ᒫᔾᔨ 28, 2023
ᐅᓇᓃᑦᑐᑦ ᐅᖃᐅᓯᒥᓂᖏᑦ ᔨᐅᕆ ᓵᑉ, ᐸᐅᒃᑑᑎᑦ ᐃᓄᐃᑦ ᑲᓇᑕᒥ ᐊᖏᔪᖅᑳᖓᑦ, ᑲᓇᑕᐅᑉ ᒐᕙᒪᒃᑯᖏᑦ ᓴᖅᑮᓚᐅᕐᑎᓪᓗᒋᑦ 2023 ᐊᕐᕌᒍᖓᓂ ᑮᓇᐅᔭᓂᑦ ᐊᑐᕈᒫᕐᓂᐊᕐᑐᓂᑦ:
“ᐸᐅᒃᑑᑎᑦ ᖁᕕᐊᑉᐳᑦ ᒐᕙᒪᒃᑯᑦ ᑮᓇᐅᔭᓂᑦ ᐊᑐᕈᒫᕐᓂᐊᕐᑕᖏᓐᓂᑦ ᓴᖅᑮᓚᐅᕐᖓᑕ ᑕᒪᐃᓐᓅᖓᔪᓂᑦ ᐱᕚᓪᓕᕐᑎᑕᐅᖁᓪᓗᒋᑦ ᐊᕐᓇᐃᑦ ᐊᖑᑏᓪᓗ ᓇᓕᒧᒌᔾᔫᒥᔪᓂᑦ ᓯᕗᓪᓕᐅᔾᔭᐅᖁᔭᖏᓐᓄᑦ ᐃᑲᔫᑎᑦᓴᓂᑦ ᑭᓐᖒᒪᕙᑦᑕᖏᑦ ᑲᔪᓯᑎᑕᐅᖁᓪᓗᒋᑦ − ᐱᓗᐊᕐᑐᖅ ᐊᑐᖅᑕᐅᕙᓪᓕᐊᓂᖓ ᐊᕐᓇᐃᑦ ᐊᖑᑏᓪᓗ ᐃᓕᖅᑯᓯᖃᑎᒌᖏᑦᑐᑦ ᕿᒥᕐᕈᔭᐅᓂᖏᑦ (GBA Plus) ᐊᕐᓇᐅᔭᑦ ᐊᖑᑕᐅᔭᓪᓗ ᑕᑯᓐᓇᕐᑕᐅᕙᓐᓂᖏᑦ ᐊᒻᒪ ᐃᑲᔫᑕᐅᔪᓐᓇᕐᑐᓂᑦ ᐃᓅᖃᑎᒌᓄᑦ ᑐᓐᖓᕕᑦᓴᖏᓐᓂᑦ − ᖃᐅᔨᒪᑎᑦᓯᖃᑦᑕᓂᐊᕐᖓᑕ ᐃᓱᒪᓕᐅᕈᑕᐅᕙᓪᓕᐊᔪᓂᑦ ᐊᒻᒪ ᖃᐅᔨᒪᐃᓐᓇᕋᓱᐊᕐᓗᒋᑦ ᖃᓄᑎᒋ ᑲᔪᓯᑦᓯᐊᕐᑎᒋᕙᓪᓕᐊᒻᒪᖔᑦ ᐆᑦᑐᕋᐅᑕᐅᔪᓐᓇᕐᖓᑕ.
