭᐅᕕᒃᓴᖓᑦ ᑎᑭᑉᐸᑦ
ᐋᑦᑐᕚᒻᒥ, ᒫᐊᑦᔅ 17, 2021 — ᑕᐅᑐᒐᒃᓴᖅ ᐅᑉᓗᒻᒥ ᓴᕿᑎᑕᐅᓂᐊᕐᒪᑦ ᐃᑲᔪᖅᑐᐃᔪᖅ ᑲᐱᔭᐅᔭᕆᐊᖃᕐᓂᖏᓐᓂᒃ ᐃᓄᐃᑦ ᒪᒃᑯᒃᑐᖏᑕ ᐃᓄᐃᑦ ᓄᓇᖓᓐᓂ ᐊᒻᒪ ᑲᓇᑕᐅᑉ ᓄᓇᓕᖏᓐᓂ, ᐅᓂᑉᑳᖅᑐᖅ ᐋᓐᓂ ᐴᔅᓯᒻᒥ, ᖃᐅᔨᒪᔭᐅᓪᓗᕆᒃᑐᖅ ᐃᓄᒃ ᖃᕆᑕᐅᔭᓕᕆᔨ, ᐅᖃᐅᓯᖃᖅᖢᓐᓂ ᓲᖕᒪᑦ ᓄᕙᒡᔪᐊᕐᓇᖅ-19 ᐊᓐᓂᐊᓕᖅᑕᐃᓕᔪᒻᒧᑦ ᖃᐱᔭᐅᓱᐊᕐᒪᖔᑦ. ᑖᒻᓇ ᑕᕆᔭᐅᑦ ᐃᓚᒋᔭᐅᔪᖅ ᐃᓄᐃᑦ ᐃᓕᓐᓂᐊᕈᑎᖏᓐᓄᑦ ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏ ᑲᓇᑕᒻᒥ ᐅᔨᕈᓱᓕᖅᑎᑦᓯᔪᒪᖕᒪᑕ ᐃᓄᐃᑦ ᐊᕐᓇᖏᓐᓂᒃ ᕿᑐᕋᖏᓐᓂᒃᓗ ᖃᓄᐃᑕᐃᓕᓂᕐᒥᒃ ᐊᒻᒪ ᐊᑐᓕᖅᑎᑦᓯᓂᕐᒥᒃ ᓄᕙᒡᔪᐊᕐᓇᖅ-19 ᑲᐴᑎᖏᓐᓂᒃ ᐊᖏᖅᑕᐅᓯᒪᔪᓐᓂᒃ ᐊᑐᒐᐅᓂᐊᕐᓗᑎᒃ ᑲᓇᑕᒻᒥ.
“ᐃᓄᐃᑦ ᐳᕙᓪᓗᓚᐅᖅᓯᒪᖕᒪᑕ ᒥᐊᓂᕆᔭᐅᑎᐊᓗᐊᖏᖢᑎᒃ ᐊᓐᓂᐊᖅᑕᐃᓕᓂᖏᓐᓄᑦ, ᑕᐃᒪᖓᑦ ᐅᑉᓗᒻᒥ ᐃᓄᐃᑦ ᐊᒥᓱᓐᓂᒃ ᐱᔪᑎᒃᓴᖃᓕᕐᒪᑕ ᑲᐱᔭᐅᔪᒪᖏᓂᖏᓐᓄᑦ ᓄᕙᒡᔪᐊᕐᓇᖅ-19 ᑲᐴᑎᖓᓐᓂᒃ,” ᐅᖃᕐᒪᑦ ᕆᐱᑲ ᑲᓪᓗᒃ, ᐊᖓᔪᖄᖓᑦ ᐸᐅᒃᑑᑎᒃᑯᑦ. “ᒪᒃᑯᒃᑐᓪᓗ ᐃᓱᒪᑦᑕᕐᒪᑕ ᐊᓐᓂᐊᓕᓚᖏᓇᓱᒋᑉᓗᑎᒃ ᐱᓗᐊᖅᑐᒻᒥᒃ ᐊᓐᓂᐊᕐᓂᖅᑖᓚᖏᓇᓱᒋᖕᒪᑕ ᓄᕙᒡᔪᐊᕐᓇᖅ-19. ᐃᓄᐃᑦ ᒪᒃᑯᒃᑐᖏᑦ ᐊᔪᕈᖕᓇᐃᕈᒫᓕᕐᒪᑕ ᓄᕙᒡᔪᐊᕐᓇᖅ-19 ᓄᕙᒡᔪᐊᕐᓂᕐᒧᑦ, ᐸᐅᒃᑑᑎᑦ ᐃᓱᒪᖕᒪᑕ ᐊᑑᑎᖃᕐᒪᑦ ᐃᑲᔪᖅᑐᐃᓂᖏᑦ ᒪᒃᑯᒃᑐᑦ ᐊᕐᓇᑦ ᐆᒃᑐᕋᐅᑕᐅᖕᒪᑕ ᐋᓐᓂ ᐴᔅᓯᒥᑦᑐᑦ ᐅᖃᕈᖕᓇᑎᐊᖅᑐᖅ ᒪᒃᑯᒃᑑᖃᑎᒥᓐᓄᑦ ᑲᓇᑕᓗᒃᑖᒥᓗ, ᐅᖃᖅᐸᒃᖢᓐᓂ ᐊᕐᓂᐊᕐᓂᕐᒧᑦ ᑎᑭᑕᐅᓚᖏᓇᑉᑕ ᑲᐱᔭᐅᓯᒪᒍᑉᑕ,” ᐅᖃᖅᖢᓐᓂ.
