— Read the english version
ᐊᓚᒃᑲᕐᑕᖓᑦ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ | ᔫᓂ 3, 2020 | ᐱᕙᓪᓕᐊᔪᑦ
ᐋᑐᒑᒥ − ᐅᓪᓗᒥ ᕇᐱᑲ ᖁᓪᓗ, ᐊᖏᔪᖅᑳᖓᑦ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐅᖃᓚᐅᕐᑐᖅ
ᐱᑦᔪᑎᒋᓪᓗᒋᑦ ᑲᓇᑕᓕᒫᒥ ᑭᓪᓕᓯᓂᐊᕐᑎᐅᓚᐅᕐᑐᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᑭᓂᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᑭᓪᓕᓯᓂᐊᕐᑏᑦ ᐅᓂᒃᑲᐅᓯᓕᐅᓚᐅᕐᓯᒪᑎᓪᓗᒋᑦ ᐊᑕᐅᓯᖅ ᐊᕐᕌᒍ ᓈᓕᕐᐳᖅ ᐊᖏᔪᖅᑳᖅ ᐅᖃᐅᓯᖃᓚᐅᖅᑐᖅ ᐃᒫᒃ:
“ᑲᓇᑕᓕᒫᒥ ᑭᓪᓕᓯᓂᐊᕐᑎᐅᓚᐅᕐᑐᑦ ᐅᓂᒃᑲᐅᓯᓕᐅᓚᐅᕐᓯᒪᑎᓪᓗᒋᑦ ᐊᑕᐅᓯᖅ ᐊᕐᕌᒍ ᓈᓕᕐᐳᖅ ᓄᓇᖃᖅᑳᕐᓯᒪᔪᑦ ᑭᓂᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᐱᑦᔪᑎᒋᓪᓗᒋᑦ, ᐅᖃᐅᓯᕆᔪᒪᕙᒃᑲ ᐱᔪᓐᓇᕐᓂᕆᓯᒪᔭᖏᑦ, ᐃᓗᖏᕐᓱᕐᓯᒪᓂᖏᑦ ᐊᒻᒪ ᑲᑦᓱᖓᐃᕐᓯᐊᕐᓯᒪᓚᐅᕐᓂᖏᑦ ᐊᒥᓲᔪᑦ ᐃᓚᒋᑦᑐᑦ ᐅᓂᒃᑲᐅᓯᖃᓚᐅᕐᒪᑕ ᓇᓪᓕᒋᔭᒥᓐᓂᒃ ᐃᓚᒥᓐᓂᒃ. ᑕᐃᑲᓂ ᑐᓵᓚᐅᕐᐸᑦᓯ ᐊᒻᒪ ᐃᓚᒋᔭᐅᑦᓱᑎᒃ ᐊᒥᓱᔪᑦ ᑲᑎᒻᒪᔨᐅᖃᑎᕗᑦ ᐊᒻᒪ ᐱᓕᕆᖃᑎᕗᑦ.
ᖃᐅᔨᒪᕗᖓ ᑕᒪᓐᓇ ᐅᖁᒪᐃᑦᑐᒻᒪᕆᐊᓗᒃᒪᑦ ᐊᒻᒪ ᐊᓐᓂᕐᓯᒪᑦᔪᑎᑐᖄᓗᐃᑦ ᐊᑐᒃᑲᓐᓂᓕᓚᐅᕐᒥᒐᑦᓯᐅᒃ ᓱᕐᓗ ᐅᑲᐅᓯᐅᑲᓐᓂᓚᐅᕐᓯᒪᖏᑦᑐᑦ ᑭᓯᐊᓂᓕ ᐱᐅᒍᕐᑕᐅᓚᐅᕐᓯᒪᖏᑦᑐᖅ ᑕᒪᓐᓇ. ᐊᒥᓲᔪᓯᒍᑦ ᐅᓂᒃᑲᐅᓯᖃᓕᓚᐅᕋᑦᓯ ᓂᓪᓕᐅᑎᒋᓚᐅᕐᓯᒪᖏᑦᑕᓯᓐᓂᒃ. ᓇᒻᒥᓂᖅ ᐅᖃᐅᓯᒃᓴᓯᓐᓂᒃ ᐅᖃᐅᓯᖃᓚᐅᕋᓗᐊᕐᑐᓯ ᑭᓯᐊᓂᓕ ᓱᕐᓗ ᐅᕙᒃᑎᓐᓂᒃ ᑭᒡᒐᕐᑐᐃᓚᐃᕐᐳᓯ. ᕿᑦᓵᑦᔪᑎᒋᕙᒃᐸᕗᑦ ᑕᐃᒃᑯᐊ ᓱᓕ ᒫᓐᓇᒧᑦ ᕿᓂᕐᑕᐅᔪᑦ.