ᓄᑖᓂᑦ ᑮᓇᐅᔭᖃᒃᑲᐃᓂᖅ ᓄᓇᖃᖅᑳᖅᓯᒪᔪᓂ ᐋᓐᓂᐊᖅᑐᓕᕆᓂᖕᒧᑦ ᓯᕗᓪᓕᐅᑎᒋᐊᓕᓐᓄᑦ
“ᐸᐅᒃᑑᑎᑦ ᖁᕕᐊᑉᐳᑦ ᓄᑖᓂᑦ ᑮᓇᐅᔭᖃᒃᑲᐃᓂᐊᕐᓂᖏᓐᓂᑦ ᑲᑎᑦᑐᒋᑦ $2 ᐱᓕᔭᑦ ᐅᖓᑖᓂ ᐊᕐᕌᒍᑦ ᖁᓕᑦ ᐃᓗᐊᓂ ᐊᑐᖅᑕᐅᕙᓪᓕᐊᓂᐊᕐᑐᓂᑦ ‘ᓄᓇᖃᖅᑳᖅᓯᒪᔪᑦ ᐋᓐᓂᐊᕐᑐᓕᕆᓂᖕᒥ ᓯᕗᓪᓕᐅᑎᒍᒪᔭᖏᓐᓄᑦ’. ᐸᐅᒃᑑᑎᒃᑯᑦ ᖃᐅᔨᓇᓱᐊᕐᓂᐊᕐᑐᑦ ᓄᑖᑦ ᑮᓇᐅᔭᖅᑖᑦᓴᑦ ᐊᖏᖅᑕᐅᔪᓐᓇᕐᒪᖔᑕ ᐃᓄᑦᑎᑐᑦ ᐃᕐᓂᓱᒃᓰᔾᔪᓰᑦ ᐱᓐᖑᕐᑎᑕᐅᒃᑲᓐᓂᖁᓪᓗᒋᑦ ᓄᓇᓕᓕᒫᓂ ᐃᓄᐃᑦ ᓄᓇᖏᓐᓂ.
“ᐱᓗᐊᕐᑐᒥᖕ, ᐸᐅᒃᑑᑎᒃᑯᑦ ᕿᓂᕐᖓᑕ ᑮᓇᐅᔭᓂᑦ ᐃᓕᓐᓂᐊᕈᑎᑦᓴᓄᑦ ᐱᓕᒻᒪᑦᓴᐅᑎᑦᓴᓂᓪᓗ ᐃᓄᓐᓄᑦ ᐃᕐᓂᓱᒃᓰᔨᑖᕐᐸᓪᓕᐊᖁᓪᓗᑕ. ᓱᓕᒃᑲᓐᓂᖅ, ᓂᐱᒐᔭᐅᓗᑕ ᒫᓐᓇ ᐃᓄᐃᑦ ᐃᕐᓂᓱᒃᓰᔨᖏᓐᓄᑦ ᓴᓐᖓᑎᑉᐸᓪᓕᐊᖁᓪᓗᒋᑦ, ᐱᖃᓯᐅᑎᓗᒋᑦ ᓈᒻᒪᔾᔫᒥᔪᓂᑦ ᐊᑭᓕᕐᑐᖅᑕᐅᔪᓐᓇᖁᓪᓗᒋᑦ, ᐃᖅᑲᓇᐃᔭᕐᕕᖃᑦᓯᐊᓂᕐᓴᐅᓗᑎᑦ, ᐊᒻᒪ ᐃᓱᒪᑕᐅᔪᓐᓇᕐᓗᑎᑦ ᐅᖃᐅᔾᔨᒋᐊᕆᕙᓪᓗᑎᑦ ᐃᓅᓱᑦᑑᓂᕐᓴᓂᑦ ᐃᓄᑦᑎᑐᑦ ᐃᕐᓂᓱᒃᓰᔨᐅᔪᒪᒐᔭᕐᑐᓂᑦ.