“ᐅᐱᓚᐅᕋᒻᒪ ᐊᐱᕆᔭᐅᒐᒻᒪ ᐃᓚᐅᖃᑕᐅᔫᓪᓗᐊᕐᓂᒻᓂᒃ ᐸᐅᒃᒡᑐᑎᑦ ᐃᑲᔪᖅᑐᐃᓂᖓᓐᓂ,” ᐅᖃᖅᖢᓐᓂ ᐴᔅᓯᒻᒥ. “ᐊᒥᓱᑦ ᐃᓄᐃᑦ ᒪᒃᑯᒃᑐᖏ, ᐊᑖᑕᑦᓯᐊᒻᓄᑦ ᐊᓈᓇᑦᓯᐊᒻᓄᓪᓗ ᖃᓂᓐᓇᒻᒪ ᐊᒥᓱᓐᓂᒃ ᐃᓕᓐᓂᐊᖅᑎᓯᒪᖕᒪᖓ ᐃᓅᓯᖃᑎᐊᕐᓂᕐᒥᒃ. ᓄᕙᒡᔪᐊᕐᓇᖅ-19 ᑲᐱᔭᐅᓗᓐᓂ ᐅᖃᕈᖕᓇᖅᐳᖓ ᐅᕙᒻᓂᒃ ᒥᐊᓂᕆᓂᐊᖅᐳᒐ ᐊᒻᒪ ᐃᓄᑐᖃᐃᑦ ᒥᐊᓂᕆᔭᐅᓗᒃ ᓄᓇᓕᑉᑎᖕᓂ.”
ᐊᒃᑑᓂᖅᓴᑦ ᐃᓄᐃᑦ ᓄᓇᖓᓐᓂ ᑲᐱᔭᐅᓯᒪᓕᕐᒪᑕ ᐊᑕᐅᓰᖅᖢᑎᒃ ᒪᑖᓐᓇ ᑲᐴᑎᖓᓐᓂᒃ. ᐃᓚᖏᑦ, ᐊᖓᔪᖄᖅ ᑲᓪᓗᒃᑐᑦ ᖃᒪᓂ’ᑐᐊᕐᒥᐅᑦ ᐃᓄᐃᑦ ᓄᓇᖓᓐᓂ ᒥᑭᔪᒻᒥᒃ ᐊᓐᓂᐊᕐᕕᖃᖅᑐᑦ ᓇᔭᖑᐊᖃᖅᑐᓐᓂᒃ ᐃᒡᓗᖏᓪᓗ ᐃᓂᑭᓗᐊᖅᖢᑎᒃ ᐊᒥᓲᓗᐊᕐᓂᖏᓐᓄᑦ ᐃᓚᒌᑦ, ᒪᕈᐃᕐᖢᑎᒃ ᑲᐱᔭᐅᓯᒪᖕᒪᑕ. ᐊᒻᒪ ᓱᓕ, ᓄᓇᓕᒡᔪᐊᕐᓂ ᐋᑐᕚᒻᒥᑐᑦ, ᐃᓄᐃᑦ ᓄᓇᖓᓐᓂᑦ ᐱᔪᑦ ᐊᒃᑑᓂᖅᓴᐅᔪᑦ ᓯᕗᓪᓕᐅᑎᑕᐅᖕᒪᑕ ᓄᕙᒡᔪᐊᕐᓇᖅ-19 ᑲᐱᔭᐅᓂᕐᒧᑦ.