ᐱᓕᕆᖃᑎᒋᑦᓱᑕ, ᐃᓱᖏᑦᓱᖃᑎᒋᓚᐅᕐᐸᕗᑦ ᑲᓇᑕᒥ ᑭᓪᓕᓯᓂᐊᕐᑏᑦ ᓂᕆᐅᓐᓂᖃᕐᓱᑕ ᐋᖅᑮᕚᓪᓕᕈᑎᒃᓴᓂᒃ. ᓱᕐᓗ ᑲᓇᑕᒥ ᓂᕆᐅᓐᓂᖃᑦᒌᓚᐅᕐᐳᒍᑦ ᑕᒪᓐᓇ ᓴᐃᒻᒪᕙᓪᓕᕈᑎᒃᓴᒥᒃ ᓴᖅᑮᕕᐅᖁᓪᓗᒍ ᑕᒪᑐᒧᖓ ᐊᓐᓂᓇᕐᓯᒪᔪᐊᓗᒃᒧᑦ ᐊᒻᒪ ᓯᕗᓂᒃᓴᑎᓐᓂ ᑕᐃᒪᐃᑦᑐᖃᖃᑦᑕᕈᓐᓂᕐᓗᓂᓗ.
ᖃᐅᔨᒪᕗᖓ ᐊᒥᓲᔪᓯᒍᑦ ᖁᓄᒻᒥᕐᓯᒪᒐᑦᓯ ᐅᖓᕐᕙᕆᐊᕐᑕᐅᓂᕆᓚᐅᕐᑕᖓᓄᑦ ᓯᕗᒧᐊᑦᔪᑎᒃᓴᓂᒃ ᑲᓇᑕᓕᒫᒥ ᐃᓄᐃᑦ ᐱᓕᕆᑦᔪᑎᒃᓴᓕᐅᕐᓂᕐᒧᑦ. ᐃᓕᒃᓯᑐᑦ ᐸᐅᒃᑑᑎᒃᑯᑦ ᑲᑎᒻᒪᔨᖏᑦ ᐊᒻᒪ ᐅᕙᖓ ᓴᐱᓕᕐᓂᐊᖏᓪᓚᒍᑦ ᐊᒻᒪ ᑲᔪᓯᐅᒪᐃᓐᓇᑎᒃᓯᓂᐊᕐᐳᒍᑦ ᐋᔨᖃᑎᒌᖃᑦᑕᓂᕐᒥᑦ ᒐᕙᒪᒃᑯᓐᓂᖔᕐᑐᓂᒃ ᐊᒻᒪ ᐊᓯᖏᓐᓂᒃ ᓯᕗᓂᒃᓴᑎᓐᓂᒃ. ᐃᓗᖏᕐᓱᕐᓂᕆᔭᓯ ᐊᒻᒪ ᑲᔪᓯᐅᒪᓂᓯ ᐅᕙᓐᓂᒃᐳᖅ ᖃᐅᑕᒫᑦ. ᐃᓕᓐᓂᒃ ᓇᑯᕐᒦᕐᐳᖓ ᐃᓚᓯ ᓇᓪᓕᒋᔭᒃᓯ ᐃᓅᓯᕆᓯᒪᔭᖏᓐᓂᒃ ᐅᓂᒃᑲᐅᓯᖃᕈᓐᓇᓚᐅᕋᑦᓯ. ᐃᖅᑲᐅᒪᔭᐅᖏᓐᓇᖁᓇᖅᑯᑦ.”
-30-
ᑐᑭᓯᒋᐊᕐᕕᐅᑲᓐᓂᕈᓐᓇᕐᑐᖅ ᐅᓇ:
ᐋᓐᑐᐊᓇᑦ ᕗᕆᓐᑕᒧᐊ
ᑐᑭᒧᐊᒃᑎᒃᓯᔨ ᑐᓴᐅᒪᐅᑎᓕᕆᓂᕐᒧᑦ
613-316-8943; abrindamour@pauktuutit.ca