“ᑕᐃᒫᖕ ᑮᓇᐅᔭᑦ ᐊᑐᖅᑕᐅᑉᐸᑕ ᐊᑦᓱᕈᓐᖏᓂᕐᓴᐅᖃᑦᑕᓕᕐᓂᐊᕐᑐᑦ ᐅᓗᕆᐊᓇᕐᑐᒦᓐᖏᓂᕐᓴᐅᓗᑎᓪᓗ ᐊᐅᓪᓚᖃᑦᑕᕆᐊᓖᑦ ᓄᓇᓕᐸᐅᔭᐅᓂᕐᓴᓄᑦ ᖃᓪᓗᓈᓄᑦ ᐃᕐᓂᔭᖅᑐᖅᑐᑎᑦ ᑕᐃᒪᐃᑉᐸᒻᒪᑕ ᐊᑐᖅᐸᑦᑕᖏᑦ ᒫᓐᓇ ᓇᔾᔨᔪᑦ ᐃᓚᖏᓪᓗ. ᓱᓕᒃᑲᓐᓂᖅ, ᐃᓕᖅᑯᓯᑐᖃᖅᑎᒍᑦ ᐅᓗᕆᐊᓇᓐᖏᑦᑐᒥ ᐃᕐᓂᓱᒃᓰᔨᖃᕐᓗᑎᑦ ᐃᑲᔫᑎᖃᓪᓚᕆᓐᓂᐊᕐᑐᖅ ᓄᓇᖅᑲᑎᒌᑦ ᑕᒪᐃᑦᓯᐊᖅ ᓴᓐᖓᑎᑉᐸᓪᓕᐊᒃᑲᓂᖁᓪᓗᒋᑦ.
ᑮᓇᐅᔭᖃᒃᑲᐃᓂᖏᑦ ᑲᓇᑕᒥ ᖃᓄᖅᑑᕈᑕᐅᓯᒪᔪᑦ ᐸᕐᓇᐅᑏᑦ ᐊᑐᓕᕐᑎᑕᐅᔾᔪᑎᑦᓴᖏᓄᑦ ᓇᓂᔭᐅᓚᐅᕐᓯᒪᓐᖏᑦᑐᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᓂᕕᐊᖅᓯᐊᓪᓗ ᐃᓱᓕᑉᐸᓪᓕᐊᖁᓪᓗᒍ
“ᐸᐅᒃᑑᑎᑦ ᖁᕕᐊᑉᐳᑦ ᓱᒃᑲᑦᑎᒋᐊᕐᑕᐅᓂᖓᓂᑦ ᐊᑐᓕᕐᑎᑕᐅᕙᓪᓕᐊᓂᖏᑕ ᒐᕙᒪᑐᖃᒃᑯᑦ ᐊᖅᑯᑎᒋᓂᐊᕐᑕᖏᑦ ᖃᓄᖅᑑᕈᑕᐅᖁᓪᓗᒋᑦ ᓇᓂᔭᐅᓚᐅᕐᓯᒪᓐᖏᑦᑐᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪ ᖃᐃᕋᔪᐊᑦᑐᑦ ᒪᓃᓗᑭᓵᓪᓗ ᐊᕐᓇᐅᔭᐃᑦ ᐊᖑᑕᐅᔭᓪᓗ ᐃᓄᐃᑦ (2SLGBTQQIA+), ᐱᓗᐊᖅᑐᒥᖕ ᓵᑕᐅᔪᑦᓴᐅᓂᖏᓐᓄᑦ ᑭᐅᖃᑦᑕᕆᐊᖃᕐᖓᑕ ᓴᖅᑮᔮᑦᓯᐊᕐᓗᑎᑦ ᓇᓂᓯᕙᓪᓕᐊᒻᒪᖔᕐᒥ.