“ᐃᓄᐃᑦ ᐊᒻᓱᑦ ᑐᑭᓯᐊᖏᒻᒪᑕ ᐃᓄᐃᑦ ᑲᓇᑕᒻᒥ ᐃᓅᔪᖕᓇᐃᕆᐊᑲᖕᓂᖅᓴᐅᓱᕐᒪᑕ 10-17 ᐅᑭᐅᓐᓂᒃ ᑲᓇᑕᒥᐅᓐᓂᑦ,” ᐅᖃᕐᓗᓐᓂ ᑳᓐᓂ ᓯᑦᑎᐅᓪ, ᑐᑭᒧᐊᒃᑎᑦᓯᔨ ᐊᑲᐅᓯᕕᖕᒥ ᐃᓄᐃᑦ ᐊᓐᓂᐊᕐᓇᖏᑐᓕᕆᔨᖏᑦ ᐋᑦᑐᕚᒻᒥ. “ᑕᒪᓇ ᑐᑭᖃᕐᒪᑦ ᐊᒥᓱᑦ ᐃᓄᐃᑦ ᐃᒡᓗᕐᔪᐊᖅᑕᓕᖕᓂ ᐊᓐᓂᐊᓕᓚᓂᖅᓴᐅᖕᒪᑕ ᐃᓅᔪᖕᓇᐃᕋᔪᖕᓂᖅᓴᐅᑉᓗᑎᒡᓗ ᐱᑖᕋᔭᕐᓂᕈᒥᒃ ᓄᕙᒡᔪᐊᕐᓇᖅ-19,” ᐅᖃᖅᐳᖅ ᓯᑦᑎᐅᓪ. ᐊᑐᕆᐊᓕᓵᖅᑎᓪᓗᒍ ᐅᑭᐅᖅ, ᓯᓚᑎᒃ ᖃᑉᕕᒃ ᓴᓂᑭᓗᐊᕐᒥᐅᑕᖅ ᓄᓇᕘᒥ ᐃᓅᔪᖕᓇᐃᕌᓚᓚᐅᕐᒪᑦ ᕖᓂᐱᖕᒥ ᓄᕙᒡᔪᐊᕐᓂᖅᑖᕋᒻᒥ. 35-ᓂᒃ ᐅᑭᐅᓕᒃ ᕖᓂᐱᒧᓕᐊᕐᒪᑦ ᓄᑕᕋᖅᑖᕆᐊᖅᑐᕐᖢᓐᓂ ᓄᕕᒻᐱᕆᒻᒥ ᑭᓯᐊᓐᓂ ᐃᓅᔪᖕᓇᐃᕐᒪᑦ ᔮᓄᐊᕆᒻᒥ ᐊᓐᓂᐊᓕᕋᒻᒥ ᓄᕙᒡᔪᐊᕐᓇᖅ-19, ᕿᒪᒃᖢᓂᒋᑦ ᓄᑕᕋᐃ ᑕᓪᓕᒪᑦ ᐊᓈᓇᖃᖏᖠᖅᖢᑎᒃ.
ᐸᐅᒃᑑᑎᒃᑯᑦ ᑕᕿᓐᓂᒃ 6−ᓂᒃ ᐅᔨᕈᓱᖕᓂᕐᒧᑦ ᐱᓕᕆᐊᖓᑦ ᑮᓇᐅᔭᖃᖅᑎᑕᐅᖕᒪᑦ $340,000 ᑮᓇᐅᔭᖅ ᐅᑯᓇᖓᑦ ᐊᕐᓇᐃᑦ ᐊᒪ ᐊᔨᒌᒃᑎᑕᐅᓂᖏᑦ ᐃᓄᐃᑦ ᑲᓇᑕᒻᒥ (WAGE). ᐃᑲᔪᖅᑐᐃᓂᖅ ᐃᖃᓕᒫᒐᖅᑎᒍᑦ ᓈᓚᐅᑎᒃᑯᓪᓗ ᐊᒻᒪ ᖃᕆᑕᐅᔭᒃᑯᑦ ᑐᑭᓯᑎᑦᓯᓂᓗᖕᓂᐅᔪᖅ ᐱᓗᐊᖅᑐᒻᒥᒃ ᒪᒃᑯᒃᑐᓐᓂᒃ ᐊᒻᒪ ᑐᓂᓯᕙᓪᓕᐊᓂᖅ 5,000 ᑕᓗᐊᕐᓂᒃ ᐃᓄᐃᑦ ᓄᓇᖓᓐᓄᑦ ᐊᒪ ᑲᑉᓗᓈᑦ ᓄᓇᖓᓐᓄᑦ ᐃᓄᖃᖅᑐᓐᓄᑦ.
“ᐊᓐᓂᐊᕐᖏᓐᓂᖏᑦ, ᖃᓄᐃᖏᓂᖏᑦ, ᐃᖃᓇᐃᔮᓂᓗ ᐃᓚᐅᓂᕐᒥᒃ ᐱᔨᑦᓯᕐᓂᕐᒥᒡᓗ ᐃᓄᐃᑦ ᐊᕐᓇᖏᑕ ᐊᑑᑎᖃᖅᐳᖅ ᑲᓇᑕᒥᐅᓗᒃᑖᓐᓄᑦ,” ᐅᖃᖅᐳᖅ ᐅᐱᓐᓇᖅᑐᖅ ᒥᐊᕆᐊᒻ ᒫᓐᓰᕝ, ᒥᓂᔅᑕᖓᑦ ᐊᕐᓇᐃᑦ ᐊᒪ ᐊᕐᓇᑦ ᐊᖑᑎᑦ ᐊᔨᒌᒃᑎᑕᐅᓂᖏᑦ ᑲᓇᑕᒥ (WAGE). “ᐅᑉᓗᒥᒻᒧᑦ, ᐃᖃᓇᐃᔭᕐᕕᖓ ᑮᓇᐅᔭᖃᖅᑎᑦᓯᖕᒪᑦ 8−ᓂᒃ ᐱᓕᕆᐊᕐᓂᒃ ᐃᑲᔪᖅᑐᓐᓂᒃ ᐃᓄᐃᑦ ᐊᕐᓇᖏᓐᓂᒃ, ᐃᓚᐅᑉᓗᓐᓂ ᑲᓇᑕᒻᒥ ᐅᖃᐅᓯᖃᕐᓂᕐᒥᒃ ᐊᕐᓇᐃᑦ ᐊᖑᑎᓪᓗ ᐊᑦᔨᒌᒃᑎᑕᐅᓂᖏᓐᓂᒃ, ᐃᓚᐅᑎᑦᓯᓂᕐᒥᒃ ᐊᖑᑎᑦ ᐊᕐᓇᐃᓪᓗ ᐊᓐᓂᖅᑕᐅᑦᑕᕐᓂᖏᑦ ᒥᒃᖦᒋᐊᖅᑎᓗᒋᑦ. ᒐᕙᒪᕗᑦ ᓴᓂᕐᕙᐃᓯᒪᕗᑦ $1.6 ᒥᓕᔭᓐᓂᒃ ᐃᑲᔪᕐᓂᐊᕐᓗᒋᑦ ᐃᓄᐃᑦ ᐊᕐᓇᖏᑕ ᕿᒫᕕᒃᓴᖏᓐᓂᒃ ᒪᑐᐃᖓᑎᓪᓗᒋᑦ ᐱᔨᑦᓯᕋᐅᑎᖏᓪᓗ ᐊᑐᐃᓐᓇᐅᑎᓪᓗᒋᑦ ᑕᐃᑉᑯᓄᖓ ᐊᑐᕈᒪᔪᓐᓄᑦ.”
“ᐊᒻᒪ — ᑲᓇᑕᒥᐅᓗᒃᑖᑦ ᑲᐱᔭᐅᔫᓗᐊᖁᑉᓗᒋᑦ ᓈᒻᒪᓕᖅᐸᑦ ᐱᑉᕕᒃᓴᖓᑦ — ᐊᑐᐃᓐᓇᐅᑎᑦᓯᕗᒍᑦ ᒥᓕᔭᓐᓂᓯᐅᖅᑐᓐᓂᒃ ᑲᐴᑎᓐᓂᒃ, ᐃᓚᖏᑦ ᓱᓕ ᐊᑐᐃᓐᓇᐅᓂᐊᖅᖢᑎᒃ ᒫᐊᑦᔅ ᓄᖑᓪᓗᒍ ᐊᒻᒪ ᐱᒋᐊᒃᑲᓂᕐᓗᑎᒃ ᐅᐱᕋᒃᓵᖅ,” ᐅᖃᖅᐳᖅ ᒫᓐᓰᕝ. “ᒪᑦᓈᕈᒪᕙᒃᑲ ᐸᐅᒃᑑᑎᒃᑯᑦ ᐃᓄᐃᓪᓗ ᐱᓕᕆᖃᑕᐅᔪᑦ ᑲᔪᓯᑎᑦᓯᓚᐅᕐᒪᑕ ᐱᐅᔪᒻᒥᒃ ᑲᐱᔭᐅᑦᑕᕐᓂᖏᑦ ᐃᓄᐃᑦ. ᒐᕙᒪᕗᑦ ᑲᔪᓯᓂᐊᖅᐳᖅ ᐃᖃᓇᐃᔭᖃᑎᖃᕐᓂᕐᒥᒃ ᐃᓕᖕᓂᒃ ᐊᓐᓂᐊᕐᓂᖅ ᓄᖑᑕᐅᖁᑉᓗᒍ ᒪᑭᒃᑲᓂᕐᓗᓂᓗ ᐱᐅᓂᖅᓴᐅᓕᕐᓗᓐᓂ.”
-30-
ᑐᑭᓯᒋᐊᕐᕕᐅᔪᖕᓇᖅᑐᒃ:ᓲᓴᓐ ᑭᖕ: 613.724.1518, sking@pauktuutit.ca or ᑲᑐᕆᓐ ᕕᑎᑲᓪ: 613.762.7729, cwhittaker@pauktuutit.ca