“ᐱᓗᐊᕐᑐᒥᖕ, ᑲᔪᖏᕐᓇᕐᑐᖅ ᓄᑖᓂᑦ ᑮᓇᐅᔭᖃᒃᑲᐃᓂᐊᕐᖓᑕ ᓇᐅᑦᓯᕐᑐᕈᑎᑦᓴᓂᑦ ᐅᓂᒃᑳᓕᐅᕐᐸᓪᓕᐊᓗᑎᓪᓗ ᖃᓄᑎᒋ ᐱᕙᓪᓕᐊᒻᒪᖔᑕ ᖃᓄᖅᑑᕈᑕᐅᕙᓪᓕᐊᓂᖏᓐᓂ ᑲᓇᑕᒥ ᖃᐅᔨᓴᕐᑕᐅᓂᖏᑦ ᓄᓇᖃᖅᑳᕐᓯᒪᔪᑦ ᓇᓂᔭᐅᓯᒪᓐᖏᑦᑐᑦ ᐃᓄᐊᖅᑕᐅᓯᒪᔪᓪᓗ ᒪᓕᒐᓕᕆᔨᒃᑯᓐᓄᑦ ᖃᓄᐃᓕᔭᐅᕙᓪᓕᐊᒻᒪᖔᑕ, ᐱᖃᓯᐅᔾᔭᐅᓯᒪᒻᒪᑕ ᑖᒃᑯᓄᖓ 46 ᐃᓄᓐᓄᑦ ᑐᕌᖓᓗᐊᓐᖑᐊᕐᑐᑦ ᐊᑐᓕᖁᔨᔾᔪᑕᐅᓯᒪᔪᑦ.
“ᖃᐅᔨᓴᕐᑕᐅᓚᐅᕐᑐᑦ ᐅᓂᒃᑳᖏᓐᓂ 2019ᓕᓴᓂᑦ ᐊᑦᓱᐊᓗᖕ ᐱᕙᓪᓕᐊᓇᓱᓐᓂᖏᑦ ᓱᒃᑲᐃᑦᑑᓯᒪᒻᒪᑕ. ᓂᕆᐅᑦᑐᒍᑦ, ᓄᑖᑦ ᖃᐅᔨᓴᕈᑕᐅᓂᐊᕐᑐᑦ ᐃᒻᒪᖃ ᑲᔪᖏᒃᑲᓐᓂᕈᑕᐅᓂᐊᕐᑐᑦ ᓇᐅᒃᑯᓕᒫᖅ ᒐᕙᒪᓄᑦ, ᒪᓕᒐᓕᕆᔨᒃᑯᑎᒍᑦ ᐃᖅᑲᖅᑐᐃᕕᓄᑦ, ᐊᓯᖏᓐᓄᓪᓗ ᑲᒪᖃᑕᐅᕙᑦᑐᓄᑦ ᑲᔪᓯᑎᑕᐅᖁᓪᓗᒋᑦ ᑮᓇᐅᔭᑦ ᐊᑐᕋᑦᓴᑦ ᑲᔪᓯᑎᑕᐅᒋᐊᓖᓪᓗ ᒫᓐᓇᑦᓴᐅᑎᒋᓪᓚᕆᒃ ᑲᔪᓯᖁᔭᐅᔪᑦ.
“ᓱᓕᒃᑲᓐᓂᖅ, ᐸᐅᒃᑑᑎᒃᑯᑦ ᐃᑲᔪᕐᑐᐃᓪᓚᕆᑦᑐᑦ ᓄᑖᒥᖕ ᐱᓐᖑᑎᑦᓯᓂᐅᓴᒻᒪᑕ ᓄᓇᖃᖅᑳᕐᓯᒪᔪᑦ ᐃᓄᓕᒫᓪᓗ ᐱᔪᓐᓇᐅᑎᖏᓐᓄᑦ ᑕᑎᒋᔭᐅᓂᐊᕐᑐᒥᑦ, ᐊᒻᒪ ᖁᕕᐊᑉᐳᑦ ᑮᓇᐅᔭᓂᑦ ᓴᓂᕐᕙᐃᓯᒪᒻᒪᑕ ᐊᑐᕈᒫᕐᓂᐊᕐᑐᓂᑦ 2023 ᐊᕐᕌᒍᖓᓂ ᑕᒪᑐᒧᖓ ᐱᒻᒪᕆᐊᓗᒻᒧᑦ ᐱᒋᐊᕈᑎᑦᓴᓂᑦ.
“ᑐᑦᓯᕌᖑᓯᒪᔪᑦ ᑮᓇᐅᔭᑦ ᐱᕚᓪᓕᕈᑕᐅᓂᐊᕐᖓᑕ ᓇᓕᒧᒌᔾᔪᒥᔪᒥᑦ ᐊᑐᐃᓐᓇᖃᕐᔫᒥᓗᑎᓪᓗ ᒪᓕᒐᓕᕆᔨᓂᑦ, ᐱᓂᕐᓗᑦᑕᐅᕙᑦᑐᑦ ᐃᓚᒌᑦ ᐱᔨᑦᓯᕐᑕᐅᑦᓯᐊᕐᔫᒥᓗᑎᑦ, ᐊᒻᒪ ᐃᑲᔪᕐᑕᐅᓗᑎᑦ ᐃᓄᓐᓂᑦ ᓯᕗᓕᕐᑎᓖᑦ ᐃᑲᔫᑕᐅᔪᒫᕐᓂᐊᕐᑐᑦ ᓄᓇᖅᑲᑎᒥᓂᖕ ᑲᔪᖏᖅᓱᐃᔾᔪᑕᐅᓂᐊᕐᖓᑕ ᑲᑉᐱᐊᓇᕐᑐᒦᒋᐊᖃᓐᖏᓂᑦᑎᓂᑦ. ᐸᐅᒃᑑᑎᑦ ᐸᑦᑕᖅᑐᖅᑐᑦ ᐆᑦᑐᕈᒪᓂᖏᓐᓂᑦ ᓴᖅᑮᓗᑎᑦ “ᐊᐅᐸᖅᑐᒥᑦ ᐊᑕᔪᕐᒥᑦ ᖃᐅᔨᒃᑲᕐᓵᕆᔾᔪᑎᒥᑦ” ᑕᕝᕙᑦᓴᐅᑎᒋ ᑭᒃᑯᑐᐃᓐᓇᕐᓄᑦ ᐃᓕᑕᕆᔭᐅᔪᓐᓇᕐᓯᓂᐊᕐᖓᑦ ᓄᓇᖃᖅᑳᖅᓯᒪᔪᖅ ᐊᕐᓇᐃᑦ ᐅᕝᕙᓘᓐᓃᑦ ᖃᐃᕋᔪᐊᑦᑐᑦ ᒪᓃᓗᑭᓵᓪᓘᓐᓃᑦ ᔭᒐᒐᐃᑉᐸᑕ ᓇᓂᔭᐅᔪᓐᓇᐃᓕᓗᑎᑦ ᖃᐅᔨᒪᔾᔪᑕᐅᓂᐊᕐᑐᒥᑦ.
ᕿᒫᕖᑦ ᐊᒻᒪ ᐃᓪᓗᒋᔭᐅᑲᐃᓐᓇᐸᑦᑐᑦ ᒪᑭᓐᓇᓱᐊᕐᓂᖏᓐᓂ
“ᐊᕐᕌᒍᑦᑎᓂ ᑮᓇᐅᔭᑦ ᐊᑐᕈᒫᕐᓂᐊᕐᑐᑦ ᓇᓗᓇᐃᕐᓯᓯᒪᓪᓚᑦᑖᓐᖏᒃᑲᓗᐊᕐᑐᑎᑦ ᐊᑐᕐᓂᐊᕐᑐᓂᑦ ᖁᓕᓂᑦ ᐱᖓᓱᓂᓪᓗ (13) ᐃᓪᓗᓕᐅᕈᑎᑦᓴᓂᑦ ᓄᑖᓂᑦ ᑐᐊᕕᕐᓇᕐᑐᒃᑯᑦ ᕿᒫᕕᓐᓂᑦ ᐊᒻᒪ ᖁᓕᓂᑦ ᑕᓪᓕᒪᓂᓪᓗ (15) ᐃᓪᓗᒋᔭᐅᑲᐃᓐᓇᑐᑦᓴᓂᑦ ᒪᑭᓐᓇᓱᐊᕐᓂᖏᓐᓂ, ᐸᐅᒃᑑᑎᒃᑯᑦ ᖁᕕᐊᑉᐳᑦ ᑐᓴᖅᑎᑦᓯᓚᐅᕐᖓᑕ ᑕᖅᑭᕆᓚᐅᕐᑕᑎᓐᓂ ᓯᕗᓪᓕᕐᐹᓂᑦ ᑎᓴᒪᓂᑦ ᐃᓪᓗᓕᐊᖑᕙᓪᓕᐊᓂᐊᕐᑐᓂᑦ.
“ᓂᕆᐅᑦᓯᐊᕐᑐᒍᑦ ᓱᒃᑲᓂᕐᓴᒃᑯᑦ ᐃᖅᑲᓇᐃᔮᖑᕙᓪᓕᐊᓂᖏᓐᓂᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪ ᐃᓄᓐᓄᑦ ᑲᑐᔾᔨᖃᑎᑦᑎᓐᓄᑦ ᑐᐊᕕᕐᓇᓪᓚᕆᑦᑐᑦ ᐱᒋᐊᕐᑕᐅᔪᒪᓂᖏᓐᓂᑦ, ᑐᕌᒐᖃᕐᓗᑕ ᐊᓯᒃᑲᓐᓂᖏᑦ ᐱᔭᑦᓴᕗᑦ ᐊᖏᖅᑕᐅᔪᓐᓇᕐᓯᖁᓪᓗᒋᑦ ᐊᕐᕌᒎᓂᐊᕐᑐᒥ ᑮᓇᐅᔭᕐᑐᕈᑎᑦᓴᓂ.”
ᐸᐅᒃᑑᑎᑦ ᐃᓄᐃᑦ ᐊᕐᖕᓇᐃᑦ ᑲᓇᑕᒥ ᑲᓇᑕᒥ ᑮᓇᐅᔭᓕᐅᕋᓱᑐᐃᓐᓇᕋᑎᖕ ᑭᒡᒐᕐᑐᐃᔩᑦ ᐃᓄᓐᓂᑦ ᐊᕐᖕᓇᓂᑦ ᑲᓇᑕᒥ. ᑎᓕᔭᐅᓯᒪᔪᑦ ᐅᔾᔨᕈᓱᓕᖅᑎᑦᓯᕙᓪᓕᐊᖁᓪᓗᒋᑦ ᐃᓄᐃᑦ ᐊᕐᖕᓇᐃᑦ ᑭᓐᖒᒪᔭᖏᓐᓂᑦ, ᐊᒻᒪ ᐃᓚᒋᔭᐅᑎᑦᓯᓯᐊᕐᓂᖕᒥᑦ ᓄᓇᖅᑲᑎᖏᓐᓄᑦ, ᐊᒡᒍᑐᖅᓯᒪᔪᓄᑦ ᑲᓇᑕᒥᓗ ᐃᓱᒫᓗᒋᔭᐅᕙᑦᑐᓂᑦ ᐃᓄᓕᕆᓂᖕᒧᑦ, ᐃᓕᖅᑯᓯᓕᕆᓂᖕᒧᑦ ᐊᒻᒪ ᒪᑭᓇᓱᐊᕐᓂᖕᒥᑦ ᐱᕙᓪᓕᐊᓂᒃᑯᑦ.
ᑐᓴᐅᑎᓕᕆᔩᑦ ᐱᕙᓪᓕᐊᔪᓂᑦ
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕈᓐᓇᕐᑐᑎᑦ ᐸᐅᒃᑑᑎᒃᑯᑦ ᑐᓴᐅᑎᓕᕆᔨᖏᓐᓄᑦ ᐅᕗᖓ 343.804.0386, ᐅᕝᕙᓘᓐᓃᑦ ᐃᕐᖕᓃᓐᓈᕈᑎᒃᑯᑦ ᐅᕗᖓ communications@pauktuutit.ca